Local news

පිරමීඩ යෝජනා ක්‍රම සම්බන්ධයෙන් ජනතාව දැනුවත් කිරීම සඳහා ශ්‍රී ලංකා මහ බැංකුව නිවේදනයක් නිකුත් කර ඇත.

1988 අංක 30 දරන (සංශෝධිත) බැංකු පනතේ 83(ඇ) වගන්තියට අනුව පහත සඳහන් ආයතන/යෙදවුම් (Apps) විසින්ද තහනම් පිරමීඩ යෝජනා ක්‍රම පවත්වා ඇති බවට නිර්ණය කර ඇති බව මහ බැංකුව සඳහන් කරයි.

ඒ අනුව තහනම් පිරමීඩ යෝජනා ක්‍රම පවත්වා ගෙන ගිය ආයතන 25ක් ශ්‍රී ලංකා මහ බැංකුව විසින් ප්‍රකාශයට පත් කර ඇත.

01. Tiens Lanka Health Care (Pvt) Ltd
02. Best Life International (Pvt) Ltd
03. Mark – Wo International (Pvt) Ltd
04. V M L International (Pvt) Ltd 
05. Global Lifestyle Lanka (Pvt) Ltd
06. Fast3Cycle International (Pvt) Ltd
07. Sport Chain app, Sport Chain zs society Sri Lanka
08. OnmaxDT
09. MTFE App, MTFE SL Group, MTFE Success Lanka, MTFE DSCC Group
10.Fastwin (Pvt) Ltd
11. Fruugo Oline App/ Fruugo Oline (Pvt) Ltd
12. Ride to Three Freedom (Pvt) Ltd
13. Qnet/ Questnet
14. Era Miracle (Pvt) Ltd. And Genesis Business School
15.Ledger Block
16. Isimaga International (Pvt) Ltd
17. Beecoin App and Sunbird Foundation 
18. Windex Trading
19. The Enrich Life (Pvt) Ltd
20. Smart Win Entrepreneur (Pvt) Ltd
21. Net Fore International (Pvt) Ltd./ Netrrix
22. Pro Care (Pvt) Ltd., Shade of Procare (Pvt) Ltd
23. SGO/sgomine.com
24. I.C.A.N Advertising (Pvt) Ltd සහ ඊට අනුබද්ධිත icanonlineadvertising.com / bannercuts.com / bannercuts.lk / bannercuts.net / bannercuts.org
25. Infinity Rover (Pvt) Ltd

වර්ෂිකව මාස හයකට වරක් ජල ගාස්තු සංශෝධනය සිදුකෙරෙන අතර මේ වසරේ මුල් මාසය 06 සඳහා ජල ගාස්තු සංශෝධනයක් සිදු නොකිරීමට රජය පියවර ගෙන තිබුණේය.

ඒ අනුව මේ වසරේ ඉදිරි මාස 06 සඳහා ද ජල ගාස්තුවල සංශෝධනයක් සිදුනොවනු ඇති බව නිවාස, ඉදිකිරීම් හා ජල සම්පාදන අමාත්‍ය සුසිල් රණසිංහ සඳහන් කරයි.

වසරේ මුල් මාස 06 සඳහා ජල පිරිපහදු කටයුතු වෙනුවෙන් මණ්ඩලයට විශාල පිරිවැයක් දැරීමට සිදුනොවු බැවින් ජල ගාස්තු වැඩි කිරීමේ අවශ්‍යතාවක් පැන නොනගින බව අමාත්‍ය සුසිල් රණසිංහ සඳහන් කරයි.

පැවැත්වීමට නියමිත පළාත් සභා මැතිවරණය හැකි ඉක්මනින් පැවැත්වීම රජයේ මූලික බලාපොරොත්තුව බව කැබිනට් මාධ්‍ය ප්‍රකාශක, අමාත්‍ය නලින්ද ජයතිස්ස සඳහන් කරයි.

එහි නිල දිනය තීරණය වන්නේ පවතින මැතිවරණ නීති සංශෝධනය කිරීම සඳහා පාර්ලිමේන්තුව ලබා ගන්නා කාලය මත බවද අමාත්‍ය නලින්ද ජයතිස්ස සඳහන් කරයි.

පසුගිය පාලන සමයන්හිදී පළාත් සභා මැතිවරණ ක්‍රමය සම්බන්ධයෙන් හඳුන්වා දුන් ව්‍යාකූල නීතිමය තත්ත්වයන් හේතුවෙන් වසර ගණනාවක සිට මෙරට පළාත් සභා මැතිවරණය පැවැත්වීම අඩාල වී තිබුණේය.

අද (01) පැවති කැබිනට් තීරණ දැනුම්දීමේ මාධ්‍ය සාකච්ඡාවට එක්වෙමින් අමාත්‍ය නලින්ද ජයතිස්ස මේ බව සඳහන් කරයි.

ශ්‍රී ලංකා නාවික හමුදාවේ 27 වන නාවික හමුදාපති ලෙස පත් වූ වයිස් අද්මිරාල් ඩේමියන් ප්‍රනාන්දු අද (01) ආරක්ෂක අමාත්‍යාංශයේදී ආරක්‍ෂක ලේකම්, එයාර් වයිස් මාර්ෂල් සම්පත් තුයියකොන්තා (විශ්‍රාමික) හමු විය.

ශ්‍රී ලංකා නාවික හමුදාවේ නව නාවික හමුදාපති ලෙස වැඩභාර ගැනීමෙන් පසු, වයිස් අද්මිරාල් ඩේමියන් ප්‍රනාන්දු ආරක්‍ෂක ලේකම්වරයා නිල වශයෙන් හමු වූ පළමු අවස්ථාව මෙයයි.

මෙහිදී, නව නාවික හමුදාපතිවරයා පිළිගත් ආරක්ෂක ලේකම්වරයා, එතුමාගේ නව පත්වීම වෙනුවෙන් සිය සුබ පැතුම් පිරිනැමීය.

ශ්‍රී ලංකා නාවික හමුදාවේ මෙහෙයුම් විශිෂ්ටත්වය සහ සම්ප්‍රදායන් තවදුරටත් ඉදිරියට ගෙනයමින්, උසස් වෘත්තීය භාවය, කැපවීම සහ උපායමාර්ගික දැක්මකින් යුතුව නාවික හමුදාව මෙහෙය වීමට නව නාවික හමුදාපතිවරයාට ඇති හැකියාව පිළිබඳව ද ආරක්ෂක ලේකම්වරයා මෙහිදී දැඩි විශ්වාසය පළ කළේය.

වයිස් අද්මිරාල් ඩේමියන් ප්‍රනාන්දු ඉකුත් ජුනි (30) වනදා ජනාධිපති ලේකම් කාර්යාලයේදී ජනාධිපති ලේකම්, ආචාර්ය නන්දික සනත් කුමානායක අතින් සිය පත්වීම් ලිපිය ලබා ගන්නා ලදී.

දිට්වා සුළි කුණාටුව හේතුවෙන් පනවා තිබූ මහජන හදිසි නීති තත්ත්වය මෙම මාසයේ සිට තවදුරටත් දීර්ඝ නොකිරීමට රජය තීරණය කර ඇති බව කැබිනට් මාධ්‍ය ප්‍රකාශක, අමාත්‍ය නලින්ද ජයතිස්ස සඳහන් කරයි.

අද (01) දින පැවැති කැබිනට් මාධ්‍ය හමුවේදී කැබිනට් මාධ්‍ය ප්‍රකාශක, අමාත්‍ය නලින්ද ජයතිස්ස මේ බව සඳහන් කරයි.

තම දුරකථනයේ සහ ලැප්ටොප් පරිගණකයේ මුරපද වැඩිදුර පරීක්ෂණ සඳහා අපරාධ පරීක්ෂ දෙපාර්තමේන්තුව වෙත ලබාදෙන ලෙසට හිටපු බුද්ධි ප්‍රධානී සුරේෂ් සලේට කොටුව මහෙස්ත්‍රාත්වරයා විසින් නියෝග කර ඇත.

පසුගිය පෙබරවාරි මස (25) දින පාස්කු ඉරුදින ත්‍රස්ත ප්‍රහාරය සම්බන්ධයෙන් සිදුකරන විමර්ශන වලට අදාළව අපරාධ පරීක්ෂණ දෙපාර්තමේන්තුව විසින් හිටපු බුද්ධි ප්‍රධානී සුරේෂ් සලේ අත්අඩංගුවට ගනු ලැබීය.

අනතුරුව සුරේෂ්⁣ සලේ අපරාධ පරීක්ෂණ දෙපාර්තමේන්තුවේ රැඳවුම් නියෝග මත ප්‍රශ්න කිරීම ආරම්භ කළ අතර එහිදී ඔහු විසින් ආහාර වර්ජනය කරමින් උපවාසයක් ආරම්භ කළේය.

උපවාසය අතරතුර ඇතිවු හෘදයාබාධ රෝගී තත්ත්වයක් හේතුවෙන් ප්‍රථිකාර සඳහා සුරේෂ්⁣ සලේ කොළඹ ජාතික රෝහලට අතුළත් කළ අතර ඔහු මේ වන විවටත් හෘද රෝග ඒකකයේ ප්‍රතිකාර ලබමින් සිටියි.

කෙසේ වෙතත් අඛණ්ඩ උපවාසයක් ආරම්භ කළ සුරේෂ්⁣ සලේ අද (01) දින සිය උපවාසය නතර කිරීමට තීරණය කළේය.

ඉදිරියේදී ඇති විය හැකි එල්-නිනෝ දේශගුණික බලපෑමට මුහුණ දීම සඳහා අවශ්‍ය පියවර ගැනීම වෙනුවෙන් පරිසර අමාත්‍ය වෛද්‍ය දම්මික පටබැඳිගේ සභාපතීත්වයෙන් යුතුව පත් කළ විශේෂ අමාත්‍ය මණ්ඩල අනුකමිටුව සහ නිලධාරී කමිටුව පළමු වරට ජනාධිපති කාර්යාලයේදී (30) පස්වරුවේ රැස් විය.

ආහාර සුරක්ෂිතතාව, ජල කළමනාකරණය සහ බලශක්ති සුරක්ෂිතතාව පවත්වාගෙන යාම වෙනුවෙන් අවශ්‍ය කෙටිකාලීන, මධ්‍යකාලීන, සහ දිගුකාලීන සැලසුම් සකස් කිරීම සහ සියලුම රාජ්‍ය ආයතන අතර නිසි සම්බන්ධීකරණයත්, ඒකාබද්ධ මෙහෙයුම් සහතික කිරීම සදහා සහ මහජනතාව දැනුවත් කරමින් ආපදා අවදානම අවම කිරීම සඳහා කඩිනම් ක්‍රියාමාර්ග ගැනීමත් වෙනුවෙන් ජනාධිපති අනුර කුමාර දිසානායක විසින් මෙම විශේෂ අමාත්‍ය මණ්ඩල අනුකමිටුව සහ නිලධාරී කමිටුව පත් කරන ලදී.

කෘෂිකර්ම, පශු සම්පත්, ඉඩම් සහ වාරිමාර්ග අමාත්‍ය කේ. ඩී. ලාල්කාන්ත, වැවිලි සහ ප්‍රජා යටිතල පහසුකම් අමාත්‍ය සමන්ත විද්‍යාරත්න, වරාය සහ සිවිල් ගුවන් සේවා අමාත්‍ය සහ බලශක්ති අමාත්‍ය අනුර කරුණාතිලක, වෙළෙඳ, වාණිජ, ආහාර සුරක්ෂිතතා සහ සමුපකාර සංවර්ධන අමාත්‍ය වසන්ත සමරසිංහ, නිවාස, ඉදිකිරීම් සහ ජලසම්පාදන අමාත්‍ය සුසිල් රණසිංහ අමාත්‍ය මණ්ඩල අනුකමිටුව නියෝජනය කරනු ලබයි.

මෙම සාකච්ඡාවට සමගාමීව නිලධාරී කමිටුව සඳහා පත් කළ සාමාජිකයන්ට පත්වීම් ලිපි ලබාදීමද සිදු කෙරිණි.

එල්-නිනෝ සම්බන්ධව දැනට පවතින තත්ත්වය අනුව ප්‍රබල සම්භාවිතාව 63%ක් සහ දුර්වල සම්භාවිතාව 33%ක් බව මෙහිදී අනාවරණය වූ අතර, එම තත්ත්වය යටතේ පානීය ජලය, වාරිමාර්ග සහ බලශක්තිය සම්බන්ධව වැඩි අවධානයක් යොමු කළ යුතුව තිබෙන බවටද අවධාරණය කෙරිණි.‍

ගෝලීය එල්-නිනෝ තත්ත්වය හමුවේ ශ්‍රී ලංකාවට ඇති විය හැකි නියං හෝ වැසි තත්ත්වයක් අඩු වැඩි වශයෙන් ඇති වනු ඇති බවට පුරෝකථනය කර තිබෙන බැවින් එම සියලු තත්ත්වයන්ට මුහුණදීමට අනුගමනය කළ යුතු ක්‍රියාමාර්ග සහ නිශ්චිත වැඩපිළිවෙළක් සති දෙකක් ඇතුළත සකස් කරන ලෙස මෙහිදී අදාළ අමාත්‍යාංශවලට සහ දෙපාර්තමේන්තුවලට උපදෙස් දෙනු ලැබීය.

එල්-නිනෝ තත්ත්වය සම්බන්ධව දැනට පවතින වෙන් වෙන් අර්ථ දැක්වීම් වෙනුවට කාලගුණ විද්‍යා දෙපාර්තමේන්තුව මගින් පමණක් නිල ප්‍රකාශ නිකුත් කිරීමටද මෙහිදී තීරණය කෙරිණි.