සමාජයේ පවතින ඇතැම් සංකීර්ණ ගැටලු විසඳාගැනීමට නම් ඩිජිටල් ගනුදෙනු සඳහා රටක් ලෙස අප ප්රවිෂ්ට විය යුතු බව ජනාධිපති අනුර කුමාර දිසානායක සඳහන් කරයි.
අලුත් අවුරුද්දට කරන ගනුදෙනු QR හරහා සිදුකරන්න පුළුවන් නම් එය ඉතාමත් හොඳ හැරවුම් ලක්ෂයක් බවට පත්වන බවද ජනාධිපති අනුර කුමාර දිසානායක සඳහන් කරයි.
“ජාතික QR ගෙවීම් ප්රචලිත කිරීමේ ව්යාපෘතිය” ආරම්භ කරමින් ජනාධිපති අනුර කුමාර දිසානායක සඳහන් කළේ,
“QR කිව්වොත් ඔළුවට එන්නේ කුමක් ද.? ඉන්ධන සීමා කිරීම සඳහා තිබෙන මෙවලමක්. QR යටතේ පොහොර දෙන්න යනවා කිව්වා. එතකොට මතයක් හැදුවා පොහොරත් කපන්න තමා යන්නේ කියලා. QR අන්තිමට සීමා කිරීමකට ලඝු වෙලා.
ගනුදෙනු වලටත් ආවොත් මේ කරන්න යන්නේ සීමා කිරීමක්ද, මේ කරන්න හදන්නේ කියලා හිතන්න පුළුවන්. ඒ නිසා මේ පිළිබඳව විශේෂ අධ්යාපන වැඩසටහනකුත් අවශ්යයි. අපි විශ්වාස කරනවා.
මේ ආරම්භ කරන ලද පියවර අපේ රටේ QR කේතයන් හරහා සිදුවන සියලුම ගනුදෙනු ඉතාම වේගයෙන් ප්රචලිත කළ හැකියි. බැංකු සහ මූල්ය ආයතනවලට මේ පිළිබඳ විශාල වගකීමක් තියෙනවා. ගොඩක් මුල්ය සමාගම් දැන් අලුත් අවුරුද්දට ප්රචාරක දැන්වීම් හදනවා.
මම හිතනවා අපිට පුළුවන් නම් මේක නිමිත්තක් බවට පත්කරගෙන අලුත් අවුරුද්දට කරන ගනුදෙනු QR කේතයන් හරහා සිදුකරන ගනුදෙනු බවට පත්කරගන්න පුළුවන් නම් එය ඉතාමත් හොඳ හැරවුම් ලක්ෂයක් බවට පත්වේවි. එතකොට මිනිස්සු වැලඳගන්නවා. අපේ සමාජය අලුත් දේ වැලඳ ගන්න ලෑස්තියි.”
