Local news

විභාග දෙපාර්තමේන්තුව විසින් 2026 අගෝස්තු මස (09) වන ඉරුදින පැවැත්වීමට නියමිත ශිෂ්‍යත්ව විභාගය සඳහා අයදුම්පත් කැඳවීම සම්බන්ධයෙන් නිවේදනයක් නිකුත් කර ඇත.

ඒ අනුව අද (30) සිට අප්‍රේල් මස (30) වනදා මධ්‍යම රාත්‍රී 12.00 දක්වා මෙම අයදුම්පත් කැඳවනු සිදුකරන අතර කිසිදු හේතුවක් මත අයදුම්පත් භාරගන්නා අවසන් දිනය දීර්ඝ නොකරන බවද විභාග දෙපාර්තමේන්තුව සඳහන් කරයි.

රජයේ පාසලක හෝ රජය විසින් අනුමත කරනු ලැබූ පෞද්ගලික පාසලක 5 ශ්‍රේණියේ ඉගෙනුම ලබන සිසුන්ට පමණක් විභාගයට ඉදිරිපත් විය හැකිය.

අයදුම්පත් ඉදිරිපත් කළ යුත්තේ මාර්ගගතව වන අතර අදාළ උපදෙස් https://onlineexams.gov.lk/eic යන වෙබ් අඩවියට පිවිසීමෙන් ලබාගත හැක.

ශිෂ්‍යාධාර පිරිනමනු ලබන්නේ අඩු ආදායම් සහිත 2027 ජනවාරි මස (31) වන දිනට වයස අවුරුදු 11ට අඩු සිසුන් සඳහා පමණක් බව විභාග දෙපාර්තමේන්තුව අවධාරණය කරයි.

පාතාල කල්ලි නායක ගනේමුල්ල සංජීව ඝාතනය කිරීම සම්බන්ධයෙන් චෝදනා එල්ල වී කොළඹ අපරාධ කොට්ඨාශයේ රඳවාගෙන ප්‍රශ්න කරමින් සිටින ඉෂාරා සෙව්වන්දි වෙනුවෙන් උපන්දින සාදයක් පැවැත්වීමට සූදානම් කිරීමේ පුවතක් වාර්තා වේ.

පසුගිය (29) වැනිදාට උපන්දිනය යෙදී තිබී ඇති අතර ඒ වෙනුවෙන් කොළඹ දිසා අපරාධ කොට්ඨාසය තුළ කේක් කපා සැමරුමක් සූදානම් කර ඇති බවට කොළඹ දිසාව භාර නියෝජ්‍ය පොලිස්පති නිශාන්ත සොයිසාට පෞද්ගලික ඔත්තුකරුවකුගෙන් තොරතුරක් ලැබී ඇත.

අනතුරුව එම කොට්ඨාසයේ බුද්ධි අංශ නිලධාරියෙකුගෙන් තහවුරු කරගැනීමෙන් පසුව එහි ස්ථානාධිපතිවරයාට දුරකථන ඇමතුමක් ගෙන එම ක්‍රියාව වහාම නවත්වන්නැයි නියෝජ්‍ය පොලිස්පතිවරයා දැඩිව පවසා ඇත.

පසුව කොළඹ මධ්‍යම කොට්ඨාසය භාර ජ්‍යෙෂ්ඨ පොලිස් අධිකාරී මහේෂ් කුමාරසිංහ කොළඹ දිසා අපරාධ කොට්ඨාසයට යවා ඒ පිළිබඳ සොයාබලන ලෙස උපදෙස් ලබාදී ක්ෂණිකව නියෝජ්‍ය පොලිස්පති නිශාන්ත සොයිසාද එම ස්ථානයට ගොස් ඇත.

එහිදී සිදුකළ සොයා බැලීමේදී ඉෂාරා සෙව්වන්දිගේ සොහොයුරා කේක් ගෙඩියක් ගෙනැවිත් ඇති අතර උපන්දින සැමරුමට සෙව්වන්දිගේ ලොකු අම්මා හා ඇයගේ පුත්‍රයාද කොළඹ දිසා අපරාධ කොට්ඨාසයට පැමිණ ඇති බව අනාවරණය වී ඇත.

අනතුරුව ඉෂාරා සෙව්වන්දි, ඇය රඳවා සිටින සිර කුටියෙන් පිටතට ගෙන ඒ අසල වූ ස්ථානයක කේක් ගෙඩිය කැපීමට සියල්ල සූදානම් කර තිබී ඇති බවත් ඒ සඳහා කොළඹ අපරාධ කොට්ඨාසයේ ස්ථානාධිපතිවරයා අවසර ලබාදී ඇති බවද මෙතෙක් සිදුකළ විමර්ශනවලදී අනාවරණය වී ඇත.

කොළඹ අපරාධ කොට්ඨාසයේ ස්ථානාධිපතිවරයා, “කේක් එක කපලා ෆොටෝ ගන්න එපා. පස්සේ ඔවා ඉන්ටර්නේට් එකේ යයි” යනුවෙන් පවසා ඇති බවද සඳහන් වේ.

කේක් ගෙඩිය රැගෙන ඒම සම්බන්ධයෙන් ඉෂාරා සෙව්වන්දිගේ සහෝදරයා සමග අදාළ ස්ථානාධිපතිවරයා දුරකථනය ඔස්සේ කතාබහ කර ඇති බවත් කලක සිට ඔවුන් දෙදෙනා දුරකථනය ඔස්සේ කතාබහ කර ඇති බවද විමර්ශනවලදී අනාවරණ වී ඇත.

ඉෂාරා සෙව්වන්දිගේ සොහොයුරා, ඇයගේ ලොකු අම්මා හා ඇයගේ පුත්‍රයාගෙන් මෙන්ම අදාළ සිදුවීම සිදුවන අවස්ථාවේ රාජකාරියේ නිරත පොලිස් නිලධාරීන්ගෙන් ඇතුළුව 15 දෙනෙකුගෙන් පමණ ප්‍රකාශ ලබාගෙන ඇති බව වාර්තා වේ.

මේ අතර කොළඹ අපරාධ කොට්ඨාසයේ ස්ථානාධිපතිවරයාගේ ක්‍රියාකලාපය සම්බන්ධයෙන් කඩිනමින් විමර්ශනයක් සිදුකරන ලෙස පොලිස් විශේෂ විමර්ශන ඒකකයට කොළඹ දිසාව භාර නියෝජ්‍ය පොලිස්පතිවරයා විසින් ලිඛිතව දැනුම්දී ඇත.

රන්මාලයක් උකස් තැබීමේ චෝදනාවකට අදාළව තලංගම පොලීසියෙන් අත්අඩංගුවට ගෙන අධිකරණයට ඉදිරිපත් කළ රංගන ශිල්පිනී හර්ෂි රසාංගා උකස් තැබූ එම රන් මාලයේ හිමිකරු ක්‍රිකට් ක්‍රීඩක භානුක රාජපක්ෂ බවට අනාවරණය කර ඇත.

රංගන ශිල්පිනී හර්ෂි රසාංගා හා භානුක රාජපක්ෂ අතර තිබූ ප්‍රේම සබදතාවයකට අනුව ඔහු මෙම රන්මාලය ඇයට තෑගි කොට තිබූ බවත් පසුව දෙදෙනා වෙන්වීමෙන් අනතුරුව භාණුක රාජපක්ෂ නැවතත් එම රන්මාලය ඇයගෙන් ඉල්ලා තිබූ බව හර්ෂි රසාංගා සඳහන් කරයි.

විදෙස්ගතව සිටි තමා දිවයිනට පැමිණි පසු භානුක රාජපක්ෂ තමන්ට විවාහ යෝජනාවක් රැගෙන ආ බවත් ඔහු සිය නිවසට පැමිණ තම දෙමාපියන් මුණ ගැසී ඒ සඳහා අවසර ඉල්ලා සිටි නමුත් තමන් ඊට මුලදී අකමැති වූ බවද හර්ෂි රසාංගා සඳහන් කරයි.

ඒ වන විටත් තමන් මුල් විවාහයෙන් වෙන්වී නොසිටි අතර භානුක රාජපක්ෂද සිය විවාහය අවසන් කර නොතිබූ බවත් පසුව ඔහුගේ බලකිරීම මත දෙමාපියන් මෙම සබදතාවයට අවසර ලබාදුන් බවත් ඒ අනුව වසරකට ආසන්න කාලයක් විවිධ හැලහැප්පීම් මැද මෙම සබදතාවය ගොඩනැගුණු බව හර්ෂි රසාංගා සදහන් කරයි.

ඔහු සිය බලය භාවිතා කරමින් අවස්ථා කිහිපයක ඉතා දුරදිග ගිය රණ්ඩු සරුවල් ඇතිවූ අතර එම අවස්ථාවන්වලදී ඔහු විසින් ලබාදුන් තෑගි, ජංගම දුරකතන හා ලැප්ටොප් පරිගණක නැවත ඉල්ලා සිටි බවද හර්ෂි රසාංගා සදහන් කරයි.

නමුත් සමාව ඉල්ලා යළි සබදතාවය අලුත් වූ පසුව එම භාණ්ඩ තමන්ට යළි ලබා දුන්නද දිගින් දිගටම වෙන මෙම ක්‍රියාවලියට තමන් අකමැති බැවින් තමන්ට කිසිදු භාණ්ඩයක් ලබානොදෙන ලෙසට භානුක රාජපක්ෂගෙන් ඉල්ලා සිටි බව හර්ෂි රසාංගා සදහන් කරනවා.

අනතුරුව තමා විවාහ කරගන්නා බව පවසා එත්තරා බහින්බස්වීමකින් අනතුරුව මෙම රන්මාලය තමාගේ ගෙලෙහි භානුක රාජපක්ෂ පැළදූ බවත් නමුත් පසුව එයද තමන්ගෙන් ඉල්ලා සිටි බවද හර්ෂි රසාංගා සදහන් කරනවා.

අනතුරුව තමන් මෙම රන්මාලය උකස් කර ලක්ෂ 6ක මුදලක් තමන් සන්තකයේ තබාගැනීම සම්බන්ධයෙන් භානුක රාජපක්ෂ පොලිසියේ පැමිණිල්ලක් කර ඇති අතර අදාළ පැමිණිල්ල සිදුකිරීමෙන් අනතුරුව මෙම කිසිදු තොරතුරක් මාධ්‍යයට නොයන ලෙසට තමන් අපහසුතාවයට ලක්වන ආකාරයෙන් කටයුතු කර ඇති බව හර්ෂි රසාංගා සදහන් කරනවා.

ව්‍යාපාරයක් සතු සියලුම වාහන සඳහා ඉන්ධන “QR” කේතය ලබාගැනීමේ හැකියාව ඇතැයි, ඩිජිටල් ආර්ථික අමාත්‍යාංශයේ උපදේශක සුමුදු රත්නායක සඳහන් කරයි.

ව්‍යාපාරය ලියාපදිංචි අංකය සහ එක් ජංගම දුරකථන අංකයක් ඇතුළත් කර ලියාපදිංචි වීමෙන් එම පහසුකම ලබාගත හැකි බව එම අමාත්‍යංශයේ උපදේශක සුමුදු රත්නායක සඳහන් කරයි.

හෙට (30) දින උදෑසන 08.00 සිට එක් දිනක දීප ව්‍යාප්ත සංකේත වැඩවර්ජනයක් ක්‍රියාත්මක කරන බව රජයේ වෛද්‍ය නිලධාරීන්ගේ සංගමය සඳහන් කරයි.

මේ වනවිට ස්ථාන මාරුකිරීම් සඳහා ලයිස්තුවක් සාදා ඇති බවත් මින් පෙර කිසිදු දිනකදී එවැන්නක් සිදුකර නොමැති බවත් එනිසා ස්ථාන මාරුකිරීම් හේතුවෙන් හෙට දින දීප ව්‍යාප්ත සංකේත වැඩවර්ජනයක් ක්‍රියාත්මක කරන බව වෛද්‍ය හංසමාල් වීරසූරිය සඳහන් කරයි.

එය නවත්වා ගැනීමට අවශ්‍ය නම් හෙට (31) උදෑසන දක්වා කාලය තිබෙන බවත් හෙට දින හදිසි ප්‍රතිකාර නිසි පරිදි සිදුකරන බවද අද (30) මාධ්‍ය හමුවක් පවත්වමින් වෛද්‍ය හංසමාල් වීරසූරිය සඳහන් කරයි.

ශ්‍රී ලංකා ක්‍රිකට් කණ්ඩායම නියෝජනය කරන ක්‍රිකට් ක්‍රීඩකයෙකුගේ රුපියල් ලක්ෂ 9කට අධික වටිනාකමකින් යුත් රන් මාලයක් රංගන ශිල්පිනියක් විසින් සොරාගෙන බත්තරමුල්ලේ පිහිටි පුද්ගලික මුල්‍ය ආයතනයක උකස් තබා රුපියල් ලක්ෂ 6ක මුදලක් ලබාගෙන ඇති බවට පොලීසියට පැමිණිල්ලක් ලැබී ඇත.

එම පැමිණිල්ල අනුව අද (30) දිනයේ තලංගම පොලිස් ස්ථානයේ විවිධ පැමිණිලි අංශය මගින් රන්මාලයක් වංචාවක් සිදුකිරීමේ සිද්ධියට අදාළව නව පරපුරේ රංගන ශිල්පිනිය අත්අඩංගුවට ගෙන කඩුවෙල මහෙස්ත්‍රාත් අධිකරණයට ඉදිරිපත් කර ඇත.

අධිකරණයට ඉදිරිපත් කිරීමෙන් අනතුරුව එම සැකකාරිය වෙනුවෙන් පෙනී සිටි නීතිඥවරයා ප්‍රකාශ කර ඇත්තේ, එම රන් මාලය උකස් කර තිබුණද එය බේරාගෙන හිමිකරුට නැවත භාරදීමට හැකියාව පවතින බවයි.

අනතුරුව සැකකාරිය රුපියල් ලක්ෂ 5 බැගින් වූ ශරීර ඇප දෙකක් මත මුදා හැරීමට වැඩ බලන මහේස්ත්‍රාත්වරයා නියෝග කළේය.

අනතුරුව මෙම නඩුව නැවත අප්‍රේල් මස (22) වන දින කැඳවීමට නියමිතය.

කෙසේ වෙතත් අදාළ රන් මාලය තලංගම පොලීසිය මගින් භාරගෙන අධිකරණයට ඉදිරිපත් කිරීමටද වැඩ බලන මහේස්ත්‍රාත්වරයා නියෝග කර ඇත.

අපරාධ පරීක්ෂණ දෙපාර්තමේන්තුව විසින් අත්අඩංගුවට ගනු ලැබූ මෝටර් රථ ප්‍රවාහන කොමසාරිස් ජනරාල් කමල් අමරසිංහ අද (30) කුරුණෑගල, පිලැස්ස මහේස්ත්‍රාත් අධිකරණයට ඉදිරිපත් කළේය.

මෝටර් රථ ප්‍රවාහන කොමසාරිස් ජනරාල් කමල් අමරසිංහ කුරුණෑගල, පිලැස්ස මහේස්ත්‍රාත් අධිකරණයට ඉදිරිපත් කිරීමෙන් අනතුරුව අප්‍රේල් (10) වැනිදා දක්වා යළි රක්ෂිත බන්ධනාගාරගත කර ඇත.

අදාළ කැබ් රථයට E කාණ්ඩයේ අංකයක් ලබාගැනීම සහ චැසි සංශෝධනයට ඉදිරිපත් කර තිබූ චැසි සංශෝධන ගොණුව නීති විරෝධී ලෙස සඟවා තබා අසත්‍ය ප්‍රකාශ ලබා දෙමින් අදාළ රථය ව්‍යාජ ලෙස එකලස් කිරීමට මෝටර් රථ ප්‍රවාහන කොමසාරිස් ජනරාල් කමල් අමරසිංහ ආධාර අනුබලදී ඇති බවට චෝදනා එල්ල වේ.

2026 වසරේ දෙවන කාර්තුවේ විදුලි ගාස්තු සංශෝධනය පිළිබඳ අවසන් තීරණය අද (30) දින දැනුම්දීමට නියමිතය.

ඒ අනුව අද පස්වරු 2.00ට පමණ දෙවන කාර්තුවේ විදුලි ගාස්තු සංශෝධනය පිළිබඳව නිල වශයෙන් දැනුවත් කිරීමට නියමිතය.

ශ්‍රී ලංකා මහජන උපයෝගීතා කොමිෂන් සභාව විසින් විදුලි ගාස්තු සංශෝධනය පිළිබඳව දැනුම්දීමට නියමිතව ඇත.