Foreign news

කටාර් රාජ්‍යය, තුර්කිය සහ ඊජිප්තුව යන රටවල මැදිහත් වීමෙන් සකස් කරන ලද විශේෂ රාමුවක් යටතේ ඉරානය සහ අමෙරිකාව අතර තීරණාත්මක න්‍යෂ්ටික සාකච්ඡාවක් ඕමානයේදී හෙට (06) දින පැවැත්වීමට නියමිතව ඇත.

දෙරට අතර වසර ගණනාවක සිට පවතින රාජ්‍යතාන්ත්‍රික අර්බුදයට විසඳුම් සෙවීම මෙහි අරමුණ වන බව ඉරාන විදේශ අමාත්‍ය අබ්බාස් අරග්චි ප්‍රකාශ කර ඇත.

සාධාරණ සහ යුක්ති සහගත ලෙස මෙම සාකච්ඡා ඉදිරියට ගෙන යන ලෙස තමා විදේශ අමාත්‍යවරයාට උපදෙස් දුන් බව ඉරාන ජනාධිපති මසූඩ් පෙසෙෂ්කියන් ප්‍රකාශ කර ඇත.

යුරේනියම් සාරවත් කිරීම සීමා කිරීම, බැලිස්ටික් මිසයිල පාලනය සහ කලාපයේ පවතින ඉරාන හිතවාදී සන්නද්ධ කණ්ඩායම් වෙත ආයුධ සැපයීම සීමා කිරීම් පිළිබඳව මෙහිදී අවධානය යොමු කර ඇත.

විශාල භාණ්ඩ ප්‍රවාහනය කළ හැකි ඩ්‍රෝන වර්ගයට අයත් ලොව ප්‍රථම මිනිසුන් රහිත Cai Hong YH-1000S නම් දෙමුහුන් ගුවන් යානය චීනයේ Chongqing නගරයේදී සිය ප්‍රථම ගුවන් ගමන සාර්ථකව නිමකර ඇත.

මෙම ගුවන් යානය චීන අභ්‍යවකාශ තාක්ෂණයෙන් ගුවන් ගමන් සඳහා වන සුදුසුකම් සහ ප්‍රමිතීන්ට අනුව නිෂ්පාදය කරන ලද විශාල ප්‍රමාණයේ ගුවන් යානයක් වන අතර මෙම යානයේ ගුවන් නියමුවෙකු හො කිසිදු නිලධාරියෙකු නොමැත.

ගෝලීය වෙළඳපොළ ගනුදෙනුකරුවන්ගේ ඉල්ලීම් සපුරාලීම සඳහා නිර්මාණය කර ඇති මෙම විශාල මිනිසුන් රහිත ගුවන් යානය ජාත්‍යන්තර සැපයුම් සහ බෙදාහැරීම, හදිසි ගලවා ගැනීම සහ ආපදා අවම කිරීම, කෘතිම කාලගුණ වෙනස් කිරීම, සමුද්‍ර නිරීක්ෂණය සහ සමුද්‍රීය අධීක්ෂණය වැනි ක්ෂේත්‍රවල භාවිතා කළ හැකි බවද සඳහන් කරයි.

ඉන්දියාව සමඟ වෙළඳ ගිවිසුමකට එකඟ වූ බවට අමෙරිකානු ජනාධිපති ඩොනල්ඩ් ට්‍රම්ප් සිය සමාජ මාධ්‍ය ගිණුමේ සටහනක් තබමින් ප්‍රකාශ කර ඇත.

ඒ අනුව ඉන්දියාවෙන් ආනයනය කරන භාණ්ඩ සඳහා අමෙරිකාව විසින් පනවා තිබූ සියයට 25ක තීරු බද්ද සියයට 18 දක්වා අඩු කිරීමට තීරණය කර ඇත.

ඉන්දීය අග්‍රාමාත්‍ය නරේන්ද්‍ර මෝදි සමග පැවති දුරකථන සාකච්ඡාවකින් අනතුරුව මෙම එකඟතාවට පැමිණ ඇත.

ඉන්දියාව රුසියානු තෙල් මිලදී ගැනීම් නතර කිරීමෙන් පසු මෙලෙස බදු අඩු කිරීමට ට්‍රම්ප් රජය සිය කැමැත්ත පළ කර ඇතැයි විදෙස් මාධ්‍ය වාර්තා කරයි.

මේ අතර අමෙරිකා එක්සත් ජනපදය සමඟ ගිවිසුමකට එළැඹීම ගැන තමා සතුටින් සිටින බව ඉන්දීය අග්‍රාමාත්‍ය නරේන්ද්‍ර මෝදි සිය සමාජ මාධ්‍යයේ සටහනක් තබමින් ප්‍රකාශ කර ඇත.

අමෙරිකාව කිසියම් හෝ ආකාරයකට තම රටට පහර දුන්නොත් ඊට ප්‍රතිචාර දක්වන බවට ඉරාන උත්තරීතර නායක අයතුල්ලා අලි කමේනි අනතුරු අඟවයි.

අමෙරිකාව ඉරානයට පහර දුන්නොත් මැදපෙරදිග කලාපයේ අමෙරිකන් හමුදා ඉලක්ක වලට ප්‍රතිප්‍රහාර එල්ල කරන බවද ඉරාන උත්තරීතර නායක අයතුල්ලා අලි කමේනි සඳහන් කරයි.

ඉරාන උත්තරීතර නායකයා ටෙහෙරාන් නගරයේ පැවති උත්සවයකදී සඳහන් කළේ,

“මෙවර යුද්ධයක් ආරම්භ කළහොත් එය කලාපීය යුද්ධයක් වනු ඇති බව ඔවුන් දැනගත යුතුයි. අමෙරිකාව අපට පහර දුන්නොත්, අපි මැදපෙරදිග කලාපයේ අමෙරිකන් හමුදා ඉලක්ක වලට ප්‍රතිප්‍රහාර එල්ල කරනවා.”

දකුණු කොරියාව පසුගිය වසර වොෂින්ටනය සමඟ ඇති කරගත් වෙළඳ ගිවිසුමට අනුව කටයුතු නොකිරීම හේතුවෙන් දකුණු කොරියානු ආනයන සඳහා තීරුබදු 25% දක්වා ඉහළ නංවන බව අමෙරිකානු ජනාධිපති ඩොනල්ඩ් ට්‍රම්ප් සඳහන් කරයි.

මෝටර් රථ, දැව සහ ඖෂධ ඇතුළු භාණ්ඩ රැසක් සඳහා මෙලෙස 15% සිට 25% දක්වා බදු ඉහළ දමා ඇති බව ජනාධිපති ඩොනල්ඩ් ට්‍රම්ප් සිය සමාජ මාධ්‍ය ඔස්සේ නිවේදනය කර ඇත.

මෙම බදු ඉහළ නැංවීම පිළිබඳව තමන්ට නිල දැනුම්දීමක් සිදු කර නොමැති බවත් ඒ සම්බන්ධයෙන් වොෂින්ටනය සමඟ කඩිනම් සාකච්ඡා පැවැත්වීම අපේක්ෂා කරන බවද දකුණු කොරියාව සඳහන් කරයි.

ජනාධිපති ඩොනල්ඩ් ට්‍රම්ප් සිය දෙවැනි පදවිප්‍රාප්තිය සිදුවූ පසුගිය වසරේ ජනවාරි (20) වැනිදා අත්සන් තැබූ විධායක නියෝගයට අනුව ලෝක සෞඛ්‍ය සංවිධානයේ ප්‍රධාන සම්පත් දායකයා වූ අමෙරිකාව (22) දින සිට නිල වශයෙන් එහි සාමාජිකත්වයෙන් ඉවත් වී ඇත.

ලෝක සෞඛ්‍ය සංවිධානයේ නීති වලට අනුව එහි සාමාජිකත්වයෙන් ඉවත් විය හැක්කේ නීත්‍යනුකූල දැනුම්දීමක් කර වසරකින් අනතුරුව පමණක් වන අතර එම කාලය තුළත් සාමාජික මුදල් ගෙවිය යුතු වේ.

ප්‍රංශ වයින් සහ ෂැම්පේන් සඳහා 200% තීරුබදු පනවන බවට අමෙරිකානු ජනාධිපති ඩොනල්ඩ් ට්‍රම්ප් විසින් තර්ජනය කර ඇත.

ගෝලීය ගැටුම් විසඳීම අරමුණු කරගත් ජනපති ට්‍රම්ප්ගේ සාම මණ්ඩලයට ප්‍රංශ ජනාධිපති එමානුවෙල් මැක්‍රොන්ගේ සහාය ලබා ගැනීම සඳහා සිදුකරණ උත්සහයක් බව වාර්තා වේ.

තමන්ට සහාය දක්වන බවට කළ ආරාධනය, ප්‍රංශ ජනාධිපතිවරයා විසින් ප්‍රතික්ෂේප කිරීමට අදහස් කරන බවට සැලවීමත් සමඟ ජනාධිපති ඩොනල්ඩ් ට්‍රම්ප් මේ බව සඳහන් කර ඇත.

ජනාධිපති ඩොනල්ඩ් ට්‍රම්ප් මාධ්‍ය වෙත ප්‍රකාශ කර ඇත්තේ,

‘ඔහු එහෙම කිව්වද.? හොඳයි.. කිසිවෙකුත් ඔහුට කැමති නැහැ.. මොකද ඔහු ඉතා ඉක්මනින් ධුරයෙන් ඉවත් වනවා. මම ඔහුගේ වයින් සහ ෂැම්පේන් සඳහා 200% තීරුබදු පනවනවා. ඔහු එවිට එක්වනු ඇති. නමුත් ඔහු එක්විය යුතුත් නෑ.”