Foreign news

ඉරාකයේ බැග්ඩෑඩ්හි අමෙරිකානු තානාපති කාර්යාල පරිශ්‍රයේ පිහිටි හෙලිකොප්ටර් යානා අංගනයට මිසයිල ප්‍රහාරයක් එල්ල කර ඇති බව විදෙස් මාධ්‍ය වාර්තා කරයි.

මෙම මිසයිල ප්‍රහාරය එල්ලවීමත් සමග අමෙරිකානු තානාපති කාර්යාල සංකීර්ණය ඇතුළත සිට දුමාරයක් නැඟී ඇති බව විදෙස් මාධ්‍ය වාර්තා කරයි.

මෙම ප්‍රහාරය සහ ප්‍රහාරයෙන් සිදුවු හානිය සම්බන්ධයෙන් බැග්ඩෑඩ් හි අමෙරිකානු තානාපති කාර්යාලය මෙතෙක් නිල ප්‍රකාශයක් සිදුකර නොමැත.

අමෙරිකාව සමග සහයෝගයෙන් කටයුතු කරන කලාපයේ තෙල් සමාගම් වලට ප්‍රහාර එල්ල කරන බවට ඉරානය අනතුරු අඟවා ඇත.

ඉරානයේ තෙල් හා බලශක්ති යටිතල පහසුකම් වලට එල්ල වන ඕනෑම ප්‍රහාරයකට පළිගැනීමක් ලෙස එම ප්‍රහාර එල්ල කරන බව ඉරානය සඳහන් කරයි.

ඉරානයේ ප්‍රධානම බොරතෙල් අපනයන මධ්‍යස්ථානය වන කාර්ග් දූපතේ හමුදා ඉලක්ක වෙත එල්ලවූ අමෙරිකානු ප්‍රහාරයට ප්‍රතිචාර ලෙස ඉරානයේ සන්නද්ධ හමුදාවන්ගේ ඒකාබද්ධ සටන් විධානය නිවේදනයක් නිකුත් කරමින් මේ බව සඳහන් කර ඇත.

ඉරානයේ නව උත්තරීතර නායක මොජ්ටාබා කමේනි සහ එරට ඉස්ලාමීය විප්ලවවාදී ආරක්ෂක බළකායේ ඉහළ පෙළේ නායකයින් ගැන තොරතුරු සපයන්නෙකුට මුල්‍ය ත්‍යාගයක් ලබාදීමට අමෙරිකානු රාජ්‍ය දෙපාර්තමේන්තුව තීරණය කර ඇත.

ඒ අනුව නව උත්තරීතර නායක මොජ්ටාබා කමේනි සහ ඉස්ලාමීය විප්ලවවාදී ආරක්ෂක බළකායේ ඉහළ පෙළේ නායකයින් ගැන තොරතුරු සපයන්නෙකුට අමෙරිකානු ඩොලර් මිලියන 10 දක්වා වූ මුල්‍ය ත්‍යාගයක් ලබාදීමට තීරණය කර ඇත.

මේ අතර අමෙරිකාව සහ ඊශ්‍රායලය ඒකාබද්ධව ඉරානයට එරෙහිව සිදුකරන යුද්ධය වෙනුවෙන් මැදපෙරදිගට අමතර භට පිරිස්, මැරීන් භටයින් සහ නාවික නෞකා යෙදවීමටත් අමෙරිකාව තීරණය කර ඇත.

ඉරානයේ ප්‍රධාන බොරතෙල් අපනයන පර්යන්තය ලෙසින් සැලකෙන “කාර්ග් දූපතට” අමෙරිකාව විසින් බෝම්බ හෙළා ඇත.

මෙම “කාර්ග් දූපත” ඉරානයේ ප්‍රධානම බොරතෙල් අපනයන පර්යන්තය ලෙසින් සැලකෙන අතර එය ඉරානයේ ‘ඛනිජ තෙල් ජීවනාලිය’ ලෙස හඳුන්වයි.

ඉරානය සිය බොරතෙල් අපනයනයෙන් 90%ක්ම සිදුකරන්නේ මෙම දූපත හරහා වන අතර ඉරානයේ විශාලතම තෙල් ගැණුම්කරුවා වන චීනය තෙල් රැගෙන යන්නේ මෙම දූපතෙන්ය.

සැතපුම් 5ක පමණ දිගකින් යුත් කුඩා දූපතක් වන මෙය, ඉරාන වෙරළට නාවික සැතපුම් 15ක් පමණ දුරින් පිහිටා ඇත.

දශක තුනකට අධික කාලයක් පාලනය කළ ඉරානයේ උත්තරීතර නායක අයතුල්ලා අල් කමේනි එක්සත් ජනපදය සහ ඊශ්‍රායලය එක්ව සිදුකළ ප්‍රහාරවලින් ජීවිතක්ෂයට පත්ව ඇත.

එක්සත් ජනපදය සහ ඊශ්‍රායලය එක්ව සිදුකළ ප්‍රහාරවලින් අල් කමේනිට අමතරව ඉරාන උත්තරීතර නායකයාගේ දියණිය, මුනුපුරා සහ බෑණාද ඝාතනයට ලක්ව ඇති බවද මේ වන විට අනාවරණය වී ඇත.

ඉරානයට එල්ල කරන ප්‍රහාරයට අමෙරිකා එක්සත් ජනපදය සම්බන්ධ බවත් ඉරානය තුළ “ප්‍රධාන සටන් මෙහෙයුම්” ආරම්භ කර ඇති බව අමෙරිකානු ජනාධිපති ඩොනල්ඩ් ට්‍රම්ප් සඳහන් කරයි.

ඉරානයේ සන්නද්ධ හමුදා වන විප්ලවවාදී ආරක්ෂක භටයින්ට තම ආයුධ බිම තබන ලෙසත් නැතිනම් අනෙක් විකල්පය නිශ්චිත මරණය බවට ජනාධිපති ඩොනල්ඩ් ට්‍රම්ප් අනතුරු අඟවා ඇත.

ඉරාන මිසයිල විනාශ කිරීම සහ එහි නාවික හමුදාව විනාශ කිරීම අරමුණු කරගනිමින් මෙම ප්‍රහාර මාලාව දියත් කර ඇති බවත් ඉරානය සිය න්‍යෂ්ටික සහ බැලස්ටික් මිසයිල වැඩසටහන් ඉදිරියට ගෙන ගියහොත් ඔවුන් නැවත පහර දෙන බවද සඳහන් කරයි.

එක්සත් ජනපද හමුදාව ඉරානයේ ප්‍රධාන සටන් මෙහෙයුමක් ආරම්භ කළ බවත් ඔවුන්ගේ අරමුණ ඉරාන පාලන තන්ත්‍රයෙන් එල්ල වන තර්ජන තුරන් කිරීමෙන් අමෙරිකානු ජනතාව ආරක්ෂා කිරීම බවද ජනාධිපති ඩොනල්ඩ් ට්‍රම්ප් සඳහන් කරයි.

අමෙරිකාව සහ ඊශ්‍රායලය එක්ව අද (28) දින දියත් කළ ඒකාබද්ධ මෙහෙයුමක් ලෙස ඉරානයේ ටෙහෙරාන් අගනුවර වෙත ප්‍රහාර මාලාවක් එල්ල කළේය.

ඉරානයට එල්ල කළ මිසයිල ප්‍රහාරයට ප්‍රතිචාර ලෙස ඉරානය විසින් ඊශ්‍රායලයට මිසයිල ප්‍රහාරයක් දියත් කර ඇති බව ඊශ්‍රායල ආරක්ෂක බළකාය (IDF) තහවුරු කරයි.

තවද ඉරානය විසින් මැදපෙරදිග කලාපයේ අමෙරිකානු කඳවුරු පිහිටා ඇති රටවල් කිහිපකට මේ වනවිට ප්‍රහාර එල්ල කර ඇති බව විදෙස් මාධ්‍ය වාර්තා කරයි.

ඒ අනුව ඉරානය පළමුවෙන් බහරේනයේ පිහිටි අමෙරිකානු කඳවුරු පිහිටා ඇති මනමා අගනුවරට ප්‍රහාරයක් එල්ල කර ඇති අතර අනතුරුව එක්සත් අරාබි එමීර් රාජ්‍ය (UAE) මෙන්ම කුවේට් දේශයට ප්‍රහාර එල්ල කර ඇත.

මෙම ප්‍රහාර හේතුවෙන් මේ වනවිට කටාර්, කුවෙට්, එක්සත් අරාබි මෙන්ම සෞදි අරාබිය සිය ගුවන් කලාප වසා දමා ඇති බව විදෙස් මාධ්‍ය වාර්තා කරයි.

අමෙරිකාව සහ ඊශ්‍රායලය එක්ව ඉරානයට එල්ල කළ මිසයිල ප්‍රහාරයට ප්‍රතිචාර ලෙස ඉරානය විසින් ඊශ්‍රායලයට මිසයිල ප්‍රහාරයක් දියත් කර ඇති බව ඊශ්‍රායල ආරක්ෂක බළකාය (IDF) තහවුරු කරයි.

අදාළ මිසයිල ප්‍රහාර ඉරානයේ සිට පැමිණි බව හඳුනාගත් බවත් එම ප්‍රහාරයන් වැළැක්වීමට කටයුතු කළ බවද ඊශ්‍රායල ආරක්ෂක හමුදාවන් සඳහන් කරයි.

තවද එරට වැසියන්ට ඊශ්‍රායල ආරක්ෂක අංශ පූර්වාරක්ෂක නියෝගය අනුව කටයුතු කරන ලෙස දැනුම්දී ඇති අතර වගකීමෙන් යුතුව ක්‍රියා කරන ලෙසටත් මහජනතාවට උපදෙස් ලබාදී ඇත.

මේ අතර ඉරානය සමග පවතින ආතතිය මධ්‍යයේ සිරියාව, කටාර් සහ බහරේනය යන රටවල පිහිටි හමුදා කඳවුරුවලින් අමෙරිකානු හමුදා ඉවත් කරගැනීමට කටයුතු කර ඇත.

පසුගිය (23) වැනිදා සිට එම කලාපවල සිටි සෙබළුන් සහ යුද්ධ උපකරණ ඉරාකයේ කුර්දිස්ථාන කලාපය වෙත මාරු කර ඇතැයි වාර්තා වේ.

අමෙරිකාව සහ ඉරානය අතර උණුසුම් වාතාවරණයක් ගොඩනැගෙමින් පවතින පසුබිමක ඊශ්‍රායලය ඉරානයේ ටෙහෙරාන් අගනුවර වෙත මිසයිල ප්‍රහාර මාලාවක් එල්ල කර ඇත.

අමෙරිකාව සහ ඊශ්‍රායලය ඒකාබද්ධව මෙම ප්‍රහාර එල්ල කර ඇති අතර ඉරානයට එල්ල කළ ප්‍රහාර මාලාවෙන් පසු ඉරාකය සිය ගුවන් අවකාශය වසා දමා ඇත.

ඒ අනුව ඉරාක සිවිල් ගුවන්සේවා අධිකාරිය විසින් එරට ගුවන් සීමාව හරහා සියලුම ගුවන් ගමනාගමනය නිල වශයෙන් අත්හිටුවා ඇත.

ඉරානයේ අගනුවර දැවැන්ත පිපිරීම් 3ක් සිදු වූ වහාම එර්බිල් ජාත්‍යන්තර ගුවන්තොටුපොළේ ගුවන්ගමන් මෙහෙයුම් සම්පූර්ණයෙන්ම නතර කරන බවද එම අධිකාරිය සඳහන් කරයි.