Local news

හිටපු ජනාධිපති මහින්ද රාජපක්ෂගේ පුත් යෝෂිත රාජපක්ෂ ව්‍යාපාරික සමුළුවකට සහභාගීවීම සඳහා විදේශගත වීමට අවසර දෙන ලෙසට ඉල්ලා ඇත.

ඒ අනුව යෝෂිත රාජපක්ෂ කළ ඉල්ලීමට අදාළව නියෝගයක් නිකුත් කළ නොහැකි යැයි කොළඹ ප්‍රධාන මහේස්ත්‍රාත් අසංග එස්. බෝදරගම (04) දින සඳහන් කළේය.

සැකකරුට එරෙහිව මේ වනවිට අධිචෝදනා ගොනුකර ඇති බැවින් ඊට අදාළව නියෝගයක් මහාධිකරණයෙන් ලබා ගන්නා ලෙසද මහේස්ත්‍රාත්වරයා දැනුම් දුන්නේය.

නොතිසියක් ලද විට කොළඹ මහාධිකරණය හමුවේ පෙනී සිටින ලෙසද මහේස්ත්‍රාත්වරයා යෝෂිත රාජපක්ෂ සහ හිටපු නාවික හමුදාපති වසන්ත කරන්නාගොඩ යන දෙදෙනාටම නියම කළේය.

අධිකරණය හමුවේ කරුණු දක්වමින් අල්ලස් හෝ දූෂණ චෝදනා විමර්ශන කොමිෂන් සභාව සඳහන් කළේ, මෙම සැකකරුවන් දෙදෙනා හට මහාධිකරණය හමුවේ අධිචෝදනා ගොනුකර ඇති බවයි.

පසුගිය 2008 වසරේ සිට පරිහරණය කළ නිල නිවස වෙනුවෙන් කිසිදු කුලී මුදලක්, ජල බිල්පතක්, විදුලි බිල්පතක් පොහොට්ටුවේ හිටපු ඇමති සුසන්ත පුංචිනිලමේ ගෙවා නැති බව විදේශ කටයුතු නියෝජ්‍ය අමාත්‍ය අරුන් හේමචන්ද්‍රන් පාර්ලිමේන්තුවේදී (04) සඳහන් කරයි.

එම මුදල් අයකර ගැනීම වෙනුවෙන් සියලු දිස්ත්‍රික් ලේකම්වරුන් උත්සාහ කර ඇතත් පොහොට්ටුවේ හිටපු ඇමති සුසන්ත පුංචිනිලමේ කිසිදු මුදලක් ගෙවා නොමැති බවද නියෝජ්‍ය අමාත්‍ය අරුන් හේමචන්ද්‍රන් සඳහන් කරයි.

එනිසා මේ සම්බන්ධයෙන් වන ලිපි ගොනු අපරාධ පරීක්ෂණ දෙපාර්තමේන්තුවට සහ රජයේ ගිණුම් පිළිබඳ කාරක සභාව හෙවත් කෝපා කමිටුව වෙත භාරදෙන බවද නියෝජ්‍ය අමාත්‍ය අරුන් හේමචන්ද්‍රන් සඳහන් කරයි.

තවද පළාත් සභා මන්ත්‍රීවරයකු ලෙස කටයුතු කළ ප්‍රියන්ත පතිරණ ප්‍රේමකුමාරට පේදුරු කොටුව තුළ නිල නිවාසයක් ලබාදී තිබූ බවත් ඒ වෙනුවෙන් කුලී ගෙවීමක් කර නොමැති බවද නියෝජ්‍ය අමාත්‍ය අරුන් හේමචන්ද්‍රන් සඳහන් කරයි.

පැවැත්වීමට නියමිත අධ්‍යයන පොදු සහතික පත්‍ර උසස් පෙළ විභාගය කල්දැමීමේ නියෝගයක් නිකුත් කරන ඉල්ලා ගොනුකර තිබූ මූලික අයිතිවාසිකම් පෙත්සමක් විභාගයට නොගෙන නිෂ්ප්‍රභ කිරීමට ශ්‍රේෂ්ඨාධිකරණය අද (05) නියෝග කළේය.

උසස් පෙළ විභාගය සඳහා පළමුවරට සහ දෙවන වරට පෙනී සිටින සිසුන් පස් දෙනෙකු විසින් මෙම පෙත්සම ඉදිරිපත් කර තිබුණි.

මේ අතර උසස් පෙළ විභාගය මාස දෙකකින් කල් දමන මෙන් නියෝගයක් නිකුත් කරන්නැයි ඉල්ලා ගොනුකළ රිට් පෙත්සමක් විභාගයට නොගෙන නිෂ්ප්‍රභ කිරීමට පසුගිය ජුලි මස (23) වනදා අභියාචනාධිකරණය තීරණය කළේය.

හිටපු රාජ්‍ය අමාත්‍ය ශෂීන්ද්‍ර රාජපක්ෂ ඇතුළු විත්තිකරුවන් තුන්දෙනෙකුට එරෙහිව අල්ලස් කොමිසම විසින් ගොනුකර තිබෙන නඩුව අද (05) දින කැඳවයි.

මෙම නඩුව කැඳවූ අවස්ථාවේදී ඇප මත මුදාහැර සිටින ශෂීන්ද්‍ර රාජපක්ෂ ඇතුළු විත්තිකරුවන් අධිකරණය හමුවේ පෙනී සිටියේය.

අනතුරුව ඉදිරිපත් වූ කරුණු සලකා බැලූ විනිසුරුවරයා නඩුව විභාගය සඳහා එළඹෙන සැප්තැම්බර් මස (28) වැනිදා කැඳවන ලෙස නියෝග කළේය.

මෙරට කර්මාන්තවලින් 30% කට පමණ පරිසර ආරක්ෂණ බලපත්‍ර නොමැති බවට හෙළි වී ඇත.

එවැනි ආයතන තවත් හඳුනාගැනීම සඳහා වැඩපිලිවෙලක් ක්‍රියාත්මක බව මධ්‍යම පරිසර අධිකාරියේ අධ්‍යක්ෂ ජෙනරාල් කපිල රාජපක්ෂ සඳහන් කරයි.

පරිසර බලපත්‍ර ලබාගෙන නොමැති කර්මාන්තකරුවන්ට ඒ සම්බන්ධයෙන් දැනුවත් කිරීමක් සිදු කරන බවද අධ්‍යක්ෂ ජෙනරාල් කපිල රාජපක්ෂ සඳහන් කරයි.

පරිසර බලපත්‍ර ලබා නොගෙන හා බලපත්‍ර කොන්දේසි උල්ලංඝණය කරන කාර්මාන්ත කරුවන්ට එරෙහිව නඩු 200කට අධික සංඛ්‍යාවක් මේ වනවිට පවරා ඇති බවද අධ්‍යක්ෂ ජෙනරාල් කපිල රාජපක්ෂ සඳහන් කරයි.

පසුගියදා මීගමුව සහ මහර බන්ධනාගාරවල සිදුවූ ගැටුම් වලින් අනතුරුව දකුණු පළාතේ බූස්ස ඇතුළු බන්ධනාගාරවල ආරක්ෂාව තර කිරීමට තීරණය කර ඇත.

මීගමුව සහ මහර බන්ධනාගාර ආශ්‍රිතව මෑතකදී වාර්තා වූ නොසන්සුන්කාරී තත්ත්ව හමුවේ දකුණු පළාත තුළ එවැනි කිසිදු සිදුවීමක් ඇති නොවීමට වගබලා ගැනීම ප්‍රධාන අරමුණ වේ.

ගාල්ල, බුස්ස, මාතර, අඟුණකොළපැලැස්ස සහ වීරවිල බන්ධනාගාරවල වත්මන් තත්ත්වය සහ රැඳවියන්ගේ ආරක්ෂාව සම්බන්ධයෙන් විශේෂ සාකච්ඡාවක් දකුණු පළාත් ආණ්ඩුකාර ආචාර්ය සුසිරිපාල මානවඩුගේගේ ප්‍රධානත්වයෙන් දකුණු පළාත් ආණ්ඩුකාර කාර්යාලයේදී පැවැති අවස්ථාවේදී මේ බව තීරණය කර ඇත.

දකුණු පළාතේ ජනතාවගේ ආරක්ෂාව, ජීවිත දේපළ සහ සාමකාමී වාතාවරණය අඛණ්ඩව පවත්වාගෙන යාම සම්බන්ධයෙන් කිසිදු ආකාරයකින් ලිහිල් ප්‍රතිපත්තියක් අනුගමනය නොකරන බව දකුණු පළාත් ආණ්ඩුකාරවරයා සඳහන් කරයි.

දිවයිනේ සෙසු බන්ධනාගාරවල වූ සිදුවීම් වලින් පාඩම් ඉගෙන ගනිමින්, බුද්ධි තොරතුරු හුවමාරුව කාර්යක්ෂම කිරීමටත්, සියලු ආරක්ෂක අංශ ඒකාබද්ධව ඕනෑම හදිසි තත්ත්වයකට කඩිනමින් ප්‍රතිචාර දැක්විය හැකි යන්ත්‍රණයක් සූදානම්ව තබා ගැනීමටද මෙහිදී උපදෙස් ලබාදී ඇත.

අද (05) දින අලුයම රත්මලානේ, ඥානේන්ද්‍ර මාර්ගයේ නිවසකට අත්බෝම්බ ප්‍රහාරයක් එල්ල වීම සම්බන්ධව පාතාල සබඳතාවයක් පිළිබඳ තොරතුරු අනාවරණය වී ඇත.

ප්‍රහාරය හේතුවෙන් ජීවිත හානි කිසිවක් සිදුව නොමැති අතර නිවසේ ජනෙල් පියන් 02ක වීදුරු පුපුරා ගොස් ඇති බව පොලීසිය සඳහන් කරයි.

දෙමහල් නිවසකට අත්බෝම්බ ප්‍රහාර දෙකක් එල්ල වී තිබූ අතර ඉන් එකක් පුපුරා ගොස් අනෙක් අත්බෝම්බය ගෙවත්තේ වැටී තිබී ඇතැයි පොලීසිය සඳහන් කරයි.

නිවසේ හිමිකරු සංවිධානාත්මක අපරාධ කණ්ඩායම් සාමාජිකයෙකු වන දැනට විදෙස්ගතව සිටින රසල් ඇලෝසියස් ස්මිත් යන අයගේ පියාගේ සහෝදරයෙකුගේ පුතෙකු බවට තොරතුරු අනාවරණය වී ඇත.

රසල් ඇලෝසියස් ස්මිත් යන අය අපරාධ කල්ලි නායකයින් වන සිංහාර අමල් ශාමින්ද සිල්වා නොහොත් අංජු හා එල්ලාවල ලියනගේ ධර්මසිරි නොහොත් ධර්මේ යන අයවලුන් සමඟ සමීප සම්බන්ධතා පවත්වා ඇති බව වාර්තා වේ.

2026 පහ ශ්‍රේණිය ශිෂ්‍යත්ව විභාගයට පෙර විභාග දෙපාර්තමේන්තුවෙන් දැනුම්දීමක්.

ඒ අනුව ශිෂ්‍යත්ව විභාගයට අදාළ උපකාරක පන්ති පැවැත්වීම, විෂයානුබද්ධ දේශන, සම්මන්ත්‍රණ, වැඩමුළු පැවැත්වීම අද (05) දින මධ්‍යම රාත්‍රියෙන් අවසන් කළ යුතු බව විභාග දෙපාර්තමේන්තුව සඳහන් කරයි.

එම විභාග කටයුතු අවසන් වනතුරු මෙම තහනම බලපැවත්වෙන අතර එම කාලයේදී ශිෂ්‍යත්ව විභාගය සඳහා අනුමාන ප්‍රශ්න ඇතුළත් ප්‍රශ්න පත්‍ර මුද්‍රණය කිරීම සහ ඒවා බෙදාහැරීම සිදු නොකළ යුතුයි.

විභාග ප්‍රශ්න පත්‍රවලට ප්‍රශ්න ලබාදෙන බවට හෝ ඒ හා සමාන ප්‍රශ්න ලබාදෙන බවට පෝස්ටර්, බැනර් අත්පත්‍රිකා විද්‍යුත් හෝ මුද්‍රිත මාධ්‍ය මගින් ප්‍රසිද්ධ කිරීම හෝ එවැනි දෑ ළඟ තබාගැනීම සපුරා තහනම් වේ. 

හිටපු අමාත්‍ය දුමින්ද දිසානායකට එරෙහිව නීතිපතිවරයා විසින් කොළඹ මහාධිකරණය හමුවේ අධිචෝදනා භාරදී ඇත.

වැල්ලවත්ත පොලිස් වසමේ හැව්ලොක් නිවාස සංකීරණයේදී සොයාගත් රන් ආලේපිත T56 සිදුවීමට අදාළව දුමින්ද දිසානායකට එරෙහිව නීතිපතිවරයා අධිචෝදනා ගොනුකර ඇත.

මීට අමතරව එම රන් ආලේපිත T56 සිද්ධියේ සැකකාරියට එරෙහිව ද නීතිපතිවරයා අධිචෝදනා ගොනුකර ඇත.

අල්ලස් කොමිසමේ සියලු කොමසාරිස්වරුන් අත්සන් නොකිරීමේ ⁣තාක්ෂණික දෝෂයක් මත හිටපු අමාත්‍ය ජොන්ස්ටන් ප්‍රනාන්දු නිදහස් කළ අල්ලස් නඩුවක් නැවත විභාගයට ගැනීමට අභියාචනාධිකරණය නියෝග කර ඇත.

සතොස ආයතනයේ සිදුවූ බව කියන දූෂණ සිද්ධීන් සම්බන්ධයෙන් හිටපු අමාත්‍ය ජොන්ස්ටන් ප්‍රනාන්දු ඇතුළු විත්තිකරුවන් නිදහස් කරමින් කොළඹ මහාධිකරණය මීට පෙර දුන් නියෝගය බලරහිත කිරීමට අභියාචනාධිකරණය (04) දින පියවර ගත්තේය.

එම චෝදනාවලට අදාළව හිටපු අමාත්‍යවරයා ඇතුළු පිරිසට එරෙහිව පවරා ඇති සියලුම නඩු නැවත මුල සිට විභාග කරන ලෙස පී. කුමාරරත්නම්, දමිත් තොටවත්ත, කේ.එම්.එස්. දිසානායක, කේ.පී. ප්‍රනාන්දු සහ අන්නලිංගම් ප්‍රේමශංකර් යන විනිසුරුවරුන්ගෙන් සැදුම්ලත් පංච පුද්ගල අභියාචනාධිකරණ විනිසුරු මඩුල්ල නියෝග කළේය.

මහාධිකරණයේ එම තීන්දුවට එරෙහිව අල්ලස් කොමිසමේ අධ්‍යක්ෂ ජනරාල්වරයා ඉදිරිපත් කළ ප්‍රතිශෝධන අයැදුම්පත සලකා බැලූ අභියාචනාධිකරණ විනිසුරු මඩුල්ල සිය තීන්දුව ප්‍රකාශයට පත් කරමින් පෙන්වා දුන්නේ, 1994 අල්ලස් හෝ දූෂණ චෝදනා විමර්ශන කොමිෂන් සභා පනතේ 2 (8) වගන්තියට අනුව කොමිසමේ බලතල ක්‍රියාත්මක කිරීමට කොමසාරිස්වරුන් තිදෙනාම එකට සිටීම අනිවාර්ය නොවන බවයි.

2010 – 2014 කාලයේ සතොස ආයතනයේ සේවකයන් නිල රාජකාරිවලින් ඉවත් කර වෙනත් කටයුතුවල යොදවමින්, රජයේ මුදලින් ඔවුන්ට වැටුප් හා අතිකාල දීමනා ගෙවීම තුළින් දූෂණය නමැති වරද සිදුකළ බවට චෝදනා කරමින් හිටපු අමාත්‍ය ජොන්ස්ටන් ප්‍රනාන්දු, සතොස හිටපු සභාපති එරාජ් ප්‍රනාන්දු සහ එහි හිටපු වැඩබලන අධ්‍යක්ෂ මොහොමඩ් සකීර්ට එරෙහිව අල්ලස් පනතේ 70 වන වගන්තිය යටතේ නඩු 07ක් ගොනුකර තිබුණේය.

එහෙත්, මෙම විමර්ශන ආරම්භ කිරීම සහ නඩු පැවරීම සඳහා අල්ලස් හෝ දූෂණ විමර්ශන කොමිෂන් සභාවේ කොමසාරිස්වරුන් තිදෙනාගේම අත්සන් නොමැති බවට විත්තියේ නීතිඥවරුන් මතු කළ මූලික විරෝධතාවක් පිළිගනිමින් කොළඹ මහාධිකරණය විසින් 2023 මැයි (19) වනදා මොවුන් නිදහස් කිරීමට තීන්දු කළේය.