Local news

මීගමුව බන්ධනගාරයේ ඇතිවූ ගැටුමෙන් මියගිය බන්ධනාගාර නිලධාරීන්ගේ පවුල්වලට තවත් වන්දි මුදලක් ලබාදීමට තීරණය කර ඇත.

මේ වනවිට ඔවුන්ගේ පවුල වලට රුපියල් ලක්ෂ 5 බැගින් වන්දි මුදලක් ලබාදුන් බව බන්ධනාගාර දෙපාර්තමේන්තුව සඳහන් කරයි.

අධිකරණ හා ජාතික ඒකාබද්ධතා අමාත්‍යංශයේ මෙහෙයවීමෙන් තවත් වන්දි මුදලක් ලබාදීම සම්බන්ධයෙන් අවශ්‍ය සැලසුම් සකස් කරමින් ඇත.

අදාළ නිලධාරීන්ගේ පවුල්වලට ලක්ෂ 20කට අධික මුදලක් ලබාදීම කෙරෙහි මේ වනවිට දෙපාර්තමේන්තුවේ අවධානය යොමුව ඇති බව වාර්තා වේ.

අම්බලන්ගොඩ ප්‍රාදේශීය සභාවේ සමගි ජන බලවේගය නියෝජනය කරන මන්ත්‍රීවරයෙක් ගාල්ල දිසා අපරාධ කොට්ඨාස විසින් අත්අඩංගුවට ගෙන ඇත.

රිපිටර් වර්ගයේ  (Repeater Gun) ගිනි අවියක් නීති විරෝධීව සන්තකයේ තබා ගැනීමේ චෝදනාව යටතේ සමගි ජන බලවේගය නියෝජනය කරන මන්ත්‍රීවරයා අත්අඩංගුවට ගෙන ඇත.

අදාළ ගිනි අවිය යම් අපරාධ ක්‍රියා සඳහා භාවිත කර ඇද්දැයි සම්බන්ධයෙන් මේ වනවිට විමර්ශන සිදු කරන බව ගාල්ල දිසා අපරාධ කොට්ඨාසය සඳහන් කරයි.

හදිසි ණය මුදලක් ලබා ගැනීමට හැකියාව තිබෙන බව සදහන් කරමින් නිකුත් කරන පණිවිඩ මේ වනවිට සමාජ ජාලවල විශාල වශයෙන් ප්‍රචාරය වේ.

එහි ඇතැම් ආයතන රුපියල් 5,000 සිට රුපියල් 150,000 දක්වා හදිසි ණය මුදල් ලබා දීමට සූදානම් බවත් ඒ සඳහා ලියකියවිලි සහ ඇපකරුවන් අවශ්‍ය නැති බව එම පණිවිඩ වල සඳහන් වේ.

මෙම වංචනික ආයතන හරහා ණය ලබා ගැනීමට ලියකියවිලි අවශ්‍ය නොවන නමුත් එම ආයතන විසින් එවන “Link” එක Click කර තොරතුරු ඇතුලත් කිරීමට ණය අයදුම්කරුවා වෙත දැනුම් දෙන අතර එම Link එක Click කළ වහාම එම පුද්ගලයින් වංචනිකයන්ට ගොවුරු වී අවසන්ය.

ලින්ක් එක හරහා ඔවුන් එවන්නේ Remote Administrative Tool හෙවත් RAT එකක් වන අතර එය ජංගම දුරකථනයට ඇතුල් වූ වහාම එහි පාලනය ඔවුන් අතට ගනී. අනතුරුව තම දුරකතනයේ තිබෙන ඡායාරූප, ලේබන, තොරතුරු හා දුරකථන අංක ඇතුළු සියලූ තොරතුරු වලට ප්‍රවිෂ්ට වීමට ඔවුන්ට හැකියාව ලැබේ.

තවද “apk” යෙදවුමක් ඇතුල් වුවහොත් තත්ත්වය ඊට වඩා බරපතළ විය හැකි බවත් ණය මුදල ලබාදීමෙන් පසුව එම වංචනිකයන් තව තවත් ණය ලබා ගැනීමට උනන්දු කරවන අතර එලෙස ආපසු ගෙවා ගත නොහැකි වු පසුව වංචනිකයන්ට ගොදුරු වී අවසන්.

අනතුරුව ගෙවිය යුතු පොලිය මෙන්ම ඉටුකළ යුතු කොන්දේසි දැඩි වන අතර මෙම කොන්දේසි ඉටු නොකරන ණයකරුවන්ට නොයෙකුත් අකටයුතුකම් වලට ලක් වීමට සිදුවන අතර පහසුවෙන් ණය ගන්නට ගොස් අවසානයේ අතේ තියෙන මුදල ඔවුනට අහිමි වේ.

එනිසා හදිසි ණය මුදල් ලබාගැනීමට කටයුතු නොකරන ලෙසත් එම පණිවිඩ මගින් ලබාදෙන Link ඩවුන්ලෝඩ් කරන්න නොගන්නා ලෙසත් යම් අයෙකු හෝ ආයතනයක් විසින් තමන්ගේ පෞද්ගලික තොරතුරු ලබාගෙන ඇති බවට හැගුණොත් “101” අමතා ඒ පිළිබඳව දැනුවත් කරන ලෙස පරිඝණක හදිසි ප්‍රතිචාර සංසදය රටේ මහජනතාවට දැනුම් දෙයි.

අධිකරණ සේවා සංගමයේ සභාපති ලෙස කටයුතු කළ කොටුව මහේස්ත්‍රාත් පසන් අමරසේන එම තනතුරින් වහාම ඉල්ලා අස්වී ඇති බව වාර්තා වේ.

කෙසේ වෙතත් සභාපතිවරයාගේ ඉල්ලා අස්වීමට හේතුව මෙතෙක් නිල වශයෙන් ප්‍රකාශයට පත් කර නැත.

අධිකරණ සේවා සංගමයේ විශේෂ මහා සභා රැස්වීමක් කැඳවා ඇති පසුබිමක සභාපතිවරයා හදිසියේම ඉල්ලා අස්වී ඇත.

එම රැස්වීම කඩුවෙල මහේස්ත්‍රාත් අධිකරණ පරිශ්‍රයේදී පැවැත්වෙන අතර එහිදී විනිසුරුවරුන්ගේ සේවා කාලය දීර්ඝ කිරීමේ අර්බුදය සහ සංගමයේ ඉදිරි පියවර පිළිබඳව එහිදී දීර්ඝ වශයෙන් සාකච්ඡාවට බඳුන් වීමට නියමිතය.

අද (11) දින උදෑසන කටුනායක සිට තුර්කියේ ඉස්තාන්බුල් බලා පිටත්වූ මගී ගුවන් යානයේ කුරුල්ලෙක් ගැටී ඇත.

අනතුරුව යානයෙහි ඉන්ධන සංචිතය අඩුකර ගොඩබැස්ස වීමට සුදුසු මට්ටම තෙක් පැය 03 විනාඩි 15ක් මීගමුව කළපුව ආසන්න මුහුදු ප්‍රදේශයේ පහතින් අඩු වේගයකින් ගමන් කරනු ලැබීය.

ගුවන් යානයෙහි වූ ඉන්ධන සංචිතය සමග යළි ගොඩබැස්සවීම ජාත්‍යන්තර ගුවන්ගමන් සංවිධානයේ නවතම නීතිරීති වලට පටහැනි වන බැවින් ඉහළ අහසේ ඉතා පහතින් පියාසර කරමින් ඉන්ධන දහනය කිරීමේ කටයුතු සිදුකර ඇත.

අනතුරුව ඉහළ අහසේ පියාසර කරමින් තිබූ තුර්කි ගුවන් සේවයට අයත් TK-731 දරන මගී ගුවන් යානය මේ වනවිට ආරක්ෂිතව ගොඩබස්වා ඇත.

මෙම යානය පුළුල් බද සහිත A- 330 එයාර් බස් වර්ගයේ ගුවන් යානයක් වන අතර එහි ගුවන් මගීන් 246ක් සහ කාර්යය මණ්ඩල සාමාජිකයන් 10 දෙනෙකු සිට ඇත.

රටම එකට ජාතික මෙහෙයුමට සමගාමීව මත්ද්‍රව්‍යයට ඇබ්බැහි වූ පුද්ගලයින් පුනරුත්ථාපනයට යොමුවීම 28% කින් ඉහල ගොස් ඇතැයි  පුනරුත්ථාපන කාර්යාංශය සඳහන් කරයි.

එවැනි පුද්ගලයින් පුනරුත්ථාපනය වී සමාජගත කිරීමද 65% කින් වර්ධනය වී ඇති බවද එහි කොමසාරිස් ජනරාල් බ්‍රිගේඩියර් ශිරාන් අමිත් සඳහන් කරයි.

පුනරුත්ථාපනය වී සමාජගතවීමෙන් පසුවද මිතුරු ඇසුර හේතුවෙන් 47%ක් මත්ද්‍රව්‍ය භාවිතයට යොමුවී ඇති බවද කොමසාරිස් ජනරාල් බ්‍රිගේඩියර් ශිරාන් අමිත් සඳහන් කරයි.

“රටම එකට” ජාතික මෙහෙයුම් ප්‍රධාන කාර්යාලයේ (10) පැවති මාධ්‍ය හමුවකට එක්වෙමින් කොමසාරිස් ජනරාල් බ්‍රිගේඩියර් ශිරාන් අමිත් මේ බව සඳහන් කරයි.

බන්ධනාගාර රැඳවියන්ට ජනාධිපති සමාව දීම සඳහා ක්‍රමානුකුල, සාධාරණ සහ විනිවිද භාවයෙන් යුත් ක්‍රමවේදයක් සකස් කිරීමේ නිර්දේශ සහිත කැබිනට් කමිටු වාර්තාව, අධිකරණ සහ ජාතික ඒකාබද්ධතා අමාත්‍යාංශයේ ලේකම් ජනාධිපති නීතිඥ අයේෂා ජිනසේන වෙත භාරදී ඇත.

කමිටු සභාපති විශ්‍රාමලත් ශ්‍රේෂ්ඨාධිකරණ විනිසුරු එස්. තුරෙයිරාජා විසින් අදාළ වාර්තාව අමාත්‍යංශ ලේකම් වෙත භාරදුන් බව අධිකරණ අමාත්‍යංශය නිවේදනය කළේය.
‍
පසුගිය වසරේ ජුනි (25) වැනිදා කැබිනට් මණ්ඩලය විසින් එම කමිටුව පත්කරනු ලැබු අතර නියෝජ්‍ය අමාත්‍ය කෞෂල්‍යා ආරියරත්න, අමාත්‍යාංශ අතිරේක ලේකම් පියුමන්ති පීරිස්, අතිරේක සොලිස්ටර් ජනරාල් නෙරින් පුල්ලේ, ජ්‍යේෂ්ඨ නියෝජ්‍ය පොලිස්පති නීතිඥ අසංග කරවිට, පුනරුත්ථාපන කාර්යාංශයේ සභාපතිනි මහාචාර්ය වසන්තා සුභසිංහ, විශේෂඥ වෛද්‍ය චිත්තහාරි අභයනායක, හිටපු වැඩබලන බන්ධනාගාර කොමසාරිස් නිෂාන් ධනසිංහ, වැඩබලන බන්ධනාගාර කොමසාරිස් ජෙනරාල් ප්‍රසාද් හේමන්ත කුමාර, අමාත්‍යාංශ ජ්‍යේෂ්ඨ සහකාර ලේකම්වරුන් වන රොෂානි හෙට්ටිගේ සහ චන්දිමා වැලිකල කමිටුවේ සෙසු සාමාජිකයින් වේ.

බන්ධනාගාරවල දැනට පවතින අධික තදබදය අවම කිරීම සහ රැඳවියන් පුනරුත්ථාපන ක්‍රමවේදයන්හි පවතින විවිධ අඩුලුහුඬුකම් මග හරවා ගනිමින්, ජාත්‍යන්තර ප්‍රමින්තීන්ට අනුගත විය හැකි බන්ධනාගර පද්ධතියක් සඳහා රජය ගෙන යන ප්‍රතිසංස්කරණවල එක් මූලික පියවරක් ලෙස මෙය හැඳින්විය හැකි බව අධිකරණ අමාත්‍යංශය සඳහන් කළේය.

එම නිර්දේශ සළකා බලා සුදුසු අයුරින් ක්‍රියාත්මක කිරීම අධිකරණ සහ ජාතික ඒකාබද්ධතා අමාත්‍යාංශය විසින් ඉදිරි කාලයේදී කටයුතු කරයි.

පසුගිය සමයේ ජාතික නිවාස සංවර්ධන අධිකාරියට විශාල මුදලක් අහිමි වී ඇති බව පොදු ව්‍යාපාර පිළිබඳ කාරක සභාවේදී (COPE) අනාවරණය විය.

ජාතික නිවාස සංවර්ධන අධිකාරියේ නිලධාරීන් කෝප් කමිටුව හමුවට කැඳවා ආදායම් රැස්කිරීම පිළිබඳව කරුණු විමසූ අවස්ථාවේදී මෙම තොරතුරු අනාවරණය විය.

කොළඹ මාලිගාවත්ත ප්‍රදේශයේ පිහිටි කඩ සාප්පු වල බදු ගිවිසුම් යාවත්කාලීන නොකිරීම සම්බන්ධයෙන් කෝප් කමිටු සභාපති වෛද්‍ය නිශාන්ත සමරවීර විසින් කරුණු රැසක් අනාවරණය කළේය.

“කඩ සාප්පු පිහිටි ප්‍රදේශය මාලිගාවත්ත. කඩ සාප්පු 113ක් පසුගිය දෙසැම්බර් (31) දින වනවිට හිඟ කුලිය රුපියල් මිලියන 12කට වැඩියි. කඩ සාප්පු 2ක් රුපියල් 100කටත් වඩා අඩු මුදලකටද, තවත් කඩ සාප්පු 37ක් රුපියල් 100ත් 1,000ත් අතර කුලියකටද,

තවත් කඩ සාප්පු 38ක් රුපියල් 1,000ත් 5,000ත් අතර කුලියකටද බදු දී ඇත. තවද කඩ සාප්පු 52ක බදු ගිවිසුම් කාලය අවසන් වී වසර 1 සිට 35 දක්වා දීර්ඝ කාලයක් ගත වී ඇත. මේ මාලිගාවත්තේ කඩ සාප්පු ගැන කියන්නේ. මේ විගණන නිරීක්ෂණ වලට අනුව කඩ සාප්පු දෙකක් තවම යන්නේ රුපියල් 100කට වඩා අඩු කුලියකට.”

මෙලෙස වංචනික ලෙස කටයුතු කළ ඇතැම් දූෂිත නිලධාරීන්ගේ සේවය මේ වන විටත් තහනම් කිරීමට පියවර ගෙන ඇති බව ජාතික නිවාස සංවර්ධන අධිකාරියේ අධ්‍යක්ෂ මණ්ඩල සාමාජික අනුරාධ කිරලවැල්ල සඳහන් කරයි.

ජාතික නිවාස සංවර්ධන අධිකාරියේ අධ්‍යක්ෂ මණ්ඩල සාමාජික අනුරාධ කිරලවැල්ල සඳහන් කළේ,

“එම බදු ගිවිසුම් යාවත්කාලීන නොවීම සම්බන්ධයෙන් අපිට නිලධාරීන්ටම වරද පටවන්න අමාරුයි. මෙතන තුන් ආකාරයකින් බලපෑම් මත තමයි මේවා සිද්ධ වෙන්නේ කියලා අපිට පැහැදිලි වෙලා තියෙනවා. දේශපාලන බලපෑම. දෙවැනි කාරණය තමයි, පාතාල තර්ජන සහ යම් යම් දුෂිත නිලධාරින්ගේ ක්‍රියාකලාපය.”