Local news

අධ්‍යයන පොදු සහතික පත්‍ර සාමාන්‍ය පෙළ විභාගයේ ප්‍රතිඵල නිකුත් කිරීම ගැන විභාග දෙපාර්තමේන්තුව දැනුම්දීමක් කර ඇත.

2025 අධ්‍යයන පොදු සහතික පත්‍ර සාමාන්‍ය පෙළ විභාගයේ  ප්‍රතිඵල ජුනි මස මැද වන විට නිකුත් කිරීමට අපේක්ෂා කරන බව විභාග දෙපාර්තමේන්තුව සඳහන් කරයි.

කෙසේ වෙතත් සාමාන්‍ය පෙළ විභාගයේ ප්‍රතිඵල නිකුත් කෙරෙන නිශ්චිත දිනයක් මෙතෙක් ප්‍රකාශයට පත් කළ නොහැකි බව විභාග කොමසාරිස් ජනරාල් ඉන්දිකා කුමාරි ලියනගේ සඳහන් කළාය.

කෙසේ වෙතත් ජුනි මස මැද වන විට සාමාන්‍ය පෙළ විභාගයේ ප්‍රතිඵල නිකුත් කිරීමට සැලසුම් කර ඇති බවද විභාග කොමසාරිස් ජනරාල් ඉන්දිකා කුමාරි ලියනගේ සඳහන් කළාය.

හිටපු පාර්ලිමේන්තු මන්ත්‍රී විමල් වීරවංශ අත්අඩංගුවට ගෙන ඇත.

පසුගියදා රණවිරු සැමරුම් පෙරහුරුවට බාධා කිරීමේ චෝදනාව සම්බන්ධයෙන් ප්‍රකාශයක් ලබාදීම සඳහා තලංගම පොලිසියට පැමිණි හිටපු පාර්ලිමේන්තු මන්ත්‍රී විමල් වීරවංශ අත්අඩංගුවට ගෙන ඇත.

එම සිදුවීමට අදාළව අද (25) දින ප්‍රකාශයක් ලබාගැනීම සඳහා විමල් වීරවංශට තලංගම පොලිසිය වෙත පැමිණෙන ලෙස දැනුම්දීමක් කර තිබුණේය.

මෙරටට පැමිණෙන රටවල් 40ක පිරිස් සඳහා දින 30ක කාලයක් සඳහා පිරිනමන නොමිලේ සංචාරක වීසා පහසුකම අද (25) දිනයේ සිට ක්‍රියාත්මක වේ.

ඔස්ට්‍රේලියාව, ප්‍රංශය, ඔස්ට්‍රියාව, මැලේසියාව, සෞදි අරාබිය, ජර්මනිය, නේපාලය, දකුණු කොරියාව, බහරේන්, ඉන්දියාව, නෙදර්ලන්තය, ස්පාඥ්ඥය, බෙලාරුස්, ඉන්දුනීසියාව, නවසීලන්තය, ස්වීඩනය, බෙල්ජියම, කැනඩාව, චීනය, චෙක් ජනරජය, ඩෙන්මාර්කය, ෆින්ලන්තය, ඉරානය, ඊශ්‍රායලය, ඉතාලිය, ජපානය, කසකස්තානය, කුවේට්, නෝර්වේ, ඕමානය, පකිස්තානය, පෝලන්තය, කටාර්, රුසියාව, ස්විට්සර්ලන්තය, තායිලන්තය, තුර්කිය, එක්සත් අරාබි එමීර් රාජ්‍යය, එක්සත් රාජධානිය, අමෙරිකා එක්සත් ජනපද යන රටවල ජාතිකයින්ට මෙම පහසුකම හිමිවනු ඇත.

රාජ්‍ය තාන්ත්‍රික, නිල, සේවා හෝ සාමාන්‍ය ගමන් බලපත්‍ර ඇති ඉහත සඳහන් රටවල ජාතිකයින්ට මෙම යෝජනා ක්‍රමය යටතේ නොමිලේ සංචාරක වීසා ලබා ගැනීමට සුදුසුකම් හිමිවන බව ආගමන විගමන දෙපාර්තමේන්තුව සඳහන් කරයි.

ඉහත සඳහන් රටවල් 40 හි ජාතිකයින් සහ මෙරට සමග ද්විපාර්ශ්වික අන්‍යෝන්‍ය ගිවිසුම් ඇති ජාතිකයින් එනම් මාලදිවයින, සීශෙල්ස් සහ සිංගප්පූරුව ඇතුළු සියලුම විදේශීය ජාතිකයින් ශ්‍රී ලංකාවට පැමිණිමට පෙර විද්‍යුත් සංචාරක අවසරයක් (ETA) ලබා ගත යුතු බවද එම දෙපාර්තමේන්තුව සඳහන් කරයි.

ශ්‍රී ලංකාව සහ මාලදිවයින අතර ද්විපාර්ශ්වික අන්‍යෝන්‍ය ගිවිසුම අනුව මාලදිවයින් ජාතිකයින්ට පෙර  විද්‍යුත් සංචාරක අවසරය හරහා දින 90ක සංචාරක වීසා බලපත්‍රයක් ලැබෙනු ඇත.

ඉහත රටවල් 40හී ජාතිකයින් සඳහා සහ මාලදිවයින, සීෂෙල්ස් සහ සිංගප්පූරු ජාතිකයින් සඳහා ඉලෙක්ට්‍රොනික සංචාරක අවසර පත්‍රය නොමිලේ සකසනු ඇති බවද සඳහන් කර ඇත.

රජයේ රෝහල් පද්ධතියේ මෙතෙක් පැවති ගැබ්ගෙල පිළිකා සොයා ගැනීමට භාවිත කරන කොල්පොස්කොපි (Colposcopy) යන්ත්‍ර 15 ක ප්‍රමාණය, මේ වසරේ අලුතින් එක් කෙරෙන යන්ත්‍ර 18 ත් සමඟ 33 දක්වා ඉහළ නැංවීමට සෞඛ්‍ය හා ජනමාධ්‍ය අමාත්‍යාංශය පියවර ගෙන ඇත.

රුපියල් මිලියන 114 ක මූල්‍ය ප්‍රතිපාදන වැය කරමින් සිදුකරන මෙම ව්‍යාපෘතිය හරහා මෙරට කාන්තාවන්ට වැළඳෙන පිළිකා අතර පස්වන ස්ථානයේ පසුවන ගැබ්ගෙල පිළිකා කලින් හඳුනාගෙන, සමස්ත දිවයිනම ආවරණය වන පරිදි ප්‍රතිකාර සේවාවන් කාර්යක්ෂම කිරීම අමාත්‍යාංශයේ මූලික අරමුණයි.

​ඒ අනුව, එක් යන්ත්‍රයක් රුපියල් ලක්ෂ 60 බැගින් වන අති නවීන කොල්පොස්කොපි යන්ත්‍ර 12ක් මේ වනවිටත් අනුරාධපුර, බදුල්ල, මඩකලපුව, යාපනය, කුරුණෑගල, ද සොයිසා කාන්තා රෝහල, මහනුවර, ගම්පහ, මාතර, මොණරාගල, පුත්තලම සහ හම්බන්තොට යන දිස්ත්‍රික්කයන්හි ප්‍රධාන රෝහල්වල ස්ථාපිත කර අවසන්ය.

එළඹෙන ජුනි මාසය වන විට තවත් යන්ත්‍ර 06ක් අම්පාර, රාගම, කළුතර, කුලියාපිටිය, මාතලේ සහ වව්නියාව යන ශික්ෂණ හා දිස්ත්‍රික් මහ රෝහල්වල ස්ථාපිත කිරීමට සැලසුම් කර ඇති අතර කලින් පැවති පැරණිම යන්ත්‍ර 5ක් වෙනුවට නව යන්ත්‍ර 5ක් ප්‍රතිස්ථාපනය කිරීමට ද කටයුතු කර ඇත.

​ජාතික පිළිකා මර්දන වැඩසටහනේ දත්තවලට අනුව මෙරටින් වසරකට නව ගැබ්ගෙල පිළිකා රෝගීන් 1200ක් පමණ හඳුනාගන්නා අතර, නිසි ප්‍රතිකාර නොලැබීමෙන් වසරකට සිදුවන මරණ සංඛ්‍යාව 180කි.

මානව පැපිලෝමා වයිරසය (HPV) මඟින් වැළඳෙන මෙම පිළිකාව, පූර්ව පිළිකා අවධියේදීම කොල්පොස්කොප් වැනි විශේෂිත විශාලන උපකරණ මඟින් අසාමාන්‍ය සෛල හඳුනා ගැනීමෙන් සම්පූර්ණයෙන්ම වළක්වා ගත හැකිය.

යාපනයේ සිවලෝගනාදන් විද්‍යා නම් දැරිය දූෂණය කර මරා දැමීමේ චෝදනාව සම්බන්ධව මරණ දඬුවම නියම වී රක්ෂිත බන්ධනාගාර ගතව සිටි සැකකරුවෙකු සියදිවි නසාගෙන ඇතැයි වාර්තා වේ.

සියදිවි නසාගෙන ඇත්තේ පූබාලසිංහම් ජෙයකුමාර් නම් 46 හැවිරිදි අයෙක් වන අතර ඔහු යාපනය බන්ධනාගාරයේ රඳවා තිබූ අතර ඊයේ (24) රාත්‍රියේ සියදිවි නසාගෙන ඇතැයි බන්ධනාගාර දෙපාර්තමේන්තුව සඳහන් කරයි.

2015 වසරේ මහත් ආන්දෝලනයකට තුඩු දුන් මෙම සිද්ධිය සම්බන්ධයෙන් ත්‍රිපුද්ගල මහාධිකරණ විනිසුරු මඩුල්ලක් විසින් ස්වීස් කුමාර් ඇතුළු විත්තිකරුවන් හතරදෙනෙකුට පනවනු ලැබූ මරණීය දණ්ඩනය ශ්‍රේෂ්ඨාධිකරණය විසින් මැයි (06) වැනිදා යළිත් තහවුරු කළේය. 

අදාළ දඬුවමින් තමන්ම නිදොස් කොට නිදහස් කරන ලෙස ඉල්ලා එම විත්තිකරුවන් විසින් ඉදිරිපත් කළ අභියාචනා විභාග කොට නිෂ්ප්‍රභ කරමින් අගවිනිසුරු ප්‍රීති පද්මන් සූරසේන ප්‍රමුඛ පංච පුද්ගල ශ්‍රේෂ්ඨාධිකරණ විනිසුරු මඩුල්ලක් විසින් එම තීන්දුව ලබාදී තිබුණි.

අද (25) දිනයේ සිට රන් භාණ්ඩ ඇපයට තබා ගන්නා උකස් ණය සහ වාහන සඳහා ලබාදෙන ණය වලට අදාළ රෙගුලාසි දැඩි කර ඇතැයි ශ්‍රී ලංකා මහ බැංකුව සඳහන් කරයි.

ඒ අනුව රන් භාණ්ඩ ඇපයට තබා ලබා ගත හැකි උපරිම ණය සීමාව, එහි වටිනාකමෙන් 70%ක් බව ශ්‍රී ලංකා මහ බැංකුව සඳහන් කරයි.

නව රෙගුලාසිවලට අනුව වාහනයක් මිලදී ගැනීමේදී ලබා ගත හැකි උපරිම ණය සීමාව, 10% කින් අඩුකර ඇතැයි ශ්‍රී ලංකා මහ බැංකුව සඳහන් කරයි.

ඒ අනූව වාණිජ වාහන සඳහා ලබාදෙන ණය ප්‍රතිශතය, වටිනාකමෙන් 60%ක් වන අතර පෞද්ගලික වාහන සදහා වටිනාකමින් 40%ක ණය මුදලක් ලබාදෙයි.

මෙතෙක් වාණිජ වාහනයක් සඳහා වටිනාකමින් 70%ක්ද, පෞද්ගලික වාහනයක් සඳහා වටිනාකමින් 50% ක් ලබාදුන් අතර නව නීති, අද (25) සිට සහ අදින් පසු අලුත් කරන පෙර ලබාගත් ණය සඳහා ද, ක්‍රියාත්මකයි.

එලෙස නව නීති හඳුන්වාදී ඇත්තේ, බැංකු සහ මූල්‍ය සමාගම් මඟින් වඩාත් සැළකිලිමත්ව ණය ලබාදීම දිරිමත් කිරීම සහ මූල්‍ය පද්ධතියේ ස්ථාවරත්වය ආරක්ෂා කිරීමේ අරමුණින්.

අඟුණුකොලපැලැස්ස බන්ධනාගාරයේ රැඳවියන් නඩු කටයුතු සදහා අධිකරණ වෙත රැගෙන යාම තාවකාලිකව අත්හිටුවා ඇතැයි බන්ධනාගාර දෙපාර්තමේන්තුව සඳහන් කරයි.

රැඳවියන් කිහිප දෙනෙකු රෝගී වීම හා එම රෝගී තත්ත්වය පැතිර යාම පාලනය කිරීමේ අරමුණින් එම පියවර ගෙන ඇති බව බන්ධනාගාර මාධ්‍ය ප්‍රකාශක ඒ.සී ගජනායක සඳහන් කරයි.

දැනට අඟුණකොලපැලැස්ස බන්ධනාගාරයේ රැඳවියන්ට අදාළ නඩු කටයුතු, ඔන්ලයින් තාක්ෂණය ඔස්සේ සිදුකෙරෙන බවද මාධ්‍ය ප්‍රකාශක ඒ.සී ගජනායක සඳහන් කරයි.

තවද වෙනත් බන්ධනාගාර වලින් අඟුණකොලපැලැස්ස බන්ධනාගාරය වෙත රැඳවියන් රැගෙන ඒම නවතා ඇති බවද මාධ්‍ය ප්‍රකාශක ඒ.සී ගජනායක සඳහන් කරයි.

හම්බන්තොට රෝහලට ඇතුලත් කල රැඳවියන්ගෙන් 7 දෙනෙකුට මෙනින්ජයිටිස් වැළදී නොමැති බව තහවුරු වී ඇතැයි ද මාධ්‍ය ප්‍රකාශක ඒ.සී ගජනායක සඳහන් කරයි.

මේ අතර පසුගියදා අඟුණකොළපැලැස්ස බන්ධනාගාරයේ රඳවා සිටි රැඳවියෙකු හදිසි අසනීප තත්ත්වයක් හේතුවෙන් මියගොස් ඇති අතර ඔහු මියයයාමට හේතුව මෙතෙක් අනාවරණය වී නැත.

දිවයිනේ නිරිත දිග ප්‍රදේශවල වැසි තත්වයේ වැඩිවීමක් ඉදිරි දින කිහිපය තුල බලාපොරොත්තු විය හැකි බව කාලගුණ විද්‍යා දෙපාර්තමේන්තුව සඳහන් කරයි.

නිරිත දිග මෝසම දිවයින හරහා ක්‍රමයෙන් ස්ථාපිත වෙමින් පවතින බැවින්, දිවයිනේ නිරිත දිග ප්‍රදේශවල වැසි තත්වයේ වැඩිවීමක් බලාපොරොත්තු විය හැකි බව කාලගුණ විද්‍යා දෙපාර්තමේන්තුව සඳහන් කරයි.

ඒ අනුව බස්නාහිර, සබරගමුව සහ වයඹ පළාත්වලත් ගාල්ල, මාතර, මහනුවර සහ නුවරඑළිය දිස්ත්‍රික්කවලත් විටින් විට වැසි හෝ ගිගුරුම් සහිත වැසි ඇතිවිය හැකි බව කාලගුණ විද්‍යා දෙපාර්තමේන්තුව සඳහන් කරයි.

එම ප්‍රදේශවල ඇතැම් ස්ථානවලට මි.මී 75ට වැඩි තරමක තද වැසි ඇති විය හැකි බවත් ඌව සහ නැගෙනහිර පළාත්වල ස්ථාන ස්වල්පයක පස්වරු 1.00න් පසුව වැසි හෝ ගිගුරුම් සහිත වැසි ඇති විය හැකි බවද එම දෙපාර්තමේන්තුව සඳහන් කරයි.

ගිගුරුම් සහිත වැසි සමග ඇතිවිය හැකි තාවකාලික තද සුළං වලින් සහ අකුණු මඟින් සිදුවන අනතුරු අවම කර ගැනීමට අවශ්‍ය පියවර ගන්නා ලෙසද එම දෙපාර්තමේන්තුව ජනතාව⁣ට දැනුම් දෙයි.

පසුගියදා බත්තරමුල්ල රණවිරු ස්මාරකය අසල ඇති වූ සිද්ධියට අදාළව හිටපු පාර්ලිමේන්තු මන්ත්‍රී විමල් වීරවංශට පොලිසියෙන් කැඳවීමක් කර ඇත.

ඒ අනුව එම සිදුවීමට අදාළව අද (25) දින ප්‍රකාශයක් ලබාගැනීම සඳහා හිටපු මන්ත්‍රී විමල් වීරවංශට තලංගම පොලිසිය වෙත පැමිණෙන ලෙස දැනුම්දීමක් කර ඇත.

මේ අතර රණවිරු ස්මාරකය අසල සිදුවූ සිද්ධිය සම්බන්ධයෙන් දැනගන්න තියෙන විදියට තමන් අත්අඩංගුවට ගනීවි යැයි හිටපු මන්ත්‍රී විමල් වීරවංශ සඳහන් කළේය.

දිවයිනේ ප්‍රදේශ කිහිපයකින් වාර්තා වී ඇති උණ රෝගී තත්ත්වය මෙනින්ජයිටිස් හෙවත් මොළේ උණ රෝගයක් බවට හඳුනාගෙන ඇතැයි, වසංගත රෝග විශේෂඥ වෛද්‍ය පාලිත කරුණාපේම සඳහන් කරයි.

ඒ අනුව දියතලාව ප්‍රදේශයෙන් රෝගීන් 28ක් වැලිමඩ ප්‍රදේශයෙන් රෝගීන් 13ක් සහ රිකිල්ලගස්කඩ ප්‍රදේශයෙන් රෝගීන් 25ක්  වාර්තා වී ඇති බවද වසංගත රෝග විශේෂඥ වෛද්‍ය පාලිත කරුණාපේම සඳහන් කරයි.

වැසි සහිත කාලගුණික තත්ත්වය සහ ඉදිරියේදී වෙසක් උත්සවයට සංවිධානය කෙරෙන දන්සල් හේතුවෙන් රෝගය තවදුරටත්  පැතිර යා හැකි බැවින් ඒ පිළිබඳව සැලකිලිමත්ව කටයුතු කරන ලෙසද විශේෂඥ වෛද්‍ය පාලිත කරුණාපේම ජනතාවගෙන් ඉල්ලීමක් කරයි.

මේ අතර රෝගය වාර්තා වූ රෝගීන්ගේ සුසුම් තරල පරීක්ෂාවේදී එම රෝගය වාර්තා වූ වැඩි පිරිසක් ළමුන් ලෙස හඳුනාගත් බව සෞඛ්‍ය අමාත්‍යාංශයේ ලේකම් විශේෂඥ වෛද්‍ය අනිල් ජාසිංහ සඳහන් කරයි.

එම රෝගී තත්ත්වය සමීප ආශ්‍රිතයින් පානය කරන ජලයෙන් සහ ස්පර්ශයෙන් බෝවන බවද විශේෂඥ වෛද්‍ය අනිල් ජාසිංහ සඳහන් කරයි.

මෙහි රෝග ලක්ෂණ ලෙස උණ, හිසේ කැක්කුම, වමනය සහ ඔක්කාරය, බෙල්ල ආශ්‍රිත තද ස්වභාවය, හිරු එළියට නිරාවරණය වීමේ අපහසුතා හඳුනාගෙන ඇත.