Local news

අද (27) දිනයේ සිට එළඹෙන ජූනි මස (02) වනදා දක්වා වෙසක් සතිය පුරාවට ස්ථාන රැසක් වසා දමන බව රාජ්‍ය පරිපාලන, පළාත් සභා සහ පළාත් පාලන අමාත්‍යාංශය නිවේදනය කරයි.

ඒ අනුව වෙසක් උත්සවය වෙනුවෙන් මස් මාංශ අලෙවි සැල්, මස් පිණිස සතුන් මරණ ස්ථාන, රේස් බුකි, කැසිනෝ ශාලා හා සමාජ ශාලා වසා තැබීමට තීරණය කර ඇත.

තවද, මැයි මස (30), (31) සහ ජූනි (01) යන දිනයන්හි දිවයින පුරා ඇති මස් පිණිස සතුන් ඝාතනය කරන ස්ථාන හා මස් මාංශ අලෙවිසැල් වසා තැබීමටත්, සුපිරි වෙළඳ සැල්වල මස් මාංශ අලෙවිය නැවැත්වීමටත්, රේස් බුකි, කැසිනෝ ශාලා හා සමාජ ශාලා වසා තැබීමටත් අවශ්‍ය කටයුතු කරයි.

රුසියානු සමූහාණ්ඩුවේ නිල සංචාරයක නිරතව සිටින ශ්‍රී ලංකාවේ ආරක්ෂක ලේකම්, එයාර් වයිස් මාර්ෂල් සම්පත් තුයිය කොන්තා (විශ්‍රාමික) (26) දින මොස්‌කව් නුවරදී රුසියානු නියෝජ්‍ය ආරක්ෂක අමාත්‍ය Vasily Osmakov හමුවිය.

මොස් කව්හිදී මැයි (26) සිට (29) දක්වා පැවැත්වෙන පලමුවන ජාත්‍යන්තර ආරක්ෂක සංසදය සහ ආරක්ෂක ගැටළු පිළිබඳ ජ්‍යෙෂ්ඨ නියෝජිතයින්ගේ වාර්ෂික රැස්වීම (International Forum on Security and the Annual Meeting of High Representatives for Security Issues) සඳහා සහභාගි වු ආරක්ෂක ලේකම්වරයා ඊට සමගාමීව මෙම හමුව පැවැත්විණි.

මෙම සාකච්ඡාවේදී, දෙරට අතර කලාපීය සහ ගෝලීය වශයෙන් වැදගත් ආරක්‍ෂක අභියෝග පිළිබඳව අදහස් හුවමාරු කරගෙන ඇත.

ශ්‍රී ලංකාව සහ රුසියානු සමූහාණ්ඩුව අතර අන්‍යොන්‍ය වශයෙන් වැදගත් වන ආරක්ෂක ක්ෂේත්‍ර වල, විශේෂයෙන්ම යුධ – තාක්ෂණික සහයෝගීතාව (Military-Technical cooperation), ධාරිතා සංවර්ධන වැඩසටහන් (Capacity-Building Initiatives) මෙන්ම දෙරට අතර පුහුණුවීම් වලට අදාල අවස්ථා ඉහළ නැංවීම වෙනුවෙන් පවතින අඛණ්ඩ සහයෝගීතාවයේ වැදගත්කම තහවුරු කලේය.

තවද දැනට රුසියානු සමූහාණ්ඩුවේ සේවය කරන හිටපු ශ්‍රී ලාංකික හමුදා සාමාජිකයන්ට අදාළ කරුණු පිළිබඳවද දෙපාර්ශවය විසින්ම දීර්ඝ වශයෙන් සාකච්ඡා කලේය.

අද (27) දින ගම්පහ සහ මහර ප්‍රාදේශීය සභා බලප්‍රදේශ වලට පැය 12ක කාලයක් ජල සැපයුම අත්හිටුවන බව ජාතික ජලසම්පාදන හා ජලාපවහන මණ්ඩලය සඳහන් කරයි.

ඒ අනුව අද සවස 7.00 සිට හෙට (28) පෙරවරු 7.00 දක්වා කාලය තුළ ජල සැපයුම කප්පාදු කරන බව ජාතික ජලසම්පාදන හා ජලාපවහන මණ්ඩලය සඳහන් කරයි.

මධ්‍යම අධිවේගී මාර්ගයේ ඉදිකිරීම් කටයුතු හා සම්බන්ධ ජල නළ විතැන්කිරීමේ අත්‍යාවශ්‍ය නඩත්තු තටයුත්තක් හේතුවෙන් මෙම ජල අත්හිටුවීම සිදුකරන බව ජාතික ජලසම්පාදන හා ජලාපවහන මණ්ඩලය සඳහන් කරයි.

වෙසක් උත්සවයට සමගාමීව අද (27) දිනයේ සිට ජුනි (02) දක්වා වෙසක් සතියක් ප්‍රකාශයට පත්කර ඇත.

මෙවර රාජ්‍ය වෙසක් උත්සවය මාතර තිහගොඩ මිදෙල්ලවල විහාරස්ථානයේදී අද (27) දින ජනාධිපති අනුර කුමාර දිසානායකගේ ප්‍රධානත්වයෙන් පැවැත්වීමට නියමිතය.

සමස්ත ලංකා ශාසනාරක්ෂක බලමණ්ඩලයේ මඟ පෙන්වීම අනුව බුද්ධ ශාසන, ආගමික සහ සංස්කෘතික කටයුතු අමාත්‍යාංශය හා බෞද්ධ කටයුතු දෙපාර්තමේන්තුව, දිස්ත්‍රික් ලේකම් කාර්යාල හා ප්‍රදේශීය ලේකම් කාර්යාල ඇතුළු රාජ්‍ය හා රාජ්‍ය නොවන ආයතනවල සහය ඇතිව වෙසක් උත්සවය දිවයින පුරා පැවැත්වීමට පියවර ගෙන ඇත.

වෙසක් සමයේ පිළිවෙතින් පෙල ගැසී ප්‍රතිපත්ති පූජාවන්ට මුල් තැන දී කටයුතු කරන්නැයි බෞද්ධ කටයුතු කොමසාරිස් ජෙනරාල්වරයා ජනතාවගෙන් ඉල්ලීමක් කරයි.

අල්ලස් හෝ දූෂණ චෝදනා විමර්ශන කොමිෂන් සභාව විසින් නිවේදනයක් නිකුත් කර ඇත.

වත්කම් සහ බැරකම් ප්‍රකාශ මධ්‍යගත ඉලෙක්ට්‍රොකින පද්ධතිය මගින් ඉදිරිපත් කිරීම පිළිබඳව විවිධ බාහිර පාර්ශ්වයන් විසින් සිදුකරන ලබන නිවැරදි නොවන දැනුවත් කිරීම් සම්බන්ධව අල්ලස් හෝ දූෂණ චෝදනා විමර්ශන කොමිෂන් සභාව මෙම නිවේදනය නිකුත් කර ඇත.

වත්කම් සහ බැරකම් ප්‍රකාශ කිරීමට අල්ලස් හෝ දූෂණ චෝදනා විමර්ශන කොමිෂන් සභාව විසින් ස්ථාපිත කර ඇති මධ්‍යගත ඉලෙක්ට්‍රොනික පද්ධතිය පිළිබඳව, එම පද්ධතියට තොරතුරු ඇතුළත් කිරීම පිළිබඳව සහ පද්ධතියට ප්‍රවේශ වීම පිළිබඳව කොමිෂන් සභාවේ නිලධාරීන් නොවන වෙනත් පුද්ගලයින් විසින් විවිධ දැනුවත් කිරීම් සිදුකරන බවට මේ වන විට නිරීක්ෂණය වී ඇත.

මෙලෙස සිදුකරන ලබන දැනුවත් කිරීම්වලදී නිවැරදි නොවන තොරතුරු සහ මෙම ඉලෙක්ට්‍රොනික පද්ධතියේ භාවිතය පිළිබඳව නිවැරදි නොවන ක්‍රමවේදයන් අදාළ පුද්ගලයින් විසින් සන්නිවේදනය කරනු ලබන බවද කොමිෂන් සභාවට මේ වන විට නිරීක්ෂණය වී ඇති බවද සඳහන් කරයි.

එනිසා කොමිෂන් සභාව හෝ එහි නිලධාරීන් නොවන වෙනත් බාහිර පුද්ගලයින් විසින් සිදුකරනු ලබන එවැනි දැනුවත් කිරීම් පිළිබඳව අල්ලස් හෝ දූෂණ චෝදනා විමර්ශන කොමිෂන් සභාව විසින් වගකීමක් දරනු නොලබන බවද කොමිසම සඳහන් කරයි.

එම මධ්‍යගත ඉලෙක්ට්‍රොනික පද්ධතියට තොරතුරු ඇතුළත් කිරීම සම්බන්ධව මතුවන ගැටලු පිළිබඳව කොමිෂන් සභාවේ වත්කම් බැරකම් ප්‍රකාශ අංශයේ 0767011954 සහ 0112587284 යන දුරකථන අංක මගින් පමණක් නිරාකරණය කර ගත හැකි බවද කොමිසම සඳහන් කරයි.

පවුල් සෞඛ්‍ය සේවා නිලධාරිනියන්ට ලබන ජනවාරි මාසයේ නියමිත වැටුප් වැඩිවීම ලබාදීමටත් ඉදිරියේදී සේවා කටයුතු සඳහා යතුරුපැදි ලබාදීමටත් කටයුතු කරන බව සෞඛ්‍ය හා ජනමාධ්‍ය අමාත්‍ය වෛද්‍ය නලින්ද ජයතිස්ස සඳහන් කරයි.

පරිපාලන පවුල් සෞඛ්‍ය සේවා නිලධාරිනී පුහුණුව සාර්ථකව අවසන් කළ නිලධාරිනියන් 275 දෙනෙකු සඳහා සහතිකපත් ප්‍රදානය කිරීමේ උත්සවයට (26) එක්වෙමින් අමාත්‍ය වෛද්‍ය නලින්ද ජයතිස්ස මේ බව සඳහන් කරයි.

වර්තමානය වනවිට රටක් ලෙස ආර්ථිකය ස්ථාවර කරමින් සිටින බවත් එය සරල පහසු රේඛීය මාර්ගයක ගමන් නොකරන බවත් පවතින ලෝක යුධමය තත්ත්වය හමුවේ වුවද සියලු බර ජනතාව වෙතම නොදී සියල්ල කළමනාකරණය කරමින් ආර්ථිකය යම් ස්ථාවර තත්ත්වයකට පත් කරමින් සිටින බවද අමාත්‍යවරයා සඳහන් කරයි.

ලෝක සෞඛ්‍ය සංවිධානයේ මෙවර පැවති ලෝක සෞඛ්‍ය සමුළුවේදී ශ්‍රී ලංකාවේ නිදහස් සෞඛ්‍ය සේවාව විශේෂ ඇගයීමකට, වර්ණනාවක පාත්‍ර වූ බවත් එම ගෞරවයේ ප්‍රධාන කොටසක් පවුල් සෞඛ්‍ය සේවා නිලධාරිනීයන් ඉටුකළ සේවය වෙනුවෙන් මෙරටට ලැබුණු බවද අමාත්‍යවරයා සඳහන් කරයි.

විශේෂයෙන්ම තරුණ කාන්තාවන්ට, මව්වරුන්ට ගෙයින් ගෙට ගොස් පවුල් සෞඛ්‍ය සේවා නිලධාරිනීය අවස්ථානුකූලව මවක්, මිතුරියක්, සොයුරියක් වෙමින් ඉතාම සමීපව කටයුතු කරන බවත් එලෙස කටයුතු කරමින් ඉටුකරනු ලබන සේවාව මහත්සේ අගය කරන බවද අමාත්‍යවරයා සඳහන් කරයි.

වර්ථමානය වන විට බෝනොවන රෝග පිළිබද ගැටළුවේදී එය නිරාකරණයට විශාල ආදර්ශයක් මෙරට පවුල් සෞඛ්‍ය සේවාව තුළින් ලැබෙන බවත් අලුතින් ස්ථාපිත කරන ආරෝග්‍යා සුවතා මධ්‍යස්තානවල පවුල් සෞඛ්‍ය සේවා නිලධාරිනියන්ටද සැලකිය යුතු වැඩ කොටසක් ඉටුකිරීමට පැවරෙන බවද අමාත්‍යවරයා සඳහන් කරයි.

ශ්‍රී ලංකා නාවික හමුදාවේ වයඹ සහ උතුරු මැද නාවික විධානයන් භාවිතා කරනු ලබන ඉඩම් නිරීක්‍ෂණය කිරීම සඳහා ආරක්ෂක නියෝජ්‍ය අමාත්‍ය මේජර් ජෙනරල් අරුණ ජයසේකර (25) දින මන්නාරම් දිස්ත්‍රික්කයේ ක්ෂේත්‍ර චාරිකාවක නිරත විය.

මෙම සංචාරය සඳහා මන්නාරම් දිස්ත්‍රික්ක සම්බන්ධීකරණ කමිටුවේ සභාපති, සමුපකාර සංවර්ධන නියෝජ්‍ය අමාත්‍ය උපාලි සමරසිංහ, වන්නි දිස්ත්‍රික් පාර්ලිමේන්තු මන්ත්‍රී මයිල්වාගනම් ජෙගදීස්වරන් ඇතුළු රාජ්‍ය නිලධාරීන් පිරිසක් ද සහභාගී වූහ.

මෙම සංචාරය අතරතුර, නියෝජ්‍ය අමාත්‍යවරයා රට තුල ඇති මත්ද්‍රව්‍ය උවදුර තුරන් කිරීම සඳහා මන්නාරම් දිස්ත්‍රික්කය තුළ නාවික හමුදාව විසින් දක්වන සක්‍රීය දායකත්වය පිළිබඳව පුළුල්ව නිරීක්ෂණය කළ අතර, මුහුදු සීමාවන් සහ වෙරළබඩ ආරක්ෂාව ශක්තිමත් කිරීම මෙන්ම, අදාළ බල ප්‍රදේශ තුළ සිදුවන නීති විරෝධී කටයුතු මැඩපැවැත්වීම සඳහා ගෙන ඇති ක්‍රියාමාර්ග පිළිබඳව සමාලෝචනය කළේය.

අදාළ නාවික ප්‍රදේශ භාර ආඥාපතිවරුන් විසින් දැනට සිදු කරන මෙහෙයුම්වල වත්මන් ප්‍රගතිය පිළිබඳව ඉදිරිපත් කළ පුළුල් මෙහෙයුම් විස්තර කිරීම් වලින් අනතුරුව, නියෝජ්‍ය අමාත්‍යවරයා ඔවුන්ගේ එම විශිෂ්ඨ කාර්යභාරය අගය කළේය.

එහිදී ඔවුන්ගේ මුලපිරීම්වල ඵලදායීතාවය තවදුරටත් ඉහළ නැංවීම සඳහා අවශ්‍ය උපදෙස් ලබාදීම ඔහු විසින් සිදු කළේය.

ඉන් අනතුරුව, මන්නාරම දිස්ත්‍රික්කයේ මුල්ලික්කුලම්, සිලාවතුර, තලෙයිමන්නාරම, වන්කාල පාඩුව සහ පල්ලිමුනෙයි යන ප්‍රදේශ වල නාවික හමුදාව දැනට භාවිතා කරන ඉඩම් නිරීක්ෂණය කළේය.

එහිදී ප්‍රදේශවාසීන් සමඟ ද සුහදව අදහස් හුවමාරු කරගත් ඔහු, ඔවුන් මුහුණ දෙන නිවාස ගැටළු, ප්‍රජාව මුහුණ දෙන අභියෝග, සුබ සාධන අවශ්‍යතා සහ විශේෂයෙන්ම ධීවර ප්‍රජාව මුහුණ දෙන ගැටළු පිළිබඳව විශේෂ අවධානයක් යොමු කළේය.

එමෙන්ම, අදාළ රාජ්‍ය බලධාරීන් සමඟ සම්බන්ධීකරණය වෙමින් එම ගැටළු විසඳීම සඳහා ගත හැකි ක්‍රියාකාරී මාර්ග ද හඳුන්වා දුන්නේය.