මේ දිනවල පවතින නියං තත්ත්වය මත සාමාන්‍ය ජල මුලාශ්‍ර සිඳී යෑම හේතුවෙන් පානීය ජලය සපයා ගැනීම ජනතාවට දැඩි ගැටලුවක් බවට පත්වෙමින් පවතින බව රජයේ වෛද්‍ය නිලධාරීන්ගේ සංගමයේ සහකාර ලේකම් වෛද්‍ය චමිල් විජේසිංහ සදහන් කරයි.
පවතින නියං තත්ත්වය මත ජල මූලාශ්‍ර අපිරිසිදුවීම් විෂබීජ ආසාදනයන් තිබීම හේතුවෙන් ඉදිරියේදී පාචනය හා අතීසාරය වැනි රෝග ව්‍යාප්ත වීමේ අවදානමක් පවතින බවද රජයේ වෛද්‍ය නිලධාරීන්ගේ සංගමයේ සහකාර ලේකම් සදහන් කරයි.
පානය කරන ජල මුලාශ්‍ර අපිරිසිදු වීම හේතුවෙන් එම ජලය උණුකර නිවා පානය කරන ලෙසත් එලෙස පානය කිරීමෙන් රෝගවලින් වැළකීමට හැකියාව ලැබෙන බවද වෛද්‍ය නිලධාරීන්ගේ සංගමයේ සහකාර ලේකම් සදහන් කරයි.
සහකාර ලේකම් වෛද්‍ය චමිල් විජේසිංහ තවදුරටත් සදහන් කළේ,
“ග්‍රාමීය ප්‍රදේශවලට යනකොට දුෂ්කර ප්‍රදේශවලට යනකොට මේ තත්ත්වය බරපතළ තත්ත්වයක් බවට පත්වෙමින් තියෙනවා. එහිදී ළිං, නළ ළිං ආදිය මේ නියං තත්ත්වය සමග සිඳීයෑම නිසා ජනතාවට පානීය ජලය සොයාගැනීම දැඩි දුෂ්කරතාවයක් බවට පත්ව තිබෙනවා. ඒ නිසා තිබෙන ජල මුලාශ්‍රවලින් ජලය සපයා ගන්න ඔවුන් උත්සාහ කරනවා.
එහිදි ඒ ජල මුලාශ්‍රවල යම් යම් අපිරිසිදුවීම් විෂබීජ ආසාදනයන් තිබීමට යම් සම්භාවිතාවයක් තියෙනවා. ඒ නිසා ඉදිරියේ දී මේ ජල මුලාශ්‍රවලින් මේ ජනතාව ජලය භාවිත කරන විට පාචනය හා අතීසාරය වැනි රෝග තත්ත්වයන් මතුවීමේ යම් අවදානමක් තියෙනවා.”
