Local news

පවතින අධික වර්ෂාපතනයත් සමඟ ඇති වූ නායයෑම් තත්ත්වයක් නිසා ගිනිගත්හේන පොල්පිටිය ප්‍රදේශයේ නිවසක් මතට පස් කන්දක් කඩා වැටීමෙන් අනතුරට ලක්ව අතුරුදන්ව සිටි පුද්ගලයින් සිව්දෙනාගේම මෘත ශරීර සොයාගත් බව පොලිසිය සඳහන් කරයි.

අනතුරින් අතුරුදහන් වූවන් සෙවීම සඳහා ක්‍රියාත්මක කළ සෙවීම් සහ ගලවා ගැනීමේ මෙහෙයුම් වලදී පළමුවෙන් කාන්තාවකගේ සිරුර සොයාගත් අතර අනතුරුව තවත් කාන්තාවන් දෙදෙනෙකුගේ සහ පිරිමි පුද්ගලයෙකුගේ සිරුරු සොයාගත් බව පොල්පිටිය පොලීසිය සඳහන් කරයි.

මහර බන්ධනාගාර ගැටුමෙන් මියගිය රැඳවියාගේ මෘත ශරීරය පිළිබඳ පශ්චාත් මරණ පරීක්ෂණය අද (03) දින සිදුකර ඇත.

විශේෂ අධිකරණ වෛද්‍ය කණ්ඩායමක් විසින් රාගම රෝහල් මෘත ශරීරාගාරයේදී මරණ පරීක්ෂණය සිදුකර ඇති අතර එහිදී මරණයට හේතුව අධික ලෙස රුධිරය වහනය වීම බවට තීන්දු කර ඇති බව වාර්තා වේ.

පශ්චාත් මරණ පරීක්ෂණයෙන් අනතුරුව, අදාළ රැඳවියාගේ මෘත ශරීරය අද දින සවස වත්තල ප්‍රදේශයේ පිහිටි ඔහුගේ ඥාතීන් වෙත භාරදී ඇත.

විදුලි ගාස්තු සංශෝධනය ගැන ශ්‍රී ලංකා මහජන උපයෝගිතා කොමිෂන් සභාව දැනුම්දීමක් කර ඇත.

ඒ අනුව 2026 වසරේ තෙවන කාර්තුව සදහා විදුලි ගාස්තු සංශෝධනයක් අවශ්‍ය නොවන බවට ශ්‍රී ලංකා මහජන උපයෝගිතා කොමිෂන් සභාව තීරණය කර ඇත.

ශ්‍රී ලංකා මහජන උපයෝගිතා කොමිෂන් සභාව, ජාතික පද්ධති මෙහෙයුම් සමාගම (NSO) තෙවන කාර්තුව සඳහා ඉදිරිපත් කළ විදුලි සැපයුම් පිරිවැය සමාලෝචනය කිරීමෙන් අනතුරුව මෙම තීරණය ගෙන ඇත. 

සියලු ගැළපීම් කිරීමෙන් අනතුරුව 2026 තෙවන කාර්තුවේදී විදුලිය සැපයීම සදහා වන පිරිවැය ඉහළ යාම සියයට 0.3 කට (රුපියල් මිලියන 417කට) සීමාවී ඇති බව ඇස්තමේන්තු කළ බව මහජන උපයෝගීතා කොමිෂන් සභාව සඳහන් කරයි.

එනිසා තෙවන කාර්තුව සඳහා විදුලි ගාස්තු සංශෝධනයක් අවශ්‍ය නොවන බවත් දෙවන කාර්තුවේ පැවති ගාස්තු ක්‍රමය මෙම කාර්තුව තුළදී ද බලාත්මක කරන බව සඳහන් කරයි.

පාස්කු ත්‍රස්ත ප්‍රහාර සිද්ධිය සම්බන්ධයෙන් සිදු කරන විමර්ශන වලට අදාළව තමන්ව අත්අඩංගුවට ගෙන රඳවා ගැනීම වළක්වාලන නියෝගයක් නිකුත් කරන ලෙස ඉල්ලා හිටපු ජනාධිපති ගෝඨාභය රාජපක්ෂ ඉදිරිපත් කළ රිට් පෙත්සම සලකා බැලීම අවසන් කළේය.

ඒ අනුව හිටපු ජනාධිපති ගෝඨාභය රාජපක්ෂ ඉදිරිපත් කළ රිට් පෙත්සම සලකා බැලීම අවසන් කළ අභියාචනාධිකරණය එම පෙත්සම විභාගයට ගැනීමට අවසර දෙන්නේ ද.? නැද්ද.? යන නියෝගය සැප්තැම්බර් මස (22) වනදා ප්‍රකාශයට පත් කරන බව නිවේදනය කළේය.

මෙම නඩුකරයට අදාළ ලිඛිත දේශන තිබේ නම් ඒවා මේ මස (31) වනදාට පෙර ගොනුකරන ලෙසද විනිසුරු මඩුල්ල නියම කර ඇත.

අඛණ්ඩ වර්ෂාපතනය සහ හදිසි කාලගුණ තත්ත්වයන් සැලකිල්ලට ගනිමින් පේරාදෙණිය විශ්වවිද්‍යාලයේ සියලු පීඨවල අධ්‍යයන කටයුතු සහ විභාග නැවත දැනුම් දෙනතුරු තාවකාලිකව අත්හිටුවීමට පේරාදෙණිය විශ්ව විද්‍යාල පාලන අධිකාරිය තීරණය කර ඇත.

ඒ අනුව විශ්වවිද්‍යාලයේ අධ්‍යයන කටයුතු තාවකාලිකව නවතා දැමුණත් එහි අත්‍යාවශ්‍ය සේවාවන් අඛණ්ඩව පවත්වාගෙන යන බව පේරාදෙණිය විශ්වවිද්‍යාලයේ උපකුලපතිවරයා සඳහන් කරයි.

තම ගම් ප්‍රදේශ වෙත ආරක්ෂිත ගමන් කළ හැකි සිසුන්ට එසේ පිටත්ව යා හැකි බවත් නිවෙස් වෙත යාමට නොහැකි සිසුන්ට සරසවි මැදුර නේවාසිකාගාරය හැර විශ්ව විද්‍යාල නේවාසිකාගාර පාලනය දැනුවත් කර රැඳී සිටිය හැකි බව සඳහන් කරයි.

අවදානම් සහිත පෞද්ගලික නේවාසික ස්ථාන වල රැඳී සිටින සිසුන් ආරක්ෂාවට විශ්වවිද්‍යාල නේවාසිකාගාර වෙත පැමිණෙන්නේ නම් ඔවුන් පිළිගෙන අවශ්‍ය වාර්තා පවත්වා ගන්නා ලෙස නේවාසිකාගාර පාලන අධිකාරියට උපදෙස් ලබාදී ඇත.

ශ්‍රී ලංකාව ජාත්‍යන්තර තෙල් බෙදාහැරීමේ මධ්‍යස්ථානයක් බවට පත්කර විශාල ආද‍ායමක් උපයා ගැනීමේ දැවැන්ත ව්‍යාපෘතියක් ආරම්භ කර ඇත.

ත්‍රිකුණාමලය තෙල් ටැංකි පද්ධතිය කේන්ද්‍ර කරගනිමින් මෙම දැවැන්ත ව්‍යාපෘතිය ආරම්භ කිරීමට නියමිතව ඇත.

මෙම නව සංවර්ධන සැලැස්ම යටතේ ලංකා තෙල් සංස්ථාව සහ ඉන්දියන් ඔයිල් සමාගම ඒකාබද්ධව පවත්වාගෙන යන ටැංකි 81න් 29ක් නවීකරණය කිරීමට යෝජිතය.

මේ වන විටත් තෙල් සංස්ථාව සතු තෙල් ටැංකි දෙකක් අලුත්වැඩියා කර අවසන් කර ඇති අතර තවත් ටැංකි තුනක් ප්‍රතිසංස්කරණය කිරීම සඳහා ටෙන්ඩර් කැඳවා ඇත.

වරායේ සිට විශාල නැව් මඟින් රැගෙන එන තෙල් මෙම ටැංකි වෙත සම්ප්‍රේෂණය කිරීම සඳහා නව නළ පද්ධතියක් ස්ථාපිත කිරීමට මූලික කටයුතු සූදානම් කර ඇත.

වරාය අධිකාරිය සතු බෝයාවේ සිට මෙම නළ පද්ධතිය එළීම සඳහා ප්‍රීමා සමාගම ඇතුළු අදාළ අනෙකුත් පාර්ශ්වයන්ගේ එකඟතාව හිමිව ඇති බව වාර්තා වේ.

මෙම නව සංවර්ධන සැලැස්ම හරහා ත්‍රිකුණාමලය ප්‍රදේශය ආර්ථිකමය වශයෙන් ශක්තිමත් කිරීමටත් ශ්‍රී ලංකාව තෙල් බෙදාහැරීමේ මධ්‍යස්ථානයක් බවට පත් කිරීම රජයේ අපේක්ෂාව වේ.

අද (03) දින මහජන ආරක්ෂක හා පාර්ලිමේන්තු කටයුතු අමාත්‍යාංශය යටතේ ඇති විෂය පථයන්ට අදාළ රාජ්‍ය ආයතන සම්බන්ධව මහජන පැමිණිලි ලබාදීමේ ‘118 මහජන ආරක්ෂක සේවා මැදිරිය’ විවෘත කළේය.

මහජන ආරක්ෂක නියෝජ්‍ය අමාත්‍ය සුනිල් වටගලගේ ප්‍රධානත්වයෙන් මහජන ආරක්ෂක අමාත්‍යංශයේදී විවෘත කළ අතර මෙහිදී 118 ගාස්තු විරහිත ඇමතුම් සහ 118 pubsec.gov.lk හරහා මාර්ගගත මහජන පැමිණිලි ඉදිරිපත් කිරීමේ හැකියාව සලසා දී ඇත.

මහජන ආරක්ෂක හා පාර්ලිමේන්තු කටයුතු අමාත්‍යාංශයේ විෂය පථයට අයත් වන ආගමන විගණන දෙපාර්තමේන්තුව, අන්තරායක ඖෂධ පාලක ජාතික මණ්ඩලය පුනරුත්තාපන කොමසාරිත් ජනරාල් කාර්යාලය, සිවිල් ආරක්ෂක දෙපාර්තමේන්තුව යන ආයතන වලට අදාළ තොරතුරු සහ මහජන පැමිණිලි මෙම 118 අංකයට ඉදිරිපත් කිරීමට හැකියාව ඇත.

පතුල පහත් මෙට්‍රෝ (Metro) බස් රථවල ගමන් ගන්නා මගීන්ට සති අන්තයේ සහන පැකේජයක් ලබාදීමට තීරණය කර ඇති බව වාර්තා වේ.

ඒ අනුව මෙට්‍රෝ (Metro) බස් රථවල සති අන්තයේ ගමන් ගන්නා මගීන්ට රුපියල් 799ක සහන පැකේජයක් හඳුන්වාදීමටත් වයස අවුරුදු 12ට අඩු ළමුන්ගෙන් මුදල් අය නොකිරීමට ද තීරණය කර ඇත.

මෙරට පොදු ප්‍රවාහනයේ නව පරිවර්තනයකට තවත් ශක්තිමත් පියවරක් ලෙස පතුල පහත් මෙට්‍රෝ (Metro) බස් රථ 104ක් පසුගියදා මෙරටට රැගෙන ආවේය.

රටේ ජනතාවට සුවපහසු, ආරක්ෂිත සහ විශ්වාසනීය පොදු ප්‍රවාහන සේවාවක් වෙනුවෙන් මෙරටට ආනයනය කළ මෙට්‍රෝ බස් රථ 104 සැප්තැම්බර් මාසයේ සිට ප්‍රවාහනයට යෙදවීමට නියමිතය.