බාලවයස්කාර දැරියක් බරපතළ ලිංගික හිංසනයකට ලක් කළ බවට චෝදනා ලැබ සිටින අටමස්ථානාධිපති පල්ලේගම හේමරතන හිමි ලබන (22) වන දින දක්වා රිමාන්ඩ් බන්ධනාගාරගත කිරීමට කොටුව මහේස්ත්රාත්වරයා නියෝග කර ඇත.
කොටුව මහේස්ත්රාත්වරයා විසින් නවලෝක රෝහලේදී අටමස්ථානාධිපති පල්ලේගම හේමරතන හිමි පරීක්ෂාවට ලක් කිරීමෙන් අනතුරුව මෙම නියෝගය කර ඇත.
තවද සැකකාර පල්ලේගම හේමරතන හිමි නවලෝක පෞද්ගලික රෝහලේ සිට කොළඹ ජාතික රෝහලට මාරු කර යවන ලෙසටද කොටුව මහේස්ත්රාත්වරයා නියෝග කර ඇත.
දැනට රක්ෂිත බන්ධනාගාරගත කර සිටින අටමස්ථානාධිපති පල්ලේගම හේමරතන හිමි යළි රක්ෂිත බන්ධනාගාරගත කිරීමේ නියෝගයක් නිකුත් කිරීම අනුරාධපුර ප්රධාන මහේස්ත්රාත් සියපත් සසිඳු වික්රමරත්න විසින් ප්රතික්ෂේප කර ඇත.
මෙම සිද්ධියට අදාළ නඩුව පසුගිය (12) වනදා අනුරාධපුර ප්රධාන මහේස්ත්රාත් අධිකරණය හමුවේ යළි කැඳවූ අවස්ථාවේදී අනුරාධපුර ප්රධාන මහේස්ත්රාත්වරයා විසින් එය ප්රතික්ෂේප කර ඇත.
සැකකාර පල්ලේගම හේමරතන හිමි කොළඹ ප්රධාන මහේස්ත්රාත් අධිකරණයේ අංක 08 මහේස්ත්රාත්වරයාගේ නියෝගයකට අනුව (12) වැනිදා දක්වා රක්ෂිත බන්ධනාගාරගත කර ඇති බවත් හිමියන් එම දින අනුරාධපුර ප්රධාන මහේස්ත්රාත් අධිකරණය හමුවට ඉදිරිපත් කරන ලෙස නියෝග කර ඇති බව මහේස්ත්රාත්වරයා සඳහන් කර ඇත.
බන්ධනාගාර නිලධාරීන් පැවසුවද සැකකාර පල්ලේගම හේමරතන හිමි මැයි (12) වනදා දක්වා රක්ෂිත බන්ධනාගාරගත කර ඇති බවත් එම දින මෙම අධිකරණයට ඉදිරිපත් කරන ලෙස නියෝග කළ බව සඳහන් කොළඹ ප්රධාන මහේස්ත්රාත් අධිකරණයේ අංක 08 මහේස්ත්රාත්වරයාගේ නියෝගය තම අධිකරණයට මෙතෙක් ලැබී නැති බව සඳහන් කරයි.
තවද සැකකාර පල්ලේගම හේමරතන හිමියන් මෙම අධිකරණය ඉදිරියේ පෙනී නොසිටින පසුබිමක සැකකාර හිමි යළි රිමාන්ඩ් බන්ධනාගාරගත කිරීමේ නියෝගයක් නිකුත් කිරීමට තමාට නීතිමය හැකියාවක් නොමැති බවද මහේස්ත්රාත්වරයා සඳහන් කර ඇත.
එවැනි තත්ත්වයකදී පල්ලේගම හේමරතන හිමි යළි රක්ෂිත බන්ධනාගාරගත කිරීමේ නියෝගයක් නිකුත් කරන්නේ නම් එම නියෝගය දැනට පවතින තත්ත්වය අනුව නිකුත් කළ යුත්තේ, සැකකාර හිමියන් නිරීක්ෂණය කර මැයි (12) දක්වා බන්ධනාගාරගත කිරීමට නියෝගය ලබා දුන් මහේස්ත්රාත්වරයා විසින්ම බව අනුරාධපුර මහේස්ත්රාත්වරයා සඳහන් කර ඇත.
ඒ අනුව නඩුව එළැඹෙන (15) වන දින අනුරාධපුර ප්රධාන මහේස්ත්රාත් අධිකරණය හමුවේ යළි කැඳවීමටත් එදින විමර්ශනවල ප්රගතිය දැක්වෙන වාර්තාවක් අධිකරණය හමුවට ඉදිරිපත් කරන ලෙසට නිට්ටඹුව පොලීසියට නියෝග කළේය.
