Foreign news

තලේබාන් සටන්කරුවන් ඉලක්ක කරමින් පාකිස්තානය එල්ල කළ ගුවන් ප්‍රහාර මාලාවෙන් තලේබාන් සටන්කරුවන් 130කට වැඩි පිරිසක් මියගොස් 200කට වැඩි පිරිසක් තුවාල ලැබූ බව පකිස්තානය තහවුරු කරයි.

දේශසීමා ගැටලුවක් හේතුවෙන් ඇෆ්ගනිස්තානය විසින් පාකිස්තානයට එල්ල කළ ප්‍රහාර වලට පළිගැනීමක් ලෙස පාකිස්තානය ඊයේ (26) රාත්‍රියේ මෙම ප්‍රහාර මාලාව එල්ල කළේය.

‘ගසබ් ලිල් හක්’ ලෙසින් නම් කර ඇති මෙම මෙහෙයුම යටතේ පාකිස්තාන ගුවන් හමුදාව කාබුල්හි තලේබාන් හමුදා මූලස්ථානය ඇතුළු ස්ථාන රැසකට බෝම්බ හෙළා ඇත.

ඇෆ්ගන් තලේබාන් සංවිධානයේ ආක්‍රමණයට සිය සන්නද්ධ හමුදා දැඩි ප්‍රතිචාරයක් දක්වන බව පාකිස්තාන ආරක්ෂක අමාත්‍ය කවාජා අසිෆ් සඳහන් කරයි.

අසල්වැසි ඉන්දියාවේ ජාර්කන්ඩ් ප්‍රාන්තයේ චත්‍රා දිස්ත්‍රික්කයේ සිදුවූ ගුවන් අනතුරකින් පුද්ගලයින් හත් දෙනෙකු ජීවිතක්ෂයට පත්ව ඇති බව විදෙස් මාධ්‍ය වාර්තා කරයි.

මෙම යානය ඊයේ (23) පස්වරු 7:11ට රාංචි ගුවන්තොටුපළෙන් නව දිල්ලිය බලා ගමන් ආරම්භ කර ඇති අතර අනතරුව පස්වරු 7:30ට පමණ එය රේඩාර් පද්ධතියෙන් අතුරුදන් වී ඇත. 

පසුව සිදුකළ විමර්ශන වලදී අනාවරණය වී ඇත්තේ නව දිල්ලිය බලා ගමන් ආරම්භ කළ මෙම යානය ඝන වනාන්තර ප්‍රදේශයකට කඩා වැටී ඇති බවයි.

රෙඩ්බර්ඩ් එයාර්වේස් (Redbird Airways) සමාගමට අයත් ගුවන් ගිලන් යානයක් මෙලෙස අනතුරට පත්ව ඇති බව විදෙස් මාධ්‍ය වාර්තා කරයි.

අමෙරිකානු ජනාධිපති ඩොනල්ඩ් ට්‍රම්ප්ට අයත් ‘මාර්-අ-ලාගෝ’ (Mar-a-Lago) නිකේතනයේ අධි ආරක්ෂිත කලාපයට අනවසරයෙන් ඇතුළු වීමට උත්සාහ කළ පුද්ගලයෙක්ට වෙඩි තබා ඇත.

එරට වෙලාවෙන් අලුයම 1:30ට පමණ මෙම සිදුවීම වාර්තා වූ බවත් අනවසරයෙන් ඇතුළු වීමට උත්සාහ කළ එම සන්නද්ධ පුද්ගලයා ආරක්ෂක අංශ එල්ල කළ වෙඩි ප්‍රහාර හමුවේ ජීවිතක්ෂයට පත්ව ඇත.

මියගිය පුද්ගලයා උතුරු කැරොලිනා ප්‍රාන්තයේ පදිංචි 21 හැවිරිදි ඔස්ටින් ටකර් මාර්ටින් ලෙස හඳුනාගෙන ඇති අතර එම සැකකරු විසින් සිය වාහනය ධාවනය කරමින් අධි ආරක්ෂිත කලාපයට තුළට ඇතුළු වීමට උත්සහා කර ඇත.

එම සැකකරු සතුව shotgun වර්ගයේ ගිනි අවියක් සහ ගෑස් කෑනයක් තිබී ඇති අතර අදාළ ගිනි අවියේ අසුරණය ඔහුගේ වාහනය තුළ තිබී සොයාගෙන ඇත.

කෙසේ වෙතත් මෙම සිදුවීම වන අවස්ථාවේදී ජනාධිපති ට්‍රම්ප් සහ ඔහුගේ බිරිඳ මෙලානියා Mar-a-Lago නිකේතනයේ රැඳී නොසිටි අතර ඔවුන් වොෂින්ටනයේ ධවල මන්දිරයේ සිට ඇත.

ගෝලීය ආනයන සඳහා 10%ක නව බද්දක් අමෙරිකානු ජනාධිපති ඩොනල්ඩ් ට්‍රම්ප් විසින් ප්‍රකාශයට පත්කර ඇත.

ජනාධිපති ඩොනල්ඩ් ට්‍රම්ප්ගේ බදු ප්‍රතිපත්තියට එරෙහිව ශ්‍රේෂ්ඨාධිකරණය ලබාදුන් තීන්දුවෙන් පසුව ඔහු විසින් වහාම ක්‍රියාත්මක වන මෙම නව බද්ද පනවා ඇත.

කෙසේ වෙතත් ශ්‍රේෂ්ඨාධිකරණ තීන්දු විවේචනය කරන ජනාධිපති ඩොනල්ඩ් ට්‍රම්ප් නව බද්ද ප්‍රකාශයට පත්කරමින් පවසා ඇත්තේ, එම තීන්දුව ‘දරුණු’ බවයි.

තවද ජනාධිපති ඩොනල්ඩ් ට්‍රම්ප්ගේ වෙළෙඳ ප්‍රතිපත්තිය ප්‍රතික්ෂේප කළ විනිසුරුවරුන් ‘මෝඩයන්’ ලෙස ඔහු අර්ථ දක්වා ඇත.

අමෙරිකානු ශ්‍රේෂ්ඨාධිකරණය විසින් අමෙරිකානු ජනාධිපති ඩොනල්ඩ් ට්‍රම්ප් පැනවූ ගෝලීය වෙළෙඳ තීරුබදු ෆෙඩරල් නීතිය උල්ලංඝනය කිරීමක් බවට තීන්දු කර ඇත.

අදාළ තීරුබදු පැනවීම අමෙරිකානු ජනාධිපති ඩොනල්ඩ් ට්‍රම්ප්ගේ ආර්ථික න්‍යාය පත්‍රයේ ප්‍රධාන අංගයක් වූ අතර මෙම අධිකරණ තීන්දුව ට්‍රම්ප් පාලන තන්ත්‍රය ලැබූ දරුණු පසුබෑමක් ලෙස සැලකෙයි.

දකුණු කොරියානු අධිකරණය විසින් කැරැල්ලක් සැලසුම් කිරීමේ වරදට හිටපු ජනාධිපති යූන් සුක් යෝල්ට ජීවිතාන්තය දක්වා සිර දඬුවම් නියම කර ඇත.

යුද නීතිය ප්‍රකාශයට පත් කිරීමට උත්සාහ කිරීමෙන් අනතුරුව කැරැල්ලට නායකත්වය දීම සම්බන්ධයෙන් වැරදිකරු කරමින් හිටපු ජනාධිපතිවරයාට මෙම දඬුවම නියම කර ඇත.

ලොව පුරා පරිශීලකයින් ලක්ශ ගණනකට “YouTube” බිඳ වැටී ඇතැයි විදෙස් මාධ්‍ය වාර්තා කරයි.

ඇමරිකා එක්සත් ජනපදය, එක්සත් රාජධානිය සහ ඉන්දියාව ඇතුළු කලාප පුරා ලක්ෂ ගණනක් පරිශීලකයින්ගේ “YouTube” බිඳ වැටී ඇත.

කෙසේ වෙතත් මේ වනවිට ලොව පුරා බිඳවැටුණු “YouTube” ක්‍රමයෙන් යළි යථා තත්ත්වයට පත්වෙමින් පවතින බව වාර්තා වේ.

මොගඩිෂු සිට ගුවන් ගත වීමෙන් ටික වේලාවකට පසුව ඇතිවු තාක්ෂණික දෝෂයක් හේතුවෙන් සෝමාලියානු මගී ගුවන් යානයක් අගනුවර ජාත්‍යන්තර ගුවන්තොටුපොළ අසල වෙරළ තීරයට කඩා වැටී ඇත.

ඇතිවු තාක්ෂණික දෝෂයක් හේතුවෙන් සෝමාලියානු සිවිල් ගුවන් සේවා අධිකාරිය විසින් ගුවන් යානය යළි ගොඩබස්වන ලෙසට උපදෙස් ලබාදී ඇත.

කෙසේ වෙතත් නියමුවාගේ දක්ෂතාවය හේතුවෙන් මඟීන්ගේ ජීවිත බේරා ගැනීමට හැකිව ඇති අතර එම යානයේ සිටි මගීන් 55 දෙනෙකුට කිසිදු අනතුරක් සිදුව නොමැති බව විදෙස් මාධ්‍ය වාර්තා කරයි.

මෙම වසරේ දැනට පවතින දැඩි ශීත දේශගුණයත් සමග එස්තෝනියාවේ (Estonia) ප්‍රධාන භූමිය සහ දූපත් යා කරන “අයිස් මාර්ග” (Ice Roads) මේ වනවිට විවෘත කර ඇති බව විදෙස් මාධ්‍ය වාර්තා කරයි.

කෙසේ වෙතත් මෙම අයිස් මාර්ගයේ ගමන් කිරීම සාමාන්‍ය රියදුරෙකුට මෙන්ම පළපුරුදු රියදුරෙකුට වුවද දැඩි අභියෝගයක් වන අතර ඒ සඳහා වෙන්වූ අමුතුම වර්ගයේ නීති මාලාවක් පවතියි.

දැඩි ශීත දේශගුණයත් සමග බෝල්ටික් මුහුදේ ජලය දැඩි ලෙස මිදී ඝන අයිස් තට්ටුවක් බවට පත්ව ඇති අතර එම අයිස් තට්ටුවේ ඝනකම සෙන්ටිමීටර 20 (අඟල් 8) ඉක්මවා ගිය විට, රජය විසින් වාහන ගමනාගමනය සඳහා සුදුසු මාර්ග ලෙස ප්‍රකාශයට පත් කරයි.

මෙම මාර්ග පද්ධතියේ ගමන් කිරීමේදී රියදුරන්ගේ ජීවිතය සහ මරණය තීරණය කරන අමුතුම මාර්ග නීති මාලාව පහතින්..

*ආසන පටි (Seat Belts) පැළඳීම තහනම්.

*අන්තරාදායක වේග සීමාව (25-40 km/h තහනම)

*වාහන දෙකක් අතර අවම වශයෙන් මීටර් 250ක පරතරයක් තබාගැනීම.

*අයිස් පාර මැද වාහනය නතර කිරීම තහනම්.

*ටොන් 2.5ට වඩා වැඩි බර වාහන ගමන් කිරීම තහනම්.

අයිස් මාර්ග විවෘත වන්නේ හිරු එළිය ඇති දිවා කාලයේදී පමණක් වන අතර මීදුම හෝ හිම කුණාටු පවතින අවස්ථාවල මෙම මාර්ග වසා තැබේ.