අලුතින් සංවර්ධනය වන උතුරු, නැගෙනහිර වෙරළ තීරය ආරක්ෂා කර ගැනීම සඳහා උපරිම ක්‍රියාමාර්ග ගන්නා ලෙසත් අනවසර ඉදිකිරීම් හේතුවෙන් වෙරළ තීරයට විශාල හානියක් සිදුවන බැවින් එය වැළැක්වීම සඳහා ගතහැකි සියලු නීතිමය ක්‍රියාමාර්ග ගන්නා ලෙස ජනාධිපති අනුර කුමාර දිසානායක නිලධාරීන්ට උපදෙස් දුන්නේය.
තවද එම කටයුතු සොයා බැලීම වෙනුවෙන් මෙහෙයුම් කමිටුවක් පත් කරන ලෙසද ජනාධිපති අනුර කුමාර දිසානායක උපදෙස් දුන්නේය.
ජනාධිපති අනුර කුමාර දිසානායක මෙම උපදෙස් ලබා දුන්නේ පරිසර අමාත්‍යාංශයට අදාළව 2026 වසරේ වෙන් කෙරුණු අයවැය ප්‍රතිපාදන මත ක්‍රියාත්මක ව්‍යාපෘතිවල ප්‍රගතිය සමාලෝචනය සහ 2027 අයවැය යෝජනා පිළිබඳ සාකච්ඡාවකට ජනාධිපති කාර්යාලයේදී එක් වෙමිනි.
“පොහොසත් රටක් – ලස්සන ජීවිතයක්, තිරසාර ජෛව ලෝකයක් – සදාහරිත ජීවිතයක්” යන තේමාව යටතේ පරිසර අමාත්‍යාංශය විසින් රුපියල් මිලියන 19,719ක අයවැය ප්‍රතිපාදන යටතේ ක්‍රියාත්මක කරන ලද ව්‍යාපෘතිවල ප්‍රගතිය සහ 2027 සැලසුම් පිළිබඳව මෙහිදී පුළුල් ලෙස විමසා බැලිණි.
ඒ අනුව, පරිසර අමාත්‍යාංශය යටතේ ඇති මධ්‍යම පරිසර අධිකාරිය, වනජීවි දෙපාර්තමේන්තුව, වන සංරක්ෂණ දෙපාර්තමේන්තුව, ජාතික සත්වෝද්‍යාන දෙපාර්තමේන්තුව, ජාතික උද්භිද උද්‍යාන දෙපාර්තමේන්තුව, ජල සම්පත් මණ්ඩලය, වෙරළ සංරක්ෂණ සහ වෙරළ සම්පත් කළමනාකරණ දෙපාර්තමේන්තුව, සමුද්‍රීය පරිසර ආරක්ෂණ අධිකාරිය ඇතුළු ආයතන විසින් 2026 වසරේ සිදු කරන ලද පුනරාවර්තන සහ ප්‍රාග්ධන වියදම්වල ප්‍රගතිය පිළිබඳව මෙහිදී සාකච්ඡා විය.
ඔලුවිල් වෙරළ තීරයේ ඛාදනය වැළැක්වීම සඳහා ගතහැකි ක්‍රියාමාර්ග විමසා බැලීමට ඒ පිළිබඳ විශේෂඥ කමිටුවක් පත් කර, වාර්තාවක් කඩිනමින් ලබාදෙන ලෙස ජනාධිපතිවරයා විසින් මෙහිදී උපදෙස් ලබා දෙන ලදී.
ශ්‍රී ලංකාවේ අලි මිනිස් ගැටුම අවම කිරීම සඳහා 2026 අයවැය ප්‍රතිපාදන යටතේ ක්‍රියාත්මක කරන ලද ව්‍යාපෘතිවල ප්‍රගතිය මෙහිදී ජනාධිපතිවරයා විශේෂයෙන් විමසා බැලූ අතර මන්දගාමීව සිදු කෙරෙන එම ව්‍යාපෘති මිනිස් ජීවිතවලට තර්ජනයක් බවත්, අවශ්‍ය ප්‍රතිපාදන වෙන් කර තිබියදී ව්‍යාපෘති ප්‍රමාදවීම අනුමත කළ නොහැකි බවත්, ජනාධිපතිවරයා පෙන්වා දුන්නේය.
එබැවින් ග්‍රාමීය ජන ජීවිතය පිළිබඳ සංවේදී වෙමින් මෙම ව්‍යාපෘති නිසි කාලය තුළ අවසන් කිරීමේ අවශ්‍යතාව අවධාරණය කළ ජනාධිපති අනුර කුමාර දිසානායක මෙම වසරේ ලබාදී ඇති ප්‍රතිපාදන මෙම වසර තුළම වැය කරමින් අදාළ ඉදිකිරීම් සිදු කරන ලෙස නිලධාරීන්ට උපදෙස් දුන්නේය.
එමෙන්ම අලි වැට සීමාව සහ ප්‍රමාණය තීරණය කළ යුත්තේ වනජීවි කලාප ලකුණු කිරීම වෙනුවෙන් නොව, ජන ජීවිතය ආරක්ෂා කිරීමට බව ජනාධිපතිවරයා මෙහිදී වැඩිදුරටත් අවධාරණය කළේය.
“ක්ලීන් ශ්‍රී ලංකා” වැඩසටහන යටතේ ක්‍රියාත්මක වන ජල මූලාශ්‍ර සංරක්ෂණ ව්‍යාපෘති, පිරිසිදු වෙරළ තීරයක් ව්‍යෘපෘතිය, වෙරළබඩ විනෝද උද්‍යාන ඇති කිරීමේ ව්‍යාපෘතිය, සිංහරාජය සහ කන්නෙලිය වනාන්තර සඳහා විශේෂ අවශ්‍යතා සහිත පුද්ගලයන්ට ප්‍රවේශ පහසුකම් ඇති කිරීමේ ව්‍යාපෘතියේ ප්‍රගතිය මෙහිදී සාකච්ඡාවට ගැනුණි.
