Local news

රාමඤ්ඤ මහා නිකායේ දකුණු පළාතේ ප්‍රධාන සංඝනායක ධුරයෙන් ආචාර්ය ඕමල්පේ සෝභිත හිමියන් නිල වශයෙන් ඉල්ලා අස්වී ඇත.

ආචාර්ය ඕමල්පේ සෝහිත හිමියෝ පසුගිය 2012 වසරේ සිට වසර 14 කාලයක් රාමඤ්ඤ මහා නිකායේ දකුණු පළාතේ ප්‍රධාන සංඝනායක ධුරයේ කටයුතු කළහ.

සිරිමංගල පිරිවෙන් විහාරස්ථානයේ පසුගියදා පැවැති රාමඤ්ඤ මහා නිකායේ දකුණු පළාත් මහා සංඝ සභාවේ විශේෂ රැස්වීමකදී සෝහිත හිමියෝ සිය ඉල්ලා අස්වීම නිල වශයෙන් ප්‍රකාශයට පත් කළහ.

2025 සාමාන්‍ය තොරතුරු තාක්ෂණ (GIT) විභාගයේ ප්‍රතිඵල ශ්‍රී ලංකා විභාග දෙපාර්තමේන්තුව විසින් අද (20) දින නිකුත් කර ඇත.

දිවයින පුරා පිහිටි විභාග මධ්‍යස්ථාන 1,669කදී සහ සම්බන්ධීකරණ මධ්‍යස්ථාන 325ක අධීක්ෂණය යටතේ මෙම විභාගය පැවැත්වුණි.

අයදුම්කරුවන්ට තමන්ගේ විභාග අංකය නිවැරදිව ඇතුළත් කිරීමෙන් විභාග දෙපාර්තමේන්තුවේ නිල වෙබ් අඩවි වන http://www.doenets.lk සහ http://www.results.exams.gov.lk වෙත පිවිස ප්‍රතිඵල ලබාගත හැකිය.

සිය පළමු ඩෙංගු එන්නත (Vaccine) ඉන්දියාව අනුමත කරගෙන ඇති අතර ලෝක සෞඛ්‍ය සංවිධානය විසින් ඩෙංගු බහුලව පවතින කලාප සඳහා මෙම එන්නත නිර්දේශ කර ඇත.

ඉන්දියාවේ ඖෂධ පාලක ජෙනරාල් විසින් මෙම ‘QDENGA’ ඩෙංගු එන්නත භාවිතය සඳහා අවසරය ලබාදී ඇති අතර මෙය මිලිලීටර් 0.5ක එන්නත් මාත්‍රා දෙකක් ලෙස මාස තුනක කාලයක් ලබාදීම සිදු කරයි.

මෙම නව එන්නත වයස අවුරුදු 4 සිට 60 දක්වා පුද්ගලයින් සඳහා අනුමත කර ඇති අතර මීට පෙර ඩෙංගු වැළඳී තිබුණද, නොතිබුණද මෙය ලබාගත හැකි බවද සඳහන් කරයි.

මෙම ‘QDENGA’  එන්නත ලෝක සෞඛ්‍ය සංවිධානයේ පූර්ව සුදුසුකම් ලබා ඇති අතර එමඟින් ජාත්‍යන්තර ගුණාත්මකභාවය, ආරක්ෂාව සහ ඵලදායීතාවය තහවුරු කර ඇත.

2022 සිට ‘QDENGA’ ඩෙංගු එන්නත රටවල් 43ක අනුමත කර ඇති අතර ගෝලීය වශයෙන් මාත්‍රා මිලියන 32කට වඩා බෙදා හැර ඇත. 

මේ දිනවල වෙළඳපොළේ මාළු මිල ගණන් යළිත් ඉහළ ගොස් ඇති බව වාර්තා වේ.

සිල්ලර වෙළඳපොළේ තලපත් කිලෝවක් රුපියල් 2,600කට, කෙලවල්ලා රුපියල් 2,100කට, සාලයා රුපියල් 1,100කට, හුරුල්ලා රුපියල් 1,300කට අලෙවි වන බව පාරිභෝගිකයින් සඳහන් කරයි.

තවද, පරා කිලෝවක් රුපියල් 2,100කට, හැඩැල්ලා රුපියල් 1,800 කට, ලින්නා රුපියල් 1,000 කට, අලගොඩුවා රුපියල් 1,300කට සහ ඉස්සා රුපියල් 2,100කට අලෙවි වන බව පාරිභෝගිකයින් සඳහන් කරයි.

ශ්‍රී ලංකන් ගුවන් සමාගම සඳහා ගුවන් යානා 10ක් මිලදී ගැනීමේදී සිදුවූ බව කියන අල්ලස් සිද්ධිය සම්බන්ධයෙන් විමර්ශනය කිරීම සඳහා අල්ලස් හෝ දූෂණ චෝදනා විමර්ශන කොමිෂන් සභාවේ සහ අපරාධ පරීක්ෂණ දෙපාර්තමේන්තුවේ නිලධාරීන්ගෙන් සමන්විත ඒකාබද්ධ විශේෂ පොලිස් කණ්ඩායමක් ඕස්ට්‍රේලියාව බලා පිටත්ව යාමට නියමිතව ඇත.

ගනුදෙනුවට අදාළ අල්ලස් මුදල් හුවමාරු වූ බවට සැක කෙරෙන බැංකු ගිණුම් හිමිකරුවන් සහ ඕස්ට්‍රේලියාවේ පදිංචිව සිටින සැකකරුවන් මෙන්ම සාක්ෂිකරුවන්ගෙන් ප්‍රකාශ සටහන් කරගැනීම මෙම ඒකාබද්ධ මෙහෙයුමේ ප්‍රධාන අරමුණ වී ඇත.

එම මුදල් ප්‍රේෂණය වූ බැංකු ගිණුමක හිමිකරුවකු ලෙස සැලකෙන නිමල් පෙරේරා ඕස්ට්‍රේලියාවේ පදිංචිව සිටින බව අල්ලස් කොමිසම මීට පෙර අධිකරණයට කරුණු වාර්තා කළේය.

මෙහි සැකකරුවකු වූ හිටපු ප්‍රධාන විධායක නිලධාරී කපිල චන්ද්‍රසේනගේ බිරිඳ වන ප්‍රියංකා නියෝමාලි විජේනායක සහ හිටපු අමාත්‍ය චමල් රාජපක්ෂගේ පුත් ශමින්ද රාජපක්ෂ යන සැකකරුවන් මේ වනවිට විදේශගතව සිටින අතර ඔවුන් අත්අඩංගුවට ගැනීම සඳහා කොළඹ සහ කොටුව මහේස්ත්‍රාත් අධිකරණ මගින් දැනටමත් වරෙන්තු නිකුත් කර ඇත.

ඉස්සර පාර අයිනේ කැඩිච්ච බස් තියෙන බවත් අපි ඒවට නැගලා සුක්කානම අල්ලගෙන බෘම් බෘම් බෘම් කියන බව පාර්ලිමේන්තු මන්ත්‍රී චාමර සම්පත් දසනායක සඳහන් කරයි.

මන්ත්‍රී චාමර සම්පත් දසනායක සඳහන් කළේ,

“අර ඉස්සර තියනවා පාර අයිනේ කැඩිච්චම බස් නතර කරනවා. ඒ බස් වලට කියන්නේ “කොට උඩ එක්ස්ප්‍රස්” කියලා. අපි නැගලා පොඩි කාලේ අර බස් එකේ සුක්කානම අල්ලගෙන බෘම් බෘම් බෘම් කියනවා.

බස් එක යන්නේ නෑ. අපි පොඩ්ඩක් බෘම් බෘම් ගානවා. දැන් අනුර කුමාර මේ “කොට උඩ එක්ස්ප්‍රස්” බස් එකේ කට්ටිය දාගෙන, අනුර කුමාර සුක්කානම කරකනවා. බස් එක යන්නේ නෑ. බස් එක යනවද. බස් එක යන්නෑ. ඒ වගේ තමයි මේ ආණ්ඩුවත්.”

ජනහමුවක් අමතමින් මන්ත්‍රී චාමර සම්පත් දසනායක මේ බව සඳහන් කරයි.

කාලගුණ විද්‍යා දෙපාර්තමේන්තුවේ, ස්වභාවික විපත් පිළිබඳ පූර්ව අනතුරු ඇඟවීමේ මධ්‍යස්ථානය විසින් අවවාදාත්මක නිවේදනයක් නිකුත් කර ඇත.

අද (20) දින පෙ.ව. 11.00ට නිකුත් කළ මෙම අවවාදාත්මක නිවේදනය හෙට (21) දින පෙ.ව. 11.00 වන තෙක් වලංගු බව කාලගුණ විද්‍යා දෙපාර්තමේන්තුව සඳහන් කරයි.

ඒ අනුව දිවයින හරහා පවතින සක්‍රීය නිරිතදිග මෝසම් තත්ත්වය හේතුවෙන් ප්‍රදේශ කිහිපයකට තද සුළං ඇතිවිය හැකි බව කාලගුණ විද්‍යා දෙපාර්තමේන්තුව සඳහන් කරයි.

මධ්‍යම කඳුකරයේ බටහිර බැවුම්වලටත්, උතුරු, උතුරු-මැද සහ මධ්‍යම පළාත් වලටත්, හම්බන්තොට සහ ත්‍රිකුණාමලය දිස්ත්‍රික්ක වලටත් වරින් වර පැයට කිලෝමීටර 40ත් 50ත් අතර පමණ වන තද සුළං ඇතිවිය හැකි බවද සඳහන් කරයි.

එනිසා එම ප්‍රදේශවල ජීවත්වන ජනතාවට මේ සම්බන්ධයෙන් අවධානයෙන් සහ සූදානමින් සිටින ලෙස කාලගුණ විද්‍යා දෙපාර්තමේන්තුව දැනුම් දෙයි.

කන්ටේනර් 323 සම්බන්ධයෙන් පැමිණිලි කළ ඩෑන් ප්‍රියසාද් මරලා දැම්ම බව හිටපු පාර්ලිමේන්තු මන්ත්‍රී ප්‍රේමනාත් සී. දොලවත්ත සඳහන් කරයි.

හිටපු පොලිස්පතිවරයාගේ සියදිවි නසාගැනීම සම්බන්ධයෙන් විශාල කතාබහක් තිබෙන බවත් ප්‍රධාන පුද්ගලයන්ගේ මියයාම අභිරහස් ආකාරයක් බව හිටපු මන්ත්‍රී ප්‍රේමනාත් සී. දොලවත්ත සඳහන් කරයි.

මාධ්‍ය වෙත අදහස් දක්වමින් හිටපු මන්ත්‍රී ප්‍රේමනාත් සී. දොලවත්ත සඳහන් කළේ,

“එක පැත්තකින් ⁣කන්ටේනර් 323 සම්බන්ධයෙන් පැමිණිලි කරපු ඩෑන් ප්‍රියසාද් මහත්තයා මරලා දැම්මා. එයාර් බස් ගණුදෙනුව සම්බන්ධ ඒ අදාළ මහත්තයත් මියයාම සම්බන්ධයෙන් විශාල ප්‍රශ්නයක් තියෙනවා.

ඒ වගේම ඩොලර් මිලියන 2.5 සම්බන්ධයෙන් ගත්තාම, ඒ පුද්ගලයා බලනහර කපා ගැනීමේ කියන කාරණය රාජපක්ෂ මහත්තයා සම්බන්ධයෙන් ගත්තාම විශාල ගැටලුවක්.

නන්දන ගුණතිලක මහත්තයා මියයාම සම්බන්ධයෙන් විශාල කතාබහක් තියෙනවා. ඒ එක්කම වර්තමානයේ මේ පොලිස්පතිතුමා සියදිවි නසාගත්තා කියන එක. අපිට තේරෙන්නේ නෑ. ප්‍රධාන පුද්ගලයන් මේ විදිහට මියයාම කියන එක අභිරහස් ආකාරයක්.”