Local news

දූෂණ චෝදනාවක් සම්බන්ධව පාර්ලිමේන්තු මන්ත්‍රී චාමර සම්පත් දසනායකට එරෙහිව කොළඹ මහාධිකරණයේ අධි චෝදනා ගොනු කර තිබෙන බව අල්ලස් කොමිසම අද (23) දින කොළඹ මහේස්ත්‍රාත් අධිකරණයට දැනුම් දුන්නේය.

අද (23) දින කොළඹ ප්‍රධාන මහේස්ත්‍රාත් අසංග එස් බෝදරගම ඉදිරියේ මෙම නඩුව කැඳවූ අවස්ථාවේදී මෙම සැකකරුට එරෙහිව කොළඹ මහාධිකරණය හමුවේ අධි චෝදනා ඉදිරිපත් කර තිබෙන බව අල්ලස් කොමිසම අධිකරණයට දැනුම් දුන්නේය.

මහේස්ත්‍රාත් අධිකරණය හමුවේ පවතින නඩු කටයුත්ත අවසන් කළ මහේස්ත්‍රාත්වරයා මහාධිකරණය නොතීසියක් ලද විට අධිකරණයේ පෙනී සිටින ලෙස සැකකාර චාමර සම්පත් දසනායකට නියම කළේය. 

“දිට්වා” සුළි කුණාටුවෙන් පසුව රට යළි ගොඩනැංවීම සඳහා රජය විසින් ආරම්භ කළ ‘Rebuilding Sri Lanka’ අරමුදලේ වත්මන් තත්ත්වය පිළිබඳව මුදල් අමාත්‍යාංශ ලේකම් ආචාර්ය හර්ෂණ සූරියප්පෙරුම පැහැදිලි කිරීමක් සිදුකර ඇත.

‘Rebuilding Sri Lanka’ අරමුදල සඳහා ශ්‍රී ලාංකික ව්‍යාපාර ආයතන සහ පුරවැසියන් විසින් මේ වනවිට පරිත්‍යාග කර ඇති මුදල රුපියල් බිලියන 8.5 සීමාව ඉක්මවා ගොස් ඇති බව මුදල් අමාත්‍යාංශ ලේකම් ආචාර්ය හර්ෂණ සූරියප්පෙරුම සඳහන් කරයි.

විදෙස් රටවලින් ලැබුණු මුදල් ප්‍රමාණයද මේ වනවිට ඉහළ ගොස් ඇති බවත් එසේ ලැබුණු විදෙස් මුදල් ප්‍රමාණයද මේ වනවිට අමෙරිකානු ඩොලර් මිලියන 9.49ක සීමාව ඉක්මවා ගොස් ඇති බවද මුදල් අමාත්‍යාංශ ලේකම් ආචාර්ය හර්ෂණ සූරියප්පෙරුම සඳහන් කරයි.

මෙම මුදල් ආධාර ලැබුණු රටවල් අතර අමෙරිකා එක්සත් ජනපදයෙන් ඉහළ මුදල් ප්‍රමාණයක් ලැබී ඇති බවත් එම ප්‍රමාණය රුපියල් බිලියනය ඉක්මවා ගොස් ඇතැයිද මුදල් අමාත්‍යාංශ ලේකම් ආචාර්ය හර්ෂණ සූරියප්පෙරුම සඳහන් කරයි.

තවද, ඔස්ට්‍රේලියාව, චීනය, එංගලන්තය, ජර්මනිය, කැනඩාව, අරාබිය, එක්සත් අරාබි එමීර් රාජ්‍යය, භූතානය, ඉතාලිය සහ කොරියාව යන රටවල්ද පිළිවෙළින් මුදල් ආධාර ලැබුණු ඉහළම රටවල් 10 බවද මුදල් අමාත්‍යාංශ ලේකම් ආචාර්ය හර්ෂණ සූරියප්පෙරුම සඳහන් කරයි.

ඓතිහාසික දීඝවාපිය චෛත්‍ය රාජයාණන් වහන්සේ ප්‍රතිසංස්කරණය කිරීමේ මහා පුණ්‍ය කර්මය ආරක්ෂක අමාත්‍යාංශයේ පූර්ණ අධීක්ෂණය හා පුරාවිද්‍යා දෙපාර්තමේන්තුවේ මඟපෙන්වීම යටතේ ක්‍රියාත්මක වේ.

ඒ සඳහා ශ්‍රී ලංකා යුද්ධ හමුදාව සහ සිවිල් ආරක්ෂක බලකායේ සාමාජිකයින් සිය ශ්‍රම දායකත්වය අඛණ්ඩව සපයනු ලබයි.

වසර ගණනාවක් පුරා ක්‍රමානුකූලව සිදු කෙරෙන මෙම ප්‍රතිසංස්කරණ කටයුතු විධිමත් සැලසුමකට අනුව සිදුවන අතර, එම කටයුතු මේ වනවිට ඉතා ප්‍රශස්ත මට්ටමක පවති.

නැගෙනහිර පළාතේ විශාලතම ස්ථුපය ලෙස සැලකෙන දීඝවාපී සෑ රඳුන් සම්පූර්ණයෙන්ම ප්‍රතිසංස්කරණය කර අවසන් කිරීමෙන් පසු එය උස අඩි 268 යි අගල් 06 කින් සමන්විත වනු ඇත.

දෙස් විදෙස් බෞද්ධ බැතිමතුන්ගෙන් ලැබෙන මූල්‍ය පරිත්‍යාග සහ රණවිරුවන්ගේ කැපවීම මත සිදුවන මෙම ප්‍රතිසංස්කරණ කටයුතු හේතුවෙන් දීඝවාපිය පුදබිම යළිත් ශ්‍රී විභූතියෙන් බැබළවීමට කටයුතු සිදු කෙරෙමින් පවතියි.

මෙම උදාර පින්කමට දායක වීමට කැමති පින්වතුන්ට www.deegawapiya.lk වෙබ් අඩවිය හරහා හෝ [email protected] විද්‍යුත් ලිපිනය ඔස්සේ වැඩි විස්තර ලබාගතහැක. මීට අමතරව 011 2430860-78 දුරකථන අංක ඇමතීමෙන් ද, අවශ්‍ය තොරතුරු විමසිය හැක.

පාර්ලිමේන්තු මන්ත්‍රීවරුන්ගේ විශ්‍රාම වැටුප් ඉවත් කිරීමේ පනත් කෙටුම්පත එරෙහිව ගොනුකර තිබූ පෙත්සම් විභාගය අවසන් කළ ශ්‍රේෂ්ඨාධිකරණය එහි රහසිගත තීන්දුව කථානායකවරයා වෙත යොමු කරන බව (22) දින නිවේදනය කළේය.

පාර්ලිමේන්තු මන්ත්‍රීවරුන්ගේ විශ්‍රාම වැටුප් ඉවත් කිරීමේ පනත් කෙටුම්පත රජය විසින් පාර්ලිමේන්තුවට පසුගියදා ඉදිරිපත් කරනු ලැබු අතර ඊට එරෙහිව විශ්‍රාමික පාර්ලිමේන්තු මන්ත්‍රීවරු පිරිසක් මෙම පෙත්සම් ගොනු කළේය.

විදේශ සහනාධාර (සැපයුම්) සම්බන්ධීකරණ ජ්‍යෙෂ්ඨ නිලධාරී කමිටුවේ (HL-FRAC) අටවන සැසිය, නියෝජ්‍ය ආරක්ෂක අමාත්‍ය මේජර් ජෙනරාල් අරුණ ජයසේකර (විශ්‍රාමික) ගේ ප්‍රධානත්වයෙන් (21) කොළඹ පිහිටි නියෝජ්‍ය ආරක්ෂක අමාත්‍ය කාර්යාලයේදී පැවැත්විණි.

විදේශයන්ගෙන් ලැබෙන සහන ආධාර කළමනාකරණය කිරීමේ ක්‍රියාවලිය වඩාත් විධිමත් කිරීම, විනිවිදභාවය තහවුරු කිරීම සහ ආයතනික සම්බන්ධීකරණයේ කාර්යක්ෂමතාව ඉහළ නැංවීම කෙරෙහි මෙහිදී සුවිශේෂී අවධානයක් යොමු කෙරිණි.

ආපදා සුදානම මෙන්ම, සහන ද්‍රව්‍ය සාධාරණ ලෙස බෙදා හැරීම කෙරෙහි අවධානය යොමු කරමින්, මධ්‍යගත ආපදා දත්ත ඇතුළත් කිරීමේ පද්ධතියේ ප්‍රගතිය පිළිබඳව මෙහිදී දීර්ඝ වශයෙන් සමාලෝචනය කෙරිණි.

විදේශ රටවල් 22 කින් සහ ලෝක ආහාර වැඩසටහනෙන් (WFP) ලැබෙන සහන ද්‍රව්‍ය සම්බන්ධ නිවැරදි තොරතුරු හුවමාරුව සහ ඵලදායී සම්බන්ධීකරණය සහතික කිරීම මෙම පද්ධතියේ ප්‍රධාන අරමුණ වේ.

මෙහිදී අදහස් දැක්වූ නියෝජ්‍ය අමාත්‍යවරයා, කමිටුවේ ක්‍රියාකාරි මැදිහත්වීම ඇගයීමට ලක් කළ අතර, ආපදා අවස්ථාවන්හිදී සන්නද්ධ හමුදාවන් ඉටු කරන සුවිශේෂී කාර්ය භාරය ද, මෙහිදී විශේෂයෙන් අගය කළේය.

විශේෂයෙන්ම මාර්ග සහ පොදු යටිතල පහසුකම් යථා තත්ත්වයට පත් කිරීම උදෙසා හමුදාව ලබාදෙන ශ්‍රම දායකත්වය සහ ඉංජිනේරු සහාය, විපතට පත් ජනතාව වෙත බාධාවකින් තොරව සහන බෙදා හැරීම සහතික කිරීම සඳහා අතිශය තීරණාත්මක වූ බව එතුමා වැඩිදුරටත් පෙන්වා දුන්නේය.

ලැබෙන ආධාර ද්‍රව්‍ය නිසි පරිදි පරිහරණය කිරීම සහ විනිවිදභාවය තහවුරු කිරීම උදෙසා ක්‍රියාත්මක විගණන කටයුතු වල ප්‍රගතිය ද මෙහිදී කමිටුවේ සමාලෝචනයට ලක් විය.

ජාතික ආපදා සහන සේවා මධ්‍යස්ථානයේ (NDRSC) ගබඩා සහ යටිතල පහසුකම් සංවර්ධනය කිරීම, දත්ත රැස් කිරීමේදි ආයතන අතර සම්බන්ධීකරණය වඩාත් ප්‍රබල කිරීම මෙන්ම, දත්ත පද්ධතිය භාවිතය සම්බන්ධයෙන් දිස්ත්‍රික් සහ ප්‍රාදේශීය ලේකම් කාර්යාල නිලධාරීන් පුහුණු කිරීම පිළිබඳව ද, මෙහිදී සුවිශේෂී අවධානයක් යොමු කෙරිණි.

කොළඹ මහ නගර සභාවේ සිදු වී ඇතැයි සැලකෙන දූෂණ වංචා සම්බන්ධයෙන් සොයා බැලීමේ ජනාධිපති පරීක්ෂණ කොමිෂන් සභාව මහජන පැමිණිලි සහ තොරතුරු කැඳවීම ආරම්භ කර ඇත.

පසුගිය 2010 වර්ෂයේ සිට 2025 වර්ෂය දක්වා කාලය තුළ කොළඹ මහ නගර සභාව තුළ සිදු වී ඇතැයි සැලකෙන දූෂණ ක්‍රියා, වංචා, සාපරාධී ලෙස විශ්වාසය කඩ කිරීම, බලය, රජයේ සම්පත් සහ වරප්‍රසාද අනිසි ලෙස පාවිච්චි කිරීම හෝ අවභාවිතය, නීත්‍යානුකූල නොවන බඳවා ගැනීම්, පත්කිරීම් සහ ප්‍රසම්පාදන මාර්ගෝපදේශ උල්ලංඝනය කිරීම, නිශ්චල හෝ චංචල දේපොළ කුලියට හෝ බද්දට දීමේදී සිදු කර ඇති අක්‍රමිකතා, නිසි කාර්ය පරිපාටියෙන් බැහැරව සිදු කර ඇති නඩු කටයුතු සහ සමථ කිරීම්, ඉහත ක්‍රියා හේතුවෙන් රජයේ වත්කම් වලට හෝ ආදායමට සිදු වූ බරපතළ අලාභ සහ හානි පිළිබඳ සොයා බැලීම සඳහා මෙම ජනාධිපති පරීක්ෂණ කොමිෂන් සභාව ආරම්භ කළේය.

සංශෝධිත 1948 අංක 17 දරණ පරීක්ෂණ කොමිෂන් සභා පනතේ (393 අධිකාරිය වන) 02 වන වගන්තියෙහි විධිවිධාන ප්‍රකාරව ජනාධිපති අනුර කුමාර දිසානායක විසින් 2025 දෙසැම්බර් (30) වෙනි දින අංක 2469/08 දරණ අතිවිශේෂ ගැසට් පත්‍රය මගින් පත් කරන ලද මෙම පරික්ෂණ කොමිෂන් සභාව කොළඹ 03, ගාලු පාර, අංක 152 ස්ථානයේ ස්ථාපිත කර ඇති බව ජනාධිපති මාධ්‍ය අංශය සඳහන් කරයි.

හිටපු මහාධිකරණ විනිසුරු නීතිඥ පියසේන රණසිංහගේ සභාපතිත්වයෙන් යුතු මෙම කොමිෂන් සභාවේ සෙසු සාමාජිකයන් ලෙස ශ්‍රී ලංකා ගණකාධිකාරි සේවයේ (1 ශ්‍රේණිය) ඊ.ආර්.එම්.එස්.එච්. ඒකනායක සහ හිටපු ජ්‍යෙෂ්ඨ පොලිස් අධිකාරි ඩී.එස්. වික්‍රමසිංහ කටයුතු කරයි.

හිටපු ඇමති අර්ජුන රණතුංගට හා ඔහුගේ සොහොයුරෙකු වන ධම්මික රණතුංගට එරෙහිව අල්ලස් කොමිසම විසින් කොළඹ මහාධිකරණය හමුවේ අධි චෝදනා ගොනු කළ බව එම කොමිසම විසින් අද (22) දින කොළඹ ප්‍රධාන මහෙස්ත්‍රාත් අධිකරණයට දැනුම් දී ඇත.

ඉහළ මිල ගණන් යටතේ ස්ථානීය ටෙන්ඩර් මගින් ඛනිජ තෙල් මිලදී ගැනීම තුළින් ඛනිජතෙල් නීතිගත සංස්ථාවට රුපියල් මිලියන 800කට ආසන්න මුදලක් පාඩු කිරීමේ සිද්ධිය සම්බන්ධයෙන් අර්ජුන රණතුංගට හා ඔහුගේ සොහොයුරෙකු වන ධම්මික රණතුංගට අධි චෝදනා ගොනුකර ඇත.

මෙම නඩුව අද (22) දින කොළඹ ප්‍රධාන මහෙස්ත්‍රාත් අසංග එස්. බෝදරගම හමුවේ කැඳවනු ලැබූ අවස්ථාවේදී අල්ලස් කොමිසම මෙම දැනුම් දීම සිදු කළේය.

රටේ ආගම දහම ගැන කතා කරන නාමල් රාජපක්ෂ දළදා මාලිගාව ඉදිරිපිට රේස් පැද්ද බව නියෝජ්‍ය අමාත්‍ය මහින්ද ජය­සිංහ අද (22) දින පාර්ලිමේන්තුවේදී සඳහන් කරයි.

කටුනායක සේවිකාවක් ගෙනැල්ලා අරලියහ මන්දිරේ තියාගෙන, මේ රටේ බදු ගෙවන ජනතාවගේ බදු මුදලින් ලක්ෂ ගණන් පඩි ගෙවලා තිබෙන බවද නියෝජ්‍ය අමාත්‍ය මහින්ද ජය­සිංහ සඳහන් කරයි.

නියෝජ්‍ය අමාත්‍ය මහින්ද ජය­සිංහ සඳහන් කළේ,

“මම දැක්කා නාමල් මහත්තයා. හිටියනම් හොදයි. එයත් මං දැක්කා එක එක කතා කියනවා. මගෙ අම්මේ ආගම ගැන තියෙන භක්තිය. මේ කවුද.? දළදා මාලිගාව ඉදිරිපිට රේස් පැදපු මහත්තුරු.

අපෙ ගෞරවනීය ස්වාමීන්වහන්සේලා පහළ අසුන්වල වාඩිවෙලා ඉන්දැද්දි සිංහාසන වගේ අසුන්වල වාඩිවෙලා හිටපු තාත්තලා, බාප්පොච්චිලා එහෙම වාඩිවෙලා ඉදගෙන ආගමට අගෟරව කරපු මහත්තුරු.

අද එනවා අපිට ආගම දහම ගැන කියලා දෙන්න. මේක ඇතුලේ ආගම විනාශ වෙනවලු. මේක ඇතුලේ රටේ සංස්කෘතිය විනාශ වෙනවලු. කවුද මේ.?

අර කටුනායක සේවිකාවක් ගෙනැල්ලා අරලියහ මන්දිරේ තියාගෙන. මේ රටේ බදු ගෙවන ජනතාවගේ බදු මුදලින් ලක්ෂ ගණන් පඩි ගෙවලා. මේ අසභ්‍යකරණය ගැන අපිට කියා දෙන්න එනවා.

වැදි බණ කියනවා. එනිසා අපි කියන්න ඕන කම තිබෙනවා, මේ අධ්‍යාපන ප්‍රතිසංස්කරණය අපි ගෙනැල්ලා තිබෙන්නේ රටේ දරුවන්ට අලුත් ලෝකයක් හදන්න. ඒ ලෝකය හදන වැඩේ අපි අත්හරින්නේ නෑ.”