Local news

වියට්නාම ජනාධිපතිවරයා නිල සංචාරයක් සඳහා ලබන (07) වැනිදා ශ්‍රී ලංකාවට පැමිණීමට නියමිතව ඇත.

දෙදින නිල සංචාරයක් සඳහා පැමිණෙන වියට්නාම ජනාධිපතිවරයා ලබන (08) වැනිදා පාර්ලිමේන්තුව ඇමතීමට නියමිතය.

වියට්නාම රාජ්‍ය නායකයෙකු ශ්‍රී ලංකාවේ සංචාරය කරන්නේ 2011 වසරෙන් පසුවයි.

වියට්නාම පක්ෂ මහලේකම් සහ ජනාධිපති ධුරයට පත් වීමෙන් පසුව ඔහු ශ්‍රී ලංකාවේ කරන පළමු රාජ්‍ය සංචාරය මෙය වේ.

යාපනය, චෙම්මනි සිත්තුපාත්තු සුසාන භූමිය ආසන්නයේ පවතින සමූහ මිනීවළ තුළ හයවන අදියරේ කැණීම් කටයුතු හයවන දිනයටත් (03) ආරම්භ කර ඇත.

එහිදී තවත් මිනිස් සිරුරු 245කට අදාළ අස්ථි කොටස් හඳුනාගෙන ඇති අතර ඉන් මිනිස් සිරුරු 243කට අදාළ අස්ථි කොටස් ගොඩගැනීම සිදුකළ බව අතුරුදහන්වූවන්ගේ ඥාතීන් වෙනුවෙන් පෙනී සිටින නීතිඥ වි.කේ.නිරංජන් සඳහන් කරයි.

චෙම්මනි සමූහ මිනිවළ හයවන අදියර කැනීම් කටයුතු පසුගිය අප්‍රේල් (27) වැනිදා යාපනය මහේස්ත්‍රාත් එස්.ලෙනින්කුමාර්ගේ අධීක්ෂණය යටතේ ආරම්භ කළේය.

පස්වන අදියර කැනීම් කටයුතු අවසන් වන විට සමූහ මිනිවළ තුළින් මිනිස් සිරුරු 240කට අදාළ අස්ථි කොටස් මතුකරගෙන තිබු අතර ඉන් මිනිස් සිරුරු 239කට අදාළ අස්ථි කොටස් ගොඩගෙන ඇත.

අල්ලස් කොමිසම මඟින් හිටපු ජනාධිපති මහින්ද රාජපක්ෂට මෙතෙක් කිසිඳු නිල දැනුම් දීමක් හෝ නොතීසියක් එවා නැතැයි ඔහුගේ මාධ්‍ය ප්‍රකාශක නීතිඥ මනෝජ් ගමගේ සඳහන් කරයි.

යම් සිද්ධියකට කැඳවීමක් කරන්නේ නම් ඊට අදාළ පුද්ගලයාට දැනුම් දීම වෙනුවට තම හිතවත් මාධ්‍ය වෙත දැනුම් දීමට කටයුතු කරන බවත් ඒ මඟින්ම එහි ඇති අරුත පැහැදිලිව පෙන්නුම් කරන බවත් මනෝජ් ගමගේ සඳහන් කරයි.

තවද රාජපක්ෂ පාර්ශ්වය මෙවැනි දේශපාලන කටයුතු වලට බිය නොවන බවත් අවශ්‍ය අවස්ථාවලදී නීත්‍යානුකූලව ඒ සඳහා ප්‍රතිචාර දක්වන බවද මනෝජ් ගමගේ සඳහන් කරයි.

එයාර් බස් ගනුදෙනුව සම්බන්ධයෙන් ප්‍රකාශයක් දීමට පැමිණෙන ලෙස තමන්ටද කිසිදු දැනුම් දීමක් කර නොමැති බව හිටපු ඇමැති පියංකර ජයරත්නද සඳහන් කරයි.

ඉන්දීය නාවික හමුදාවට අයත් INS සින්දුකේසරි සබ්මැරීනය දින තුනක මෙහෙයුම් චාරිකාවක් සඳහා කොළඹට පැමිණ ඇත.

කොළඹ වරාය වෙත පැමිණි සබ්මැරීනයට ශ්‍රී ලංකා නාවික හමුදාවෙන් සාම්ප්‍රදායික පිළිගැනීමක් ලබාදුන් බව වාර්තා වේ.

INS සින්දුකේසරි සබ්මැරීනය නේටෝ සංවිධානයේ වර්ග කිරීම අනුව ටොන් 3000ක් කිලෝ පන්තියේ ඩීසල් – විදුලි (Kilo-class diesel-electric) සබ්මරීනයකි.

ගාල්ල බන්ධනාගාර රැඳවියන් පැවැත්වූ උපන්දින සාදයක වීඩියෝවට අදාළව වාර්තාවක් කැඳවා ඇති බව බන්ධනාගාර දෙපාර්තමේන්තුව සඳහන් කරයි.

මෙම සිදුවීම කුමන කාලයේ සිදුවූවක්ද යන්න පිළිබඳ සොයා බලා කඩිනමින් වාර්තාවක් ලබාදෙන ලෙස ගාල්ල බන්ධනාගාර අධිකාරිවරයාට දැනුම් දී ඇති බව බන්ධනාගාර මාධ්‍ය ප්‍රකාශක බන්ධනාගාර කොමසාරිස් ඒ.සී ගජනායක සඳහන් කරයි.

එම වීඩියෝවේ සිටින බොහෝ රැඳවියන් මේ වනවිට ඇප මත නිදහස ලබා පිටව ගොස් ඇතැයිද, බන්ධනාගාර මාධ්‍ය ප්‍රකාශක බන්ධනාගාර කොමසාරිස් ඒ.සී ගජනායක සඳහන් කරයි.

අපරාධ කල්ලි සාමාජිකයෙකු බව කියන ‘අහුංගල්ලේ ලොකු පැටී’ නමැත්තාගේ සමීපතමයෙකු වන නාමල් නොහොත් ‘පොඩියා’ නමැත්තාගේ උපන්දිනය සමරන බව කියන වීඩියෝවක් මේ දිනවල සමාජ මාධ්‍ය ඔස්සේ සංසරණය වේ.