Foreign news

හෝමූස් කලාපයට පැමිණෙන ඕනෑම අමෙරිකානු සන්නද්ධ නෞකාවකට පහර දෙන බවට ඉරානය අනතුරු අඟවයි.

අමෙරිකාව ඉරාන වරායන් ඉලක්ක කර ප්‍රහාර එල්ල කළහොත්, පර්සියානු ගල්ෆ් කලාපයේ හෝ ඕමාන මුහුදේ පවතින කිසිදු වරායක් ආරක්ෂිත නොවන බවද ඉරානය සඳහන් කරයි.

අමෙරිකානු නාවික හමුදාව විසින් හෝමූස් සමුද්‍ර සන්ධිය අවහිර කිරීම ආරම්භ කර ඇති බවත් ඒ අනුව නෞකා වලට ඉරාන වරායන් වෙත පිවසීම අවහිර වන බව විදෙස් මාධ්‍ය වාර්තා කරයි.

අමෙරිකානු නාවික හමුදාවේ අවහිර කිරීම් වෙත සමීප වුවහොත් ඉරාන ‘ප්‍රහාරක යාත්‍රා’ විනාශ කරන බවට ජනාධිපති ඩොනල්ඩ් ට්‍රම්ප් අනතුරු අඟවා ඇත.

මේ අතර ඉරානය ආපහු අමෙරිකාව සමග සාකච්ඡාවට ආවත් නැතත් මට කමක් නැහැ යනුවෙන් ජනාධිපති ඩොනල්ඩ් ට්‍රම්ප් ප්‍රකාශ කර ඇත.

ඉරානයට එල්ල කළ ප්‍රහාර වලින් සිසුන් සහ ගුරුවරුන් 345 දෙනෙකු ජීවිතක්ෂයට පත්ව ඇති බව ඉරාන අධ්‍යාපන අමාත්‍යංශය සඳහන් කරයි.

එම ප්‍රහාර වලින් සිසුන් 278 දෙනෙකු මියගොස් තවත් සිසුන් 196 දෙනෙකු සහ අධ්‍යාපන කාර්යය මණ්ඩල සාමාජිකයින් 26 දෙනෙකු තුවාල ලබා ඇත.

පසුගිය පෙබරවාරි (28) වනදා සිට ආරම්භ වු අමෙරිකානු සහ ඊශ්‍රායල ප්‍රහාරවලින් මෙම මරණ වාර්තා වන බව එම අමාත්‍යංශය සඳහන් කරයි.

එම අමාත්‍යංශය තවදුරටත් සඳහන් කළේ, පාසල් 933 ක්, සංස්කෘතික මධ්‍යස්ථාන 17 ක් ක්‍රීඩා ශාලා 36 ක් සහ ශිෂ්‍ය කඳවුරු 08 ක් විනාශයට පත්ව ඇති බවයි.

අමෙරිකානු ජනාධිපති ඩොනල්ඩ් ට්‍රම්ප් විසින් අති උතුම් ලියෝ පාප්වහන්සේව දැඩි ලෙස විවේචනයට ලක් කර ඇති බව විදෙස් මාධ්‍ය වාර්තා කරයි.

ලියෝ පාප්වහන්සේ යුද්ධය සම්බන්ධයෙන් සිදුකර ඇති ප්‍රකාශයකට විරෝධය පළ කරමින් අමෙරිකානු ජනාධිපතිවරයා පාප්වහන්සේ වෙත මෙම විවේචනය සිදුකර ඇත.

පාප්වහන්සේ අපරාධ වලට කැමති අයෙකු බවත් තමන් පාප් වහන්සේගේ රසිකයෙකු නොවන බවත් ඔහු ලිබරල් මිනිසෙකු බවත් අමෙරිකානු ජනාධිපතිවරයා සඳහන් කර ඇත.

න්‍යෂ්ටික අවි හදන එක නිවැරදි කියන එක මෙන්ම නගරවල අපරාධ සිදුවන එක ගණන් නොගත යුතු බව කියන පාප්වහන්සේ කෙනෙකුට තමන් අකමැති බවද අමෙරිකානු ජනාධිපතිවරයා චෝදනා කර ඇත.

පාප්වහන්සේට අමෙරිකානු ජනාධිපතිවරයා සිය සමාජ මාධ්‍ය ගිණුමක් වන Truth Social ගිණුමේ ඡායාරූපයක් පළ කර ඇති අතර එය මේ වනවිට ලොව පුරා බොහෝ පිරිසකගේ දැඩි අවධානයට මෙන්ම විවේචනයට ලක්ව ඇත.

අදාළ පින්තූරය මගින් තමන් ජේසුස් වහන්සේ බවට අර්ථගන්වා ඇති අතර තමන් ලෝක සාමය මෙන්ම මිනිසුන්ට පිහිටවන සැබෑ ජේසුස් වහන්සේ කෙනෙකු බවද අමෙරිකානු ජනාධිපතිවරයා එමගින් නිරූපනය කර ඇත.

බොරතෙල් බැරලයක මිල යළිත් වරක් ඉහළ ගොස් ඇති බව විදෙස් මාධ්‍ය වාර්තා කරයි.

ඉරානයේ වරායන් අවහිර කිරීමට අමෙරිකානු ජනාධිපති ඩොනල්ඩ් ට්‍රම්ප් අණ කිරීමත් සමඟ මෙම මිල වැඩිවීම සිදුව ඇති බව සඳහන් වේ.

ඒ අනුව, බ්‍රෙන්ට් වර්ගයේ බොරතෙල් බැරලයක මිල 7%ක ප්‍රතිශතයකින් ඉහළ ගොස් ඇති අතර එහි නව මිල ඩොලර් 102කි.

ඩබ්ලිව්.ටී.අයි. වර්ගයේ බොරතෙල් බැරලයක මිල 8%කින් ඉහළ ගොස් ඇති අතර එහි නව මිල ඩොලර් 104.50කි.

අමෙරිකානු ජනාධිපති ඩොනල්ඩ් ට්‍රම්ප් විසින් චීනයට අනතුරු ඇඟවා ඇත.

චීනය විසින් ඉරානයට යුද සහයෝගය ලබාදුන හොත් ඔවුන්ට 50%ක තීරු බද්දකට මුහුණදීමට සිදුවනු ඇති බවට ජනාධිපති ඩොනල්ඩ් ට්‍රම්ප් සඳහන් කර ඇත.

චීනය ඉරානයට ‘Shoulder Missiles’ ගුවන් යානා නාශක මිසයිලය වැනි යුද සහායන් ලබාදෙන බවට තොරතුරු වාර්තා වන බවද ජනාධිපති ඩොනල්ඩ් ට්‍රම්ප් සඳහන් කරයි.

‘MANPAD’ ලෙසින් හඳුන්වන උරහිසේ තබා එල්ල කරන ගුවන් යානා නාශක මිසයිල පද්ධතිය ඉරානයට ලබාදීමට චීනයේ සූදානමක් ඇති බවද ජනාධිපති ඩොනල්ඩ් ට්‍රම්ප් සඳහන් කරයි.

කෙසේ නමුත් තම බුද්ධි අංශ පවා එවැනි සැලසුමක් ඇති බවට පෙන්වා දී තිබියදීත්, චීනය එසේ නොකරනු ඇතැයි තමා විශ්වාස කරන බවද ජනාධිපති ඩොනල්ඩ් ට්‍රම්ප් සඳහන් කරයි.

පැවැති මාධ්‍ය හමුවකදී ජනාධිපති ඩොනල්ඩ් ට්‍රම්ප් මේ බව සඳහන් කරයි.

හෝමූස් සමුද්‍ර සන්ධියට යුද නෞකාවක් ළඟාවීම යනු සටන් විරාමය උල්ලංඝනය කිරීමක් සේ සලකන බව ඉරාන ඉස්ලාමීය විප්ලවවාදී ආරක්ෂක බළකාය (IRGC) සඳහන් කරයි.

යුද නෞකාවක් ළඟාවී සටන් විරාමය උල්ලංඝනය කළහොත්, ඊට විරුද්ධව දැඩි ක්‍රියාමාර්ග ගන්නා බවද ඉරාන ඉස්ලාමීය විප්ලවවාදී ආරක්ෂක බළකාය (IRGC) සඳහන් කරයි.

හෝමූස් සමුද්‍ර සන්ධිය අමෙරිකානු නාවික හමුදාව විසින් අවහිර කරන බවට ජනාධිපති ඩොනල්ඩ් ට්‍රම්ප් සිදුකළ ප්‍රකාශයට ප්‍රතිචාර දක්වමින් ඉරාන ඉස්ලාමීය විප්ලවවාදී ආරක්ෂක බළකාය මෙම ප්‍රකාශය සිදුකර ඇත.

මෙම නීතිය බලපාන්නේ යුද නෞකා වලට පමණක් බවත්, සාමාන්‍ය නෞකා ඒ සඳහා බලනොපාන බවද ඉරාන ඉස්ලාමීය විප්ලවවාදී ආරක්ෂක බළකාය සඳහන් කරයි.

අමෙරිකානු නාවික හමුදාව යොදා හෝමූස් සමුද්‍ර සන්ධිය අවහිර කරන බව අමෙරිකානු ජනාධිපති ඩොනල්ඩ් ට්‍රම්ප් සඳහන් කරයි.

හෝමූස් සමුද්‍ර සන්ධියට ඇතුළු වීමට හෝ පිටවීමට උත්සාහ කරන ඕනෑම නෞකාවක් අවහිර කරන බවද ජනාධිපති ඩොනල්ඩ් ට්‍රම්ප් සඳහන් කරයි.

ඉස්ලාමාබාද්හිදී ඉරානය සමඟ සෘජු සාකච්ඡා අසාර්ථක වූයේ “ඉරානය තම න්‍යෂ්ටික අභිලාෂයන් අත්හැරීමට අකමැති” නිසා බවද ජනාධිපති ඩොනල්ඩ් ට්‍රම්ප් සඳහන් කරයි.

ඉන්දියානු සංගීතයේ ශ්‍රේෂ්ඨතම ගායිකාවක් ලෙස සැලෙකන ජනප්‍රිය ගායන ශිල්පිනී ආශා බෝස්ලේ ජීවිතයෙන් සමුගනී.

හෘදයාබාධ තත්ත්වයක් සහ ස්වසනාබාධ තත්ත්වයක් හේතුවෙන් ඇය ඊයේ මුම්බායි හී රෝහලක් වෙත ඇතුළත් කළේය.

ඊයේ රාත්‍රියේදී එම රෝහලේ දැඩි සත්කාර ඒකකයට ඇතුළත් කර ඇති ඇය අද (12) උදෑසන මියගොස් ඇති අතර ඇය මියයන විට 92 වියෙහි පසුවිය.

ඇයගේ අවසන් කටයුතු අද (12) සවස 4.00ට මුම්බාහි ශිවාසි උද්‍යානයේදී සිදු කරන බව ඉන්දීය මාධ්‍ය වාර්තා කරයි.