Local news

අපරාධ පරීක්ෂණ දෙපාර්තමේන්තුව (CID) විසින් අත්අඩංගුවට ගත් මෝටර් රථ ප්‍රවාහන කොමසාරිස් ජෙනරාල් කමල් අමරසිංහ අද (10) දින කුරුණෑගල පිලැස්ස මහේස්ත්‍රාත් අධිකරණයට ඉදිපත් කළේය.

අධිකරණයට ඉදිරිපත් කිරීමෙන් අනතුරුව මෝටර් රථ ප්‍රවාහන කොමසාරිස් ජෙනරාල් කමල් අමරසිංහ එළඹෙන (20) වනදා දක්වා යළිත් රක්ෂිත බන්ධාගාරගත කිරීමට මහේස්ත්‍රාත්වරයා නියෝග කළේය.

නීති විරෝධීව එකලස් කරන ලද කැබ් රථයක් සම්බන්ධයෙන් ලද තොරතුරකට අනුව වලාන මධ්‍යම දූෂණ මර්දන ප්‍රහාරක ඒකකය සිදුකළ විමර්ශනයකින් අනතුරුව ඔහුව අත්අඩංගුවට ගත්තේය.

බලශක්ති අමාත්‍ය කුමාර ජයකොඩිට වහාම ධුරයෙන් ඉල්ලා අස්වන ලෙසට බල කරමින් විපක්ෂ නායකවරයා ඇතුළු සමගි ජන බලවේග මන්ත්‍රීවරුන් පිරිසක් මේ වනවිට පොල්දූව මංසන්ධියේ පාර්ලිමේන්තු පිවිසුම අසල දැවැන්ත විරෝධතාවයක නිරත වෙි.

මෙම විරෝධතාව සඳහා විපක්ෂ නායක සජිත් ප්‍රේමදාස, එම පක්ෂයේ මහලේකම් රංජිත් මද්දුම බණ්ඩාර, සමගි ජන බලවේග පාර්ලිමේන්තු මන්ත්‍රීවරුන් වන හර්ෂද සිල්වා, මුජිබුර් රහුමාන් ඇතුළු පක්ෂයේ මන්ත්‍රීවරුන් රැසක් එක්ව ඇත.

විරෝධතාව හේතුවෙන් බත්තරමුල්ල, ශ්‍රී ජයවර්ධනපුර සහ පොල්දූව මංසන්ධිය අවට දැඩි වාහන තදබදයක් හටගෙන ඇති අතර පාර්ලිමේන්තු පිවිසුම් මාර්ගය තාවකාලිකව අවහිර වී ඇත.

මේ හරහා ගමන් ගන්නා මහජනතාව දැඩි අපහසුතාවයට පත්ව සිටින අතර, පොලිසිය රථවාහන පාලනය සඳහා අතිරේක කණ්ඩායම් කැඳවා ඇත.

හෝමාගම, මොරගහහේන ප්‍රදේශයේ හෝටලයක පුද්ගලික විශ්වවිද්‍යාලයක සිසුන් පිරිසක් විසින් ඊයේ (09) රාත්‍රී පවත්වනු ලැබූ සාදයක් අතරතුරදී බහින්බස්වීමක් මත සිදුවූ පහරදීමකින් මනුෂ්‍ය ඝාතනයක් සිදුව ඇත.

මොරගහහේන ප්‍රදේශයේ හෝටලයකදී පුද්ගලයෙකු මියගොස් සිටින බවට ලද තොරතුරක් මත සිදුකළ විමර්ශනයකදී ඒ සම්බන්ධයෙන් සැකකරුවන් 5 දෙනෙකු පොලීසිය විසින් අත්අඩංගුවට ගෙන ඇත.

අදාළ පහරදීම සිදුකළ බවට සැකපිට එම විශ්වවිද්‍යලයේම සිසුන් පිරිසක් මෙලෙස අත්අඩංගුවට ගෙන ඇති අතර මෙලෙස මියගොස් ඇත්තේ වයස අවුරුදු 19ක් වූ නිකදළුපොත වැල්ලව ප්‍රදේශයේ පදිංචිකරුවෙකි.

කෙසේ වෙතත් මෙම මරණය සැක සහිත බවත් ඒ සම්බන්ධයෙන් පරීක්ෂණය සිදු කරන බව පොලීසිය සඳහන් කරයි.

රණවිරු සුභසාධන ක්‍රියාවලියේ තවත් සුවිශේෂී පියවරක් සනිටුහන් කරමින් රජයේ මූල්‍ය ප්‍රතිපාදන ඔස්සේ, රණක්ෂිතයට පත් රණවිරුවන් දස දෙනෙකු වෙත නවීන විද්‍යුත් රෝද පුටු ප්‍රදානය කිරීමේ විශේෂ වැඩසටහනක් රණවිරු සේවා අධිකාරියේ සභාපති බ්‍රිගේඩියර් එස්.බී. කොහොනගේ (විශ්‍රාමික) ප්‍රධානත්වයෙන් (09) දින රණවිරු සේවා අධිකාරි පරිශ්‍රයේදී පැවැත්විණි.

මින් පෙර පෞද්ගලික පරිත්‍යාග මත සිදු කෙරුණු මෙවැනි පරිත්‍යාග වෙනුවට, රණවිරු සේවා අධිකාරියේ මැදිහත් වීමෙන් ප්‍රථම වතාවට රජයේ පුර්ණ මූල්‍ය ප්‍රතිපාදන යොදවමින් මෙම විද්‍යුත් රෝද පුටු තොගය ප්‍රදානය කර තිබීම විශේෂත්වයකි.

එහිදී උත්සව සභාව අමතමින් රණවිරු සේවා අධිකාරියේ සභාපතිවරයා සඳහන් කළේ, පූර්ණ ආබාධිතතත්ත්වයේ පසුවන රණවිරුවන්ගේ දෛනික ජීවන කටයුතු වඩාත් පහසු කිරීම මෙමගින් අපේක්ෂා කෙරෙන බවයි.

ජාතියේ උත්තරීතර නිදහස වෙනුවෙන් තම ශරීර අවයව පරිත්‍යාග කරමින් අභීතව සටන් වැදුණු රණවිරුවන්ගේ සුභසාධනය වෙනුවෙන් ඉදිරියේදී මෙවැනි ව්‍යාපෘති තවදුරටත් පුළුල් කිරීමට කටයුතු කරන බවත් ඔහු වැඩිදුරටත් අවධාරණය කළේය.

2025 (2026) අධ්‍යයන වර්ෂයට අදාළ අ.පො.ස. සාමාන්‍ය පෙළ විභාගය සෞන්දර්ය විෂය ප්‍රායෝගික පරීක්ෂණ පැවැත්වීම ගැන විභාග දෙපාර්තමේන්තුව දැනුම්දීමක් කර ඇත.

ඒ අනුව 2026 අප්‍රේල් (22) වනදා සිට මැයි (04) දින දක්වා සාමාන්‍ය පෙළ විභාගයේ සෞන්දර්ය විෂය ප්‍රායෝගික පරීක්ෂණ පැවැත්වෙන බව ශ්‍රී ලංකා විභාග දෙපාර්තමේන්තුව සඳහන් කරයි.

සෞන්දර්ය විෂයන් වල අවසාන ප්‍රතිඵල නියම කිරීම සඳහා ලිඛිත හා ප්‍රායෝගික පරීක්ෂණ දෙකම අනිවාර්ය වන බැවින් එම කොටස් දෙකටම පෙනී නොසිටින අපේක්ෂකයන්ට අදාළ විෂයේ ප්‍රතිඵල ලබා නොදෙන බවද විභාග දෙපාර්තමේන්තුව අවධාරණය කරයි.

අපේක්ෂකයින් 162,587 දෙනෙකු සඳහා දිවයින පුරා පරීක්ෂණ මණ්ඩල 1,198කදී මෙම ප්‍රායෝගික පරීක්ෂණ පැවැත්වෙන බව විභාග කොමසාරිස් ජනරාල් ඒ.කේ.එස්. ඉන්දිකා කුමාරි ලියනගේ නිවේදනයක් නිකුත් කරමින් සඳහන් කරයි.

අද (09) දින කොළඹ මහනගර සභාවේ නාගරික මන්ත්‍රීවරු දෙදෙනෙකු අතර ඇතිවූ ගුටිබැට හුවමාරුවක් හේතුවෙන් එක් මන්ත්‍රීවරයෙකු තුවාල ලබා කොළඹ ජාතික රෝහලට ඇතුළත් කර ඇත.

එක්සත් ජාතික පක්ෂ නාගරික මන්ත්‍රී රම්සි ටෝනි තුවාල ලබා කොළඹ ජාතික රෝහලට ඇතුළත් කර ඇති අතර එම මන්ත්‍රීවරයාට පහරදී ඇත්තේ ස්වාධීන මන්ත්‍රීවරයෙකු වන උපාලි වැලිවත්ත බව වාර්තා වේ.

දෙදෙනා අතර ඇතිවූ බහින්බස්වීමක් ගැටුමක් දක්වා වර්ධනය වී ඇති අතර එම ගැටුමේදී රම්සි ටෝනි මන්ත්‍රීවරයාගේ නාසයට බරපතළ හානි සිදුව ඇති බව වාර්තා වේ.

මෙම සිද්ධිය සම්බන්ධයෙන් කුරුඳුවත්ත පොලීසිය විමර්ශන ආරම්භ කර ඇති අතර එම පහරදීමට සම්බන්ධ මන්ත්‍රීවරයා මේ වනවිට ප්‍රදේශයෙන් පලාගොස් ඇති බව වාර්තා වේ.