ගුවන් තොටුපොලේ සියලුම අංශ වලින් විදේශ රැකියා ජාවාරමට සහාය ලැබෙන බව කම්කරු හා විදේශ රැකියා අමාත්‍ය මනුෂ නානායක්කාර සදහන් කරයි.
මිනිස් වෙළදාම වැලැක්වීම සදහා රජය ගෙනයන වැඩසටහනට ආගමන විගමන දෙපාර්තමේන්තුවේ සහයෝගය නොලැබෙන බවද අමාත්‍යවරයා සදහන් කරයි.
අද වනවිට රජයේ නිලධාරීන් තමන්ගේ යුතුකම් ඉටුකරන්න බියවී සිටින බවත් යුතුකම් ඉටුකරපු හමුදා නිලධාරීන් තාමත් ලැයිස්තුවල සිටින බවත් එම නිලධාරීන් යුතුකම් ඉටුකරපු නිසා අද අපි රටක් විදිහට හැමෝම සතුටින් සිටින බවද අමාත්‍යවරයා සදහන් කරයි.
කටුනායක ගුවන් තොටුපොලේ ආරක්ෂික සංක්‍රමණ ප්‍රවර්ධන ඒකකය විවෘත කිරීමේ උත්සවයට එක්වෙමින් අමාත්‍යවරයා තවදුරටත් සදහන් කළේ,
“සමහර නිළධාරීන් යුතුකම් ඉටුකරන්න ගිහින් තාමත් ප්‍රශ්නවල ඉන්නවා. අපේ අමාත්‍යාංශයේ ලේකම්තුමන් රටේ මිනිස්සු වෙනුවෙන් පනත් ක්‍රියාත්මක කරන්න ගිහින් අද යම් අර්බුදයකට මුහුණදීලා ඉන්නවා. පාර්ලිමේන්තුවෙන් දෙන බලය ක්‍රියාත්මක කරන්න ගිහින්. මේ ස්ථානයේ රාජකාරි කරන නිළධාරීනුත් බොහෝ අරපරිස්සම් වෙනවා නීතිය ක්‍රියාත්මක කරන්න ගියාම.
මොකද මින්ස්සුන්ගේ යෑම් ඒම් නිදහස කියන එක ආණ්ඩුක්‍රම ව්‍යවස්ථාවේ පැහැදිලිව සදහන් කරලා තියෙනවා. කෙනෙක් කොහේහරි යනවා නම් එයාව නතර කරන්න, ඒ ගැන ප්‍රශ්න කරන්න තියෙන බලය මොකක්ද කියලා අහන අවස්ථා තියෙනවා. එතකොට යම් නිළධාරීන් පැකිලිමක් සිද්ධවුණා.
මම කියන්නේ විදේශ සේවා නියුක්ති කාර්යාංශය, ගුවන් තොටුපොල සමාගම, ඉමිග්‍රේෂන් එක ගොඩක් අය එකට සම්බන්ධ වෙලා ඇතුලට එන කෙනා ඇඳුම් මාරු කරන්නේ වොෂ් රූම් ඇතුලේ. ඇතුලෙදි තමයි පාස්පෝට් එකයි අනිත් ඒවයි අතට දෙන්නේ. මෙතනින් එන්නේ වෙන පාස්පෝට් එකක් අරන්, ඇතුලට දෙන්නේ වෙන පාස්පෝට් එකක්.
මේ සියල්ල එකතු වෙච්ච වැඩ. මේක තනියෙන් නතර කරන්න බෑ. මේක නතර නොකරන තාක් ඔයාලට හොඳයි. එක එක්කෙනාගේ සාක්කුවට 15000 ගානේ වැටෙනවා. ඒක අපි දන්නවා. හැබැයි අවසානෙදි ඒ රටවලට ගිහින් අපේ මිනිස්සු අතරමං වෙනවා. අපේ මිනිස්සු දුක් විදිනවා. ඒ ගෙවල්වලින් එලියට දානවා. හවු හරනට කවුරුත් නෑ.
ලියාපදිංචි වෙලා නෙවෙයි යන්නේ. නැවත ගෙන්න ගන්න අපිට පනතෙන් බලයක් නෑ. විදේශ සේවා නියුක්ති කාර්යාංශයේ ලියාපදිංචි නොවුන කෙනෙක් ගෙන්න ගන්න කවුද වියදම් කරන්නේ. ඒ මිනිස්සුන්ගේ ජීවිත අහිමි වෙනවා. දේශ සීමා පන්නන් යද්දි නොයෙක් කරදර වෙනවා. කවුද ඒ ජීවිතවලට වන්දි ගෙවන්නේ.
මේ කාන්තාවන් ගැන විතරක් නෙවෙයි. ගොඩක් අය මෙතන පහුකරන් යන්නේ. බෝට්ටුවලින් යන්නේ ටික දෙනයි. මේක හොයලා බලලා නතර නොකරොත් අපේ රටේ මිනිස්සුන්ගේ ජීවිත අංක එක, දෙක මේ රටේ කීර්ති නාමය.
මේ සියළු මහන්සිවීම්වල ප්‍රතිපලයක් විදිහට අපේ රටේ මිනිස් වෙලදාම්වල අපේ රටේ ස්ථානය ආරක්ෂා කරගන්න පුළුවන් වෙලා තියෙනවා. ඒකට අපි කාර්ය සාධන බලකායට ස්තූතිවන්ත වෙනවා ඒ කර්තව්‍ය සිදුකිරීම වෙනුවෙන්.
විසිට් වීසා වලින් රට ගිහින් අසරණ වුන අයව ජනාධිපතිතුමාගේ විශේෂ අනුමැතියක් යටතේ ගුවන් යානා දෙක තුනකින් ගෙන්න ගන්න පහුගිය අවුරුද්දේ මම කටයුතු කලා. ලේසි දෙයක් නෙවෙයි. ආණ්ඩුවේ බදු මුදලින් ඒ දේවල් යන්නේ.
ලියාපදිංචි වෙලා යන ශ්‍රමිකයින් දුන්න මුදලින් ඒක ගෙවන්න වෙන්නේ. අපේ විමර්ශන අංශය රටේ හැමතැනම ගිහින් අත්අඩංගුවට ගැනීම් කරනවා. අපි උසාවියට ඉදිරිපත් කරනවා. නඩුවලට ගතවන කාලය දන්නවනේ ඉතින්. හොරු හොරුන්ගේ වැඩේ නැවතත් සුපුරුදු පරිදි කරගෙන යනවා.
අපි දිනපතා CID එකට ඉදිරිපත් කරන ඒවගේ ප්‍රතිඵල ඉදිරියෙදි ලැබෙයි කියලා මම විස්වාස කරනවා. තවම මට ඒවගේ ප්‍රතිපල ලැබෙන්නේ නෑ. අපිට පොලිස් නිළධාරින් නෑ. අපිට ඉන්නේ අපේ නිළධාරීන්. මාංචු කුට්ටමක් අරන් යන්න බලයක් නැතිවුනාට අපේ නිළධාරීන් ගිහින් අත්අඩංගුවට ගැනීම සිදුකරනවා.
ඒක බලය අතට අරන් කරන වැඩක්. අපි ඒකට හයිය දෙනවා මිනිස්සුන්ව රකින්න ඕනි නිසා. ආණ්ඩුක්‍රම ව්‍යවස්ථාව ආරක්ෂා කරන්න අපි හැමෝම බැදිලා ඉන්නවා. ඒක ඇත්ත. නමුත් ඒ සියල්ලට වඩා ඉන්නේ මිනිස්සු. මිනිස්සු ආරක්ෂා කරන්න අපි ඉන්නේ. මිනිස්සුන්ගේ ආර්ථිකයයි කන්න බොන්න නැති එකයි අංක එක.
අපි නිශ්පාදන ආර්ථිකය හදන්න ඕනි රටක් විදිහට, සේවා ආර්ථිකය හදන්න ඕනි. සංචාරකයෝ එද්දි ගුවන් තොටුපොල කාර්යක්ෂමව සේවාවන් සපයනවා. ඉදිරි කාල සීමාවේ සංචාරකයෝ වැඩියෙන් එනවා. මේක තමයි රටේ දියුණුවේ ඉදිරි ගමන. ඒ දේ වෙනුවෙන් ගුවන් තොටුපොල දැනටමත් සූදානම් වෙනවා. රට හොද දිශානතියක් පේන්න තියෙනවා. රටේ මිනිස්සු ආයෙත් හුස්ම ගන්නවා.”
