Local news

දකුණු පළාත් හිටපු ආණ්ඩුකාර විලී ගමගේ අද (11) අල්ලස් හෝ දූෂණ චෝදනා විමර්ශන කොමිෂන් සභාවට පැමිණ ඇත.

එයාර් බස් ගනුදෙණුව සම්බන්ධයෙන් දකුණු පළාත් හිටපු ආණ්ඩුකාර විලී ගමගේගෙන් අල්ලස් කොමිසම අද (11) පැය හතරක පමණ ප්‍රකාශයක් ලබාගෙන ඇත.

ශ්‍රී ලංකන් ගුවන් සමාගමේ හිටපු විධායක නිලධාරී යුරෝපීය ගුවන් සමාගමකින් ලබාගත් ඇමරිකන් ඩොලර් මිලියන 2ක අල්ලස් මුදලක් හිටපු ජනාධිපති මහින්ද රාජපක්ෂගේ 2015 මැතිවරණ ව්‍යාපාරය වෙත යොමු කිරීම සම්බන්ධයෙන් විලී ගමගේගෙන් ප්‍රශ්න කර ඇත.

ජල බිල සමාලෝචනය කිරීම එළඹෙන ජූනි මස (30) වනදා සිදුකරන බව නිවාස, ඉදිකිරීම් සහ ජල සම්පාදන අමාත්‍ය වෛද්‍ය සුසිල් රණසිංහ සඳහන් කරයි.

වසරකට දෙවතාවක් ජල බිල සංශෝධනය කරනු ලබන බවද අමාත්‍ය වෛද්‍ය සුසිල් රණසිංහ සඳහන් කරයි.

ඒ අනුව ජූනි (30) වන දිනට පවතින තත්ත්වය මත ජල බිල සංශෝධනය කිරීමට නියමිත බවද අමාත්‍යවරයා සඳහන් කරයි.

පිවිතුරු හෙළ උරුමයේ නායක උදය ගම්මන්පිල අද (11) ත්‍රස්ත මර්දන හා විමර්ශන කොට්ඨාසය හමුවට කැඳවා ඇත.

ප්‍රකාශයක් ලබා ගැනීම සඳහා උදය ගම්මන්පිල ත්‍රස්ත මර්දන හා විමර්ශන කොට්ඨාසය හමුවට කැඳවා ඇත.

පාස්කු ඉරුදින ත්‍රස්ත ප්‍රහාරය සම්බන්ධයෙන් ඔහු විසින් ලියූ පොතක් එළිදැක්වීමෙන් අනතුරුව, තවත් ප්‍රහාරයක් සම්බන්ධයෙන් කළ ප්‍රකාශයක් මුල්කරගෙන මෙම කැඳවීම කර ඇති බව වාර්තා වේ.

ජීවිතේට එකට වාඩිවී දේශපාලනය නොකරපු මිනිස්සූ එක කඳවුරකට එකතු වී සිටින බව පාර්ලිමේන්තු මන්ත්‍රී රෝහිත අබේගුණවර්ධන සඳහන් කරයි.

මන්ත්‍රී රෝහිත අබේගුණවර්ධන සඳහන් කළේ,

“බලන්නකෝ ජීවිතේට අපි එකට වාඩිවෙලා හිටිය මිනිස්සුද. ඉස්සර යූන්පී කාරයයි, ශ්‍රීලංකා කාරයයි හම්බුනාට පස්සේ හරියට නයයි මුගටියයි හම්බුනා වගේ.

දැන් බලන්නකෝ රාජිත ඇමතිතුමයි, නිමල් සිරිපාල ඇමතිතුමයි කුටු කුටු ගගා ඉන්නවා. කොච්චර ලස්සනද. සාගල රත්නායක ඇමතිතුමා මේ පැත්තේ ඉන්නවා.

අපි ඔක්කොම එක කඳවුරක එකට හිටියේ. අපේ මේ එක පක්ෂයකවත් වෛරය තිබුණේ නෑ. අපි කල්පනා කරන්න ඕන එක කඳවුරක ඉදගෙන කොහොමද මර්දනකාරී ආණ්ඩුවට මුහුණ දෙන්නේ කියලා.”

හොරුත් බොරුත් එක මිටකට පරදවමු යන රැස්වීමට එක්වෙමින් පාර්ලිමේන්තු මන්ත්‍රී රෝහිත අබේගුණවර්ධන මේ බව සඳහන් කරයි.

පසුගිය අප්‍රේල් මස (09) වැනිදා රජයේ වෛද්‍ය නිලධාරීන්ගේ සංගමය ක්‍රියාත්මක කළ වැඩ වර්ජනයක් අතරතුර ත්‍රිකුණාමලය දිස්ත්‍රික් මහ රෝහලේදී බිළිඳෙකු මියගොස් ඇත.

ත්‍රිකුණාමලය දිස්ත්‍රික් මහ රෝහලේදී බිළිඳෙකු මියයාම සම්බන්ධයෙන් සැකපිට වෛද්‍යවරුන් දෙදෙනෙකුගේ සේවය අත්හිටුවා ඇති බව සෞඛ්‍ය අමාත්‍යාංශය සඳහන් කරයි.

සිදුකළ මූලික විමර්ශනයකින් අනතුරුව රෝහලේ ප්‍රසව හා නාරිවේද විශේෂඥ වෛද්‍යවරයාගේ සහ ජ්‍යෙෂ්ඨ නේවාසික වෛද්‍යවරියගේ සේවය අත්හිටුවීමට පියවර ගත් බව සෞඛ්‍ය අමාත්‍යාංශය සඳහන් කරයි.

මේ අතර අදාළ වෛද්‍යවරුන් විසින් අපරාධමය වරදක් සිදුකර ඇත්ද යන්න පිළිබඳ අඛණ්ඩ විමර්ශන ක්‍රියාත්මක බව සෞඛ්‍ය හා ජනමාධ්‍ය අමාත්‍ය වෛද්‍ය නලින්ද ජයතිස්ස සඳහන් කරයි.

ඉදිරි පැය 36 තුලදී පහළ වායුගෝලීය කැළඹිලි ස්වභාවය අඩු පීඩන කලාපයක් දක්වා වර්ධනය විය හැකි බව කාලගුණ විද්‍යා දෙපාර්තමේන්තුව සඳහන් කරයි.

ඒ අනුව දිවයිනේ පවතින වැසි තත්ත්වය ඉදිරි දින කිහිපයේදී තවදුරටත් බලාපොරොත්තු විය හැකි බව කාලගුණ විද්‍යා දෙපාර්තමේන්තුව සඳහන් කරයි.

මෙම බලපෑම හේතුවෙන් දිවයිනේ බොහෝ ප්‍රදේශවල අහස වලාකුළින් බරව පවතිනු ඇති අතර විටින් විට වැසි හෝ ගිගුරුම් සහිත වැසි ඇති විය හැකි බවද එම දෙපාර්තමේන්තුව සඳහන් කරයි.

බස්නාහිර, සබරගමුව, මධ්‍යම, ඌව, දකුණ, වයඹ, උතුරු සහ උතුරු මැද පළාත්වලත් ත්‍රිකුණාමලය දිස්ත්‍රික්කයේත් ඇතැම් ස්ථානවලට මි.මී. 100ක පමණ තද වැසි ඇති විය හැකි බවද සඳහන් කරයි.

ගිගුරුම් සහිත වැසි සමග ඇතිවිය හැකි තාවකාලික තද සුළං වලින් සහ අකුණු මඟින් සිදු වන අනතුරු අවම කර ගැනීමට අවශ්‍ය පියවර ගන්නා ලෙස එම දෙපාර්තමේන්තුව ජනතාවට දැනුම් දෙයි.

අසර්බයිජානයේදී අත්අඩංගුවට ගත් මෙරට සංවිධානාත්මක අපරාධකරුවෙකු වන මනෝජ් සුරංග නොහොත් “බටුවත්තේ චාමර” අද (10) දින රාත්‍රියේ දිවයිනට රැගෙන ආවේය.

මනෝජ් සුරංග නොහොත් “බටුවත්තේ චාමර” මෙරටට රැගෙන ඒම සඳහා මෙරට පොලිස් කණ්ඩායමක් පසුගිය (07) වනදා දිවයිනෙන් පිටත්ව ගියේය.

මේ වනවිට බලය ගිලිහී ගොස් ඇති ප්‍රභූ දේශපාලන පැලැන්තිය කලබල වී ඇති බව කෘෂිකර්ම, පශු සම්පත්, ඉඩම් සහ වාරිමාර්ග අමාත්‍ය කේ.ඩී ලාල්කාන්ත සඳහන් කරයි.

හොරකම් නිසා, වංචා නිසා, දුෂණ නිසා, නඩු වැටිලා නිසා, අනිවාර්යෙන් ළග ළග ඇතුළට පෝලිමේ යන්න වෙන නිසා ඔවුන් හොඳටම කලබල වෙලා තියෙන බවද අමාත්‍ය කේ.ඩී ලාල්කාන්ත සඳහන් කරයි.

අමාත්‍ය කේ.ඩී ලාල්කාන්ත සඳහන් කළේ,

“බලය ගිලිහෙච්ච ප්‍රභූ පන්තිය කලබල වෙලා තියෙන්නේ. හොදටම කලබල වෙලා තියෙන්නේ. බලය ගිලිහී ගිය ප්‍රභූ පන්තිය හොරකම් නිසා, වංචා නිසා, දුෂණ නිසා, නඩු වැටිලා නිසා, අනිවාර්යෙන් ළග ළග ඇතුළට පෝලිමේ යන්න වෙන නිසා හොඳටම කලබල වෙලා තියෙන්නේ. කලබල වෙන්න ඕන. හැබැයි අපි නෑ කලබල.”

පොළොන්නරුව ඇලහැර අමුණ ප්‍රතිසංස්කරණය කිරීමේ අවස්ථාවට එක්වෙමින් අමාත්‍ය කේ.ඩී ලාල්කාන්ත මේ බව සඳහන් කරයි.