Local news

අලුත් පරම්පරාවේ ප්‍රශ්න වලට සහ රටේ ආර්ථික ප්‍රශ්න වලට නායකත්වය දෙන්න පුළුවන් පුද්ගලයා නාමල් රාජපක්ෂ බව හිටපු පාර්ලිමේන්තු මන්ත්‍රී ජොන්ස්ටන් ප්‍රනාන්දු සඳහන් කරයි.

අද වනවිට ගම් මට්ටමින් පමණක් නොව, බන්ධනාගාර තුළ පවා කතා වන්නේ ඊළඟ ජනාධිපතිවරයා වන්නේ නාමල් රාජපක්ෂ බවද ජොන්ස්ටන් ප්‍රනාන්දු සඳහන් කරයි.

රටේ ජනතාවට වැඩි වශයෙන් වැඩ කළ, රටේ සංවර්ධනයට කටයුතු කළ නායකයා හිටපු ජනාධිපති මහින්ද රාජපක්ෂ බවත් ඔහු පරාජයට පත් නොකළේ නම්, රට අද පවතින තත්ත්වයට වඩා බෙහෙවින් ඉදිරියට ගොස් තිබෙන බවද ජොන්ස්ටන් ප්‍රනාන්දු සඳහන් කරයි.

එනිසා රට සංවර්ධනය කරන්නට සහ මහින්ද රාජපක්ෂ විසින් සිදුකළ වෙනස සිදු කිරීමට හැකි නායකයා වන්නේ නාමල් රාජපක්ෂ බවද ජොන්ස්ටන් ප්‍රනාන්දු සඳහන් කරයි.

කැස්බෑව ප්‍රදේශයේ ජන හමුවක් අමතමින් හිටපු මන්ත්‍රී ජොන්ස්ටන් ප්‍රනාන්දු මේ බව සඳහන් කරයි.

පාර්ලිමේන්තු මන්ත්‍රී ආචාර්ය හර්ෂ ද සිල්වාගේ ෆේස්බුක් සටහනට සමගි ජන බලවේග පක්ෂයෙන් ඉල්ලා අස්වී සිටින වැලිගම හිටපු නගරාධිපති සහ හිටපු ආසන සංවිධායක රෙහාන් ජයවික්‍රම ප්‍රතිචාර දක්වා ඇත.

සිය ෆේස්බුක් ගිණුමේ සටහනක් තබමින් ඔහු පෙන්වා දෙන්නේ මන්ත්‍රී ආචාර්ය හර්ෂ ද සිල්වාට වැඩිපුරම පහර දෙන්නේ පක්ෂය ඇතුලේම සිටින කණ්ඩායම් බවයි.

රෙහාන් ජයවික්‍රම ෆේස්බුක් ගිණුමේ සටහනක් තබමින් සඳහන් කළේ,

“ඔයාගේ මේ තියෙන post එකේ reactions විතරක් බලන්න Harsha de Silva. ඒකෙන් පේන්නේ සාම්ප්‍රදායික දේශපාලනඥයන්ට වැඩිය මිනිස්සුන්ට තාම ඔයා ගැන විශ්වාසයක් තියෙනවා කියලා.

අනිත් එක තමයි, ඔබතුමාට වැඩිපුරම ගහන්නේ පක්ෂය ඇතුළෙම ඉන්න සමහර කණ්ඩායම්. ඒ කාගේ උවමනාවටද කියන එක බබෙක් වගේ තේරුම් කරලා දෙන්න ඕන නෑ. සැබෑ තත්වය ඒකයි. ඒ ගැන දුකයි, කණගාටුයි, හැබැයි ඔය හැමදේම දන්න නිසා තමයි, කොන්ද කෙලින් තියාගෙන මම පක්ෂ දේශපාලනයෙන් එළියට බැස්සේ.

සජිත් ප්‍රේමදාස මහත්තයට තැන් තැන්වල පිටිපස්සෙන් බනින්නයි, දැක්කම දෙකට තුනට නැවෙන්නයි, ඕන තරම් මිනිස්සු තාම ඔය පක්ෂය ඇතුලේ ඉන්නවා. ඒ වගේ කට්ටියට ඉතින් මම අනුකම්පා කරනවා. තමන්ගේ මතයවත් දරාගන්න බැරි තැනක තමයි ඒගොල්ලෝ ඉන්නේ. කවද හරි දවසක, මේක බහුතර මතයකුත් වෙනවා. එතකොට පරක්කු වැඩියි.

ලංකාවට දැන් අවශ්‍ය වෙන්නේ වෙනස් විපක්ෂයක්. හැමදේටම විරුද්ධ වෙන්නැති, හොඳ දේට හොඳයි කියල කියන්න පුළුවන්, නරක දේ ඒ වගේම විවේචනය කරන්න පුළුවන් විපක්ෂයක්. ඒක තමයි මිනිස්සු බලාපොරොත්තු වෙන්නේ.

ජනතා සුබවාදී තීරණයක් ගන්න ඔයාට ශක්තිය ධෛර්යය ලැබේවා. සමහරවිට තනියම හරි හිටගන්න වෙයි. තමන්ගේ මතය වෙනුවෙන් මංගල සමරවීරත් තනියම තමයි එළියට බැස්සේ. ඒකට තමයි බය නැති දේශපාලනය කියන්නේ.”

මත්ද්‍රව්‍ය ජාවාරම්කරුවකු ලෙසින් සැලකෙන ‘ඩුබායි අසිතට’ නමැත්තාට අයත් බව පැවසෙන රන් පවුම් 105ක් පානදුර මහෙස්ත්‍රාත් අධිකරණය විසින් තහනම් කර ඇත.

තවද ඔහුට අයත් රුපියල් ලක්ෂ 70ක් පමණ වටිනා වෑන් රථයක් හා රුපියල් ලක්ෂ 10ක මුදලක්ද තහනම් කිරීමට අධිකරණය කටයුතු කර ඇත.

එම මුදල් හා රන් භාණ්ඩ ‘ඩුබායි අසිත’ නමැත්තා සිය ඥාතීන්ගේ නම් වලින් මිලදී ගෙන තිබූ බව සිදුකළ මූලික විමර්ශන වලදී අනාවරණය කරගෙන ඇත.

මධ්‍යම අපරාධ විමර්ශන කාර්යාංශයේ නීතිවිරෝධි වත්කම් විමර්ශන ඒකකය සිදුකළ කරුණු දැක්වීමකින් අනතුරුව මෙම නියෝගය ක්‍රියාත්මක කර ඇත.

අපරාධ පරීක්ෂණ දෙපාර්තමේන්තුවේ අධ්‍යක්ෂ, ජ්‍යෙෂ්ඨ පොලිස් අධික‍ාරී ශානි අබේසේකර නියෝජ්‍ය පොලිස්පති තනතුරට උසස් කිරීමට පරිපාලන අභියාචනා විනිශ්චයාධිකාරය ජාතික පොලිස් කොමිෂන් සභාව වෙත අද (13) නියෝග කර ඇත.

2026 වසරේ අගෝස්තු මස (25) දින සිට බලපැවැත්වෙන පරිදි මෙම උසස්වීම් ලබාදී ඇති අතර වැඩ තහනමට ලක් වූ දින සිට මේ දක්වා ඔහුට අහිමි වූ සියලුම හිඟ වැටුප් සහ දීමනා ගෙවීමටද තීන්දුව ලබාදී ඇත.

ශ්‍රී ලංකා පොලිස් ඉතිහාසයේ කීර්තිමත් නිළධාරියෙකු ලෙස සැළකෙන ශානි අබේසේකර මෙරට මෑත ඉතිහාසයේ සිදුවූ සංකීර්ණ අපරාධ පරීක්ෂණ රැසක් මෙහෙය වූ දක්ෂ නිළධාරියෙකි.

ලංකා ඛනිජ තෙල් නීතිගත සංස්ථාවට අයත් රුපියල් ලක්ෂ 61කට අධික මුදලක් සාවද්‍ය ලෙස පරිහරණය කළ බවට චෝදනා ලැබ සිටින හිටපු අමාත්‍ය අනුර ප්‍රියදර්ශන යාපා ඇතුළු විත්තිකරුවන් හත්දෙනෙකුට එරෙහි නඩුව කොළඹ මහාධිකරණ විනිසුරු උදේශ් රණතුංග ඉදිරියේ අද (13) කැඳවනු ලැබූවේය.

විත්තිකාර හිටපු අමාත්‍ය අනුර ප්‍රියදර්ශන යාපා සහ ඔහුගේ බිරිඳ ඇතුළු විත්තිකරුවන් පිරිස අධිකරණය හමුවේ පෙනී සිටියේය.

රුපියල් ලක්ෂ 61කට අධික මුදලක් සාවද්‍ය ලෙස පරිහරණය කළ බවට චෝදනා ලැබ සිටින අනුර ප්‍රියදර්ශන යාපා ඇතුළු විත්තිකරුවන් හත්දෙනෙකුට එරෙහි නඩුව වැඩිදුර විභාගය සඳහා ලබන ජූනි මස (19) වනදා කැඳවීමට කොළඹ මහාධිකරණය අද (13) නියෝග කළේය.

පසුගිය 2014 වසරේ දෙසැම්බර් මස (26) වනදා සහ 2015 ජනවාරි මස (26) වනදා අතර කාලසීමාව තුළ ගංවතුර ආධාර සපයන බව පවසමින් ලංකා ඛනිජ තෙල් නීතිගත සංස්ථාවට අයත් රුපියල් 6,146,110ක මුදලක් අනීතික ලෙස වැය කරමින් මූල්‍ය වංචාවක් සිදුකර ඇති බවට නීතිපතිවරයා විසින් අධිචෝදනා ගොනුකර ඇත.

ශ්‍රී ලංකන් ගුවන් සමාගමට එයාර් බස් ගුවන් යානා මිලදී ගැනීමේදී සිදුකළ වංචාවට සම්බන්ධ සෙසු සැකකරුවන් මේ වනවිට විදෙස් රටවල සිටියි.

ඒ අනුව එයාර් බස් ගුවන් යානා මිලදී ගැනීමේදී සිදුකළ වංචාවට සම්බන්ධ සෙසු සැකකරුවන් විදේශ රටවල සිට මෙරටට ගෙන්වා ගැනීමේ කටයුතු සැලසුම් කරගෙන යන බව වාර්තා වේ.

මේ සිද්ධිය සම්බන්ධයෙන් මියගිය කපිල චන්ද්‍රසේනගේ බිරිඳ වන ප්‍රියංකා නියෝමාලි විජේනායක සහ චමල් රාජපක්ෂගේ පුත්‍රයා වන ශමින්ද්‍ර රාජපක්ෂ සහ නිමල් පෙරේරා නැමැත්තෙකු අත්අඩංගුවට ගැනීමට අල්ලස් කොමිසමට අවශ්‍යව ඇත.

එම සැකකරුවන් අත්අඩංගුවට ගැනීම සඳහා අධිකරණය නිකුත් කළ වරෙන්තුවට අනුව ජාත්‍යන්තර රතු වරෙන්තු ලබා ගැනීමට අවශ්‍ය කටයුතු මේ වනවිට සිදුකරමින් පවතින බව වාර්තා වේ.

මෙම සිද්ධිය සම්බන්ධයෙන් රිමාන්ඩ් බන්ධනාගාරයේ සිට පැමිණීමෙන් පසු කපිල චන්සේනගේ බිරිඳ ඕස්ට්‍රේලියාවට පලා ගොස් ඇතැයි වාර්තා වන අතර ඇය කපිල චන්ද්‍රසේනගේ අවමංගල්‍ය උත්සවයටද සහභාගී වීමට මෙරටට පැමිණ නැත.