පාසල් සිසුන්ට විභාග සමත්වීම සදහා දෛනික පාසල් පැමිණීම අත්‍යවශ්‍ය කරුණක් බවත් ඉදිරියේදී සියලු‍ම ශ්‍රේණිවලට අදාළව සිසුන් පාසල් පන්ති කාමරය තුළ රැඳීසිටීම අනිවාර්යය වන බවද අධ්‍යාපන අමාත්‍ය සුසිල් ප්‍රේම්ජයන්ත සදහන් කරයි.
පහේ ශිෂ්‍යත්ව විභාගයේදී පවා හතර සහ පහ ශ්‍රේණි දෙකේදී පන්ති කාමරයේ රැඳී සිට උපයාගත යුතු නිශ්චිත ලකුණු ප්‍රමාණයක් පවතින බැවින් මෙම තීරණය ගත් බවද උත්සවයකට එක්වෙමින් අධ්‍යාපන අමාත්‍ය සුසිල් ප්‍රේම්ජයන්ත සදහන් කරයි.
ඉදිරියේදී උසස් පෙළ විභාගය පැවැත්වුණ ද එළඹෙන 2024 ජනවාරි පාසල්වල ප්‍රාථමික පන්ති පවත්වාගෙන යාමට අපේක්ෂා කරන බවත් ලබන වසර තුළ අතපසු වූ සියලු විෂය ආවරණ කටයුතු සම්පූර්ණ කර නිමා කරන බවද අමාත්‍යවරයා සදහන් කරයි.
එළඹෙන 2024 වසරේ අතපසු වූ සියලු‍ම විෂය ආවරණ කිරීමට කටයුතු කරන බවත් ඒ සදහා පාසල් නිවාඩු කාලය අඩු කරන බවද අමාත්‍යවරයා සදහන් කරයි.
ආර්ථික හා සමාජ අභියෝග හමුවේ දුෂ්කරතාවලට මුහුණ දී සිටින දෙමාපියන්ට දරුවන්ගේ උපකාරක පන්ති වෙනුවෙන් අති විශාල මුදලක් වෙන්කිරීමට සිදුවීමේ ඛේදනීය තත්ත්වය වහාම වළක්වාගත යුතු බවද සදහන් කරයි.
එය එසේ නොවුණහොත් ගුරු පුහුණු සැසි පවත්වා අධික මුදලක් වැය කර ගුරු වැටුප් ගෙවා භෞතික හා මානව සම්පත් සංවර්ධනය කර පාසල් පවත්වාගෙන යාමේ නිදහස් අධ්‍යාපන අරමුණු වියැකී යන බවද අමාත්‍යවරයා සදහන් කරයි.
