Local news

වියට්නාම ජනපති පාර්ලිමේන්තුව අමතයි
08 May

වියට්නාම ජනපති පාර්ලිමේන්තුව අමතයි

දෙදින නිල සංචාරයක් සඳහා දිවයිනට පැමිණි වියට්නාම ජනාධිපති ටෝ ලම් මේ වනවිට මෙරට පාර්ලිමේන්තුව අමතයි.

මෙලෙස විදෙස් රාජ්‍ය නායකයෙකු මෙරට පාර්ලිමේන්තුව අමතන්නේ, වසර 11කට පසුව බව පාර්ලිමේන්තු මහලේකම් කුෂානි රෝහණධීර සඳහන් කළාය.

අවසන් වරට ඉන්දීය අග්‍රාමාත්‍ය නරේන්ද්‍ර මෝදි පසුගිය 2015 වසරේදී ශ්‍රී ලංකා පාර්ලිමේන්තුව ඇමතූ බවද මහලේකම් කුෂානි රෝහණධීර සඳහන් කළාය.

වියට්නාමයෙන් මෙට්‍රික් ටොන් 100ක පොහොර සහනාධාරයක් 
08 May

වියට්නාමයෙන් මෙට්‍රික් ටොන් 100ක පොහොර සහනාධාරයක් 

මෙරටට යූරියා සහ සුපර් පෝස්පේට් පොහොර මෙට්‍රික් ටොන් 100ක් වියට්නාම රජය විසින් පරිත්‍යාග කළ බව ජනාධිපති අනුර කුමාර දිසානායක සඳහන් කරයි.

තවද වියට්නාමයෙන් පොහොර ලබාගැනීමට කළ ඉල්ලීමට එරට රජය විසින් ධනාත්මක ප්‍රතිචාරයක් ලබාදී ඇති බවද ජනාධිපති අනුර කුමාර දිසානායක සඳහන් කරයි.

දෙරට අතර අවබෝධතා ගිවිසුම් හුවමාරු කරගැනීමෙන් අනතුරුව ඒකාබද්ධ මාධ්‍ය සාකච්ඡාවට එක්වෙමින් ජනාධිපති අනුර කුමාර දිසානායක මේ බව සඳහන් කරයි.

ශ්‍රී ලංකා – වියට්නාම අතර අවබෝධතා ගිවිසුම් මෙන්න
08 May

ශ්‍රී ලංකා – වියට්නාම අතර අවබෝධතා ගිවිසුම් මෙන්න

නිල සංචාරයක් සඳහා දිවයිනට පැමිණ සිටින වියට්නාම් ජනාධිපති ටෝ ලාම් පිළිගැනීමේ නිල රාජ්‍ය උත්සවයෙන් අනතුරුව දෙරට අතර අවබෝධතා ගිවිසුම් රැසකට එළැඹුණි.

එහිදී හුවමාරු කරගත් අවබෝධතා ගිවිසුම් පහතින්..

*මෙරට පොලිස් අභ්‍යාස ආයතනය සහ වියට්නාම මහජන පොලිස් අභ්‍යාස ආයතනය අතර පොලිස් පුහුණුව සහ විද්‍යාත්මක පර්යේෂණ සහයෝගීතාව පිළිබඳව වන අවබෝධතා ගිවිසුම,

*මෙරට විද්‍යා හා තාක්ෂණ අමාත්‍යාංශය සහ වියට්නාම විද්‍යා හා තාක්ෂණ අමාත්‍යාංශ අතර විද්‍යා හා තාක්ෂණ ක්ෂේත්‍රයන්හී සහයෝගීතාව පිළිබඳව වන අවබෝධතා ගිවිසුම,

*මෙරට බුද්ධශාසන, ආගමික සහ සංස්කෘතික කටයුතු අමාත්‍යාංශය සහ වියට්නාම ජනවාර්ගික හා ආගමික කටයුතු අමාත්‍යාංශය අතර ආගමික ක්ෂේත්‍රයේ සංවර්ධනය, ආගමික ශිෂ්‍ය සුබසාධනය, ආගමික විශ්වාස, සිරිත්විරිත් ප්‍රචාරණය සහ ආරක්ෂා කිරීම සඳහා වන අවබෝධතා ගිවිසුම,

*මෙරට බුද්ධශාසන, ආගමික සහ සංස්කෘතික කටයුතු අමාත්‍යාංශය සහ වියට්නාම සංස්කෘතික, ක්‍රීඩා සහ සංචාරක අමාත්‍යාංශය අතර සංස්කෘතික සහයෝගීතාව පිළිබඳව අවබෝධතා ගිවිසුම,

*මෙරට සෞඛ්‍ය සහ ජනමාධ්‍ය අමාත්‍යාංශය හා වියට්නාමයේ සංස්කෘතික, ක්‍රීඩා සහ සංචාරක අමාත්‍යාංශය අතර තොරතුරු සහ සන්නිවේදන ක්ෂේත්‍රයේ සහයෝගීතාව පිළිබඳව වන අවබෝධතා ගිවිසුම,

මහින්දගේ නම හෙළිකල කපිල චන්ද්‍රසේනගේ හදිසි මරණය
08 May

මහින්දගේ නම හෙළිකල කපිල චන්ද්‍රසේනගේ හදිසි මරණය

ශ්‍රී ලංකන් ගුවන් සමාගමේ හිටපු ප්‍රධාන විධායක නිලධාරී කපිල චන්ද්‍රසේන හදිසියේම මියගොස් සිටියදී ඔහුගේ දේහය අද (08) දින ඔහුගේ කොල්ලුපිටිය පිහිටි නිවසේදී සොයාගත් බව පොලිසිය සඳහන් කරයි.

කොල්ලුපිටිය පේද්‍රිස් පෙදෙසේ අංක 38 දරන නිවසේදී ගෙල වැළලාගෙන සියදිවි නසා ගෙන සිටියදී ඔහුගේ සිරුර හමුවූ බව පොලිස් මාධ්‍ය ප්‍රකාශක සහකාර පොලිස් අධිකාරී එෆ්.යූ. වුට්ලර් සඳහන් කරයි.

එයාර් බස් ගනුදෙනුවකට අදාළව අමෙරිකානු ඩොලර් මිලියන දෙකක අල්ලසක් ලබාගැනීමේ චෝදනාව මත රක්ෂිත බන්ධනාගාරගතව සිටි කපිල චන්ද්‍රසේන, ඇප කොන්දේසි උල්ලංඝනය කිරීමේ චෝදනාව යටතේ යළිත් අත්අඩංගුවට ගන්නා ලෙස කොළඹ මහෙස්ත්‍රාත් අධිකරණය ඊයේ (07) වරෙන්තු නිකුත් කළේය.

2013 වසරේදී ශ්‍රී ලංකන් ගුවන් සමාගම සඳහා එයාර් බස් යානා 14ක් මිලදී ගැනීමේ ගනුදෙනුවේදී සිදුවූවා යැයි කියන විශාල මූල්‍ය වංචාව සම්බන්ධයෙන් කපිල චන්ද්‍රසේනට සහ ඔහුගේ බිරිඳට එරෙහිව අල්ලස් කොමිසම මගින් නඩු පවරා තිබුණි.

ශ්‍රී ලංකන් ගුවන් සමාගමේ ප්‍රධාන විධායක නිලධාරී ලෙස කටයුතු කළ කපිල චන්ද්‍රසේන එයාර් බස් ගණුදෙනුවෙන් ලද අල්ලස් මුදලින් රුපියල් මිලියන 60ක මුදලක් එවක ජනාධිපති මහින්ද රාජපක්ෂ වෙත ලබාදුන් බව පසුගියදා අල්ලස් කොමිසම හමුවේ ප්‍රකාශ කළේය.

ඒ අනුව එයාර් බස් ගනුදෙනුවෙන් අල්ලස් ලබාගැනීමේ සිදුවීමට අදාළව හිටපු ජනාධිපති මහින්ද රාජපක්ෂට එළඹෙන (12) වැනිදා අල්ලස් කොමිසම හමුවට කැඳවා ඇත.

මහින්ද රාජපක්ෂ අල්ලස් කොමිසම හමුවට පැමිණීමට තවත් දින කිහිපයක් තිබියදී කපිල චන්ද්‍රසේන හදිසියේම මරණයට පත්වෙයි.

ඇත්තටම මෙම මරණය, සියදිවි හානිකර ගැනීමක්ද.? ඝාතනයක්ද.? සියදිවි හානිකර ගැනීමට කවුරු හෝ පෙළඹුවාද.? යන්න සම්බන්ධයෙන් විශේෂ විමර්ශනයක් සිදුකළ යුතුයි.

මෙය ඇත්ත අපරාධකරුවන් හංගන්න සිදුකළ තවත් සාක්ෂි විනාශ කිරීමක්ද.?

රාජාංගනේ හිමි අත්අඩංගුවට
08 May

රාජාංගනේ හිමි අත්අඩංගුවට

රාජාංගනේ සද්ධාරතන හිමි මධ්‍යම අපරාධ විමර්ශන කාර්යාංශය (CCIB) විසින් අත්අඩංගුවට ගෙන ඇත.

මහජන ආරක්ෂක අමාත්‍ය ආනන්ද විජේපාල සහ පොලිස්පති ප්‍රියන්ත වීරසූරිය යන මහත්වරුන්ට සමාජ මාධ්‍ය හරහා තර්ජනය කිරීමේ චෝදනාවක් මත මෙලෙස අත්අඩංගුවට ගෙන ඇත.

මෙම චීවරධාරියා සංඝභාවයෙන් නෙරපා හැරීමට ශ්‍රී ලංකා රාමඤ්ඤ මහා නිකායේ කාරක සභාව පසුගිය වසරේ කටයුතු යොදා තිබුණි.

එයාර් බස් ගනුදෙනුවට සම්බන්ධ කපිල චන්ද්‍රසේන ඝාතනය කරලා.?
08 May

එයාර් බස් ගනුදෙනුවට සම්බන්ධ කපිල චන්ද්‍රසේන ඝාතනය කරලා.?

ශ්‍රී ලන්කන් ගුවන් සමාගමේ හිටපු විධායක නිලධාරී කපිල චන්ද්‍රසේන මියගොස් සිටියදී සිරුර සොයාගෙන ඇත.

ප්‍රශ්නගත එයාර් බස් ගනුදෙනුව සම්බන්ධ වන නඩුවට අදාළව ඇප ලබා මුදාහැර සිටියදී යළි අත්අඩංගුවට ගන්නා ලෙස ඊයේ (07) දින අධිකරණය විසින් නියෝගයක් නිකුත් කර තිබුණි.

කපිල චන්ද්‍රසේනගේ මරණය සියදිවි හානි කරගැනීමක්ද.? නැතිනම් ඝාතනය කිරීමක්ද යන්න තවමත් අනාවරණය වී නොමැති අතර ඔහුගේ සිරුර කොල්ලුපිටියේ පිහිටි නිවසක තිබී පොලිසිය විසින් සොයාගෙන ඇත.

අමෙරිකානු නෞකා තුනකට ඉරානයෙන් ප්‍රහාර
08 May

අමෙරිකානු නෞකා තුනකට ඉරානයෙන් ප්‍රහාර

අමෙරිකානු ප්‍රහාරක නෞකා 3ක් ඉලක්ක කර ඉරානය විසින් ප්‍රහාර එල්ල කර ඇති බව විදෙස් මාධ්‍ය වාර්තා කරයි.

හෝමුස් සමුද්‍ර සන්ධිය හරහා යාත්‍රා කරමින් තිබූ USS Truxtun, USS Rafael Peralta සහ USS Mason යන අමෙරිකානු ප්‍රහාරක නෞකා ඉලක්ක කර එම ප්‍රහාරය එල්ල වී ඇති බව විදෙස් මාධ්‍ය වාර්තා කරයි.

එම ප්‍රහාරය තහවුරු කරමින් අමෙරිකානු හමුදාව ප්‍රකාශ කර ඇත්තේ, තම ආත්ම ආරක්ෂාව සහ ඊට ප්‍රතිප්‍රහාර ලෙස ඉරාන හමුදා මධ්‍යස්ථාන වෙත ප්‍රහාර එල්ල කළ බවයි.

කෙසේ වෙතත් එල්ල වූ ඉරාන ප්‍රහාර වලින් අමෙරිකානු යුද නෞකා වල⁣ට කිසිදු හානියක් සිදුව නොමැති බව විදෙස් මාධ්‍ය වාර්තා කරයි.

අද ප්‍රදේශ රැසකට තද වැසි
08 May

අද ප්‍රදේශ රැසකට තද වැසි

පහළ වායුගෝලීය කැලඹිලි ස්වභාවය හේතුවෙන්, දිවයිනේ දැනට පවතින වැසි තත්ත්වය ඉදිරි දින කිහිපයේදී තවදුරටත් බලපොරොත්තු වන බව කාලගුණ විද්‍යා දෙපාර්තමේන්තුව සඳහන් කරයි.

ඒ අනුව අද (08) දින දිවයිනේ බොහෝ ප්‍රදේශවල පස්වරු 1.00න් පමණ පසුව වැසි හෝ ගිගුරුම් සහිත වැසි ඇතිවිය හැකි බව කාලගුණ විද්‍යා දෙපාර්තමේන්තුව සඳහන් කරයි.

බස්නාහිර, සබරගමුව, මධ්‍යම, ඌව සහ වයඹ පළාත්වලත් ගාල්ල සහ මාතර දිස්ත්‍රික්කවලත් ඇතැම් ස්ථානවලට මි.මී. 100ට වැඩි තද වැසි ඇති විය හැකි බවද එම දෙපාර්තමේන්තුව සඳහන් කරයි.

ගිගුරුම් සහිත වැසි සමග ඇතිවිය හැකි තාවකාලික තද සුළං වලින් සහ අකුණු මඟින් සිදුවන අනතුරු අවම කර ගැනීමට අවශ්‍ය පියවර ගන්නා ලෙස එම දෙපාර්තමේන්තුව ජනතාවට දැනුම් දෙයි.

    

නැවතත් ඉහළ ගිය බොරතෙල් මිල
08 May

නැවතත් ඉහළ ගිය බොරතෙල් මිල

අද (08) දින ලෝක වෙළෙඳපොළේ බොරතෙල් මිල යළිත් ඉහළ ගොස් ඇත.

බ්‍රෙන්ට් වර්ගයේ බොරතෙල් බැරලයක් 1.59%කින් ඉහළ ගොස් ඇති අතර එහි නව මිල අමෙරිකානු ඩොලර් 101.65ක් ලෙස සටහන්ව ඇත.

WTI බොරතෙල් බැරලයක් 1.95%කින් ඉහළ ගොස් ඇති අතර එහි නව මිල අමෙරිකානු ඩොලර් 96.66ක් ලෙස සටහන්ව ඇත.

මර්බන් බොරතෙල් බැරලයක මිල අමෙරිකානු ඩොලර් 96.66ක් ලෙස සටහන්ව ඇත.

PayPal ශ්‍රී ලංකාවට
07 May

PayPal ශ්‍රී ලංකාවට

ශ්‍රී ලංකාවේ ඩිජිටල් ආර්ථිකයේ සහ විදේශ විනිමය ගලා ඒමේ දැවැන්ත හැරවුම් ලක්ෂ්‍යයක් සනිටුහන් කරමින්, ලොව ප්‍රමුඛතම මාර්ගගත ගෙවීම් පද්ධතියක් වන PayPal හරහා සෘජුවම ශ්‍රී ලංකාවට මුදල් ගෙන්වා ගැනීමේ පහසුකම ස්ථාපිත කිරීමට රජය තීරණය කර ඇත.

වසර ගණනාවක් පුරා මෙරට ව්‍යාපාරික ප්‍රජාව තොරතුරු තාක්ෂණ වෘත්තිකයින් සහ නිදහස් සේවකයින් විසින් සිදුකළ ඉල්ලීම් සහ ඔවුන්ගේ බලවත් අවශ්‍යතාවය සැලකිල්ලට ගනිමින් රජය මෙම සේවාව ආරම්භ කිරීමට කටයුතු කර ඇත.

ඒ අනුව එළඹෙන මැයි මස (15) වනදා සිට මෙම සේවාව ක්‍රියාත්මක කිරීමට සියලු කටයුතු සූදානම් කර ඇත.

PayPal හරහා මෙරටට මුදල් ගෙන්වා ගැනීමට පැවති නීතිමය සහ තාක්ෂණික බාධා ඉවත් කිරීම සඳහා ඩිජිටල් ආර්ථික අමාත්‍යාංශය, ශ්‍රී ලංකා මහ බැංකුව සහ මෙරට පෞද්ගලික බැංකු පද්ධතිය එක්ව පසුගිය කාලය පුරා සිදුකළ සාකච්ඡා සාර්ථක වීමත් සමඟ මෙම අවස්ථාව උදා වී ඇත.

මින් ඉදිරියට විදේශීය සේවාදායකයින්ගෙන් ලැබිය යුතු ගෙවීම් ලබා ගැනීම සඳහා ව්‍යාජ විදේශීය ලිපින භාවිත කිරීමට හෝ අවධිමත් මුදල් හුවමාරු ක්‍රම මත යැපීමට මෙරට ව්‍යවසායකයින්ට අවශ්‍ය නොවන බව සඳහන් කරයි.