ඉහළ පෙළේ සැසියට සහභාගි වීම සඳහා ජනාධිපති රනිල් වික්‍රමසිංහ මහතා හෙට (18) දිවයිනෙන් පිටත්ව යෑමට නියමිත බව ජනාධිපති මාධ්‍ය අංශය පවසයි, ඒ ඉන්දුනීසියාවේ බාලි නගරයේ පැවැත්වෙන 10 වැනි ලෝක ජල සමුළුව ඇමතීම සඳහායි.
“සාමූහික සෞභාග්‍ය සඳහා ජලය” යන තේමාව යටතේ මැයි 18 සිට 20 වැනිදා දක්වා ඉන්දුනීසියාවේ බාලි නගරයේදී පැවැත්වීමට නියමිත මෙම උත්සවය සඳහා මෙරට ජනාධිපති රනිල් වික්‍රමසිංහ මහතා වෙත ඉන්දුනීසියානු ජනාධිපති ජෝකෝ විඩෝඩෝ (Joko Widodo) මහතා විසින් සිදුකළ ආරාධනාවක් අනුව මෙම සංචාරය සිදුවන බව වාර්තා වන අතර එහිදී ජනාධිපතිවරයා සමුළුව අමතා සිය විශේෂ දේශනය ඉදිරිපත් කිරීමට නියමිත බව පැවසේ.
මේ අතර එම දෙදින නිල සංචාරය අතරතුර වික්‍රමසිංහ ජනාධිපතිවරයා ඉන්දුනීසියානු ජනාධිපතිවරයා ඇතුළු එරට ඉහළ පෙළේ නියෝජිතයන් රැසක් සමඟ ද්විපාර්ශ්වික සාකච්ඡාවලට එක්වීමට නියමිත බවද වාර්තා වේ.
