Local news

හිටපු ජනාධිපති මහින්ද රාජපක්ෂගේ පුත් යෝෂිත රාජපක්ෂ නියමිත සුදුසුකම් වෙනස් කරමින් නාවික හමුදාවේ විධායක නිලධාරියෙකු ලෙස බැදී රජයේ මුදල් අවභාවිත කරමින් බ්‍රිතාන්‍ය රාජකීය නාවික විද්‍යාලයේ පුහුණුව ලැබීමට අදාළව සිදුවන විමර්ශනයක් සම්බන්ධයෙන් හිටපු නාවික හමුදාපති වසන්ත කරන්නාගොඩ අල්ලස් කොමිසමට කැඳවා ඇත.

එහෙත් හිටපු නාවික හමුදාපති වසන්ත කරන්නාගොඩ අල්ලස් කොමිසම හමුවේ (22) දින පෙනී සිටීමට නොහැකි බව දැනුම් දී ඇත.

පසුගිය (16) වනදා ද හිටපු නාවික හමුදාපති වසන්ත කරන්නාගොඩ අල්ලස් කොමිසම හමුවට කැඳවා තිබු අතර එදින ද පැමිණීම ප්‍රතික්ෂේප කර තිබුණේය.

මෙම විමර්ශනය සම්බන්ධයෙන් යෝෂිත රාජපක්ෂ පසුගිය (17) වනදා අත්අඩංගුවට ගත් අතර අධිකරණයට ඉදිරිපත් කිරීමෙන් අනතුරුව රුපියල් ලක්ෂ 50ක ශරීර ඇප තුනක් මත නිදහස් කළේය.

පාස්කු ත්‍රස්ත ප්‍රහාරයේ ප්‍රතිලාභ හිටපු ජනාධිපති ගෝඨාභය රාජපක්ෂට ලැබුණේ නැති බවත් සෑබෑ ප්‍රතිලාභියා කාදිනල් හිමි බැවින් ප්‍රහාරයේ වගකීම කාදිනල් හිමිට පැවරිය යුතු බව හිටපු මන්ත්‍රී උදය ගම්මන්පිල සඳහන් කරයි.

අද (22) පැවති මාධ්‍ය හමුවක් අමතමින් උදය ගම්මන්පිල සඳහන් කළේ,

“පාස්කු ප්‍රහාරයේ සැබෑ ප්‍රතිලාභියෙක් ඉන්නවා. කාදිනල් හිමියන් 2022 නොවැම්බර් (15) වැනිදා විශ්‍රාම යෑමට තිබුණා. පාස්කු ප්‍රහාරයට සම්බන්ධ ප්‍රබල පිරිසක් නීතීය හමුවට ගෙන ඒමට මම තනතුර දැරිය යුතුයැයි වතිකානුවට දැනුම්දීලා. කාදිනල් හිමි අවස්ථා 04කදී සේවා දිගු ලබාගෙන තිබෙනවා.

පාස්කු ප්‍රහාරයේ සැබෑ ප්‍රතිලාභියා කාදිනල් හිමි. එසේනම් මෙම ප්‍රහාරයේ වගකීම කාදිනල් හිමිට පවරන්නේ නැත්තේ ඇයි.? 2021 ඔක්තෝබර් (13) වැනිදා සිදුකළ සාකච්ඡාවකදී. පාස්කු ප්‍රහාරයේ මහමොළකරු සලේ කියලා සිරිල් ගාමිණී පියතුමා කියනවා එය සිදුකළේ කුමන සාක්ෂියක් මතද.?

පාස්කු විමර්ශන නැවැත්වීමට ආණ්ඩුවට බලකරන විපක්ෂයේ පිරිස කවුද.? සුරේෂ් සලේ සිය දුරකථනයේ සහ පරිගණකයේ මුරපද රහස් පොලිසියට ලබාදිය යුතුයි කියලා ඔබතුමා ප්‍රකාශ කළා. සැකකරුවෙකුට එවැනි බලකිරීමක් සිදුකිරීම නීතිවිරෝධී බව දන්නෙහිද.?

රහස් පොලිසිය සලේට අමානුෂික ලෙස සලකා ඇති බව අධිකරණ වෛද්‍ය වාර්තාවෙන් හා මානව හිමිකම් වාර්තාවෙන් තහවුරු වී තිබෙනවා. එම අමානුෂික සැලකිලි සම්බන්ධයෙන් අප හඬනගනවිට ඔබතුමා එය සාධාරණීකරනය කරමින් ප්‍රකාශ සිදුකිරීම සාධාරණද.?

පාස්කු ප්‍රහාරයට සම්බන්ධ බවට චෝදනාවට ලක්වීම නිසා. ගෝඨාභය රජපක්ෂ ආණ්ඩුව ශානි ඉවත් කළ බව දැනගෙනත්. යළි ඔහු එම තනතුරේ පිහිටුවන ලෙස සිදුකළ ඉල්ලීම හරහා නැවත පරීක්ෂණ භාරදෙන්නේ චුදිතයෙකුට බව දැන සිටියාද.?

ශානි සහ රවීට නඩු පැවරිය යුතු බවට නිර්දේශ කර තිබියදී ඔවුන්ටම එම තනතුරු ලබාදීමට බලකිරීමෙන් සැඟවිය යුත්තක් තිබුණේද.? එකිනෙකට පරස්පර ඉල්ලිම් සිදුකළ බව පිළිගන්නවාද.? වරින්වර මහමොළකරු මාරුකිරීමට බලපෑ හේතු මොනවාද.”

පාස්කු ප්‍රහාරයේ මොළකරු ලෙස සුරේෂ්⁣ සලේ නම් කර ඇති පසුබිමක හිටපු ජනාධිපති ගෝඨාභය රාජපක්ෂ සහ සුරේෂ්⁣ සලේ බේරාගැනීම වෙනුවෙන් උදය ගම්මන්පිල මෙතරම් දගලන්නේ ඇයි.? සලේගේ දුරකථනයේ සහ පරිඝණකයේ තිබෙන රහස් තොරතුරු මොනවාද.? ඒවා එළියට එයි කියන බයෙන් මාධ්‍ය සාකච්ජා තියන්නේ ඇයි.?

හිටපු අමාත්‍ය ලක්ෂ්මන් යාපා අබේවර්ධන ඇතුළු විත්තිකරුවන් දෙදෙනෙකුට එරෙහිව අල්ලස් කොමිසම විසින් ගොනුකළ නඩුව අද (22) කොළඹ මහාධිකරණ විනිසුරු රෂාන්ත ගොඩවෙල ඉදිරියේ කැඳවනු ලැබීය.

එහිදී පැමිණිල්ලේ සාක්ෂිකරුවන්ගෙන් සාක්ෂි සටහන් කර ගැනීම සිදුව ඇති අතර අනතුරුව වැඩිදුර විභාගය ජූලි මස (30) වනදා කැඳවන ලෙස විනිසුරුවරයා නියෝග කර ඇත.

මහින්ද රාජපක්ෂගේ දෙවන පදවි ප්‍රාප්තිය වෙනුවෙන් 2014 වසරේ නොවැම්බර් මස (19) වන දින ශ්‍රී ලංකා ආයෝජන මණ්ඩලයේ අරමුදල්වලින් පුවත්පත් 11ක අතිරේක පළ කිරීම තුළින් රජයට 1,748,877.76ක මුදලක් පාඩු කිරීම තුළින් දූෂණ විරෝධී පනත යටතේ වරදක් සිදු කර ඇතැයි චෝදනා කරමින් අල්ලස් කොමිසම විසින් ලක්ෂ්මන් යාපා අබේවර්ධන ඇතුළු දෙදෙනෙකුට එරෙහිව මෙම නඩුව ගොනු කර ඇත.

“Hold SLC Elections or Get Blacklisted, ICC Informs President AKD” යන සිරස්තලයෙන් ඩේලි මිරර් පුවත්පතේ මුල් පිටුවේ පළ කර ඇති අසත්‍ය සහ නොමඟ යවනසුළු පුවත රජය දැඩි ලෙස ප්‍රතික්ෂේප කරයි.

මෙම වාර්තාවට කිසිදු සත්‍ය පදනමක් නොමැති අතර, ජනාධිපති අනුර කුමාර දිසානායක සහ ජාත්‍යන්තර ක්‍රිකට් කවුන්සිලයේ (ICC) සභාපති Jay Shah අතර ජනාධිපති ලේකම් කාර්යාලයේදී පැවැති හමුව සිතාමතාම විකෘති කර දැක්වීමකි.

මෙම සාකච්ඡාවේදී ක්‍රිකට් ක්‍රීඩාවේ දියුණුව, බිම් මට්ටමින් සහ තරුණ තරුණියන් සඳහා වන ක්‍රිකට් වැඩසටහන් මෙන්ම තරුණ ක්‍රීඩකයන් සඳහා අවස්ථා පුළුල් කිරීම පිළිබඳව අවධානය යොමු වූ බව ජනාධිපතිවරයා සහ ICC සභාපතිවරයා යන දෙදෙනාම සිය X ගිණුම් ඔස්සේ නිල වශයෙන් තහවුරු කළහ.

එහිදී කිසිදු අවසාන නිවේදනයක්, අසාදු ලේඛනයට ඇතුළත් කිරීමේ තර්ජනයක් හෝ නිලවරණයට අදාළ කරුණක් සාකච්ඡා නොවූ අතර, එවැනි කිසිදු අවසාන නිවේදනයක් නිකුත් කර නොමැත.

ජනාධිපති අනුර කුමාර දිසානායක සහ ICC සභාපතිවරයා යන දෙදෙනාගේම නිල ප්‍රකාශයන් සෘජුවම පරිශීලනය කිරීමට පාඨකයන්ට අවස්ථාව තිබියදී, මෙවැනි ප්‍රබන්ධිත පුවතක් පළ කිරීම අදාළ පුවත්පතේ විශ්වසනීයත්වය තවදුරටත් පළුදු කිරීමට හේතු වේ.

එම අසත්‍ය පුවත සම්බන්ධයෙන් වන මෙම නිවේදනය ප්‍රසිද්ධියේ පළ කරන ලෙසත්, අදාළ පුවත මුද්‍රිත සහ අන්තර්ජාල සංස්කරණය යන දෙකෙන්ම ඉවත් කර ගැනීමට කටයුතු කරන ලෙසත් රජය ඩේලි මිරර් පුවත්පතෙන් ඉල්ලා සිටියි.

රත්මලානේ ඉදිකෙරෙමින් පවතින නව දුම්රිය කර්මාන්තශාලාව සඳහා අවශ්‍ය Crane පද්ධති මේ වනවිට ශ්‍රී ලංකාවට ළඟා වී ඇත.

මෙම පද්ධතියට ටොන් 50 ධාරිතාවයකින් යුත් Double Girder Overhead Travelling Cranes 2ක්, ටොන් 15 ධාරිතාවයකින් යුත් Cranes 2ක් සහ ටොන් 10 ධාරිතාවයකින් යුත් Crane 1ක් ඇතුළත් වේ.

අමෙරිකානු ඩොලර් 1.35 මිලියනයකට අධික වටිනාකමකින් යුත් මෙම උපකරණ, නව කර්මාන්තශාලාව තුළ දුම්රිය එන්ජින් සහ බොගි නඩත්තු කටයුතු නවීන තාක්ෂණය ඔස්සේ සිදු කිරීම සඳහා මූලික පහසුකම් සපයනු ඇත.

Crane පද්ධති සවිකිරීමෙන් අනතුරුව, රත්මලාන නව කර්මාන්තශාලව තුළ නඩත්තු කටයුතු මෙම වසර තුළ ආරම්භ කිරීමට අපේක්ෂා කෙරේ.

මෙය ශ්‍රී ලංකා දුම්රිය සේවයේ නඩත්තු හැකියාවන් නවීකරණය කරමින්, වඩාත් කාර්යක්ෂම සහ විශ්වාසනීය සේවාවක් ගොඩනැගීම සඳහා ගනු ලබන වැදගත් පියවරකි.

අමාත්‍ය ආනන්ද විජේපාලගේ පාර්ලිමේන්තු මන්ත්‍රී ධුරය සම්බන්ධව තීන්දුවක් ලබාදෙන ලෙස ඉල්ලා ඉදිරිපත් කළ අභියාචනයක් විභාගයට ගැනීමට ශ්‍රේෂ්ඨාධිකරණය අවසර ලබාදී ඇත.

ශ්‍රී ලංකා පොදුජන පෙරමුණේ හිටපු පාලක ලේකම් රේණුක පෙරේරා විසින් ඉදිරිපත් කළ අභියාචනා පෙත්සමක් සලකා බැලීමෙන් අනතුරුව ශ්‍රේෂ්ඨාධිකරණය මෙම නියෝගය නිකුත් කර ඇත.

පාර්ලිමේන්තු මන්ත්‍රීවරයෙකු වශයෙන් තේරී පත්වු ආනන්ද විජේපාල ජනාධිපතිවරයාගේ කාර්ය මණ්ඩල ප්‍රධානියා වශයෙන් කටයුතු කරන බවත් ඒ අනුව ආණ්ඩුක්‍රම ව්‍යවස්ථාව ප්‍රකාරව ඔහුට පාර්ලිමේන්තු මන්ත්‍රී ධුරයක් දැරීමට සුදුසුකමක් නොමැති බවට තීන්දුවක් ලබා දෙන්න ලෙස ඉල්ලා මෙම අභියාචනා පෙත්සම ඉදිරිපත් කර ඇත.

තමන් දැනට ක්‍රියාකාරී දේශපාලනයෙන් බැහැරව සිටින බැවින් මේ මොහොතේ බලයේ සිටින්නේ කවුරුන් වුවද රටේ ජනතාව වෙනුවෙන් යහපතක් කරන්නේ නම් තමන් ඊට කැමති බව හිටපු ජනාධිපති මෛත්‍රීපාල සිරිසේන සඳහන් කරයි.

හිටපු ජනාධිපති මෛත්‍රීපාල සිරිසේන සඳහන් කළේ,

“අපි ඉතින් දැන් මේ දේශපාලනයේ නෑ නෑනේ. අපි ක්‍රියාකාරී දේශපාලනේ නැහැ. ඉතින් ඒක නිසා මේ අපි කැමතියි කවුරුහරි කමක් නෑ රට හොඳට හදනවා නම්. රටේ මිනිස්සුන්ට යහපත්ව ජීවත් වෙන්න දරුවන්ට හොඳ රටක් හදනවා නම් කාගෙන් හරි හොඳ ආර්ථිකයක් එක්ක දුගී භාවය අවම වෙලා ඒක තමයි අවශ්‍ය වෙන්නේ.“

“ඔයාලට වඩා මට දැනෙනවා තෙල් මිල. ඇයි ඉතින් දැන් දැන් ඔයාට කීයක් හරි පඩියක් හම්බවෙනවා නේද.? හම්බෙනවානේ කීයක් හරි. ඉතින් මට පැන්ෂන් එකක් නෑනෙ. ඒවත් ඔක්කොම නෑනේ. ඉතින් එතකොට මම මොකද කරන්නේ ඒකට. ඉතින් ඔයාලට වඩා මට අමාරුයි.”

මාධ්‍ය වෙත අදහස් දක්වමින් හිටපු ජනාධිපති මෛත්‍රීපාල සිරිසේන මේ බව සඳහන් කරයි.