Local news

ඉරානය විසින් හෝමූස් සමුද්‍ර සන්ධිය අවහිර කිරීමෙන් ආහාර මිල ගණන් ඉහළ ගොස් වඩාත් බලපෑමට ලක්විය හැකි බවත් එම රටවල් අතර දෙවැනි ස්ථානයට ශ්‍රී ලංකාව පත්ව ඇතැයි පර්යේෂණ වාර්තාවකින් අනාවරණ වී ඇත.

ආහාර, ඖෂධවල සිට ස්මාර්ට්ෆෝන් දක්වාම භාණ්ඩ රැසක මිල ගණන් මෙලෙස ඉහළ යා හැකි බව ජර්මනියේ කියෙල් ආර්ථික පර්යේෂණ ආයතනය සිදුකළ මෙම පර්යේෂණයෙන් හෙළි වී ඇත.

ඒ අනුව ආහාර මිල ඉහළ යාමෙන් වඩාත් බලපෑමට ලක්විය හැකි රටවල් අතර දෙවැනි තැන ශ්‍රී ලංකාවට හිමිව ඇති අතර එය ප්‍රතිශතාත්මක වශයෙන් 15%ක වර්ධනයක් බව සඳහන් වේ.

එම දරුණු බලපෑමට ලක්වන රටවල් අතර පළමු තැන සැම්බියාව (31%) වන අතර ශ්‍රී ලංකාව (15%), තායිවානය (12%), පකිස්තානය (11%) සහ ඉන්දියාව (10%) ඇතුළු රටවල් ද ඊට අයත් වේ.

ඉන්ධන ගෑස් ඇතුළු බලශක්ති සහ පොහොර ආනයනය කරන සංවර්ධනය වෙමින් පවතින රටවල් මෙම ආහාර මිල බලපෑමට දැඩිව ලක්වන බව එහි සඳහන් වේ.

එළඹෙන අප්‍රේල් මස (01) වනදා සිට අලුත් අවුරුදු උත්සව සමයට සමඟාමීව විශේෂ ආරක්ෂක වැඩපිළිවලක් ආරම්භ කරන බව රථ වාහන පාලන හා මාර්ග ආරක්ෂාව පිළිබඳ නියෝජ්‍ය පොලිස්පති ඩබ්ලිව්.පී.ජේ. සේනාධීර සඳහන් කරයි.

අවුරුදු සමයේ ජනතාවගේ ගමනාගමනය වැඩි වීම සැලකිල්ලට ගනිමින් විශේෂයෙන් රථ වාහන නිලධාරීන් සහ ආරක්ෂක නිලධාරීන් වැඩි වශයෙන් යොදවනු ඇති බවද නියෝජ්‍ය පොලිස්පතිවරයා සඳහන් කරයි.

කොළඹ ඇතුළු ප්‍රධාන නගරවල දුම්රිය ස්ථාන සහ ප්‍රධාන බස් නැවතුම්පොළ ආශ්‍රිතව රථ වාහන පාලන සැලසුම් සහ ආරක්ෂක වැඩපිළිවෙළ ක්‍රියාත්මක කිරීමට කටයුතු කරන බවද නියෝජ්‍ය පොලිස්පතිවරයා සඳහන් කරයි.

නියෝජ්‍ය පොලිස්පතිවරයා සඳහන් කළේ,

“අලුත් අවුරුද්ද සඳහා විශේෂයෙන්ම රථ වාහන නිලධාරීන් යොදනවා. ආරක්ෂාව සඳහා නිලධාරීන් යොදවනවා. ඒ සමගාවීම වෙනත් වර්ෂවලට සමගාමිව. අපි කොළඹ ප්‍රදේශයේ දුම්රිය ස්ථාන ආශ්‍රිතව ප්‍රධාන බස් නැවතුම්පොළ ආශ්‍රිතව ඒ රථ වාහන සැලැස්මවල් සහ ආරක්ෂිත සැලැස්මවල් ක්‍රියාත්මක වෙනවා. ප්‍රධාන නගර ආශ්‍රිතව ක්‍රියාත්මක කරනවා. ඒ ආකාරයට විශේෂයෙන් ගම්බිම්බලා යන ජනතාව වෙන්න පුළුවන් සහ නගරයට භාණ්ඩ ලබාගන්න එන අය වෙන්න පුළුවන්.”

පවතින ඉන්ධන අර්බුදයත් සමඟ එළඹෙන අලුත් අවුරුදු උත්සව සමයේ කුකුළු මස් මිල ගණන් සම්බන්ධයෙන් ශ්‍රී ලංකා සත්ත්ව නිෂ්පාදකයින්ගේ සංගමය ප්‍රකාශයක් කර ඇත.

ඒ අනුව උත්සව සමයේ කිසිදු හිඟයකින් තොරව කුකුළු මස් තොග වෙළෙඳපොළට යොමු කිරීම සඳහා පියවර ගෙන ඇති බව ශ්‍රී ලංකා සත්ත්ව නිෂ්පාදකයින්ගේ සංගමය සඳහන් කරයි.

ඉන්ධන අර්බුධයත් සමඟ කුකුළු මස් මිල ඉහළ යාමේ අවදානමක් පැවතියද එය රුපියල් 1,250ක මිල යටතේ පවත්වාගෙන යාමට සැලසුම් කර ඇති බව එහි සභාපති අජිත් ගුණසේකර සඳහන් කරයි.

එම සංගමයේ සභාපති අජිත් ගුණසේකර සඳහන් කළේ,

“අප්‍රෙල් මාසේ වෙද්දී සියලුම ගොවිපොළවල් උපරිම ධාරිතාවයෙන් නිෂ්පාදන කටයුතු සිදු කරනවා. හිඟයකින් තොරව මස් හා බිත්තර ලබා දෙන්න තමා අපේ උත්සාහය තිබ්බේ. නමුත් රටේ උද්ගත වෙලා තියෙන තත්ත්වය නිසා පවතින ඉන්ධන හිඟය නිසා ප්‍රවාහන වි‍යදම් අධික වෙලා තියෙනවා.

ඒකේ පිරිවැය අපිට දරන්න වෙනවා. එතකොට කුකුල් මස් වලට අධික ඉල්ලුමක් ආවොත් ඒ ප්‍රමාණය දෙන්න පුලුවන්ද කියන එක මත මිල උච්චාවචනය වෙනවා. වෙළෙඳපොල තමා මිල තීරණය කරන්නේ අපි නෙමෙයි. අපි බලාපොරොත්තු වෙනවා හිඟයකින් තොරව සැපයුම ලබා දෙන්න.”

තැපැල් දෙපාර්තමේන්තුව විසින් මහජනතාව⁣ වෙත නිවේදනයක් නිකුත් කර ඇත.

තැපැල් දෙපාර්තමේන්තුවේ නිල අඩවිය හා සමාන ව්‍යාජ වෙබ් අඩවියක් භාවිත කරමින් සිදු කරන වංචාවක් සම්බන්ධයෙන් තොරතුරු වාර්තාවී ඇති බව එම දෙපාර්තමේන්තුව සඳහන් කරයි.

ජංගම දුරකථන SMS මගින් පාර්සලයක් ලබාගැනීම සඳහා මුදලක් ගෙවිය යුතු බව දන්වා එම මුදල මාර්ගත ක්‍රමය ඔස්සේ ගෙවන ලෙසට පාරිභෝගිකයින්⁣ට දන්වා එම වංචාව සිදු කරන බව එම දෙපාර්තමේන්තුව සඳහන් කරයි.

මෙම ක්‍රියාවලිය යටතේ, පාරිභෝගිකයන් විසින් Payment Gateway හරහා තම කාඩ් පතෙහි තොරතුරු ඇතුළත් කරන අවස්ථාවේදී ඔවුන්ගේ බැංකු ගිණුම්වල ඇති මුදල් වංචනික ලෙස අත්පත් කරගැනීමට කටයුතු කරන බව තැපැල්පති ආර්.පී සත්කුමාර සඳහන් කරයි.

එනිසා නොහඳුනන සබැඳි වෙත ප්‍රවේශ නොවන ලෙසත් තම බැංකු කාඩ්පත් තොරතුරු හෝ OTP අංක කිසිදු අවස්ථාවක තෙවන පාර්ශ්ව පුද්ලයන්ට හෝ වෙබ් අඩවි වලට ලබා නොදෙන ලෙසද තැපැල්පති ජනතාවට දැනුම් දෙයි.

ඉන්දීය අගමැති නරේන්ද්‍ර මෝදි සහ ජනාධිපති අනුර කුමාර දිසානායක අතර පසුගියදා සිදුවූ රාජ්‍ය තාන්ත්‍රික දුරකථන සාකච්ඡාවකින් පසුව ලංකා IOC සමාගම වෙත ඉන්ධන නැවක් එවීමට ඉන්දීය තෙල් සමාගම (IOC) තීරණය කර ඇත.

ඉන්ධන සැපයුම සම්බන්ධයෙන් පවතින ගැටලු විසඳා ගැනීම සඳහා ඉන්දියාව සහ ශ්‍රී ලංකාව අතර ඉහළ මට්ටමේ රාජ්‍ය තාන්ත්‍රික මැදිහත්වීම් සිදුවූ අතර ඒ අනුව ඉන්දීය තෙල් සමාගමෙන් ලංකා IOC සමාගමට මෙම ඉන්ධන තොග ලැබීමට නියමිතය.

දැනටමත් ඉන්දීය තෙල් සමාගමට අයත් එක් නැවක් ශ්‍රී ලංකා මුහුදු සීමාවට පැමිණ ඇති අතර මෙට්‍රික් ටොන් 38,000ක ධාරිතාවයක් යුත් මෙම නැවේ ඩීසල් මෙට්‍රික් ටොන් 20,000ක් සහ පෙට්‍රල් මෙට්‍රික් ටොන් 18,000ක් ඇතුළත්ය.

රාජ්‍ය තාන්ත්‍රික මැදිහත්වීම්වල ප්‍රතිඵලයක් ලෙස, ලංකා IOC සමාගම විසින් කලින් අවලංගු කර තිබූ ඇණවුමක් ද නැවත සක්‍රීය කර ඇත.