අමෙරිකානු නියෝජිතයින් ඉරානය සමග සාකච්ඡා පැවැත්වීම සඳහා හෙට (20) දින පාකිස්තානයේ ඉස්ලාමාබාද් වෙත පැමිණෙන බව අමෙරිකානු ජනාධිපති ඩොනල්ඩ් ට්රම්ප් අද (19) තහවුරු කරයි.
සිය ‘Truth’ සමාජ මාධ්ය ගිණුමේ සටහනක් තබමින් අමෙරිකානු ජනාධිපති ඩොනල්ඩ් ට්රම්ප් මේ බව සඳහන් කරයි.
“හෝමූස් සමුද්ර සන්ධියේදී වෙඩි තැබීම් සිදුකිරීමට ඉරානය තීරණය කළා. එය සටන් විරාම ගිවිසුම සම්පූර්ණයෙන්ම උල්ලංඝනය කිරීමක්. ඔවුන්ගෙන් බොහෝ දෙනෙක් ප්රංශ නෞකාවක් සහ එක්සත් රාජධානියේ භාණ්ඩ ප්රවාහන නෞකාවක් ඉලක්ක කර ගත්තා.
ඒක සුදුසු නෑ. කෙසේ නමුත් මගේ නියෝජිතයන් පාකිස්තානයේ ඉස්ලාමාබාද් වෙත යනවා. ඔවුන් හෙට සවස සාකච්ඡා සඳහා එක්වනු ඇත. හෝමූස් වසා දමා ඉරානය නොදැනුවත්ව අපට උදව් කරනවා. අමෙරිකාවට කිසිවක් අහිමි වන්නේ නෑ.
දිනකට ඩොලර් මිලියන 500ක් අහිමි වන්නේ ඔවුන්ට. නාවික ගමනාන්ත වෙනස් වෙමින් පවතිනවා. බොහෝ නැව් දැන් අමෙරිකාව, ටෙක්සාස්, ලුසියානා සහ ඇලස්කාව වෙත යමින් සිටින්නේ. ඉරානය ඉක්මනින් කඩා වැටෙනු ඇත. ඔවුන් ගනුදෙනුව නොගන්නේ නම්, පසුගිය වසර 47 තුළ අනෙකුත් ජනාධිපතිවරු ඉරානයට කළ යුතුව තිබූ දේ මට කිරීමට සිදුවනු ඇත.”
