Local news

අද (13) දින උදෑසන කළුතර දිස්ත්‍රික් ලේකම් කාර්යාලයේ බිම් මහලේ පිහිටි විදුලි පද්ධතියක හදිසි ගින්නක් හටගෙන ඇත.

කළුතර මහ නගර සභාවේ ගිනි නිවන ඒකකය පැමිණ ගින්න මැඩපැවැත්වීමට කටයුතු කර ඇති අතර මෙම ගින්නෙන් විදුලි පද්ධතියට හානි සිදුව ඇත.

කෙසේ වෙතත් පද්ධතියට හානි වීම හේතුවෙන් කළුතර දිස්ත්‍රික් ලේකම් කාර්යාලයේ විදුලිය විසන්දී වී ඇත.

අපේ සමහර නායකයෝ වගේ, මාව නම් අත්අඩංගුවට ගන්න එපා, අපිව හිරගෙවල් වල යවන්න එපා කියලා අපි දණ ගහගෙන යන්නේ නැති බව හිටපු පාර්ලිමේන්තු මන්ත්‍රී පාඨලී චම්පික රණවක සඳහන් කරයි.

හිටපු පාර්ලිමේන්තු මන්ත්‍රී පාඨලී චම්පික රණවක සඳහන් කළේ,

“මේ හිරගෙවල් වල දානවා කිවුවාම අපේ සමහර නායකයෝ වගේ අනේ සර් මාවනම් අත්අඩංගුවට ගන්න එපා. අනේ අපිව හිරගෙවල් වල යවන්න එපා කියලා අපි දණ ගහගෙන යනවාද.? නෑ..

අපි මේ වේදිකාව තැනුවේ එවැනි අභියෝග ජය අරගෙන ඉදිරි කාලයේදී මේ රටේ හැම කෙනා⁣ටම සමානව නීතිය ගෙන එන යුක්ති ධර්මය පදනම මත නීතියේ ආධිපත්‍ය තියෙන රටක් හදන්න. නිදහස් රටක් හදන්න.”

කුරුණෑගල පැවති ජන හමුවකට එක්වෙමින් හිටපු පාර්ලිමේන්තු මන්ත්‍රී පාඨලී චම්පික රණවක මේ බව සඳහන් කරයි.

අවුරුදු දෙකෙන් පස්සේ අපේ ආණ්ඩුවක් එන බවත් අපේ ආණ්ඩුව ආවාම සියලුම නඩු නැවත අහලා ඒගොල්ලෝ හිරේ දාන දවසක් එන බව පාර්ලිමේන්තු මන්ත්‍රී චාමර සම්පත් දසනායක සඳහන් කරයි.

මන්ත්‍රී චාමර සම්පත් දසනායක සඳහන් කළේ,

“පගාව දීලා, තනතුරු දීලා අපිව හිරේ දාන්න. එකක් ලියලා තියාගන්න මහත්තුරු. අවුරුදු දෙකෙන් පස්සේ, අපේ ආණ්ඩුවක් ආවට පස්සේ නැවත ඒ සියලුම නඩු අහලා ඒගොල්ලෝ හිරේ දාන දවස එනවා කියන එක මේ අවස්තාවේදී කියන්න ඕන.”

“මේ රටේ පගාව දීලා, තනතුරු දීලා පත්කරලා එහෙම මිනිස්සූ හිරේ දාන්න ආපු කාලේ ඉවරයි. මේ වේදිකාවේ අපි කියනවා අපිට එකතු වෙමු. ජනාධිපති කෙනෙක් ඕන්නම් අපි හදන්නම්. හැබැයි හදන කෙනා හදන අය එකතුවෙලා කියන්න ඕන නෑ.

මම මේ සැරේ ජනාධිපති, අපි ඔක්කොම එකතු වෙන්න ඕනි කියලා. එහෙම නැති මිනිස්සූන්ට ඕගොල්ලෝ එකතු වෙන්න එපා. එකතු වෙලා මේ රට හදන, මුන් එළවන, මුන් මෙතනින් පන්නන දිනය ළග ළග එනවා. ඒකට සූදානම් වෙන්න.”

කුරුණෑගල පැවති ජන හමුවකට එක්වෙමින් මන්ත්‍රී චාමර සම්පත් දසනායක මේ බව සඳහන් කරයි.

පාසල් සිසුන්ට නිල ඇඳුමට අමතරව, අත් පා ආවරණය වන පරිදි සුදුසු ඇඳුමකින් සැරසී පාසලට පැමිණීමට අවසර දෙන බව අධ්‍යාපන අමාත්‍යංශය සඳහන් කරයි.

පවතින ඩෙංගු අවධානම් තත්ත්වය සළකා බලා, මදුරු දෂ්ඨනයෙන් ආරක්ෂා වීම සඳහා එම තීරණය පිළිබඳව සියලු විදුහල්පතිවරුන්ට දැනුම් දී ඇති බව එහි ලේකම් නාලක කළුවැව සඳහන් කරයි.

අත් පා ආවරණය වන පරිදි වෙනත් සුදුසු ඇඳුමක් භාවිත කිරීමට අවසර දීමෙන් පාසල් සිසුන් අතර රෝගය පැතිරීම අවම කිරීමට අපේක්ෂා කරන බව, ලේකම්වරයා සඳහන් කරයි.

මේ අතර රජයේ සහ රජයේ අනුමත සියලු පෞද්ගලික පාසල්වල ක්‍රියාත්මක මදුරු මුලාශ්‍ර විනාශ කිරීමේ විශේෂ පිරිසිදු කිරීමේ වැඩසටහන්, ඉදිරියටත් මව්පියන්ගේ සහ ආදි සිසුන්ගේ සහභාගීත්වයෙන් සංවිධානය කරන්නැයි විදුහල්පතිවරුන්ට උපදෙස් ලබාදී ඇත.

අත්අඩංගුවට ගත් සමඟි ජන බලවේගයේ අම්බලන්ගොඩ ප්‍රාදේශීය සභා මන්ත්‍රී අමිත චතුරංග නොහොත් බටපොළ නින්දානේ චුට්ටේ අද (12) බලපිටිය මහේස්ත්‍රාත් අධිකරණයට ඉදිරිපත් කළේය.

අධිකරණයට ඉදිරිපත් කිරීමෙන් අනතුරුව සමඟි ජන බලවේග ප්‍රාදේශීය සභා මන්ත්‍රී අමිත චතුරංග හෙට (13) දින දක්වා රක්ෂිත බන්ධනාගාරගත කර ඇත.

බලපත්‍ර නොමැති රිපීටර් වර්ගයේ ගිනි අවියක් සන්තකයේ තබාගැනීම සම්බන්ධයෙන් සමඟි ජන බලවේගයේ අම්බලන්ගොඩ ප්‍රාදේශීය සභා මන්ත්‍රී අමිත චතුරංග ඊයේ පස්වරුවේ ගාල්ල දිසා අපරාධ කොට්ඨාසයේ නිලධාරීන් විසින් අත්අඩංගුවට ගත්තේය.

විසර්ජන පනත් කෙටුම්පත (2027 වර්ෂය සඳහා) දෙවන වර කියවීම හෙවත් අයවැය කථාව නොවැම්බර් මස (12) වන දින සිදුකිරීමට නියමිතව ඇත.

විසර්ජන පනත් කෙටුම්පත ගැසට් පත්‍රයේ පළ කිරීම සැප්තැම්බර් මස (18) වන දින සිදුකෙරෙන අතර එය පළමු වර කියවීම ඔක්තෝබර් මස (07) වන දින සිදුවන බව මුදල් අමාත්‍යංශය සඳහන් කරයි.

අමාත්‍යංශ අනුව වියදම් ඇස්තමේන්තු ඇතුළත් 2027 විසර්ජන පනත් කෙටුම්පත අමාත්‍ය මණ්ඩල අනුමැතිය සඳහා සැප්තැම්බර් මස (14) වන දින යොමු කිරිමට නියමිතව ඇත.

අයවැය දෙවන වර කියවීමේ විවාදය නොවැම්බර් (13) වන දින සිට (20) වන දින දක්වා සිදු කෙරෙන බව මුදල් අමාත්‍යංශය සඳහන් කරයි.

කාරක සභා අවස්ථාවේ විවාදය නොවැම්බර් මස (21) වන දින සිට දෙසැම්බර් මස (14) වන දින දක්වා පැවැත්වීමට නියමිත බව මුදල් අමාත්‍යංශය සඳහන් කරයි.