Local news

ගිනි අවියක් සන්තකයේ තබාගැනීම දඩුවම් ලැබිය හැකි වරදක් බව ආරක්ෂක අමාත්‍යංශය සඳහන් කරයි.

ගිනිඅවි සඳහා බලපත්‍ර හිමි පුද්ගලයින්/ ආයතන 2027 වර්ෂය වෙනුවෙන් සිය ගිනි අවි (තුවක්කු) බලපත්‍ර අලුත් කිරීම 2026.09.01 දින සිට 2026.12.31 දින දක්වා පමණක් සිදු කරන බැවින්, 2026.12.31 වන දිනට ප්‍රථම බලපත්‍ර අලුත්කර ගැනීම සිදු කල යුතුය.

එදිනට බලපත්‍ර අලුත් නොකරන සියලු ගිනි අවි හිමිකරුවන් සඳහා තුවක්කු ආඥාපනතේ 22 වගන්තියේ විධිවිධාන අනුව වලංගු බලපත්‍රයක් රහිතව ගිනි අවියක් සන්තකයේ තබාගැනීම දඩුවම් ලැබිය හැකි වරදකි.

2027/2028 වර්ෂ සඳහා පෞද්ගලික ආරක්‍ෂක නියෝජ්‍යායතන ලියාපදිංචිය අලුත් කිරීම 2026.09.01 සිට 2026.12.31 දින දක්වා සිදුකෙරෙන අතර ඉන්පසු සිදුකරන අලුත් කිරීම් සඳහා ප්‍රමාද ගාස්තු අය කිරීමට හෝ නීතිමය ක්‍රියාමාර්ග ගැනීමට කටයුතු කරයි.

හිටපු ජනාධිපති මහින්ද රාජපක්ෂගේ පුත් යෝෂිත රාජපක්ෂ සහ ඔහුගේ මිත්තණිය වන ඩේසි ෆොරස්ට්ට එරෙහිව නීතිපතිවරයා විසින් ගොනුකර තිබෙන නඩුව අද (31) දින කොළඹ මහාධිකරණ විනිසුරු රශ්මි සිංගප්පුලි ඉදිරියේ කැඳවනු ලැබීය.

එහිදී රජයේ නීතිඥවරයා අධිකරණයට දැනුම් දුන්නේ මෙම නඩුකරයට සම්බන්ධ කරුණකට අදාළව විත්තිකරු විසින් ශ්‍රේෂ්ඨාධිකරණයට අභියාචනයක් ඉදිරිපත් කර ඇති බවත් එය සැප්තැම්බර් මස (04) වනදා සලකා බැලීමට නියමිතව තිබෙන බවයි.

අනතුරුව ඉදිරිපත් වූ කරුණු සලකා බැලූ විනිසුරුවරයා මෙම නඩුව නැවත සැප්තැම්බර් මස (28) වනදා කැඳවන ලෙස නියෝග කළේය.

අයතා ලෙස උපයා ගත් රුපියල් මිලියන 57කට ආසන්න මුදලක් බැංකු ගිණුම් තුනක තැන්පත් කිරීම තුළින් මුදල් විශුද්ධීකරණය වැළැක්වීමේ පනත යටතේ වරදක් සිදුකළ බවට චෝදනා කරමින් යෝෂිත රාජපක්ෂ සහ ඩේසි ෆොරස්ට් යන අයට එරෙහිව නීතිපතිවරයා විසින් මෙම නඩුව ගොනුකර ඇත.

ඔක්ටේන් 92 පෙට්‍රල් ලීටරයක මිල රුපියල් 15කින් අඩු කිරීම මත, ත්‍රීරෝද රථ ගාස්තු සම්බන්ධයෙන් ජාතික ඒකාබද්ධ ත්‍රීරෝද රථ රියදුරන්ගේ හා කර්මාන්තකරුවන්ගේ සංගමය ප්‍රකාශයක් කර ඇත.

ඒ අනුව ඉන්ධන මිල අඩු කළද, ත්‍රීරෝද රථ ගාස්තුවල කිසිදු සංශෝධනයක් සිදු නොවන බව එම සංගමයේ ප්‍රධාන ලේකම් එල්. රෝහණ පෙරේරා සඳහන් කරයි.

එම සංගමයේ ප්‍රධාන ලේකම් එල්. රෝහණ පෙරේරා සඳහන් කළේ,

“අපිට කියන්න තියෙන්නේ, පැරණි මිලම තමයි අපිට පාවිච්චි කරන්න වෙන්නේ. නීත්‍යානුකූල මිලක් එනකං. ඒ කියන්නේ පළවෙනි කිලෝමීටරයේ 110ක්, දෙවෙනි කිලෝමීටරයේ රුපියල් 90ක් කියන සීමාව තුළ තමයි අපිට ඉන්න වෙන්නේ.

නමුත් මහා මාර්ගයේදී සාමාන්‍ය ත්‍රිරෝදරථ භාවිතාවේදී, ඒ මිල ගණන්වලට නෙමෙයි, රුපියල් 110,120 ආදී වශයෙන් තමයි මිල අය කරන්නේ. නමුත් එතනදී තාම නීතියක් විදියට මේක ක්‍රියාත්මක වෙන්නේ නැති නිසා තමයි ඔය තත්වයටම පත් වෙලා තියෙන්නේ.

අපි බලාපොරොත්තු වෙනවා ඉතාමත් ඉක්මනින් මේ අදාළ නියාමනය යටතේ මේ මිල ගණන් එයි කියලා.“

ඊයේ (30) මධ්‍යම රාත්‍රියේ සිට ඉන්ධන මිල ගණන් අඩු කිරීමට ලංකා ඛනිජ තෙල් නීතිගත සංස්ථාව පියවර ගත්තේය.

ඒ අනුව ලංකා ඉන්දියන් ඔයිල් සමාගම විසින් ඔක්ටේන් 92 පෙට්‍රල් ලීටරයක මිල රුපියල් 15කින් අඩුකර ඇති අතර එහි නව මිල රුපියල් 399කි.

ඔක්ටේන් 95 පෙට්‍රල් ලීටරයක මිල රුපියල් 20කින් අඩුකර ඇති අතර එහි නව මිල රුපියල් 475කි.

ඩීසල් සහ භූමිතෙල් මිල ගණන් සංශෝධනය නොකිරීමට ලංකා ඉන්දියන් ඔයිල් සමාගම පියවර ගෙන ඇත.

ශ්‍රී ලංකා ක්‍රිකට් ක්‍රීඩකයින්ගෙන් පුද්ගලික අත්තිකාරම් බදු අය කිරීමට අදාළව දේශීය ආදායම් කොමසාරිස් ජෙනරාල්වරයා ගෙන තිබෙන තීරණය බල රහිත කරමින් අභියාචනාධිකරණ රිට් ආඥාවක් නිකුත් කර ඇත.

ශ්‍රී ලංකා එක්දින හා ටෙස්ට් ක්‍රිකට් කණ්ඩායම් වල ක්‍රිකට් ක්‍රීඩිකාවන් පිරිසක් විසින් ඉදිරිපත් කළ පෙත්සම්වල තීන්දුව ප්‍රකාශයට පත් කරමින් විනිසුරු මඩුල්ල මෙම නියෝගය නිකුත් කර ඇත.

එහෙත්, මෙම කරුණ සම්බන්ධයෙන් දේශීය ආදායම් කොමසාරිස්  විසින් ඉදිරියේදී ගනු ලැබුණු තීරණ වලට අගතියක් නොවන පරිදි මෙම නියෝග නිකුත් කරන බවද විනිසුරු මඩුල්ල සඳහන් කර ඇත.

අද (31) දින ලෝක වෙළෙඳපොළේ බොරතෙල් මිල ගණන් නැවතත් ඉහළ⁣ ගොස් ඇත.

ඒ අනුව WTI බොරතෙල් බැරලයක මිල අමෙරිකානු ඩොලර් 85.60ක් ලෙස ඉහළ ගොස් ඇත.

BRENT බොරතෙල් බැරලයක මිල අමෙරිකානු ඩොලර් 90.50ක් ලෙස ඉහළ ගොස් ඇත.

MURBAN බොරතෙල් බැරලයක මිල ඩොලර් 95.75ක් ලෙස ඉහළ ගොස් ඇත.

වත්මන් ආණ්ඩුව එළවන්න විපක්ෂයේ සිටින සියලුම නයි, මුගට්, පොළොන්ගු ඔක්කොම එකතු විය යුතු බව පාර්ලිමේන්තු මන්ත්‍රී චාමර සම්පත් දසනායක සඳහන් කරයි.

කැරුම් බෝඩ් බෙදීම සඳහා සියල්ල සිදු කළ පුද්ගලයා අමෙරිකාවේ සිටින බවත් කැරම් බෝඩ් බෙදපු මහින්දානන්ද අලුත්ගමගේ බන්ධනාගාරයේ බව මන්ත්‍රී චාමර සම්පත් දසනායක සඳහන් කරයි.

මන්ත්‍රී චාමර සම්පත් දසනායක සඳහන් කළේ,

“මේ ආණ්ඩුව එළවන්න හැම විපක්ෂයේ ඉන්න නයි මුගට් පොළොන්ගු ඔක්කොම එකතු වෙන්න ඕන කියන එක මම මේ අවස්තාවේදි කියනවා. තරුණ දේශපාලඥයෝ මුන්ට බයේ හැංගෙනවා. නඩු දායි කියලා හැංගෙනවා.

සමහර දිස්ත්‍රික්ක වලට නායකත්වය දෙන එවුන් හැංගෙනවා. ⁣වේදිකා වලට එන්නෑ හැංගෙනවා. රැස්වීමක කතා කරන්නේ නෑ හැංගෙනවා. කවුද දැන් ඇතුලේ ඉන්නේ.

ඇතුලේ ඉන්න මිනිස්සූ එළියේ ඉන්න ඕන මිනිස්සූ. එළියේ ඉන්න මිනිස්සූ ඇතුලේ ඉන්නවා. එළියේ ඉන්න මිනිස්සූ ඇතුලේ ඉන්නවා. කවුද කැරම් බෝඩ් බෙදුවේ. කැරම් බෝඩ් බෙදුවට කැරුම් බෝඩ් ඔක්කොම කරපු මිනිහා අමෙරිකාවේ. අලුත්ගමගේ ඇතුලේ.“

ජාතික ලොතරැයි මණ්ඩලයේ විශේෂ ව්‍යාපෘතියක් සඳහා බඳවාගත් සේවකයින් තිදෙනෙකු දේශපාලන කටයුතු වලට යොදවා රජයට පාඩු සිදුකළ බව කියන සිද්ධියක් සම්බන්ධයෙන් පාර්ලිමේන්තු මන්ත්‍රී රවී කරුණානායකට එරෙහිව විමර්ශනයක් සිදු කරයි.

එම විමර්ශනයට අදාළව ප්‍රකාශයක් ලබාගැනීම සඳහා අල්ලස් කොමිසම හමුවේ පෙනී සිටින ලෙසට රවී කරුණානායකට දින තුනකදී දැනුම් දී තිබුණ ද ඔහු එම කොමිසම හමුවට පැමිණියේ නැත.

ඒ හේතුවෙන් අල්ලස් කොමිසමේ නිලධාරීන් පිරිසක් පසුගියදා රවී කරුණානායකගේ නිවස වෙත ගොස් තිබුණු අතර එම අවස්ථාවේදී ද ඔහු නිවසේ නොසිටියේය.

ඒ අනුව පාර්ලිමේන්තු මන්ත්‍රී රවී කරුණානායක අද (31) දිනයේ අල්ලස් කොමිසම හමුවේ පෙනී සිටීමට නියමිත බව ඔහුගේ නීතිඥවරුන් සඳහන් කර ඇත.