Local news

මැදපෙරදිග යුද ගැටුම් ආරම්භ වීමෙන් පසුව පැමිණෙන දෙවන බොරතෙල් නෞකාව අද (26) පස්වරුවේ මෙරටට ළඟා වීමට නියමිත බව ඛනිජ තෙල් තොග ගබඩා පර්යන්ත සමාගම සඳහන් කරයි.

මෙම නෞකාවෙන් බොරතෙල් මෙට්‍රික් ටොන් 90,000ක ප්‍රමාණයක් මෙරටට රැගෙන එන බව එහි කළමනාකාර අධ්‍යක්ෂ ආචාර්ය මයුර නෙත්තිකුමාර සඳහන් කරයි.

පොලිස් මාධ්‍ය ප්‍රකාශක සහකාර පොලිස් අධිකාරී, නීතිවේදී ෆෙඩ්රික් වුට්ලර් අද (26) දින ප්‍රංශය වෙත පිටත්ව යමට නියමිතය.

ප්‍රංශයේ ලියෝන් නගරයේදී පැවැත්වෙන ජාත්‍යන්තර පොලිසිය (INTERPOL) විසින් පවත්වනු ලබන පළමුවන මහජන සන්නිවේදනය උදෙසා වූ ගෝලීය සම්මේලනය සඳහා සහභාගී වීම සඳහායි.

මෑත කාලයේ මෙරට පැනනැගුණු ආපදා තත්වයන්හීදී ශ්‍රී ලංකා පොලිසිය මහජනතාවගේ ආරක්ෂාව හා සුබසිද්ධිය උදෙසා ක්‍රියාත්මකවූ ආකාරය සම්බන්ධයෙන් එහිදී විශේෂ දේශනයක් පොලිස් මාධ්‍ය ප්‍රකාශකවරයා විසින් පැවැත්වීමට නියමිතය.

ජාත්‍යන්තර පොලිස් සම්මේලනයක විශේෂ දේශනයක් පැවැත්වීම සඳහා ආරාධනා ලැබූ ශ්‍රී ලංකා පොලිසියේ ප්‍රථම මාධ්‍ය ප්‍රකාශකවරයා ඔහු බව වාර්තා වේ.

Clean Sri Lanka ජාතික වැඩ සටහන මගින් ක්‍රියාත්මක කරන “සිහින ගමනාන්තය” දුම්රිය ස්ථාන සියයක් නවීකරණය කිරීමේ ව්‍යාපෘතිය මේ වන විට ක්‍රියාත්මක කරමින් පවතියි.

Clean Sri Lanka ජාතික වැඩසටහන, ශ්‍රී ලංකා දුම්රිය දෙපාර්තමේන්තුව, පෞද්ගලික අංශය, සිවිල් සංවිධාන ඒකාබද්ධව සහයෝගීතාවයෙන් මරදාන දුම්රිය ස්ථානයේ නවීකරණ ක⁣ටයුතු මීට මාස හතකට පමණ පෙර ආරම්භ කළේය.

නවීකරණ ව්‍යාපෘතියේ පලමු අදියර සඳහා රුපියල් මිලියන තිස් පහක මූල්‍ය පිරිවැයක් අක්බා බ්‍රදර්ස් පුද්ගලික සමාගම විසින් දරනු ලැබූවේය.

නවීකරණ කටයුතු සඳහා මූල්‍ය ප්‍රතිපාදන සැපයීම සිදුකර මාස හයක කාලයක් තුල පුරාවිද්‍යා දෙපාර්තමේන්තුවේ අධීක්ෂණය යටතේ ප්‍රතිසංස්කරණ කටයුතු විදිමත්ව සිදු කර ඇත.

ඒ යටතේ ආරක්ෂක කැමරා පද්ධති, විදුලි ආලෝක පද්ධති, නවීන උපාංග සහිත සනීපාරක්ෂක පහසුකම්, ගොඩනැගිලි සංකීර්ණයේ බාහිර හා අභ්‍යන්තර තීන්ත ආලේපනය, පරිසර අලංකරණ කටයුතු මෙම ව්‍යාපෘතිය යටතේ සිදුකරයි.

එමෙන්ම දශක ගණනාවකින් කිසිදු අලුත්වැඩියාවකට ලක් නොවූ වර්ෂ සියයකට අධික ඉපැරණි දුම්රිය ගොඩනැගිල්ල ද ප්‍රතිසංස්කරණයකට ලක් කිරීම මෙම ව්‍යාපෘතිය යටතේ සිදු කළේය.

දිගු කාලීනව එහි පැවති දිය කාන්දුවට ස්ථිරසාර විසඳුම් ලබාදී ඇති අතර එහිදී වරග අඩි දෙදහසකට අධික උඩු මහලේ කොන්ක්‍රිට් ආවරණ වහලය නවීන ඉඳිකිරීම් ක්‍රමෝපායන්ට අනුගතව ජල කාන්දු නොවන ලෙස (Water Proof) ප්‍රමිතිගත කොට නවීකරණයට ලක්කොට ඇත.

දේශිය හා විදේශිය මගී ජනතාවට දිවයිනේ සෑම පළාතකටම ගමනාගමන පහසුකම් සපයා ගැනීමට පැමිනෙන මරදාන දුම්රිය ස්ථානය අදියර කිහිපයක් යටතේ නවීකරණය කිරීමට සැලසුම් කර ඇති අතර එහි පලමු අදියර සාර්ථකව අවසන් කර ඇත.

නිව්යෝර්ක් හි පිහිටි එක්සත් ජාතීන්ගේ මූලස්ථානයේ සිදු කළ නිල සංචාරය අතරතුර, ශ්‍රී ලංකා ආරක්ෂක ලේකම් එයාර් වයිස් මාර්ෂල් සම්පත් තුයිය කොන්තා (විශ්‍රාමික) සහ එක්සත් ජාතීන්ගේ සංවිධානයේ ශ්‍රී ලංකා නිත්‍ය නියෝජිත අතිගරු ජයන්ත ජයසූරිය යන මහත්වරුන්, එක්සත් ජාතීන්ගේ සංවිධානයේ ඇමරිකානු නිත්‍ය නියෝජිත අතිගරු Michael G.Waltz මහතා සමඟ (23) දින සාකච්ඡාවක නිරත වූහ.

මෙහිදී එක්සත් ජාතීන්ගේ සාම සාධක සහ සාමය ගොඩනැගීමේ මෙහෙයුම් සඳහා පවතින සහයෝගීතාවය ශක්තිමත් කිරීම පිළිබඳව අවධානය යොමු වූ අතර, විශේෂයෙන්ම හයිටි රාජ්‍යයේ ක්‍රියාත්මක කල්ලි මර්දන බලකාය’ (Gang Suppression Force – GSF) සඳහා ශ්‍රී ලංකාවේ අනාගතදායකත්වය පිළිබඳව දීර්ඝ වශයෙන් සාකච්ඡා කෙරිණි.

එක්සත් ජාතීන්ගේ මෙහෙයුම් සඳහා ශ්‍රී ලංකාව දක්වන අඛණ්ඩ කැපවීම තානාපති Waltz මහතාගේ ඇගයීමට ලක් වූ අතර, ඒ සඳහා ඇමරිකා එක්සත් ජනපදයේ සහයෝගය ද ඔහු යළිත් තහවුරු කළේය.

Multi-Role Logistics, Maritime Small Boat සහ Maritime Task Force වැනි විශේෂ ඒකක ඇතුළුව අතිරේක ශ්‍රී ලංකා හමුදා කණ්ඩායම් යෙදවීමේ අවස්ථා පිළිබඳව ද මෙහිදී සොයා බලන ලදී. බලකා මූලස්ථාන විධිවිධාන, ඵලදායී සම්බන්ධීකරණ යාන්ත්‍රණයන් සහ අණ හා මාණ්ඩලික (Command & Staff) තනතුරු සඳහා ශ්‍රී ලංකා නිලධාරීන් ඇතුළත් කර ගැනීම සම්බන්ධ කරුණු ද මෙහිදී සාකච්ඡාවට බඳුන් විය.

වැරදි තොරතුරු ප්‍රචාරණය මැඩපැවැත්වීම, ජාත්‍යන්තර මානව හිමිකම් සහ මානුෂීය ප්‍රමිතීන්ට අනුකූල වීම සහතික කිරීම මෙන්ම සේවයේ යොදවන පිරිස් සඳහා වන පරීක්ෂණ සහ පුහුණු ක්‍රියාවලින් ශක්තිමත් කිරීම පිළිබඳව ද වැඩිදුරටත් අවධානය යොමු විය.

සියලුම විදේශීය මෙහෙයුම් වලදී ඉහළම මට්ටමේ විනයක් සහ වෘත්තීය මට්ටමක් පවත්වා ගැනීමට ශ්‍රී ලංකාව කැපවී සිටින බව ආරක්ෂක ලේකම්වරයා මෙහිදී විශේෂයෙන් අවධාරණය කළේය.

අද (25) ප.ව. 2.00න් පසුව දිවයිනේ ප්‍රදේශ රැසකට වැසි හෝ ගිගුරුම් සහිත වැසි ඇතිවිය හැකි බව කාලගුණ විද්‍යා දෙපාර්තමේන්තුව සඳහන් කරයි.

ඒ අනුව බස්නාහිර, සබරගමුව පළාත්වලත් ගාල්ල, මාතර, මහනුවර, නුවරඑළිය සහ පුත්තලම දිස්ත්‍රික්කවලත් තැනින් තැන වැසි හෝ ගිගුරුම් සහිත වැසි ඇතිවිය හැකි බව කාලගුණ විද්‍යා දෙපාර්තමේන්තුව සඳහන් කරයි.

ගිගුරුම් සහිත වැසි සමග ඇතිවිය හැකි තාවකාලික තද සුළං වලින් සහ අකුණු මඟින් සිදුවන අනතුරු අවම කර ගැනීමට අවශ්‍ය පියවර ගන්නා ලෙස එම දෙපාර්තමේන්තුව ජනතාවට දැනුම් දෙයි.

බුද්ධශාසන, ආගමික හා සංස්කෘතික කටයුතු අමාත්‍ය ආචාර්ය හිනිදුම සුනිල් සෙනෙවි සහ ශ්‍රී ලංකාවේ ශුද්ධාසන අපෝස්තලික තානාපති H.E. Monsignor Andrzej Jozwowicz අති උතුම් හිමිපාණන් අතර නිල හමුවක් (24) අමාත්‍යාංශ පරිශ්‍රයේදී පැවැත්විණි.

මෙම සුහද හමුවේදී ශ්‍රී ලංකාව හා වතිකානු රාජ්‍යය අතර පවතින දිගුකාලීන ආගමික හා සංස්කෘතික සබඳතා තවදුරටත් ශක්තිමත් කිරීම, අන්තර් ආගමික සංහිඳියාව ප්‍රවර්ධනය කිරීම සහ සංස්කෘතික හුවමාරු වැඩසටහන් පුළුල් කිරීම පිළිබඳව විශේෂ අවධානය යොමු කෙරිණි.

දෙරටටම වැදගත් වන සංස්කෘතික උරුමයන් සංරක්ෂණය හා ප්‍රවර්ධනය සඳහා අනාගතයේදී ඒකාබද්ධ වැඩසටහන් ක්‍රියාත්මක කිරීමේ හැකියාව පිළිබඳව මෙහිදී සාකච්ඡා කෙරිණි.