Local news

ඊයේ (05) දින මීගමුව බන්ධනාගාරයේ රැඳවියන් දෙපිරිසක් අතර ඇති වූ ගැටුම සම්බන්ධයෙන් විමර්ශනය කිරීම සදහා කමිටුවක් පත් කර ඇත.

බන්ධනාගාර කොමසාරිස් ජනාරාල්වරයා විසින් අදාළ විමර්ශන කමිටුව පත් කළ බව බන්ධනාගාර කොමසාරිස්, මාධ්‍ය ප්‍රකාශක ඒ.සී. ගජනායක සදහන් කරයි.

රිමාන්ඩ් භාරයේ සිටින රැඳවියන් පිරිසක් සහ දඩුවම් ලබා බන්ධනාගාරගත කර සිටින රැඳවියන් පිරිසක් අතර පස්වරු 1.00ට පමණ මෙම ගැටුම සිදුව ඇති බව පොලිසිය සඳහන් කරයි.

මෙම ගැටුමෙන් රැඳවියන් දෙදෙනෙකු මියගිය අතර තවත් රැඳවියන් 34දෙනෙකු තුවාල ලබා මීගමුව දිස්ත්‍රික් රෝහල වෙත ඇතුළත් කර ඇති අතර ඉන් බරපතළ තුවාල ලැබූ දෙදෙනකු කොළඹ ජාතික රෝහල වෙත මාරුකර යවා ඇත.

තවද බන්ධනාගාරයේ රැඳවියන් පිරිසක් එහි වහලයක් මත නැග විරෝධතාවයක නිරත වු අතර ඉන් ඇදවැටී තවත් රැදවියන් සිව් දෙනෙකු මීගමුව රෝහලට ඇතුළත් කර ඇත.

ලෝක වෙළෙඳපොළේ බොරතෙල් මිල තවදුරටත් පහළ ගොස් ඇති බව විදෙස් මාධ්‍ය වාර්තා කරයි.

ඒ අනුව, බ්‍රෙන්ට් (Brent) බොරතෙල් බැරලයක මිල අමෙරිකානු ඩොලර් 71.78ක් දක්වා පහළ ගොස් ඇත.

අමෙරිකානු WTI බොරතෙල් බැරලයක් ඩොලර් 68.48ක් දක්වා පහළ ගොස් ඇත.

තාත්තලා පුතාලා තමන්ගේ දේශපාලන හයිය සහ බලය පාවිච්චි කරලා රටේ තීන්දු තීරණ ගන්න පුළුවන් නම්, මේ රට තිබ්බ විදිහ කොහොමද කියලා හිතාගන්න පුළුවන් බව පාර්ලිමේන්තු මන්ත්‍රී දිනිදු සමන් හෙන්නායක සඳහන් කරයි.

මාධ්‍ය වෙත අදහස් දක්වමින් මන්ත්‍රී දිනිදු සමන් හෙන්නායක සඳහන් කළේ,

“තාත්තලා, පුතාලා තමන්ගේ දේශපාලන හයිය බලය පාවිච්චි කරලා මේ රටේ නොකරලා තියෙන්නේ මොනවාද.? කාටහරි තීරණය කරන්න පුළුවන් නම්, කවුද හිරේ යන්නේ.? හිරේ ඉන්න කෙනා ජීවත් වෙනවාද නැද්ද.?

අපේ තාත්තා අධිකරණ ඇමති නිසා හිරේ එයාව තියන්නේ කොතනද.? ඒ තැනට අපි මෙන්න මෙච්චර මුදලක් ගන්නවා කියලා පුතෙක් තීන්දු කරන රටක් තිබ්බ නම්, අපේ රට තිබ්බ විදිහ කොහොමද කියලා ඔබට හිතාගන්න පුළුවන් නේ.

ඒ වගේම නළුවෙක්ට තමන්ගේ තියෙන නළුකම් පාවිච්චි කරලා බලුකම් කරන්න පුළුවන් නම් මේ රට ඇතුලේ, හිතාගන්න පුළුවන් මේ රට ගිහිල්ලා තියෙන්නේ කොහොමද කියලා.

ඒක නිසා අපි හිතනවා දේශපාලනිකව තරා තිරම අපි බලන්න ඕන නෑ. දැන් ඉතා හොඳට නීතිය ක්‍රියාත්මක වෙනවා කියන්න අදාළ කරන හොද උදාහරණ තමයි තියෙන්නේ. ඉස්සර හාල්මැස්සෝ විතරයි මේ නීතිය ඇතුලේ තිබ්බේ. දැන් නීතිය තෝරට මෝරට අදාළව ක්‍රියාත්මක වෙනවා.”

තමන් ෆේස්බුක් යන්නේ නැත්තේ මෝඩයෝ ටිකක් ඒකෙ ඇතුලේ ඉන්න නිසා බවත් එය බුද්ධිමත් මිනිස්සූ සටන් කරන භූමියක් නොවන නිසා බවද පාර්ලිමේන්තු මන්ත්‍රී දයාසිරි ජයසේකර සඳහන් කරයි.

මාධ්‍ය හමුවක් අමතමින් මන්ත්‍රී දයාසිරි ජයසේකර සඳහන් කළේ,

“මේ ආණ්ඩුව කරන්නේ විවිධ අයව අල්ලගන්නවා. උදාහරණයක් ගත්තොත්, සුගීෂ්වර බණ්ඩාර මැතිතුමාගේ ප්‍රශ්නය. කොළඹ මහ දවාලේ පාරමැද්දේ වාහනය නතර කරලා ඔහුව පටවගෙන යනවා.

මේ වගේ විපක්ෂයේ ඉන්න හැම කෙනාම අරගෙන එක්කෝ ඔහු ජාතිවාදයෙක් කියනවා. එක්කෝ ඔහු හොරෙක් කියනවා. එක්කෝ ඔහු අපරාධකාරයෙක් බවට පත්වෙනවා. නැත්තම් කුඩු කාරයෙක් බවට පත්වෙනවා. නැත්තම් ත්‍රස්තවාදියෙක් බවට පත්වෙනවා.

මේ කරුණු තුන මත දේශපාලඥයන් විශාල ප්‍රමාණයක් මේ වෙනකොට ඇතුළට තල්ලු කරමින් දවස ගානේ ඉන්නවා. එතකොට මම හොරෙක් වෙලා යන්නේ. කවුද මාව නිදහස් කරන්නේ. ඒක තමයි මම කාරණයක් විදිහට කිවුවේ.

මම ෆේස්බුක් යන්නේ නැත්තේ මොකද, මෝඩයෝ ටිකක් නේ ඒකෙ ඇතුලේ ඉන්නේ. බුද්ධිමත් මිනිස්සූ සටන් කරන භූමියක් නෙමෙයි ඒක. ඒනිසා ඒකට මම ගිහිල්ලා බලන්නේ නෑ. ඒකාබද්ධ අපේ විපක්ෂයේ ඉන්න සියලුම දෙනා අරගෙන මේකට දාන්න පුළුවන්.”

විවිධ වැරදි වලට සම්බන්ධ පොලිස් නිලධාරීන් 1000කට වැඩි පිරිසක් සේවයෙන් ඉවත් කර ඇති බව මහජන ආරක්ෂක අමාත්‍ය ආනන්ද විජේපාල සඳහන් කරයි.

මත්ද්‍රව්‍ය ජාවාරමට සම්බන්ධ වීම, අපරාධ කල්ලි සාමාජිකයින් සමග සබඳතා පැවැත්වීම ඇතුළු චෝදනා සම්බන්ධයෙන් වැරදිකරුවන් වීම හේතුවෙන් ඉන් කොටසක් සේවයෙන් ඉවත් කළ බවද අමාත්‍ය ආනන්ද විජේපාල සඳහන් කරයි.

අනෙක් පිරිස රාජකාරි පැහැර හැරිම්, අල්ලස් ලබා ගැනීම් ඇතුළු චෝදනා සම්බන්ධයෙන් වැරදිකරුවන් වීමත් සමග සේවයෙන් පහකර ඇති බවද අමාත්‍ය ආනන්ද විජේපාල සඳහන් කරයි.

පොලිස් නිලධාරීන් සම්බන්ධයෙන් ඉදිරිපත් වන පැමිණිලි සම්බන්ධයෙන් කඩිනම් විමර්ශන සිදුකරන බවද අමාත්‍ය ආනන්ද විජේපාල තවදුරටත් සඳහන් කරයි.

වත්මන් ආණ්ඩුව අපේ නඩු ඉක්මණින් අහන බවත් රටේ ජනතාවගේ නඩු වලට කාලය ගන්නා බව පාර්ලිමේන්තු මන්ත්‍රී නාමල් රාජපක්ෂ සඳහන් කරයි.

ජනහමුවක් අමතමින් මන්ත්‍රී නාමල් රාජපක්ෂ සඳහන් කළේ,

“හිටපු නාවික හමුදාපතිවරයා අත්අඩංගුවට ගන්නවා. බුද්ධි අංශ ප්‍රධානීන් සිරගත කරනවා. ආණ්ඩුවේ සැලැස්ම මොකක්ද. අද වෙනකොට අධිකරණ පද්ධතිය ඇතුලේ අවුරුදු 12ක්, 10ක් යනවා අපරාධ නඩුවක් අහන්න.

ගම්වල තරුණ පිරිස් අදටත් ඉන්නවා සමහර බොරු නඩුවලට අහුවෙච්ච අය විදේශ රැකියාවකට යන්න විදිහක් නෑ අපෙ හාමුදුරුවනේ පොලිස් වාර්තාවක් ගන්න විදිහක් නෑ. සමහර මිනිස්සූ අවුරුදු 20, 30 උසාවි යනවා.

ඒ නඩු කඩිනම් කරන්න මොකක්ද ආණ්ඩුවේ සැලැස්ම. අපේ නඩු නම් මාස හයෙන් අහනවා. අපේ ඒවනම් මාස හයෙන් අහනවා. කමක් නෑ. හැබැයි අර මනුස්සයන්ටත් සාධාරණයක් කරන්න. ඒ අයටත් සාධාරණයක් වෙන්න ඕනි. දේශපාලනික වශයෙන් අපෙන් පළිගන්න උත්සාහ කරා⁣ට.”

අද (05) දින මීගමුව බන්ධනාගාරයේ පිරිමි රැඳවියන් පිරිසක් එහි වහළ මත නැග විරෝධතාවක නිරත විය.

ඔවුන් එලෙස විරෝධතාවයේ නිරත වෙමින් සිටින අතරතුර අද පස්වරුවේ එහි වහලය කඩා වැටී ඇත.

අනතුරුව තුවාල ලැබූ රැඳවියන් සිවුදෙනෙකු මීගමුව රෝහලට ඇතුළත් කර ඇත.

අද (05) මීගමුව බන්ධනාගාරයේ රැඳවියන් දෙපිරිසක් අතර හටගත් ගැටුමෙන් රැඳවියන් දෙදෙනෙකු මරණයට පත්ව ඇත.

මෙම ගැටුමෙන් තුවාල ලැබූ බන්ධනාගාර රැඳවියන් 30 දෙනෙකු මීගමුව රෝහලට ඇතුලත් කර ඇති අතර ඉන් 10 දෙනෙකුට ශල්‍යකර්ම සිදුකර ඇත.

තුවාල ලැබු බන්ධනාගාර රැඳවියන් දෙදෙනෙකුගේ තත්ත්වය බරපතළ බවත් ඔවුන් වැඩිදුර ප්‍රතිකාර සඳහා කොළඹ ජාතික රෝහල වෙත මාරුකර යවා ඇත.

පොලීසිය සහ පොලිස් විශේෂ කාර්ය බළකාය කැඳවා මේ වනවිට මීගමුව බන්ධනාගාරයේ නොසන්සුන්කාරී තත්ත්වය පාලනය කර ඇති බව පොලීසිය සඳහන් කරයි.