Attention (Sinhala)

අද (05) දින පාර්ලිමේන්තුවේ පැවති රජයේ මුදල් පිළිබද කාරක සභාවේදී මෙම වසර අවසන් වනවිට පෞද්ගලික වාහන හැර අනෙකුත් වාහන ආනයනය සඳහා පනවා ඇති සියලුම සීමා ඉවත් කිරීමට අදහස් කරන බව මුදල් අමාත්‍යාංශ නිලධාරීන් සදහන් කරයි.

පාර්ලිමේන්තු මන්ත්‍රී ආචාර්ය හර්ෂ ද සිල්වාගේ ප්‍රධානත්වයෙන් රජයේ මුදල් පිළිබද කාරක සභාව රැස්වූ අවස්ථාවේදී වාහන ආනයන සීමා කිරීම් කොපමණ කාලයක් ක්‍රියාත්මක වේද යන්න පිළිබඳව කාරක සභාව විමසා සිටි අවස්ථාවේදී නිලධාරීන් මේ බව සඳහන් කර ඇත.

හඳුන්වා දි ඇති 1972 අංක 7 දරණ ගෙවල් කුලී පනත සඳහා අවස්ථා කීපයකදී සංශෝධන සිදුකර ඇතත් එම පනතින් අපේක්ෂිත අරමුණු ඉටු නොවන බව රජය සදහන් කරයි.

ඒ අනුව ඉඩම් හිමියන්ගේ හා කුලී නිවැසියන්ගේ අයිතිවාසිකම් සහ යුතුකම් නිශ්චය කිරීමේ අරමුණින් 1972 අංක 7 දරණ ගෙවල් කුලී පනත අවලංගු කිරීම හා පදිංචිකරුවන් ආරක්ෂා කිරීමේ පනත හඳුන්වා දීමට කැබිනට් අනුමැතිය හිමිව ඇත.

කුලී නිවැසියාගේ සහ ඉඩම් හිමියාගේ අයිතිවාසිකම් සමානව ආරක්ෂා කිරීම අරමුණු කරගත් නව නීතියක් හඳුන්වා දීම සුදුසු බවද කැබිනට් මණ්ඩලයට යෝජනා කර ඇත.

රටේ අධිකරණ බන්ධනාගාර කටයුතු හා ව්‍යවස්ථා  ප්‍රතිසංස්කරණ අමාත්‍යංශය යටතේ ස්ථාපිත කර ඇති ගෙවල් කුලී නීතිය පිළිබඳ උපදේශක කමිටුව විසින් මේ පිළිබඳව කරුණු අධ්‍යයනය කර ඇත.

පසුගිය 2019 වසරේ සිදුවු මරාගෙන මැරෙන පාස්කු බෝම්බ ප්‍රහාර මාලාව සම්බන්ධයෙන් තවත් ආන්දෝලනාත්මක වීඩියෝවක් ප්‍රසිද්ධියට පත් කරන බව බ්‍රිතාන්‍ය “Channel 4” නාලිකාවේ නිවේදනය කළේය.

ඒ අනුව පාස්කු ප්‍රහාරය සම්බන්ධයෙන් එම “චැනල් 4” නාලිකාව කළ හෙලිදරව්ව ගැන සෙවීමට විශේෂ පාර්ලිමේන්තු තේරීම් කාරක සභාවක් පත් කිරීමට කැබිනට් මණ්ඩලයේදී සාකච්ඡා කළ බව අමාත්‍ය මනුෂ නානායක්කාර සදහන් කරයි.

තවද ඊට අමතරව ජාත්‍යන්තරවත් පරීක්ෂණ කිරීමට අවශ්‍ය නම් රජයක් ලෙස ඒ සම්බන්ධයෙන් කටයුතු කිරීමට සූදානම් බවත් කිසිදු අයුරකින් ඒ සදහා රජය පසුබට වන්නේ නැති බවද අමාත්‍යවරයා පාර්ලිමේන්තුවේදී සදහන් කරයි.

ආසියානු සංවර්ධන බැංකු ණය ආධාර යටතේ වසර 04කට පසුව වරායට රේල් පීලි නැවක් ගෙන්වා තිබෙන බව අමාත්‍ය ආචාර්ය බන්දුල ගුණවර්ධන සදහන් කරයි.

කොළඹ සිට පානදුර දක්වා දුම්රිය මාර්ගයේ දුම්රිය පීලී අබලන් වී ඇති බවත් මුහුදුබඩ දුම්රිය මාර්ගයේ පීලී අඩුම තරමින් වසර 5කට වරක්වත් මාරු කිරීමට අවශ්‍ය බවද අමාත්‍යවරයා සදහන් කරයි.

අලුත්වැඩියාවන් සිදු නොකිරීම නිසා දුම්රිය ධාවනය කිරීමේ වේගය සීමා වී තිබෙන බවත් ඒ හේතුවෙන් කාර්යාල සේවකයන්ට නියමිත වේලාවට රාජකාරියට වාර්තා කිරීමේ ගැටලුවක් මතුව ඇති බවද සදහන් කරයි.

එනිසා ඉදිරි දින කිහිපය තුළ කොළඹ සිට පානදුර දක්වා දුම්රිය මාර්ගයේ නවීකරණ කටයුතු ආරම්භ කරන බවත් එළැඹෙන අයවැයෙන් පවතින දුම්රිය මැදිරි ප්‍රතිසංස්කරණය කිරීමට බලාපොරොත්තු වන බවද සදහන් කරයි.

ජනවාරි සිට උතුරු දුම්රිය මාර්ගය තාවකාලිකව වසා දමා මාස හයක් ඇතුළත නවීකරණය කිරීමට තීරණය කර තිබෙන බවත් පසුව කොළඹ සිට කන්කසන්තුරය දක්වා පැයට කිලෝමීටර් 100ක වේගයකින් ධාවනය කිරීමට හැකි බවද සදහන් කරයි.

පාසල් දරුවන් සඳහා ජංගම දුරකථන භාවිතයේදී අනිවාර්යයෙන් සීමා පැණවීමටත් ඊට අදාළ නීති රාමුවක් සකස් කිරීමටත් අවශ්‍ය කටයුතු සූදානම් කරන බවද රාජ්‍ය ඇමතිනි ගීතා කුමාරසිංහ සඳහන් කළහ.

රට තුළ අවුරුදු 18ට අඩු පාසල් දරුවන් සඳහා ජංගම දුරකථන භාවිතයට නීති ගෙන ඒමට සූදානම් බවත් මේ ගැන තමන් ජනාධිපතිවරයා සමග සාකච්ඡා කරන බවද රාජ්‍ය ඇමතිනී සදහන් කළහ.

රටේ ළමා පරපුරට ජංගම දුරකථන හා සමාජ මාධ්‍ය විශාල තර්ජනයක් බවත් දියුණු තාක්ෂණය සමඟ දරුවන් යාවත්කාලීන විය යුතු බවට තර්කයක් නැති බවද රාජ්‍ය ඇමතිනී සදහන් කළහ.

එහෙත් රටේ දරුවන් බොහෝ දෙනකු ජංගම දුරකථන නිසා තමන්ගේ ජීවිත විනාශ කරගෙන සිටින බවත් දරුවන් ජංගම දුරකථන අද වනවිට පාසලට පවා රැගෙන යන බවද රාජ්‍ය ඇමතිනී සදහන් කළහ.

මේ දිනවල පවතින දැඩි වර්ෂාවත් සමග මදුරු ඝණත්වය වැඩිවීමේ අවදානමක් පවතින බව ජාතික ඩෙංගු මර්දන ඒකකයේ අධ්‍යක්ෂ විශේෂඥ වෛද්‍ය නලින් ආරියරත්න සදහන් කරයි.

එම අවදානම් තත්ත්වය සමග වාර්තාවන ඩෙංගු රෝගීන්ගෙන් සියයට 20%ක් පමණ පාසල් දරුවන් බවද එම ඒකකයේ අධ්‍යක්ෂ විශේෂඥ වෛද්‍ය නලින් ආරියරත්න සදහන් කරයි.

එලෙස වාර්තාවන ඩෙංගු රෝගීන්ට ප්‍රතිකාර කිරීමට අදාළ රජයේ රෝහල් මේ වනවිට නම් කර ඇති බවත් වසරේ මේ දක්වා කාලය තුළ හඳුනාගගෙන ඇති ඩෙංගු රෝගීන් සංඛ්‍යාව 62,029ක් බවද විශේෂඥ වෛද්‍ය නලින් ආරියරත්න සදහන් කරයි.

එලෙස හදුනාගත් ඩෙංගු රෝගීන්ගෙන් වැඩිම රෝගින් සංඛ්‍යාවක් වාර්තා වී ඇත්තේ බස්නාහිර පළාතෙන් වන අතර එම සංඛ්‍යාව 30,271ක් බවත් වසරේ මේ දක්වා වාර්තා වී ඇති ඩෙංගු මරණ සංඛ්‍යාව 38ක් පමණ වන බවද විශේෂඥ වෛද්‍ය නලින් ආරියරත්න සදහන් කරයි.

අද (04) සබරගමුව, බස්නාහිර, දකුණ, මධ්‍යම සහ වයඹ පළාත්වල විටින් විට වැසි හෝ ගිගුරුම් සහිත වැසි ඇති වන බවත් බස්නාහිර සහ සබරගමුව පළාත්වලත් ගාල්ල, මාතර සහ නුවරඑළිය දිස්ත්‍රික්කවලත් ඇතැම් ස්ථානවලට මිලිමීටර 50ට වැඩි තරමක් තද වැසිද ඇති විය හැකි බවද කාලගුණ විද්‍යා දෙපාර්තමේන්තුව සදහන් කරයි.

තවද මධ්‍යම කඳුකරයේ බටහිර බෑවුම් ප්‍රදේශ වලත්, බස්නාහිර, දකුණ, වයඹ, උතුරු සහ උතුරු-මැද පළාත්වලත් විටින් විට හමන සුළග පැ.කි.මී. 40-45ක පමණ තරමක තද සුළං ඇතිවිය හැකි බවත් පුත්තලම සිට කොළඹ, ගාල්ල සහ මාතර හරහා හම්බන්තොට දක්වා වෙරළට ඔබ්බෙන් වන මුහුදු ප්‍රදේශවල විටින් විට වැසි හෝ ගිගුරුම් සහිත වැසි ඇති විය හැකි බවද කාලගුණ විද්‍යා දෙපාර්තමේන්තුව සදහන් කරයි.

හම්බන්තොට සිට පොතුවිල් දක්වා සහ පුත්තලම සිට මන්නාරම සහ කන්කසන්තුරය හරහා ත්‍රිකුණාමලය දක්වා වෙරළට ඔබ්බෙන් වන මුහුදු ප්‍රදේශවල සුළගේ වේගය විටින් විට පැ.කි.මී. 60-70 දක්වාත් කොළඹ සහ ගාල්ල හරහා හම්බන්තොට දක්වා වෙරළට ඔබ්බෙන් වන මුහුදු ප්‍රදේශවල සුළගේ වේගය පැ.කි.මී. 50-60 දක්වා වැඩි විය හැකි බවද කාලගුණ විද්‍යා දෙපාර්තමේන්තුව සදහන් කරයි.

ශ්‍රී ලංකාවේ ජනගහනයෙන් සියයට 55%ක් අවදානම් දර්ශකයේ පසුවන බව එක්සත් ජාතීන්ගේ සංවර්ධන වැඩසටහන සහ ඔක්ස්ෆර්ඩ් ද්‍රරිද්‍රතාව සහ මානව සංවර්ධන ඒකකය එක්ව සිදුකළ සමීක්ෂණයකින් අනාවරණය වී ඇත.

රටේ අධ්‍යාපනය, සෞඛ්‍යය, ආපදා සහ ජීවන තත්ත්වය සැලකීමේදී ලංකාවේ පුද්ගලයන් 10 දෙනෙකුගෙන් 06 දෙනෙකු දැඩි අවදානමක පසුවන බව එම නවතම සමීක්ෂණයෙන් අනාවරණය වී ඇත.

ලංකාවේ පවතින ආර්ථික අර්බුදය හේතුවෙන් විවිධ පැතිකඩයන්ගෙන් සිදුව ඇති බලපෑම පිළිබඳව පසුගිය 2022 වසරේ නොවැම්බර් මස සිට මෙම 2023 වසරේ මාර්තු මාසය දක්වා කාලය තුළ මෙම සමීක්ෂණය සිදුකර ඇත.

ඒ අනුව ලංකාවේ දරුවන්ගේ අධ්‍යාපනය, සෞඛ්‍ය, ආපදා සහ ජීවන තත්ත්වය සම්බන්ධයෙන් අවදානමේ පසුවන බවද එම සමීක්ෂණය තවදුරටත් අණාවරණය කරයි.

අද (02) දින පෞද්ගලික අංශයෙන් විදුලිය මිලදීගැනීම ආරම්භ කරන බවත් පළමුවෙන්ම ඒ.එස්. ඇඹිලිපිටිය බලාගාරය දකුණු පළාතට සම්බන්ධ කරන බවද විදුලිබල හා බලශක්ති අමාත්‍ය කංචන විජේසේකර සදහන් කරයි.

පෞද්ගලික අංශයෙන් මිලදී ගන්නා විදුලි ඒකකයක් මණ්ඩලයේ බොහෝ බලාගාරවල ඒකක පිරිවැයට වඩා අඩු බැවින් ඒ.එස්. මාතර බලාගාරයෙන් සහ ඒ.එස්. ඇඹිලිපිටිය බලාගාරයෙන් විදුලිය මිලදී ගැනිමට නියමිත බවද අමාත්‍යවරයා සදහන් කරයි.

ඒ අනුව පෞද්ගලික විදුලි සැපයුම් සමාගම් වන ඒ.එස්. මාතර බලාගාරයෙන් විදුලි ඒකකයක් රුපියල් 55 කට සහ ඒ.එස්. ඇඹිලිපිටිය බලාගාරයෙන් විදුලි ඒකකයක් රුපියල් 54 කට මිලදී ගන්නා බවද අමාත්‍යවරයා සදහන් කරයි.

එම බාලාගාරවලට අවශ්‍ය දැවිතෙල් සඳහා සංස්ථාවට මුදල් විදුලිබල මණ්ඩලයෙන් ගෙවන බවත් ඒ.එස්. මාතර බලාගාරයෙන් හිමිකරුවන්ට ඒකකයකට රුපියල් 8.01 ක් සහ ඒ.එස්. ඇඹිලිපිටිය බලාගාරයේ හිමිකරුවන්ට ඒකකයකට රුපියල් 7.91 ක් ගෙවන බවද අමාත්‍යවරයා සදහන් කරයි.

අද (01) දින මධ්‍යම රාත්‍රියේ සිට ක්‍රියාත්මක වන පරිදි සියයට 05% කින් ආනයන අපනයන ප්‍රවාහන ගාස්තුව ඉහළ දැමීමට බහාලුම් ප්‍රවාහන රථ හිමිකරුවන්ගේ සංගමය තීරණය කර ඇත.

යළිත් වතාවක් ඉන්ධන මිල ඉහළ දැමීමත් සමග මෙම තීරණය ගත් බවද බහාලුම් ප්‍රවාහන රථ හිමිකරුවන්ගේ සංගමයේ සභාපති සනත් මංජුල සදහන් කරයි.

තවද ඉන්ධන මිල ඉහළ දැමීමට සාපේක්ෂව ආනයනික භාණ්ඩ මිල ගණන්ද ඉහළ යනු ඇති බවද සභාපති සනත් මංජුල ප්‍රවෘත්ති සාකච්ඡාවකට එක්වෙමින් සදහන් කරයි.