Local news

වහාම ක්‍රියාත්මක වන පරිදි පොලිස් ලොක්කෝ 17කට මාරුවීම්
09 Apr

වහාම ක්‍රියාත්මක වන පරිදි පොලිස් ලොක්කෝ 17කට මාරුවීම්

වහාම ක්‍රියාත්මක වන පරිදි පොලිස් ස්ථානාධිපතිවරුන් 17 දෙනෙකුට මාරුවීම් ලබාදී ඇත.

ජාතික පොලිස් කොමිෂන් සභාවේ අනුමැතියට යටත්ව අදාළ ස්ථාන මාරුවීම් ලබාදී ඇති බව පොලිස් මූලස්ථානය සඳහන් කරයි.

පොලිස් දෙපාර්තමේන්තුවේ පවතින පුරප්පාඩු වලට අනුව මෙම ස්ථාන මාරුවිම් ලබාදී ඇත.

සියලුම පොලිස් නිලධාරීන්ට අවුරුදු තෑගි තහනම් කරයි
09 Apr

සියලුම පොලිස් නිලධාරීන්ට අවුරුදු තෑගි තහනම් කරයි

පොලිස්පති ප්‍රියන්ත වීරසූරිය විසින් සියලුම පොලිස් නිලධාරීන් වෙත උපදෙස් මාලාවක් නිකුත් කර ඇත.

සිංහල හා දෙමළ අලුත් අවුරුද්ද වෙනුවෙන් බොහෝ පොලිස් ස්ථානවල අලුත් අවුරුදු සංග්‍රහ කටයුතු සිදුකිරීම සඳහා නිලධාරීන්ගෙන් මුදල් එකතු කිරීමට සූදානම් වන බවට සහ ව්‍යාපාරික ප්‍රජාවගේ දායකත්වය ලබාගනිමින් අලුත් අවුරුදු සාද පැවැත්වීමට සූදානම් වන බවට ලැබී තිබු තොරතුරු හේතුවෙන් මෙම උපදෙස් මාලාව නිකුත් කර ඇත.

විශේෂයෙන් ජ්‍යේෂ්ඨ පොලිස් නිලධාරින්ට සුබ පැතීමේ අංගයක් වශයෙන් පිරිනමනු ලබන හැම්පර්ස්, තෑගි වවුචර් පත් පිරිනැමීම සිදුනොකළ යුතු අතර ජ්‍යෙෂ්ඨ නිලධාරීන් විසින් එවැනි දෑ භාරගැනීම ද සිදුනොකළ යුතු බවට පොලිස්පතිවරයා දැනුම් දී ඇත. 

බාහිර පාර්ශ්වයන් හෝ ව්‍යාපාරික ප්‍රජාවගේ දායකත්වයෙන් යුතුව සිය පොලිස් ස්ථානවල සිංහල අලුත් අවුරුදු සාද පැවැත්වීම නොකළ යුතු බවට පොලිස්පතිවරයා දැනුම් දී ඇත.

පොලිස් ස්ථානවල සිදුකරන අලුත් අවුරුදු සංග්‍රහ කටයුතු වෙනුවෙන් එක් පොලිස් නිලධාරියෙකු වෙනුවෙන් රුපියල් 250ක මුදලක් පොලිස් ත්‍යාග අරමුදලෙන් ලබාදීමට අනුමැතිය ලබාදී ඇති බව පොලිස්පතිවරයා සඳහන් කර ඇත.

අදාළ උපදෙස්වලට පටහැනිව කටයුතු කරන නිලධාරීන්ට එරෙහිව අවශ්‍ය පියවර ගැනීමට අධීක්ෂණ නිලධාරීන් විසින් කටයුතු කළ යුතු බවද පොලිස්පතිවරයා දැනුම් දී ඇත.

ඊශ්‍රායලයට දරුණු ප්‍රහාර එල්ල කරනවා.. ඉරානය අනතුරු අඟවයි
09 Apr

ඊශ්‍රායලයට දරුණු ප්‍රහාර එල්ල කරනවා.. ඉරානය අනතුරු අඟවයි

ලෙබනනය ඉලක්ක කරමින් ඊශ්‍රායලය එල්ල කළ දරුණු ප්‍රහාර මාලාවෙන් පසුව ඉරානය විසින් ඊශ්‍රායලයට ප්‍රතිප්‍රහාර එල්ල කරන බවට අනතුරු අඟවා ඇත.

ලෙබනනයට ප්‍රහාර එල්ල කිරීම හේතුවෙන් අමෙරිකා – ඉරාන සාම ගිවිසුමක් ඇති කරගැනීමේ සාකච්ඡාද අවධානමකට ලක්වී ඇති බව ඉරානය අනතුරු අඟවා ඇත.

ඊශ්‍රායලය විනාඩි 10ක් වැනි කෙටි කාලයක් තුළ ලෙබනනයේ ඉලක්ක 100ක් වෙත එල්ල කළ දරුණු ප්‍රහාර මාලාවෙන් පුද්ගලයින් 250ක පමණ පිරිසක් මියගොස් ඇති බව වාර්තා වේ.

වැඩවර්ජන අස්සේ නවක වෛද්‍යවරු 436 දෙනාට පත්වීම්
09 Apr

වැඩවර්ජන අස්සේ නවක වෛද්‍යවරු 436 දෙනාට පත්වීම්

සෞඛ්‍ය අමාත්‍යාංශය විසින් පශ්චාත් සීමාවාසික වෛද්‍ය පත්වීම් සඳහා අයදුම් කළ නවක වෛද්‍යවරු 436 දෙනාට ඔවුන්ගේ නව පත්වීම් හා සේවා ස්ථාන ප්‍රකාශයට පත් කර ඇත.

ඒ අනුව මෙම වෛද්‍යවරුන් සියලුදෙනා අද (09) සිට එළැඹෙන (11) වැනිදා දක්වා වූ කාලය තුළ තමන් අනුයුක්ත කර ඇති දිවයින පුරා රජයේ රෝහල් හෝ සෞඛ්‍ය ආයතනය වෙත වාර්ථා කල යුතුව ඇත.

දිවයින පුරා පවතින අවශ්‍යතා සපුරාලීමේ අරමුණින් මෙම නවක වෛද්‍යවරු අනුයුක්ත කිරීමට කටයුතු කර ඇති බව සෞඛ්‍ය අමාත්‍යාංශය සඳහන් කරයි.

වෛද්‍යවරුන් අද සිට නැවතත් ජනතාව අසරණ කරයි
09 Apr

වෛද්‍යවරුන් අද සිට නැවතත් ජනතාව අසරණ කරයි

රජයේ වෛද්‍ය නිලධාරීන්ගේ සංගමය (GMOA) අද (09) දින පෙ.ව. 8.00 සිට පැය 48ක කාලයක් දීපව්‍යාප්ත වැඩවර්ජනයක නිරත වීමට තීරණය කර ඇත.

සීමාවාසික පත්වීම් ලබාදීමට අදාළව සෞඛ්‍ය අමාත්‍යාං‍ශය තම සංගමය සමග එකඟ වූ කොන්දේසි කඩකරමින් අදාළ පත්වීම් ලබාදීමට පියවර ගැනීම හේතුවෙන් මෙම තීරණය ගත් බව එම සංගමය සඳහන් කරයි.

අමෙරිකා – ඉරාන ගිවිසුමේ කරුණු රහසිගතයි
09 Apr

අමෙරිකා – ඉරාන ගිවිසුමේ කරුණු රහසිගතයි

ඉරානය සමඟ ඇති කරගත් ගිවිසුමට අදාළ වැදගත් කරුණු “රහසිගතව” සාකච්ඡා කරන බව අමෙරිකානු ජනාධිපති ඩොනල්ඩ් ට්‍රම්ප් සිය සමාජ මාධ්‍ය ගිණුමේ සටහනක් තබමින් සඳහන් කර ඇත.

එම ප්‍රකාශයත් සමගින් ඉරානය සමඟ ඇති කරගත් ගිවිසුම සම්බන්ධයෙන් පැතිර යන විවිධ අසත්‍ය ප්‍රකාශ අමෙරිකානු ජනාධිපති ඩොනල්ඩ් ට්‍රම්ප් විසින් විවේචනය කර ඇත.

තමන්ව හඳුන්වා නොදුන් පිරිස් විසින් පතුරුවනු ලබන ලේඛන සහ ගිවිසුම් පිළිබඳව ජනාධිපති ඩොනල්ඩ් ට්‍රම්ප් මෙහිදී දැඩි ලෙස දෝෂාරෝපණය කර ඇත.

“අමෙරිකා එක්සත් ජනපදය සහ ඉරානය අතර සාකච්ඡාවලට කිසිදු සම්බන්ධයක් නැති පුද්ගලයින් විසින් විවිද ගිවිසුම්, ලැයිස්තු සහ ලිපි ලේඛන ඉදිරිපත් කරමින් සිටිනවා. බොහෝ අවස්ථාවලදී ඔවුන් මුළුමනින්ම වංචාකරුවන්.”

කෙසේ වෙතත් අමෙරිකානු ජනාධිපති ඩොනල්ඩ් ට්‍රම්ප් සිය සටහන මගින් ඉරානය සමඟ ඇතිකරගත් “වැදගත් කරුණු” මොනවාද යන්න පිළිබඳව නිශ්චිත පැහැදිලි කිරීමක් කර නොමැත.

සටන් විරාමය පැත්තකට දමා ඉරානය නැවතත් හෝමූස් වසා දමයි
09 Apr

සටන් විරාමය පැත්තකට දමා ඉරානය නැවතත් හෝමූස් වසා දමයි

ඉරානය සහ අමෙරිකාව ඇතිකරගත් සටන් විරාමය මධ්‍යයේ ඉරානය හෝමූස් සමුද්‍ර සන්ධිය යළි විවෘත කිරීමට පියවරගෙන තිබුණද ඊයේ (08) පස්රුවේ නැවතත් ඉරානය විසින් හෝමූස් සමුද්‍ර සන්ධිය වසා දමා ඇත.

ඒ අනුව නෞකා වලට හෝමූස් හරහා යාත්‍රා කිරීම තහනම් බවත් අවසරයකින් තොරව ගමන් කිරීමට උත්සාහ කරන ඕනෑම නෞකාවක් විනාශ කරන බවත් ඉරාන විප්ලවීය ආරක්ෂක බළකාය අනතුරු අඟවා ඇත.

කෙසේ වෙතත් ඊශ්‍රායලය විසින් ලෙබනනයට එල්ල කරන දැවැන්ත ප්‍රහාර මාලාව හේතුවෙන් හෝමූස් හරහා ගමන්ගන්නා නෞකා වලට මෙම තහනම පැනවූ බව ඉරාන මාධ්‍ය වාර්තා කරයි.

ඊශ්‍රායල ප්‍රහාරයෙන් ලෙබනනයේ 254ක් මරුට
08 Apr

ඊශ්‍රායල ප්‍රහාරයෙන් ලෙබනනයේ 254ක් මරුට

ඊශ්‍රායලය විසින් එල්ල කළ ප්‍රහාර මාලාවෙන් ලෙබනනයේ පුද්ගලයින් 254 දෙනෙකු මියගොස් තවත් 1,165 දෙනෙකු තුවාල ලබා ඇති බව ලෙබනනයේ සිවිල් ආරක්ෂක අංශ වාර්තා කරයි.

ඊශ්‍රායලය ලෙබනනයේ ගොඩබිම් මෙහෙයුම් ආරම්භ කිරීමෙන් අනතුරුව (08) දින එරටට දැවැන්ත ප්‍රහාර මාලාවක් එල්ල කළ බව විදෙස් මාධ්‍ය වාර්තා කරයි.

ලෙබනනයේ අගනුවර වන බේරූට් ඇතුළු ප්‍රදේශ කිහිපයකටම මෙම ප්‍රහාර එල්ල කර ඇති අතර එම ප්‍රහාරත් සමග කලාපීය සාම ගිවිසුම් බිඳ වැටීමේ දැඩි අවදානමක් මතුව ඇත.

අද මධ්‍යම රාත්‍රියේ සිට හෝදලත් ඉවරයි
08 Apr

අද මධ්‍යම රාත්‍රියේ සිට හෝදලත් ඉවරයි

අද (08) දින මධ්‍යම රාත්‍රියේ සිට ක්‍රියාත්මක වන පරිදි සියලුම පිරිසිදුකාරක ද්‍රව්‍ය මිල ගණන් ඉහළ දමා ඇති බව දේශීය ව්‍යවසායකයන් බලගැන්වීමේ සංවිධානය සඳහන් කරයි.

ඒ අනුව සියලුම පිරිසිදුකාරක ද්‍රව්‍ය මිල ගණන් 25%කින් ඉහළ දමා ඇති බව එම සංවිධානයේ ලේකම් පුෂ්පකුමාර කරුණාරත්න සඳහන් කරයි.

සබන් කුඩු කිලෝවක මිල රුපියල් 75කින් වැඩි කරයි.

පිගන්, කෝප්ප සෝදන දියරය රුපියල් 105කින් වැඩි කරයි.

වැසිකිලි සේදුම්කාරක දියරය රුපියල් 115කින් වැඩි කරයි.

අත් සේදීම් දියරය රුපියල් 120කින් වැඩි කරයි.

වාහන සේදුම් දියරය රුපියල් 100කින් වැඩි කරයි.

වායු නැවුම් කාරක 500ml රුපියල් 100කින් වැඩි කරයි.

විශබීජ නාශක දියරය 500ml රුපියල් 225කින් වැඩි කරයි.

තවද මෙයට අදාළ අනෙකුත් පිරිසිදුකාරක ද්‍රව්‍ය සහ දියර වර්ග 25%කින් වැඩි කර ඇත.

විනාඩ් 10ක් තුළ හමුදා කඳවුරු ඇතුළු 100කට ඊශ්‍රායලයෙන් ප්‍රහාර
08 Apr

විනාඩ් 10ක් තුළ හමුදා කඳවුරු ඇතුළු 100කට ඊශ්‍රායලයෙන් ප්‍රහාර

ඊශ්‍රායල හමුදාව විසින් ලෙබනනයට ගුවන් ප්‍රහාර මාලාවක් එල්ල කර ඇති අතර එම ගුවන් ප්‍රහාර හේතුවෙන් රට පුරා විශාල පිරිසක් මියගොස් ඇති බව විදෙස් මාධ්‍ය වාර්තා කරයි.

තුවාලකරුවන්ගෙන් එරට රෝහල් පිරී පවතින බවත් කඩා වැටුණු ගොඩනැගිලි සුන්බුන් යට බොහෝ පිරිසක් සිරවී සිටින බවට විශ්වාස කරන බවද විදෙස් මාධ්‍ය වාර්තා කරයි.

විනාඩි 10ක් ඇතුළත හිස්බුල්ලා සංවිධානයට අයත් විධාන මධ්‍යස්ථාන සහ හමුදා කඳවුරු 100කට අධික සංඛ්‍යාවකට ප්‍රහාර එල්ල කළ බව ඊශ්‍රායලය සඳහන් කරයි.

බේරූට් අගනුවර, දකුණු තදාසන්න ප්‍රදේශ, දකුණු ලෙබනනය සහ නැගෙනහිර බෙකා නිම්නය එම ප්‍රහාරවල ඉලක්ක වු අතර ඊශ්‍රායලය මෙය හඳුන්වනු ලැබුවේ, මෙම ගැටුමේ මෙතෙක් එල්ල කළ විශාලතම ගුවන් ප්‍රහාර මාලාව ලෙසයි.