Local news

ජනාධිපති කාර්ය මණ්ඩල ප්‍රධානී ප්‍රභාත් චන්ද්‍රකීර්ති සහ ඉන්දියානු නියෝජ්‍ය මහ කොමසාරිස් ආචාර්ය සත්‍යංජල් පාණ්ඩේ අතර හමුවක් ජනාධිපති කාර්යාලයේදී අද (06) පස්වරුවේ පැවැත්විණි.

ඉන්දීය උප ජනාධිපති සී.පී. රාධක්‍රිෂ්ණන්ගේ ශ්‍රී ලංකා දෙදින නිල සංචාරයේ පූර්ව සැලසුම් පිළිබඳව මෙහිදී සාකච්ඡා කෙරිණ.

එම නිල සංචාරයේදී ඉන්දීය උප ජනාධිපතිවරයා, ජනාධිපති අනුර කුමාර දිසානායක සහ අග්‍රාමාත්‍ය ආචාර්ය හරිනි අමරසූරිය සමඟ සාකච්ඡා පැවැත්වීමට නියමිතය.

තවද මේ වනවිට අවසන් කර ඇති ඉන්දීය ආධාර ව්‍යාපෘති සහ ඉදිරියේදී ඇරඹීමට නියමිත ව්‍යාපෘති පිළිබඳව මෙහිදී සාකච්ඡා කෙරිණි.

හිටපු ජනා­ධි­පති මහින්ද රාජ­පක්ෂට අල්ලස් හෝ දූෂණ විම­ර්ශන කොමි­ෂන් සභාව විසින් ලිඛිතව දැනුම්දීමක් කර ඇත.

ඒ අනුව ලබන (10) වැනි­දාට ප්‍රථම සිය වත්කම් බැර­කම් හා පවුලේ වත්කම් බැරකම් දිවු­රුම් ප්‍රකා­ශ­යක් මඟින් ලබාදෙන ලෙසට අල්ලස් හෝ දූෂණ විමර්ශන කොමිෂන් සභාව දැනුම්දී ඇත.

මහින්ද රාජපක්ෂ සහ පවුලේ අය සම්බන්ධයෙන් පසුගිය 2010 වසරේ සිට 2015 දක්වා කාලයේ ආරම්භ කරන ලද පරීක්ෂණයකට අදා­ළව මෙම ප්‍රකාශ ලබා දෙන ලෙසට නොතී­සි­යක් නිකුත් කර­මින් මෙම දැනුම්දීම කර ඇත.

සිදුකරන විම­ර්ශන දිගු කාල­යක් ප්‍රමාද වී ඇති එබැ­වින් අප්‍රේල් (10) වැනි දිනෙන් පසු අවශ්‍ය තොර­තුරු ලබාදීමට මහින්ද රාජපක්ෂට තවත් කාල­යක් ලබා නොදෙන බවද අල්ලස් කොමිසම දැනුම්දී ඇත.

අදාළ කාල­සී­මාව තුළ වත්කම් ප්‍රකාශ ඉදිරිපත් කිරීමට අපො­හො­සත් වුව­හොත් ඔවුන්ට එරෙහිව නීති­මය පිය­වර ගන්නා බවද කොමි­සම හිටපු ජනා­ධි­ප­ති­ව­ර­යාට දැනුම්දී ඇත.

දූෂණ විරෝධී පනත යටතේ කොමි­ස­මට පැවරී ඇති බල­තල අනුව මෙම නොතීසි නිකුත් කර ඇත.

අපරාධ පරීක්ෂණ දෙපාර්තමේන්තුව විසින් තමන්ව අත්අඩංගුවට ගෙන රඳවා ගැනීම අභියෝගයට ලක් කර රාජ්‍ය බුද්ධි සේවයේ හිටපු ප්‍රධානී විශ්‍රාමික මේජර් ජෙනරාල් සුරේෂ් සලේ සිය නීතිඥවරු මාර්ගයෙන් අභියාචනාධිකරණයට රිට් පෙත්සමක් ඉදිරිපත් කර ඇත.

එහි වගඋත්තරකරුවන් ලෙස පොලිස්පති ප්‍රියන්ත වීරසූරිය, අපරාධ පරීක්ෂණ දෙපාර්තමේන්තුවේ අධ්‍යක්ෂ ශානි අබේසේකර, මහජන ආරක්ෂක අමාත්‍යාංශයේ ලේකම් රවී සෙනෙවිරත්න, රොහාන් සිල්වා පියතුමා, නීතිපතිවරයා ඇතුළු පිරිසක් නම් කර ඇත.

කුණාටුව මැදින් නැව යාත්‍රා කරන නාවිකයා වැඩකාරයෙක් බවත් එම අවස්ථාව දැන් ජනාධිපතිතුමාට ඇවිල්ලා තියෙන බව හිටපු පාර්ලිමේන්තු මන්ත්‍රී රන්ජන් රාමනායක සඳහන් කරයි.

ලෝකයේ පවතින යුදමය තත්වයත් සමඟ ලංකාවට ඇති වී තිබෙන තත්ත්වය හොඳින් කළමනාකරණය කරගතහොත් එළඹෙන ජනාධිපතිවරණය ජයග්‍රහණය කිරීමට හැකියාවක් පවතින බවද රන්ජන් රාමනායක සඳහන් කරයි.

ජනාධිපති අනුර කුමාර දිසානායක යනු කුණු ලෝභයෙක් බවත් එම ලෝභකම රටට සුභදායී බවත් එනිසා මුදල් නාස්තියක් නොමැති බවද රන්ජන් රාමනායක සඳහන් කරයි.

රන්ජන් රාමනායක තවදුරටත් සඳහන් කළේ,

“කුණාටුව මැදින් නැව යාත්‍රා කරන නාවිකයා තමයි වැඩකාරයෙක් වෙන්නේ. ඒ අවස්ථාව දැන් ජනාධිපතිතුමාට ඇවිල්ලා තියනවා. ඔහුට කොරෝනා අවේ නැති වුණාට, සුනාමි ආවේ නැති වුණාට, ගංවතුර ආවා දැන් යුද්දේ ඇවිල්ලා තියනවා.

මැදපෙරදිග, ඒක කළමනාකරණය කර ගත්තොත් ඔහුට හොඳ නමක් තියාගෙන හොඳ ජනාධිපතිවරයෙක් වෙන්න පුළුවන්, අනිත් පාරත් දිනනන් පුළුවන්. ඒක තියෙන්නේ එතුමාගේ අතේ සහ මේ ආණ්ඩුව අතේ. කීපදෙනෙක් හානවා වගේ පේනවා පොඩි පොඩි හෑම් තියනවා.

එහෙම නැති එකක් ඇමරිකාවෙත් නෑ. ලෝකේ හැමතැනම උද්ඝෝෂණ ගෝ හෝම් කියන සටන් පාඨ තියනවා. ඒක නවතින්නේ නෑ අපේ ඩියුටිය එන එන කෙනාට ගෝ හෝම් කියන එක නෙවෙයි. එන කෙනාගෙන් වැඩක් ගන්න එක.

මම දන්න විදියට එයා හරි ලෝභයි. අනුර කුමාර දිසානායක කියන්නේ කුණු ලෝභයෙක්, ඒ ලෝභකම රටට හොඳයි නාස්තිය නෑ. ඉස්සර හිටිය ජනාධිපතිවරු ලෝභ නෑනේ. අපේ සල්ලි පිස්සෝ වගේ වියදම් කළා. රට විකිණුවා.

මෙයා කුණු ලෝභයෙක්. අපේ ගෙදර තාත්තා කුණු ලෝභයෙක් වුණාම ගෙයි ඉඩමත් ඉතුරුයි, ගේත් ඉතුරුයි, සේප්පුවේ සල්ලිත් ඉතුරුයි, වී බිස්සේ වීත් තියනවා. අනුර කුමාර දිසානායක මහත්තයාගේ ලෝභකම නිසා සල්ලි ගොඩක් ඉතුරු වෙලා තියනවා.”

මාධ්‍ය වෙත අදහස් දක්වමින් රන්ජන් රාමනායක මේ බව සඳහන් කරයි.