Local news

අපරාධ පරීක්ෂණ දෙපාර්තමේන්තුවේ අධ්‍යක්ෂවරයාගේ නම භාවිතා කරමින් ව්‍යාජ ලෙස සකස් කළ විද්‍යුත් තැපැල් පණිවිඩයක් සම්බන්ධයෙන් ශ්‍රී ලංකා පොලීසිය මහජනතාවට දැනුම්දීමක් කර ඇත.

අධ්‍යක්ෂ අපරාධ පරීක්ෂණ දෙපාර්තමේන්තුව ශානි අබේසේකර යන නාමය භාවිතා කරමින්, කොළඹ 07 ලිපිනය සහ “NationWide Cloud Protection 24/7” වැනි ව්‍යාජ තොරතුරු ඇතුළත් කරමින් මෙම පණිවිඩ මහජනයා වෙත යොමු කර ඇති බව පොලීසිය සඳහන් කරයි.

මෙම email පණිවිඩය කිසිසේත්ම අපරාධ පරීක්ෂණ දෙපාර්තමේන්තුව මඟින් යොමු කරනු ලැබූ විද්‍යුත් තැපැල් පණිවිඩයක් නොවන බව අපරාධ පරීක්ෂණ දෙපාර්තමේන්තුව විසින් දැනුම් දී ඇත.

[email protected], [email protected] යන විද්‍යුත් ලිපිනයන් මඟින් යොමු කර ඇති ඉහත ව්‍යාජ විද්‍යත් පණිවිඩ මහජනතාව රැවටීම, මුදල් වංචා කිරීම හෝ පුද්ගලික තොරතුරු ලබාගැනීම යන වංචනික ක්‍රියාවන් සිදුකිරීමේ අරමුණින් යොමු කර ඇති බවට පොලීසිය සැකපල කරයි.

ඉහත පණිවිඩය යොමු කරනු ලැබූ පුද්ගලයන් හෝ කණ්ඩායම් පිළිබඳ තොරතුරු අනාවරණය කර ගැනීම හා ඒ හා සම්බන්ධව නීතිමය පියවර ගැනීම සඳහා අපරාධ පරීක්ෂණ දෙපාර්තමේන්තුව මගින් විමර්ශන ආරම්භ කර ඇත.

ආගමන විගමන දෙපාර්තමේන්තුව ගුවන් ගමන් බලපත්‍ර නිකුත් කිරීමේ සේවාවන් තාවකාලිකව අත්හිටුවීමට කටයුතු කර ඇත.

ආගමන විගමන දෙපාර්තමේන්තුවේ පද්ධතියේ ඇති වූ තාක්ෂණික දෝෂයක් හේතුවෙන් මෙම තීරණය ගෙන ඇත.

කෙසේ වෙතත් පද්ධතිය නැවත යථා තත්ත්වයට පත්වූ වහාම මෙම සේවාවන් නැවත ක්‍රියාත්මක කරන බව ආගමන විගමන දෙපාර්තමේන්තුව සඳහන් කරයි.

මේ වනවිට පද්ධතිය යථා තත්ත්වයට පත් කිරීමට අවශ්‍ය කටයුතු කරමින් සිටින බවද ආගමන විගමන දෙපාර්තමේන්තුවේ මාධ්‍ය ප්‍රකාශවරයා සඳහන් කරයි.

ආරක්‍ෂක නියෝජ්‍ය අමාත්‍ය, මේජර් ජෙනරල් අරුණ ජයසේකර (විශ්‍රාමික) සහ සවුදි අරාබි රාජ්‍යයේ ආරක්‍ෂක නියෝජ්‍ය අමාත්‍ය, අතිගරු Abdulrahman bin Ayyaf Al-Mugrin කුමරු අතර ද්විපාර්ශ්වික හමුවක් පසුගිය (09) වනදා සවුදි රාජ්‍යයේ ආරක්ෂක අමාත්‍යාංශයේදී පැවැත්විණි.

නියෝජ්‍ය අමාත්‍ය මේජර් ජෙනරල් ජයසේකර, සවුදි අරාබියේ රියාද් නුවර පැවැත්වෙන ලෝක ආරක්ෂක ප්‍රදර්ශනය සඳහා සහභාගී වීමට ගිය නිල සංචාරය අතරතුරදී මෙම හමුව පැවැත්විණ.

එහිදී දෙපාර්ශ්වයේ නිලධාරීන් දෙරට අතර පවතින සුහදශීලී ද්විපාර්ශ්වික සබඳතා යළි තහවුරු කළ අතර, ආරක්ෂක සහයෝගීතාව තවදුරටත් ශක්තිමත් කිරීමට සහ දිගු කාලීන සබඳතා වර්ධනය කර ගැනීමට ඇති අවස්ථා පිළිබඳව ද අවධානය යොමු කළහ.

එහිදී වසර ගණනාවක් පුරාවට සවුදි අරාබිය විසින් ලබා දුන් සාර්ථක සහයෝගීතාව අගය කළ ශ්‍රී ලංකා දූත පිරිස, එම සහයෝගීතාව ඉදිරියටත් අඛණ්ඩව ලබා ගැනීම පිළිබඳ අපේක්ෂා පළ කළේය.

දෙරටේ සන්නද්ධ හමුදාවන් අතර සම්බන්ධ හමුදා පුහුණු අවස්ථා පුළුල් කිරීම, වෘත්තීයමය හුවමාරු වැඩසටහන් සහ ව්‍යුහාත්මක දැනුම බෙදාහදා ගැනීමේ මුලපිරීම් පිළිබඳව ද මෙහිදී පුළුල් වශයෙන් සාකච්ඡා කෙරිණි.

එමෙන්ම, සමුද්‍රිය කලාප පිළිබඳ දැනුවත්භාවය (Maritime Domain Awareness) ඉහළ නැංවීම සහ සමුද්‍රීය ආරක්ෂාවේ ඇති උපායමාර්ගික වැදගත්කම පිළිබඳ දෙපාර්ශවයම පිළිගත්හ.

තවද, මත්ද්‍රව්‍ය ජාවාරම සහ නීතිවිරෝධී භාණ්ඩ ප්‍රවාහනය කිරීම වැනි දේශසීමා ඉක්මවා යන තර්ජන පිළිබඳව ඔවුන් සිය අන්‍යොන්‍ය සැලකිල්ල යොමු කළ අතර, මෙම අභියෝග වලට එරෙහිව වඩාත් ඵලදායී ලෙස සටන් කිරීම සඳහා ද්විපාර්ශ්වික සම්බන්ධීකරණය සහ තොරතුරු හුවමාරුව ශක්තිමත් කිරීමේ අවශ්‍යතාව පිළිබඳව ද එකඟතාවන්ට එළඹෙන ලදි.

තවද, නියමුවන් රහිත ගුවන් යානා (UAVs) භාවිතය, නිරවද්‍ය බුද්ධි තොරතුරු පද්ධති සහ නිරීක්ෂණ හැකියාවන් ඇතුළු නූතන ආරක්ෂක තාක්ෂණික ක්‍රමවේද සහ විකාශනය වන මෙහෙයුම් සංකල්ප පිළිබඳව ද මෙම හමුවේදී අවධානය යොමු විය. ආරක්ෂක ක්ෂේත්‍රයේ නවීන තාක්ෂණික දියුණුව සමඟ සමගාමීව ඉදිරියට ගමන් කිරීමේ වැදගත්කම දෙපාර්ශවයම අවධාරණය කළහ.

මීට අමතරව, දෙරට අතර ආරක්ෂක සහයෝගීතාව ආයතනික මට්ටමින් ස්ථාපිත කිරීමේ අරමුණින්, ද්විපාර්ශ්වික ආරක්ෂක සාකච්ඡා හෝ මාණ්ඩලික සාකච්ඡා (Staff Talks) සංවිධානය කිරීම සහ ව්‍යුහාත්මක ධාරිතා වර්ධන වැඩසටහන් ක්‍රියාත්මක කිරීමේ හැකියාව පිළිබඳව ද සාකච්ඡා පවත්වන ලදි.

ආපදා සහන සහ මානුෂීය ආධාර සැපයීමේ ක්‍රියාවලිය සම්බන්ධයෙන් වන සහයෝගීතාව පිළිබඳව ද මෙහිදී ප්‍රධාන වශයෙන් කරුණු සාකච්ඡා විය. විශේෂයෙන්ම ත්‍රිවිධ හමුදාව අතර සහයෝගීතාව තුළින් ආපදා ප්‍රතිචාර දැක්වීමේ සම්බන්ධීකරණ පද්ධති ශක්තිමත් කිරීමේ වැදගත්කම සහ ආපදා සඳහා පෙර සුදානම මෙන්ම සමස්තක්‍රියාවලියේ ඵලදායීතාව ඉහළ නැංවීම සඳහා මෙහෙයුම් අවශ්‍යතා හඳුනා ගැනීම පිළිබඳව දෙපාර්ශවයම කරුණු පෙන්වා දුන්හ.

අයිස් මත්ද්‍රව්‍ය සන්තකයේ තබාගැනීම සම්බන්ධයෙන් අත්අඩංගුවට ගත් රත්මලාන ප්‍රදේශයේ පදිංචි සැකකාරියක් රැඳවුම් නියෝග මත රඳවා තබාගෙන ප්‍රශ්න කර ඇත.

ඒ අනුව සැකකාරියකගෙන් අනාවරණය වූ තොරතුරු මත නිවසක සඟවා තිබු අයිස් මත්ද්‍රව්‍ය, ගිනි අවියක් හා ව්‍යාජ අංක තහඩු ඇතුළු දේපොළ රැසක් සොයා ගැනීමට ගල්කිස්ස පොලිස් නිලධාරීන් සමත්වී ඇත.

එම නිවසේ තිබී, අයිස් මත්ද්‍රව්‍ය ග්‍රෑම් 10යි මිලිග්‍රෑම් 260ක්, මුදල් රුපියල් ලක්ෂ 08ක්, ගිනි අවියක්, ජීව පතොරමක්, යතුරුපැදි සඳහා භාවිත කරන ව්‍යාජ වාහන අංක තහඩු 08ක්, ත්‍රිරෝද රථ ව්‍යාජ අංක තහඩු 04ක්, මෝටර් රථ ව්‍යාජ අංක තහඩු 18ක්, ඉලෙක්ට්‍රොනික තරාදියක්, රන් මාල 02ක්, රන් වළල්ලක්, රන් මුදුවක් පොලිස් භාරයට ගෙන ඇත.

ඉහත දේපොළ සංවිධානාත්මක අපරාධ හා මත්ද්‍රව්‍ය ජාවාරම්කරුවෙකුගෙන් මෙම සැකකාරියට ලැබී ඇති බවට දැනට සිදුකරන ලද විමර්ශනයේදී අනාවරණය වී ඇත. 

ත්‍රීරෝද රථ රියැදුරෙකුට සවලකින් පහරදුන් බව කියන සිද්ධියක් සම්බන්ධයෙන් වැලිකඩ පොලිසිය මගින් අත්අඩංගුවට ගෙන අධිකරණයට ඉදිරිපත් කළ නිරූපණ ශිල්පිණී පියුමි හංසමාලිගේ පුත්‍රයා ඇතුළු සැකකරුවන් හය දෙනෙකු හඳුනා ගැනීමේ පෙරට්ටුවකට ඉදිරිපත් කරන තෙක් එළඹෙන (16) දින දක්වා රක්ෂිත බන්ධනාගාර ගත කරන ලෙස කොළඹ අතිරේක මහේස්ත්‍රාත් නුවන් කෞශල්‍ය අද (11) නියෝග කළේය.

පියුමි හංසමාලිගේ පුත්‍රයාගේ හිතවතෙකු මීට මාස කීපයකට ඉහතදී යතුරුපැදියක නැගී රාජගිරිය ප්‍රදේශය හරහා යමින් සිටියදී ත්‍රිරෝද රථයක ගැටී අනතුරක් සිදුව ඇති බවත් සිද්ධියෙන් පසු එම ස්ථානයට පැමිණි සැකකරුවන් පිරිස ත්‍රිරෝද රථ රියදුරුට පහරදී ඇති බවට මූලික විමර්ශන වලදී කරුණු අනාවරණය වන බවද පොලිසිය අධිකරණයට දැන්වීය.

පහර කෑමට ලක්වූ ත්‍රි රෝද රථ රියැදුරා වැලිකඩ පොලිසියට කරන ලද පැමිණිල්ලක් අනුව සැකකරුවන් පිරිස අත්අඩංගුවට ගෙන අධිකරණය වෙත ඉදිරිපත් කළ අතර එම පහර කෑමට ලක්වූ පුද්ගලයා කොළඹ ජාතික රෝහලට ඇතුළත්ව ප්‍රතිකාර ලබා ඇති බවද පොලිසිය අධිකරණයට දැන්වීය.

ත්‍රිකුණාමලය නගරයේ වෙරළ ආරක්ෂක කලාපය තුළ අනවසර කුටියක් ඉදිකර බුදුපිළිමයක් තැන්පත් කිරීමේ චෝදනාව සම්බන්ධයෙන් පූජ්‍ය බලංගොඩ කස්සප හිමියන් සහ භික්ෂුන් වහන්සේ සිව්නමක් ඇතුළු සැකකරුවන් 10 දෙනෙකු අත්අඩංගුවට ගෙන රක්ෂිත බන්ධනාගාර ගත කළේය.

ඒ අනුව රක්ෂිත බන්ධනාගාරගත කර සිටි පූජ්‍ය බලංගොඩ කස්සප හිමියන් ඇතුළු සැකකරුවන් 10 දෙනා සම්බන්ධයෙන් ඇප ඉල්ලීම අද (11) දින ත්‍රිකුණාමලය මහාධිකරණය හමුවේ සලකා බැලුවේය.

අනතුරුව රක්ෂිත බන්ධනාගාරගත කර සිටි පූජ්‍ය බලංගොඩ කස්සප හිමියන් ඇතුළු සැකකරුවන් 10 දෙනා ඇප මත මුදාහරින ලෙසට ත්‍රිකුණාමලය මහාධිකරණය නියෝග කර ඇත.

හිටපු ජනාධිපති රනිල් වික්‍රමසිංහට බ්‍රිතාන්‍යයේ පුද්ගලික සංචාරයක නිරත වීම සඳහා රුපියල් ලක්ෂ 166කට අධික මුදලක් අනුමත කිරීම තුළින් එම වරදට ආධාර අනුබල ලබාදීම සම්බන්ධයෙන් හිටපු ජනාධිපති ලේකම් සමන් ඒකනායක රක්ෂිත බන්ධනාගාරගත කළේය.

රුපියල් ලක්ෂ 166කට අධික රජයේ මුදල් සාවද්‍ය පරිහරණය කළ බවට චෝදනා කරමින් හිටපු ජනාධිපති රනිල් වික්‍රමසිංහට එරෙහිව ඉදිරිපත් කර තිබෙන නඩුවේ දෙවන සැකකරු ලෙස හිටපු ජනාධිපති ලේකම් සමන් ඒකනායක නම් කර ඇත.

ඒ අනුව රක්ෂිත බන්ධනාගාරගත කර සිටින හිටපු ජනාධිපති ලේකම් සමන් ඒකනායක අද (11) දිනයේ කොටුව මහෙස්ත්‍රාත් අධිකරණය හමුවට ඉදිරිපත් කළේය.

අපරාධ පරීක්ෂණ දෙපාර්තමේන්තුව වෙනුවෙන් පෙනී සිටි අතිරේක සොලිසිටර් ජෙනරාල් දිලීප පිරිස් සහ විත්තිය වෙනුවෙන් පෙනී සිටි ජනාධිපති නීතිඥ කාලිංග ඉන්දතිස්ස ඉදිරිපත් කළ කරුණු සලකා බැලීමෙන් අනතුරුව සමන් ඒකනායක පෙබරවාරි මස (18) වනදා දක්වා තවදුරටත් රක්ෂිත බන්ධනාගාර ගත කරන ලෙසට කොටුව මහේස්ත්‍රාත් අධිකරණය නියෝග කළේය.