පොලිස්පතිවරයා මහ මගදී ඝාතනය කිරීම සම්බන්ධයෙන් ශ්‍රී ලංකා පොදුජන පෙරමුණේ මහ ලේකම් සාගර කාරියවසම් සිදුකළ ප්‍රකාශය සම්බන්ධයෙන් විමර්ශන ආරම්භ කර තිබෙන බව මහජන ආරක්ෂක අමාත්‍ය ආනන්ද විජේපාල සඳහන් කරයි.
පොහොට්ටුවේ නායකයෝ කියා ගන්නා නාමල් රාජපක්ෂ පාර්ලිමේන්තු වරප්‍රසාද වලට මුවා වෙලා සාගර කාරියවසම්ගේ ප්‍රකාශය නැවතත් තහවුරු කරන බවද මහජන ආරක්ෂක අමාත්‍ය ආනන්ද විජේපාල සඳහන් කරයි.
නිලධාරීන්ට තර්ජනය කරනවා නම් ඊට එරෙහිව ක්‍රියාමාර්ග ගන්න කිසිසේත්ම පසුබට වෙන්නේ නැති බවත් ඔවුන්ට එරෙහිව ගන්නා ක්‍රියාමාර්ග ඉදිරියේදී ජනතාවට දැකබලා ගැනීමට පුළුවන් බවද අමාත්‍ය ආනන්ද විජේපාල සඳහන් කරයි.
මහජන ආරක්ෂක අමාත්‍ය ආනන්ද විජේපාල සඳහන් කළේ,
“පොලිස්පතිවරයාට තර්ජනය කරනවා කියන්නේ මේ රටේ සමස්ත අධිකරණ ක්‍රියාවලි වගේම නීතියේ ආධිපත්‍යට තමා ඔවුන් තර්ජනය කරන්නේ. පොලිස්පතිවරයා මේ සම්බන්ධයෙන් පැමිණිල්ලක් දීලා තියෙනවා මධ්‍යම අපරාධ විමර්ශන කොට්ඨාශයට. ඊයේ දිනයේම පැමිණිල්ල ලබාගැනීමෙන් පසුව විමර්ශන ආරම්භ කරලා තියෙනවා.”
“පොහොට්ටුවේ නායකයෝ කියා ගන්නා නාමල් රාජපක්ෂලා වගේ අය ගිහිල්ලා පාර්ලිමේන්තු වරප්‍රසාද වලට මුවා වෙලා මේ ප්‍රකාශය නැවතත් තහවුරු කරනවා. ඒකෙන් පැහැදිලි දේශපාලන පක්ෂයක්, ව්‍යාපාරයක් හැටියට ඉදිමින් පොලිස්පතිවරයාට තර්ජනය කරන්නේ සමස්ත නීතියට කරන තර්ජනයක්.
නීතියේ ආධිපත්‍යට කරන තර්ජනයක්. නීතිය හා සාමය පැවැත්මට බරපතල බාධාවක් ඔවුන් ගෙනල්ලා තියෙනවා. මේක ජනතාව කුපිත කිරීමක්. ජනාධිපතිවරයාටත්, රජය කෙරෙහි අනාදරයක් වගේම රජය කෙරෙහි විරසකයක් ජනතාව තුල ඇති කිරීමට දරන උත්සාහයක්.
යම් කෙනෙක් නීති විරෝධීව මහජනයා කුපිත කරනවා නම්, ඒ වගේම රාජකාරී නිලධාරීන්ට බාධා කරනවා නම්, තර්ජනය කරනවා නම් ඊට එරෙහිව ක්‍රියාමාර්ග ගන්න කිසිසේත්ම පසුබට වෙන්නේ නෑ. ඒ ක්‍රියාමාර්ග ඉදිරියට දියත් වෙනවා. ඒක ඉදිරියේදී බලාගන්න හැකියාව ලැබෙයි මේ රටේ ජනතාවට.”
රූපවාහිනී නාලිකාවක සාකච්ඡාවකට එක්වෙමින් මහජන ආරක්ෂක අමාත්‍ය ආනන්ද විජේපාල මේ බව සඳහන් කරයි.
