Local news

අධ්‍යයන පොදු සහතික පත්‍ර උසස් පෙළ විභාගයේ (2025) ජෛව පද්ධති තාක්ෂණවේදයට අදාළ ප්‍රායෝගික පරීක්ෂණය ලබන (07) වැනිදා ආරම්භ වන බව විභාග දෙපාර්තමේන්තුව සඳහන් කරයි.

ජෛව පද්ධති තාක්ෂණවේදය විභාගය පෙබරවාරි මස (11) වැනිදා දක්වා මධ්‍යස්ථාන 74ක පැවැත්වීමට කටයුතු යොදා ඇති බවද විභාග දෙපාර්තමේන්තුව සඳහන් කරයි.

පාසල් අයදුම්කරුවන්ගේ අයදුම්පත්‍ර අදාළ පාසල්වල විදුහල්පතිවරුන් වෙතද, පෞද්ගලික අයදුම්කරුවන්ගේ ප්‍රවේශපත්‍ර ඔවුන්ගේ පෞද්ගලික ලිපිනයට ද තැපැල් මගින් යොමු කර ඇති බවද සඳහන් කරයි.

ප්‍රවේශ පත්‍ර නොලැබුණු අපේක්ෂකයින්ට විභාග දෙපාර්තමේන්තුවේ නිල වෙබ් අඩවිය ඔස්සේ ඊයේ (02) දිනයේ සිට ප්‍රවේශ පත්‍ර බාගත කර ගැනීමේ හැකියාව පවතින බවද විභාග දෙපාර්තමේන්තුව සඳහන් කරයි.

හිටපු කථානායක චමල් රාජපක්ෂගේ බාල පුත් ශමීන්ද්‍ර රාජපක්ෂ අත්අඩංගුවට ගෙන අධිකරණයට ඉදිරිපත් කරන ලෙසට කොටුව මහේස්ත්‍රාත් අධිකරණය නියෝග කර ඇත. 

2012 – 2013 කාලසීමාවේ ශ්‍රී ලන්කන් ගුවන් සමාගමට ගුවන් යානා 10ක් මිලදී ගැනීමට සූදානම් වු අවස්තාවේ සිදුවූ දූෂිත ගණුදෙනුවකට අදාළව අපරාධ පරීක්ෂණ දෙපාර්තමේන්තුව (02) දින කොටුව මහේස්ත්‍රාත් අධිකරණයට කරුණු වාර්තා කළේය.

එහිදී අපරාධ පරීක්ෂණ දෙපාර්තමේන්තුව දැනුම් දුන්නේ නඩුවේ තුන්වන සැකකරු ලෙස චමල් රාජපක්ෂගේ බාල පුත් ශමින්ද්‍ර රාජපක්ෂ නම් කරන ලෙසට නීතිපති උපදෙස් ලැබී ඇති බවයි.

ශ්‍රී ලන්කන් සමාගමේ හිටපු ප්‍රධාන විධායක නිලධාරී කපිල චන්ද්‍රසේන සහ ඔහුගේ බිරිඳ මෙම නඩුවේ සෙසු සැකකරුවන් වන අතර ඔවුන් මේ වනවිට ඇප මත මුදාහැර සිටියි.

අනතුරුව කොටුව මහේස්ත්‍රාත්වරයා නියෝග කළේ, දැනට අමෙරිකාවේ පදිංචි බව කියන සැකකරු අත්අඩංගුවට ගැනීමට ජාත්‍යන්තර පොලීසියේ සහාය ලබාගන්නා ලෙසයි.

තවද රතු වරෙන්තු නිකුත් කිරීම සඳහා අවශ්‍ය පියවර ගන්නා ලෙසද මහේස්ත්‍රාත්වරයා අපරාධ පරීක්ෂණ දෙපාර්තමේන්තුවට නියෝග කළේය.

සංවිධානාත්මක අපරාධ කල්ලි නායක කෙහෙල්බද්දර පද්මේ සහ හිටපු අමාත්‍ය ප්‍රසන්න රණතුංග අතර ඇති සබදතාවයක් පිළිබදව ප්‍රකාශයක් ලබාගැනීමට ප්‍රසන්න රණතුංග අද (02) දින අපරාධ පරීක්ෂණ දෙපාර්තමේන්තුවට කැඳවා තිබුණේය.

කෙහෙල්බද්දර පද්මේ යනු තමන්ගේ ගමේ පුද්ගලයෙක් බවත් ඔහු ලබාදුන් ප්‍රකාශයක තමන්ගේ නම සඳහන් වුවද ඔහුව තමන් නොහදුනන බව ප්‍රසන්න රණතුංග මාධ්‍ය වෙත අදහස් දක්වමින් සඳහන් කරයි.

තමන් කෙහෙල්බද්දර පද්මේගේ පියා සමඟ සමීප සබඳතාවයක් පැවැත්වූ නමුත් කෙහෙල්බද්දර පද්මේ සමඟ එතරම් සමීප සබදතාවයක් නොපැවැත්වූ බවද ප්‍රසන්න රණතුංග සඳහන් කරයි.

වත්මන් ආණ්ඩුවේ නොහැකියාව වසා ගැනීම සඳහා දිනපතා කවුරුන් හෝ අපරාධ පරීක්ෂණ දෙපාර්තමේන්තුවට කැඳවීමට කටයුතු කරන බවද ප්‍රසන්න රණතුංග සඳහන් කරයි.

2025 (2026) අ.පො.ස සාමාන්‍ය පෙළ විභාගයේ ප්‍රවේශ පත්‍ර භාගත කරගැනීම සහ සංශෝධනය කරගැනීම සම්බන්ධයෙන් විභාග කොමසාරි ජනරාල් විසින් විශේෂ නිවේදනයක් නිකුත් කර ඇත.

පෞද්ගලික අපේක්ෂකයින් තම ප්‍රවේශ පත්‍රවල සංශෝධනයක් තිබේ නම් වෙබ් අඩවියට පිවිස තම ජාතික හැඳුනුම්පත් අංකය ඇතුළත් කර සංශෝධනය කරගත යුතු බව සඳහන් කරයි.

සංශෝධනය සිදුකිරීම 2026.02.10 වන දින මධ්‍යම රාත්‍රී 12.00ට අවසන් කෙරෙන අතර සංශෝධන දිනය නැවත දීර්ඝ කරනු නොලැබෙන බවද විභාග කොමසාරි ජනරාල් ඉන්දිකා කුමාරි ලියනගේ දැනුම්දී ඇත.

විභාගයට පෙනී සිටින පාසල් අයදුම්කරුවන්ගේ විභාග ප්‍රවේශ පත්‍ර මේ වනවිට අදාළ පාසල් අයත් කලාප අධ්‍යාපන කාර්යාලය වෙත ලබාදී ඇති අතර සියලුම විදුහල්පතිවරුන් තම පාසලට අදාළ කලාප අධ්‍යාපන කාර්යාලයේ විභාග විෂය භාර නියෝජ්‍ය / සහකාර අධ්‍යාපන අධ්‍යක්ෂවරයාගෙන් ප්‍රවේශ පත්‍ර භාරගත යුතුය.

පාසල් අයදුම්කරුවන්ගේ ප්‍රවේශ පත්‍රවල යම් සංශෝධනයක් ඇත්නම් ශ්‍රී ලංකා විභාග දෙපාර්තමේන්තවේ www.doenets.lk වෙබ් අඩවියෙන් විදුහල්පතිවරුන් වෙත ලබාදී ඇති පරිශීලක නාමය හා මුරපදය උපයෝගී කරගෙන ගිණුමට ප්‍රවේශ වී අදාළ සංශෝධනය සිදුකළ යුතුය.

පෞද්ගලික අයදුම්කරුවන්ගේ ප්‍රවේශ පත්‍ර ඔවුන්ගේ පෞද්ගලික ලිපිනයට තැපැල් මඟින් යොමු කරනු ඇත.

අ.පො.ස සාමාන්‍ය පෙළ විභාගය පෙබරවාරි මස (17) වන දින සිට (26) වන දින දක්වා දිවයින පුරා මධ්‍යස්ථාන 3,545කදී පැවැත්වේ.

සංවිධාන ශක්තිය තාක්ෂණය සමඟ එක්කර ගනිමින් එක්සත් ජාතික පක්ෂය නව ඩිජිටල් යුගයකට පා තබන විශේෂ ඩිජිටල් දියත් කිරීමක් 2026 පෙබරවාරි (04) වෙනි දින සිරිකොත පක්ෂ මූලස්ථානයේදී පැවැත්වීමට නියමිතය.

පෙබරවාරි (04) දින ශ්‍රී ලංකාව පුරා සියලුම මැතිවරණ කොට්ඨාශ ආවරණය වන පරිදි ඩිජිටල් පාලක සම්බන්ධීකාරකවරුන් (Digital Ward Coordinators) පත් කිරීම නිල වශයෙන් ආරම්භ කරයි.

එම අවස්ථාව වෙනුවෙන් මූලිකව පාලක සම්බන්ධීකරණ නිලධාරීන් 1,000 දෙනෙකු මෙදින පත්කිරීම සිදු කරනු ලබන බව එක්සත් ජාතික පක්ෂ නියෝජ්‍ය මහ ලේකම් කාර්යාලය සඳහන් කරයි.

එමඟින් පක්ෂ සංවිධාන ක්‍රියාවලිය වඩාත් කාර්යක්ෂම, වේගවත් සහ ජනතාවට සමීපවීමට අපේක්ෂා කරන අතර, ඊට අමතරව, එක්සත් ජාතික පක්ෂයේ නව UNP ජංගම යෙදුම (UNP App) ඉදිරියේදී නිල වශයෙන් හඳුන්වා දෙනු ඇත. 

අද (02) වැලිගම ප්‍රාදේශීය සභාවේ නව සභාපතිවරයා ලෙස ජාතික ජන බලවේගය නියෝජනය කරමින් චින්තක දර්ශන හේවාපතිරණ තේරී පත්ව ඇත.

දකුණු පළාත් පාලන කොමසාරිස් උමංගා එරන්දි මෙනඩිස්ගේ ප්‍රධානත්වයෙන් නව සභාපතිවරයකු තෝරාපත් කරගැනීමේ ඡන්ද විමසිම අද සිදු කෙරිණි. 

ඒ අනුව අද පැවති ඡන්ද විමසිමේදි ජාතික ජන බල වේගයේ චින්තක දර්ශන හේවාපතිරණ ඡන්ද 22ක් ලබා ගත් අතර  සමගි ජන බලවේගයේ එම්.එච්රසික් ප්‍රියංකරට හිමි වූයේ ඡන්ද 21කි.

ඒ අනුව වැඩි ඡන්ද 1කින් එම ප්‍රාදේශීය සභාවේ බලය ජාතික ජන බලවේගයට හිමිවිය.

වැලිගම ප්‍රාදේශීය සභාවේ සභාපතිවරයා ලෙස කටයුතු කළ ලසන්ත වික්‍රමසේකර පසුගිය ඔක්තෝබර් (22) වනදා ප්‍රාදේශීය සභාවේ සභාපති නිලමැදිරිය තුළදී වෙඩි තබා ඝාතනය කළේය.

ත්‍රිකුණාමලය බුදු පිළිම සිදුවීම සම්බන්ධව රක්ෂිත බන්ධනාගාරගත කර සිටින පූජ්‍ය බලංගොඩ කස්සප හිමියන් සහ භික්ෂුන් වහන්සේලා සිව්නම ඇතුළු සැකකරුන් අද (02) දින ත්‍රිකුණාමලය මහේස්ත්‍රාත් අධිකරණය වෙත ඉදිරිපත් කළේය.

අධිකරණය වෙත ඉදිරිපත් කිරීමෙන් අනතුරුව පූජ්‍ය බලංගොඩ කස්සප හිමි ඇතුළු බෞද්ධ භික්ෂූන් වහන්සේලා සිව්දෙනෙකු සහ තවත් හය දෙනෙකු පෙබරවාරි (09) වන දින දක්වා තවදුරටත් රක්ෂිත බන්ධනාගාර ගත කිරීමට අධිකරණය නියෝග කර ඇත.

ත්‍රිකුණාමලය කොටුව පාරේ පිහිටි ශ්‍රී සම්බුද්ධ ජයන්ති බෝධිරාජ විහාරස්ථානයේ විහාරාධිපති පූජ්‍ය ත්‍රිකුණාමලය කල්‍යාණවංශ තිස්ස හිමියන්, පූජ්‍ය බලංගොඩ කස්සප හිමියන්, පූජ්‍ය ත්‍රිකුණාමලය සුඛිතවංශ තිස්ස හිමියන් සහ පූජ්‍ය නන්ද හිමියන් මෙම සිදුවීමට ඇතුළත් වේ.

පසුගියදා මතුගම පොලීසියේ පිස්තෝලයක් සහ පතොරම් 10ක් සමඟ මැගසිනයක් අතුරුදන් වීමේ සිද්ධියක් සම්බන්ධයෙන් පොලිස් පරීක්ෂකවරයෙකු සහ කොස්තාපල්වරයෙකු අත්අඩංගුවට ගෙන ඇත.

පසුගිය ජනවාරි (26) වන දින සිට අදාළ පිස්තෝල ගිනි අවිය සහ උණ්ඩ අස්ථාන ගත වී ඇති අතර මතුගම පොලීසිය මේ සම්බන්ධයෙන් වැඩිදුර විමර්ශන සිදුකරයි.

මෙලෙස අස්ථාන ගතවී ඇත්තේ, මතුගම පොලීසියේ උප සේවා භාරයේ තිබු පිස්තෝල ගිනි අවියක් සහ උණ්ඩ 10ක් සහිත පතරොම් ගැබකි.