Local news

දිට්වා සුළි කුණාටුව හේතුවෙන් පීඩාවට පත් ජනතාවට සහාය වීමට සහ රට පුරා අඛණ්ඩ සහන මෙහෙයුම් ශක්තිමත් කිරීම සඳහා යුරෝපා සංගමය මගින් ශ්‍රී ලංකාවට යුරෝ මිලියනයක අතිරේක මානුෂීය ආධාර මුදලක් වෙන් කර ඇත.

මානුෂීය හවුල්කාර සංවිධාන සමග ඒකාබද්ධව ලබා දෙන එම අධාර මුදල පීඩාවට පත් ජනතාවගේ මූලික සේවා සැපයීමට යොදාගනු ඇති අතර යුරෝපා සංගමය සහ එහි හවුල්කාර සංවිධාන මීට පෙරද යුරෝ මිලියන 2.35ක අධාර මුදලක් දිට්වා සුළි කුණාටුවෙන් පසු මෙරට ජනතාවට ලබා දුන්නේය.

යුරෝපීය සංගමය සහ එහි සාමාජික රටවල් ලොව ප්‍රමුඛතම මානුෂීය ආධාර සපයන්නන් ලෙස කටයුතු කරයි.  

විදේශ ආපදා සහනාධාර (සැපයුම්) සම්බන්ධීකරණය පිළිබඳ ජ්‍යෙෂ්ඨ කමිටුව ආරක්ෂක නියෝජ්‍ය අමාත්‍ය, මේජර් ජෙනරල් අරුණ ජයසේකර (විශ්‍රාමික) ගේ ප්‍රධානත්වයෙන් (26) කොළඹ පිහිටි නියෝජ්‍ය අමාත්‍යවරයාගේ කාර්යාලයේදී රැස්වූහ.

විදේශ රට වලින් ලැබුණු ආපදා සහනාධාර අදාළ රාජ්‍ය ආයතන වෙත ලබාදීමේ ක්‍රියාවලිය සමාලෝචනය කිරීම මෙන්ම විනිවිදභාවය හා මෙහෙයුම් කාර්යක්ෂමතාව සහතික කිරීම සඳහා අවශ්‍ය තීරණාත්මක පියවර ගැනීම මෙම සාකච්ඡාවේ මූලික අරමුණ විය.

ආපදා සහන ද්‍රව්‍ය බෙදා හැරීමේ ක්‍රියාවලිය මේ වනවිට අවසන් අදියරේ ක්‍රියාත්මක වන අතර එහි ක්‍රමානුකූල භාවය හා විනිවිද භාවය තහවුරු කිරීම පිළිබඳව කමිටු සාමාජිකයෝ පුළුල් වශයෙන් සාකච්ඡා කළහ.

තවදුරටත් ගබඩා වල රඳවා තිබෙන භාණ්ඩ, එම ද්‍රව්‍ය වල අවශ්‍යතා හඳුනා ගනිමින් බෙදා හැරීමට කටයුතු කරන ලෙස ද දන්වා සිටියේය.

විදේශ සහනාධාර ලැබීමේ, ගබඩා කිරීමේ හා බෙදා හැරීමේ ක්‍රියාවලිය ප්‍රශස්ථ කිරීමේ අරමුණින් සකස් කරන ලද දත්ත පද්ධතියේ නිරවද්‍යතාවය සහතික කරන ලෙසත් එම පද්ධතියේ දත්ත පිළිබඳ විගණන කටයුතු අදාළ පරිදි සිදු කරන ලෙසත් නිලධාරීන් වෙත දැනුම් දුන්නේය.

එමෙන්ම විදෙස් රටවල් වලින් ආපදා සහන හා මුදා ගැනීමේ මෙහෙයුම් සඳහා භාවිතා කිරීමට ලබා දුන් විශේෂ භාණ්ඩ හා උපකරණ අදාළ පරිදි ත්‍රිවිධ හමුදාව වෙත ලබාදීමට කටයුතු කරන ලෙසද උපදෙස් දුන්නේය.

ලාෆ් ගෑස් සමාගම විසින් නිවේදනයක් නිකුත් කර ඇත.

ඒ අනුව ලාෆ් ගෑස් සමාගම විසින් ආනයනය කරනු ලබන ගෑස් තොගයක් රැගත් නෞකාවක් අද (28) මෙරටට ළඟා වූ බව එම සමාගම සඳහන් කරයි.

ගෘහස්ත පාරිභෝගිකයන් සඳහා අද සිට එම ගෑස් තොග කඩිනමින් වෙළෙඳපොළට නිකුත් කරන බව ලාෆ් ගෑස් සමාගම සඳහන් කරයි.

අද සිට සාමාන්‍ය පරිදි ලාෆ්ස් ගෑස් අලෙවි නියෝජිතයන් හරහා අවශ්‍ය ගෑස් සිලන්ඩර මිලදී ගැනීමේ හැකියාව පවතින බවද ලාෆ් ගෑස් සමාගම සඳහන් කරයි.

පාස්කු ත්‍රස්ත ප්‍රහාරය සම්බන්ධව සිදුකරන විමර්ශන වලට අදාළව අපරාධ පරීක්ෂණ දෙපාර්තමේන්තුව විසින් අත්අඩංගුවට ගත් රාජ්‍ය බුද්ධි සේවයේ හිටපු අධ්‍යක්ෂ, විශ්‍රාමික මේජර් ජෙනරාල් සුරේෂ් සලේගෙන් දින 90ක කාලයක් රඳවාගෙන් ප්‍රශ්න කිරීමට අවසර හිමිව ඇත.

පසුගිය (25) පෙරවරුවේ පෑලියගොඩ පිහිටි පෞද්ගලික ආයතනයක සේවය සඳහා යමින් සිටියදී රාජ්‍ය බුද්ධි සේවයේ හිටපු අධ්‍යක්ෂ, විශ්‍රාමික මේජර් ජෙනරාල් සුරේෂ් සලේ අත්අඩංගුවට පත්විය.

පාසල් සිසුන්, පිරිවෙන්වල ගිහි පැවිදි සිසුන් හා සීලමාතාවන් වෙත ලබාදෙන පාවහන් තිළිණපත් ලබාදීමේ කාලය දීර්ඝ කිරීමට අධ්‍යාපන අමාත්‍යාංශය පියවර ගෙන ඇත.

ඒ අනුව එම තිළිණපත් වල වලංගු කාලය 2026.02.28 දිනෙන් අවසන් වීමට තිබුණ ද එහි වලංගු කාලය 2026.03.15 දින දක්වා දීර්ඝ කිරීමට අධ්‍යාපන අමාත්‍යාංශය පියවර ගෙන ඇත.

2026 වර්ෂයේ තෝරා ගත් පාසල් සිසුන්, පිරිවෙන්වල ගිහි පැවිදි සිසුන්, සීලමාතාවන් වෙත රුපියල් 3000ක වටිනාකමක් සහිත පාවහන් තිළිණපත් ලබාදෙයි.

සංවිධානාත්මක අපරාධ කල්ලි නායක ගණේමුල්ල සංජීව ඝාතන සිද්ධියේ සැකකරුවකු වශයෙන් නම් කළ කමාන්ඩෝ සලින්ත නමැත්තා දැඩි ආරක්ෂක විධිවිධාන මැද අපරාධ පරීක්ෂණ දෙපාර්තමේන්තුවේ නිලධාරින් විසින් කොළඹ ප්‍රධාන මහෙස්ත්‍රාත් අසංග එස්. බෝදරගමගේ නිල මදිරිය තුළට අද (27) දින ඉදිරිපත් කළේය.

එහිදී විමර්ශන සිදුකළ අපරාධ පරීක්ෂණ දෙපාර්තමේන්තුවේ නිලධාරීන් විසින් සිදුකළ විමර්ශනවල ප්‍රගතිය දැක්වෙන වාර්තාවක් ඉදිරිපත් කර ඇත.

අනතුරුව ඉදිරිපත් වූ කරුණු සලකා බැලූ මහෙස්ත්‍රත්වරයා පාතාල ක්‍රියාකාරිකයකු බව කියන කමාන්ඩෝ සලින්ත නමැත්තා ලබන මස (12) වැනිදා දක්වා රක්ෂිත බන්ධනාගාර ගත කරන ලෙසට නියෝග කළේය.

ශ්‍රී ලංකන් කේටරින් සමාගම විසින් එම සමාගමට අයත් රුපියල් තුන් ලක්ෂ විසි දහසක මුදලක් මුදා හැරීම තුළින් රජයට පාඩු සිදු කර දූෂණය නමැති වරද සිදු කළ බවට චෝදනා කරමින් හිටපු ගුවන් සේවා අමාත්‍ය ප්‍රියංකර ජයරත්නට එරෙහිව අල්ලස් කොමිසම නඩුවක් ගොනු කර ඇත. 

ඒ අනුව හිටපු ගුවන් සේවා අමාත්‍ය ප්‍රියංකර ජයරත්නට එරෙහිව අල්ලස් කොමිසම විසින් ගොනු කර ඇති නඩුව අද (27) කොළඹ මහාධිකරණ විනිසුරු රවීන්ද්‍ර ප්‍රේමරත්න ඉදිරියේ කැඳවනු ලැබීය.

අනතුරුව එහිදී ඉදිරිපත් වූ කරුණු සලකා බැලූ විනිසුරුවරයා මෙම නඩුවේ පළමුවන සාක්ෂිකරුට සාක්ෂි දීම සඳහා මාර්තු මස (24) වනදා අධිකරණය හමුවේ පෙනී සිටින ලෙස දන්වා සිතාසි නිකුත් කරන ලෙස නියෝග කළේය.

අනතුරුව සාක්ෂි විභාගය මාර්තු (24) වනදා කැඳවීමට දින නියම කෙරුණි.

රජයේ ඉඩම් අනිසි ලෙස පරිශීලනය කිරීම සඳහා කූට ලේඛන සකස් කිරීමේ චෝදනාව මත හිටපු නියෝජ්‍ය අමාත්‍යවරුන් වන මර්වින් සිල්වා සහ ප්‍රසන්න රණවීර ඇතුළු විත්තිකරුවන් හය දෙනෙකුට එරෙහිව නීතිපතිවරයා විසින් නඩු පවරා තිබුණේය.

ඒ අනුව කිරිබත්ගොඩ ප්‍රදේශයේ රජයට අයත් ඉඩමකට ව්‍යාජ ලේඛන සකස් කළ බවට එල්ල වූ චෝදනා මත මර්වින් සිල්වා සහ ප්‍රසන්න රණවීර ඇතුළු විත්තිකරුවන් හය දෙනෙකුට ගම්පහ මහාධිකරණයේදී අද (27) අධිචෝදනා භාරදී ඇත.

ගම්පහ අංක දෙක මහාධිකරණ විනිසුරු නයනා සෙනෙවිරත්න ඉදිරියේ මෙම නඩුව විභාගයට ගෙන තිබුණ අතර එම අවස්ථාවේදී විත්තිකරුවන් සියලු දෙනාටම විදේශගත වීම තහනම් කර, ඔවුන්ගේ විදෙස් ගමන් බලපත්‍ර වහාම අධිකරණ භාරයට ගන්නා ලෙස නියෝග කළාය.

අනතුරුව එක් අයෙකුට රුපියල් ලක්ෂ 10 බැගින් වූ අතිරේක ශරීර ඇප මත ඔවුන් මුදා හැරීමට විනිසුරුවරිය නියෝග කළාය.