Local news

ත්‍රිකුණාමලය බුදු පිළිම සිදුවීම සම්බන්ධව රක්ෂිත බන්ධනාගාරගත කර සිටින පූජ්‍ය බලංගොඩ කස්සප හිමියන් සහ භික්ෂුන් වහන්සේලා සිව්නම ඇතුළු සැකකරුන් අද (02) දින ත්‍රිකුණාමලය මහේස්ත්‍රාත් අධිකරණය වෙත ඉදිරිපත් කළේය.

අධිකරණය වෙත ඉදිරිපත් කිරීමෙන් අනතුරුව පූජ්‍ය බලංගොඩ කස්සප හිමි ඇතුළු බෞද්ධ භික්ෂූන් වහන්සේලා සිව්දෙනෙකු සහ තවත් හය දෙනෙකු පෙබරවාරි (09) වන දින දක්වා තවදුරටත් රක්ෂිත බන්ධනාගාර ගත කිරීමට අධිකරණය නියෝග කර ඇත.

ත්‍රිකුණාමලය කොටුව පාරේ පිහිටි ශ්‍රී සම්බුද්ධ ජයන්ති බෝධිරාජ විහාරස්ථානයේ විහාරාධිපති පූජ්‍ය ත්‍රිකුණාමලය කල්‍යාණවංශ තිස්ස හිමියන්, පූජ්‍ය බලංගොඩ කස්සප හිමියන්, පූජ්‍ය ත්‍රිකුණාමලය සුඛිතවංශ තිස්ස හිමියන් සහ පූජ්‍ය නන්ද හිමියන් මෙම සිදුවීමට ඇතුළත් වේ.

පසුගියදා මතුගම පොලීසියේ පිස්තෝලයක් සහ පතොරම් 10ක් සමඟ මැගසිනයක් අතුරුදන් වීමේ සිද්ධියක් සම්බන්ධයෙන් පොලිස් පරීක්ෂකවරයෙකු සහ කොස්තාපල්වරයෙකු අත්අඩංගුවට ගෙන ඇත.

පසුගිය ජනවාරි (26) වන දින සිට අදාළ පිස්තෝල ගිනි අවිය සහ උණ්ඩ අස්ථාන ගත වී ඇති අතර මතුගම පොලීසිය මේ සම්බන්ධයෙන් වැඩිදුර විමර්ශන සිදුකරයි.

මෙලෙස අස්ථාන ගතවී ඇත්තේ, මතුගම පොලීසියේ උප සේවා භාරයේ තිබු පිස්තෝල ගිනි අවියක් සහ උණ්ඩ 10ක් සහිත පතරොම් ගැබකි.

තමන් අවුරුදු හතරක් මහ ඇමතිකම් කළ බවත් පත්වීම් දීපු විදිහ ඇහුවනම් තමන් ආයෙ පාරක් හිරේට දාන බව නව ප්‍රජාතන්ත්‍රවාදී පෙරමුණ පාර්ලිමේන්තු මන්ත්‍රී චාමර සම්පත් දසනායක සඳහන් කරයි.

තමාට එරෙහිව නඩු හතරක් දාලා තියෙන බවත් එයින් එකකට අධිචෝදනා ගොනුකර ඇති බවත් තවත් දෙකකට අධිචෝදනා එන බවද මන්ත්‍රී චාමර සම්පත් දසනායක සඳහන් කරයි.

මන්ත්‍රී චාමර සම්පත් දසනායක සඳහන් කළේ,

“මම අවුරුදු හතරයි මහ ඇමතිකම කරේ. අපි පත්වීම් දීපු විදිහ මෙහෙම ඇහුවනම්, මුං ආයෙ පාරක් මාව හිරේ දානවා. මම කරපුවා දැන් කිවුවොත් මට උසාවි මදි වෙනවා. උන් දාන දැමිල්ලට.

දැනට දාලා තියෙනවා නඩු හතරක්. එකකට දුන්නා මේ ඊයේ පෙරේදා අධිචෝදනා. තව දෙකක් තියෙනවා. ඒ දෙකටත් අධිචෝදනා එනවා. එතකොට අධිචෝදනා තුනයි. බදුල්ලේ දැම්මා පොදු දේපල යටතේ, ඒක වෙනම අහයි. එතකොට නඩු හතරක් තියෙනවා.”

කුලියාපිටිය ශ්‍රී ලංකා නිදහස් පක්ෂ පාක්ෂිකයන්ගේ හමුවක් අමතමින් මන්ත්‍රී චාමර සම්පත් දසනායක මේ බව සඳහන් කරයි.

මහනුවර බෝගම්බර බන්ධනාගාර පරිශ්‍රය එහි පුරාවිද්‍යාත්මක වටිනාකම සුරැකෙන පරිදි නවීන පන්නයේ සංචාරක හෝටල් සංකීර්ණයක් ලෙස සංවර්ධනය කිරීමට රජය තීරණය කර ඇති බව ප්‍රවාහන, මහාමාර්ග අමාත්‍ය බිමල් රත්නායක සඳහන් කරයි.

දශකයකට අධික කාලයක් විවිධ හේතූන් මත ප්‍රමාද වූ බෝගම්බර බන්ධනාගාරය ප්‍රතිසංස්කරණය කිරීමේ ව්‍යාපෘතිය පුරාවිද්‍යාත්මක උරුමයන්ට හානි නොවන පරිදි සිදු කිරීමට තීරණය කර ඇති බව අමාත්‍ය බිමල් රත්නායක සඳහන් කරයි.

බෝගම්බර බන්ධනාගාරයේ ඉදිරිපස පෙනුම හෝ එහි පැරණි ගෘහ නිර්මාණ ශිල්පය කිසිදු වෙනසකට ලක් නොකරන බවද බෝගම්බර බන්ධනාගාර පරිශ්‍රයේ නිරීක්ෂණ චාරිකාවකට එක්වෙමින් අමාත්‍යවරයා සඳහන් කරයි.

ඓතිහාසික දළදා මාලිගාව ඉදිරිපිට පිහිටා තිබීම හේතුවෙන් මල්වතු අස්ගිරි මහානායක ස්වාමීන් වහන්සේලාගේ අනුශාසනා පරිදි මෙම ව්‍යාපෘතිය සැලසුම් කර ඇති බවත් ව්‍යාපෘතියේ විනිවිදභාවය තහවුරු කිරීම සඳහා විධිමත් ක්‍රියාවලියක් අනුගමනය කරන බවද අමාත්‍යවරයා සඳහන් කරයි.

ගාලු කොටුව තුළ සිදුකරන සංරක්ෂණ ක්‍රමවේදයට සමාන ලෙස පුරාවිද්‍යාත්මක කොන්දේසිවලට යටත්ව මෙය ක්‍රියාත්මක වන බවත් මේ සඳහා ටෙන්ඩර් කැඳවා ඇති අතර ඉදිරි දින කිහිපය තුළ සුදුසු ආයතනයක් තෝරා ගනු ලබන බවද අමාත්‍යවරයා සඳහන් කරයි.

පොලිස් අණ නොතකා ධාවනය කළ ලොරි රථයකට කිලිනොච්චිය, ධර්මපුරම් ප්‍රදේශයේදී පොලීසිය විසින් වෙඩි ප්‍රහාරයක් එල්ල කර ඇත.

පොලිස් සංඥා නොතකා අදාළ ලොරි රථය ධාවනය කිරීම හේතුවෙන්, එම ලොරියේ රෝද වලට පොලීසිය විසින් වෙඩි තබා ඇත.

අදාළ ලොරි රථයේ බලපත්‍ර නොමැතිව වැලි ප්‍රවාහනය කරමින් තිබූ බවත් එම වෙඩි තැබීමෙන් අනතුරුව සැකකාර රියදුරා එම ස්ථානයෙන් පලා ගොස් ඇති බව පොලීසිය සඳහන් කරයි.

අද (01) දින අලුයම ධර්මපුරම් ප්‍රදේශයේ වේගයෙන් ධාවනය වූ ලොරි රථයකට පොලීසිය විසින් එලෙස වෙඩි තබා ඇති අතර පලාගිය සැකකරු අත්අඩංගුවට ගැනීම සඳහා ධර්මපුරම් පොලීසිය වැඩිදුර විමර්ශන සිදුකරයි.

ශ්‍රී ලංකාව වෙනුවෙන් ඉන්දීය රුපියල් කෝටි 300ක මුදලක් වෙන් කිරීමට 2026 ඉන්දීය අයවැයෙන් යෝජනා කර ඇති බව වාර්තා වේ.

ඒ අනුව ඉන්දිය රජය විසින් 2026/27 මූල්‍ය වර්ෂයට අදාළ අයවැයට මෙම මුදල ඇතුළත් කර ඇති බවට තොරතුරු වාර්තා වේ.

අදාළ වර්ෂය සඳහා වන අයවැය මුදල් අමාත්‍ය නිර්මලා සීතාරාමන් විසින් අද (01) පාර්ලිමේන්තුවට ඉදිරිපත් කළාය.

ප්‍රාදේශීය සභා මැතිවරණය වනවිට තම දේශපාලන බලවේගය ඉතා ශක්තිමත් ලෙස ගොඩනැගුණ බවත් විශාල ඡන්ද ප්‍රමාණයක් වැඩි වු බව පාර්ලිමේන්තු මන්ත්‍රී නාමල් රාජපක්ෂ සඳහන් කරයි.

අධ්‍යාපන ප්‍රතිසංස්කරණ මුවාවෙන් රටේ දරුවන්ගේ මනස විකෘති කරන සහ රටේ සංස්කෘතියට නොගැලපෙන කරුණු විෂය නිර්දේශයට ඇතුළත් කිරීම නිසා ආණ්ඩුව දැඩි අපහසුතාවයට පත්ව ඇති බවද මන්ත්‍රී නාමල් රාජපක්ෂ සඳහන් කරයි.

තමන්ව හෝ තමන්ගේ අම්මාව අපරාධ පරීක්ෂණ දෙපාර්තමේන්තුවට ගෙන ආවත් එසේත් නැතිනම් හිරගෙදරට දැම්මත් ආණ්ඩුවේ මහා පරිමාණ වංචා කිසිසේත් යටපත් කළ නොහැකි බවද මන්ත්‍රී නාමල් රාජපක්ෂ සඳහන් කරයි.

මන්ත්‍රී නාමල් රාජපක්ෂ සඳහන් කළේ,

“මාව, අපේ අම්මාව ඉතින් සීඅයිඩීයට ගෙනාවත් හිරගෙදර දැම්මත්, ආණ්ඩුවේ ගල් අගුරු වංචාව, මේ රටේ ආගමට දහමට සංස්කෘතියට, හෙළ සංස්කෘතියට කරන විනාශය, මහා සංඝරත්නයට සහ ආගමික නායකයන්ට කරන අසාධාරණය, කුඩු කන්ටේනර් පන්නපු එක, ආපදාවට ලක් වෙච්ච අසරණ ලක් වෙලා ඉන්න ජනතාව රවට්ටන්න බොරු චෙක් දීලා ඒ චෙක්වල මුදල් නැතිව ආයේ ඇවිල්ලා. ඕවා වහගන්න බෑ. වහගන්න පුලුවන් කියලා හිතනවා නම් ඉතින් කරලා බලමුකෝ.”

අධ්‍යාපන ප්‍රතිසංස්කරණ සම්බන්ධයෙන් විපක්ෂය විසින් සමාජයේ භීතිකාවක් නිර්මාණය කළ බව සෞඛ්‍ය හා ජනමාධ්‍ය අමාත්‍ය වෛද්‍ය නලින්ද ජයතිස්ස සඳහන් කරයි.

සෞඛ්‍ය හා ජනමාධ්‍ය අමාත්‍ය වෛද්‍ය නලින්ද ජයතිස්ස

“නිකමට හරි, අපි ඇත්තටම කියන්න ඕන සජිත් ප්‍රේමදාසත් එක්ක වාහනේ යන ආරක්ෂකයන්ට ඔය අව්වයි වැස්සයි දෙකම තියෙන වෙලාවක දේදුන්නක් එහෙම දැක්කොත් සජිත්ට පෙන්නන්න එපා.

දැක්ක ගමන් සමලිංගික නැමියාවක් එන්න පුළුවන් පොරට. ඇත්තනේ. දැන් මේ පොතේ පිටකවරේ බලලා එහෙම එකක් එනවා නම්, දේදුන්නක් දැක්කාම එහෙම වෙනවා නම් අපෙ හාමුදුරුවනේ,

අපේ මේ අධ්‍යාපනයට තමන්ගේ දරුවා පිළිබඳව ඉතාම ආදරයෙන්, දරුවෝ හදන, වඩන, ඉස්කෝලේ යවන දෙමාපියන් බය කරන්න කියපු දේවල්.”

බණ්ඩාරගම පැවති සම්මන්ත්‍රණයකදී අමාත්‍ය වෛද්‍ය නලින්ද ජයතිස්ස මේ බව සඳහන් කරයි.