Foreign news

ජපානයේ රික්ටර් මාපකයේ 7.6 අගයක් ගත් භූමිකම්පාව හට ගැනීම හේතුවෙන් හොක්කයිඩෝ පළාතේ උරකාවා නගරයට සහ අමෝරි පළාතේ මුට්‌ට්සු ඔගවාරා වරායට සෙන්ටිමීටර 40ක උසින් යුත් සුනාමි රළ කඩා වැදී තිබූ බව එරට බලධාරීහු සඳහන් කරයි.

රික්ටර් මාපකයේ 7.6 අගයක භූමිකම්පාව හේතුවෙන් ජපාන කාලගුණ විද්‍යා ඒජන්සිය සුනාමි අනතුරු ඇඟවීමක් නිකුත් කළ අතර එක් රළක් රාත්‍රී 11:43ට පමණ මිසාවා පිහිටා ඇති අමෝරි හි උතුරු කලාපයේ වරායකට පහර දී ඇත.

හොක්කයිඩෝ, අමෝරි සහ ඉවාටේ පළාත් සඳහා මෙම සුනාමි අනතුරු ඇඟවීම කාලගුණ විද්‍යා ඒජන්සිය නිකුත් කර තිබූ අතර අඩි 10ක් දක්වා සුනාමි රළ ඇතිවිය හැකි බවට අනතුරු අඟවා තිබුණේය.

කෙසේ වෙතත් මේ වනවිට ජපානය සුනාමි අනතුරු ඇඟවීම ඉවත් කර ඇති බව වාර්තා වේ.

තායිලන්තය හා කාම්බෝජය අතර දේශසීමා ගැටුම් මධ්‍යයේ තායිලන්තය විසින් කාම්බෝජයට යළි ගුවන් ප්‍රහාර එල්ල කර ඇති බව විදෙස් මාධ්‍ය වාර්තා කරයි.

දෙරට අතර සටන් විරාම ගිවිසුමක් කඩ කළ බවට චෝදනා කිරීම හේතුවෙන් මෙලෙස ප්‍රහාර දියත් කළ බව තායි හමුදා ප්‍රකාශක වින්තායි සුවරී අද (08) දින ප්‍රකාශ කර ඇත.

කෙසේ වෙතත් නැවත මෙම ප්‍රහාර එල්ල කිරීමත් සමග දෙරට අතර අත්සන් කර ඇති සාම ගිවිසුම බිඳ වැටීමේ අවධානමක්ද මේ වන විට මතුව ඇත.

දේශසීමා ගැටුම් අවසන් කිරීම සඳහා පසුගිය ඔක්තෝම්බර් (26) වැනිදා අමෙරිකානු ජනාධිපති ඩොනල්ඩ් ට්‍රම්ප් විසින් දෙරට අතර සාම ගිවිසුමකට අත්සන් කරනු ලැබුවේය.

පසුගිය දිනවල ඉන්දුනීසියාවේ සුමාත්‍රා දූපතේ ඇති වූ ගංවතුර සහ නායයෑම් හේතුවෙන් පුද්ගලයින් 916ක් මියගොස් ඇති බවත් 274 දෙනෙකු අතුරුදන් වී ඇති බවද විදෙස් මාධ්‍ය වාර්තා කරයි.

එරට ගංගා ඉවුරු බිඳී ගොස් ගංවතුර කඳුකර ගම්මාන හරහා ගලා ගොස් ඇති අතර ඒ හේතුවෙන් දහස් ගණනක් නිවාස සහ ගොඩනැගිලි ජලයෙන් යට වී ඇති බවද විදෙස් මාධ්‍ය වාර්තා කරයි.

මේ වන විටත් ඉන්දුනීසියාවේ ගලවා ගැනීමේ නිලධාරීන් විසින් මළ සිරුරු සොයා මෙහෙයුම් සිදුකරන බව විදෙස් මාධ්‍ය වාර්තා කරයි.

අමෙරිකානු ජනාධිපති ඩොනල්ඩ් ට්‍රම්ප් ජන්ම පුරවැසිභාවය අහෝසි කිරීමේ විධායක නියෝගයකට පසුගියදා අත්සන් කළේය.

එහෙත් ජනාධිපති ඩොනල්ඩ් ට්‍රම්ප් විසින් ගත් විධායක නියෝගයට එරෙහිව ඉදිරිපත්වූ පෙත්සමක් සලකා බැලීමට එරට ශ්‍රේෂ්ඨාධිකරණය තීරණය කර ඇත.

එම පෙත්සම විභාග කිරීම සඳහා දිනයක් නියම කර නොමැති අතර අමෙරිකානු ‍පහළ අධිකරණය කිහිප වතාවක් එම විධායක නියෝගය ආණ්ඩුක්‍රම ව්‍යවස්ථාව උල්ලංඝණය කිරීමක් බවට ප්‍රකාශ කළේය.

එම විධායක නියෝගය මගින් නීතිවිරෝධී ලෙස අමෙරිකාවේ සිටින හෝ තාවකාලික වීසා මත රට තුළ සිටින පුද්ගලයින්ට උපදින දරුවන්ට පුරවැසිභාවය ලබාදීම ප්‍රතික්ශේප කිරිමයි.

යුක්‍රේනයට අයත් වන ඩොන්බාස් බලහත්කාරයෙන් හෝ ලබාගන්නා බව රුසියානු ජනාධිපති ව්ලැඩිමීර් පුටින් සඳහන් කරයි.

එනිසා යුක්‍රේනය හමුදාව නැගෙනහිර ඩොන්බාස් ප්‍රදේශයෙන් ඉවත්විය යුතු බවට රුසියානු ජනාධිපති ව්ලැඩිමීර් පුටින් යළිත් වරක් අනතුරු අඟවා ඇත.

යුක්‍රේනයට එරෙහි යුද්ධය අවසන් කිරීමට අදාළ තමන්ට අවාසි සියලු සම්මුතීන් ප්‍රතික්ෂේප කරන බවද ජනාධිපති ව්ලැඩිමීර් පුටින් සඳහන් කරයි.

ඉන්දියාවේ සංචාරයක නිරත රුසියානු ජනාධිපති ව්ලැඩිමීර් පුටීන් එරට පැවති  ප්‍රවෘත්ති සාකච්ඡාකට එක්වෙමින් මේ බව සඳහන් කරයි.

කෙසේ වෙතත් මේ වනවිට ඩොන්බාස් වලින් 85%ක් පමණ රුසියාව විසින් පාලනය කරන අතර එහි නැගෙනහිර ප්‍රදේශයේ පමණක් යුක්‍රේනය හමුදා රැඳී සිටියි.

හොංකොං හි මහල් නිවාස සංකීර්ණයක ඇති වූ හදිසි ගින්නෙන් විශාල පිරිසක් මියගොස් ඇති බව විදෙස් මාධ්‍ය වාර්තා කරයි.

ඒ අනුව මේ වනවිට පුද්ගලයින් 36 දෙනෙකු මියගොස් ඇති බවත් තවත් පුද්ගලයින් 279 දෙනෙකු අතුරුදන් වී ඇති බවද විදෙස් මාධ්‍ය වාර්තා කරයි.

මෙම ගින්න නිවා දැමීම සඳහා ගිනිනිවන භටයින් 800කට වැඩි පිරිසක් මේ වනවිට සේවයේ යොදවා ඇති බවත් ගින්න නිවා දැමීමේ හදිසි මෙහෙයුම් අඛණ්ඩව සිදුවන බවද සඳහන් කරයි.

පාකිස්තාන හිටපු අග්‍රාමාත්‍ය ඉම්රාන් ඛාන් බන්ධනාගාරය තුළදී ඝාතනය කර ඇති බවට වන පුවතක් එරට සමාජ මාධ්‍ය තුළ මේ වනවිට වේගයෙන් සංසරණය වෙමින් ඇත.

හිටපු අග්‍රාමාත්‍ය ඉම්රාන් ඛාන්ගේ සුවදුක් බැලීමට පැමිණි ඔහුගේ සහෝදරියන් තිදෙනාද බන්ධනාගාරයෙන් පිටතදී කුරිරු පොලිස් ප්‍රහාරයකට ලක්ව ඇති බවද වාර්තා වේ.

මේ වනවිට ඉම්රාන් ඛාන් රඳවා සිටින ආඩියාලා බන්ධනාගාරය ඉදිරිපිට ඔහුගේ පක්ෂයේ ආධාරකරුවන් දහස් ගණනක් රැඳී සිටින බවත් ඔවුන් පොලිසිය සමඟ ගැටෙන බවද වාර්තා වේ.

කෙසේ වෙතත් පාකිස්තාන රජය මේ දක්වා නිල ප්‍රකාශයක් නිකුත් කර නොමැත.

ඉන්දියාවේ බිහාර් ප්‍රාන්තයේ දිස්ත්‍රික්ක කිහිපයක කිරිදෙන මව්වරුන්ගේ මව්කිරි ලීටරයක යුරේනියම් මෛක්‍රෝ ග්‍රෑම් (ug/L) 5.25ක් අන්තර්ගතව පවතින බවට අනාවරණය වී ඇති බව විදෙස් මාධ්‍ය වාර්තා කරයි.

ඉන්දියාවේ, මහාවීර් පිළිකා ආයතනයේ පර්යේෂකයන් සොයාගෙන ඇත්තේ මව්කිරි හරහා යුරේනියම් නිරාවරණය වීම ළදරුවන්ට සැලකිය යුතු පිළිකා කාරක නොවන සෞඛ්‍ය ගැටලු ඇති කළ හැකි බවයි.

කිරි දෙන මව්වරුන් 40 දෙනෙකුගෙන් මව්කිරි විශ්ලේෂණය කළ අධ්‍යයනයෙන් සියලුම සාම්පලවල යුරේනියම් (U-238) සොයාගත් බවත් ළදරුවන්ගෙන් 70%ක් විභව පිළිකා කාරක නොවන සෞඛ්‍ය අවදානමක් පෙන්නුම් කළ බව වෛද්‍ය අශෝක් ෂර්මා සඳහන් කරයි.

සමස්ත යුරේනියම් මට්ටම් අවසර ලත් සීමාවන්ට වඩා අඩු වූ අතර මව්වරුන්ට සහ ළදරුවන්ට අවම සැබෑ සෞඛ්‍ය බලපෑමක් ඇති කරනු ඇතැයි අපේක්ෂා කරන බවත් යුරේනියම් නිරාවරණය දුර්වල ස්නායු සංවර්ධනය සහ අඩු IQ වැනි අවදානම් ඇති කළ හැකි බවද වෛද්‍ය අශෝක් ෂර්මා සඳහන් කරයි.

ලබන වසරේ නිල සංචාරයක් සදහා චීනයට පැමිණෙන්නැයි, චීන ජනාධිපතිවරයා කළ ආරාධනාවක් තමන් පිළිගත් බව අමෙරිකානු ජනාධිපති ඩොනල්ඩ් ට්‍රම්ප් සඳහන් කරයි.

චීන ජනාධිපති ෂී ජින්ග් පින්ග් සමඟ ඊයේ (24) දින පැවති දුරකථන සාකච්ඡාවකින් අනතුරුව අමෙරිකානු ජනාධිපති ඩොනල්ඩ් ට්‍රම්ප් මේ බව සඳහන් කරයි.

රාජ්‍ය නායකයින් දෙදෙනා පැයක පමණ කාලයක්, රුසියානු – යුක්‍රේන යුද්ධය, මත්ද්‍රව්‍ය මෙහෙයුම් හා දෙරට අතර අඛණ්ඩ සන්නිවේදන සබදතා පවත්වාගැනීමේ ඇති අවශ්‍යතාවය පිළිබඳ සාකච්ඡා කළ බව ධවල මන්දිරය නිවේදනය කරයි.