‘දිට්වා’ සුළි කුණාටුව: නවතම තත්ත්වය සහ කාලගුණ අනාවැකි

කොළඹ, නොවැම්බර් 28 – ශ්‍රී ලංකාවට බලපා ඇති ‘දිට්වා’ (Ditwah) සුළි කුණාටුව හේතුවෙන් දිවයින පුරා දැඩි වර්ෂාපතනයක් සහ තද සුළං තත්ත්වයක් අඛණ්ඩව පවතින අතර, කාලගුණ විද්‍යා දෙපාර්තමේන්තුව විසින් නවතම අනතුරු ඇඟවීම් නිකුත් කර තිබේ.

සුළි කුණාටුවේ ගමන් මග සහ ඉදිරි පැය කිහිපය

කාලගුණ විද්‍යා දෙපාර්තමේන්තුව විසින් 2025 නොවැම්බර් 28 වන දින ප.ව. 02.00 ට නිකුත් කරන ලද නවතම නිවේදනයට අනුව, ‘දිට්වා’ සුළි කුණාටුව ත්‍රිකුණාමලය සිට කිලෝමීටර් 30ක් පමණ නිරිත දෙසින්, අක්ෂාංශ 8.4°N සහ දේශාංශ 81.0°E ආසන්නයේ කේන්ද්‍රගතව පැවතිණි

මෙම සුළි කුණාටුව උතුරු-වයඹ දෙසට ගමන් කරනු ඇතැයි අපේක්ෂා කරන අතර, එහි බලපෑම හෙට (නොවැම්බර් 29) අලුයම 02.00 න් පසුව ක්‍රමයෙන් අඩුවනු ඇතැයි එම නිවේදනයේ සඳහන් වේ

කෙසේ වෙතත්, සුළි කුණාටුව දිවයිනෙන් ඉවතට ගියද, එහි වක්‍ර බලපෑම හේතුවෙන් තවදුරටත් අයහපත් කාලගුණික තත්ත්වයන් බලාපොරොත්තු විය හැකි බව කාලගුණ විද්‍යා දෙපාර්තමේන්තුව අවධාරණය කරයි.

දැඩි වර්ෂාපතනය සහ සුළං අනතුරු ඇඟවීම්

සුළි කුණාටුවේ බලපෑම හේතුවෙන් දිවයිනේ උතුරු, උතුරු මැද, වයඹ, සබරගමුව සහ බස්නාහිර පළාත්වල ඇතැම් ස්ථානවලට මිලිමීටර් 200 ඉක්මවූ ඉතා තද වැසි ඇතිවිය හැකි බවට රතු නිවේදන නිකුත් කර තිබේ

ඊට අමතරව, ත්‍රිකුණාමලය, බදුල්ල, මඩකලපුව, ගාල්ල සහ මාතර දිස්ත්‍රික්කවල ඇතැම් ස්ථානවලට මිලිමීටර් 150 ට වැඩි තද වැසි අපේක්ෂා කෙරේ 2.

සුළං තත්ත්වය සම්බන්ධයෙන්, පැයට කිලෝමීටර් 60-70 අතර වේගයකින් සුළං හමා යා හැකි අතර, විටින් විට පැයට කිලෝමීටර් 80-90 දක්වා ප්‍රහාරාත්මක සුළං ඇතිවිය හැකි බවට අනතුරු අඟවා ඇත

ගංවතුර සහ ජීවිත හානි

මෙම අයහපත් කාලගුණික තත්ත්වය හේතුවෙන් මේ වන විටත් දිවයිනේ ප්‍රදේශ කිහිපයක ගංවතුර සහ නාය යෑම් වාර්තා වී ඇති අතර, ජීවිත හානි සංඛ්‍යාව 56ක් දක්වා ඉහළ ගොස් ඇති බව ආපදා කළමනාකරණ මධ්‍යස්ථානය (DMC) වාර්තා කරයි 3. තවත් පුද්ගලයන් 21 දෙනෙකු අතුරුදන්ව ඇති බවද සඳහන් වේ

වාරිමාර්ග දෙපාර්තමේන්තුව අනතුරු අඟවා ඇත්තේ, කැලණි ගඟේ ජල මට්ටම ඉහළ යාම හේතුවෙන් 2016 වසරේ ඇතිවූ ගංවතුර තත්ත්වයට වඩා වැඩි ගංවතුර තත්ත්වයක් හෙට (නොවැම්බර් 29) රාත්‍රියේ කොළඹට ඇතිවිය හැකි බවයි

මහජනතාවට උපදෙස්

කාලගුණ විද්‍යා දෙපාර්තමේන්තුව සහ ආපදා කළමනාකරණ මධ්‍යස්ථානය මහජනතාවගෙන් ඉල්ලා සිටින්නේ:

•තද වැසි සහ සුළං හේතුවෙන් සිදුවිය හැකි අනතුරු අවම කර ගැනීමට කටයුතු කරන ලෙස.

•නැවත දැනුම් දෙන තුරු ධීවර සහ නාවුක කටයුතුවලින් සම්පූර්ණයෙන් වළකින ලෙස.

•ගංවතුර අවදානම් සහිත පහත් බිම්වල පදිංචිකරුවන් ආරක්ෂිත ස්ථාන වෙත ගමන් කරන ලෙස.

මෙම අයහපත් කාලගුණ තත්ත්වය නොවැම්බර් 30 වන දින දක්වා පැවතිය හැකි බැවින්, මහජනතාව අඛණ්ඩව කාලගුණ අනාවැකි පිළිබඳව විමසිල්ලෙන් පසුවන ලෙස වැඩිදුරටත් දැනුම් දෙයි

කිලෝවෝට් 132,000ක ධාරිතාවයෙන් යුත් රන්දෙණිගල, රන්ටැඹේ, මහියංගනය අතර ඇති රැහැන් මාර්ගයද මේ වන විට කඩා වැටී අතර එය යථා තත්ත්වට පත් කිරීම සඳහාද ළඟා විය නොහැකි මට්ටමක් දක්වා පැමිණ ඇතැයි විදුලි බල මණ්ඩලයේ සාමාන්‍යාධිකාරී ශර්ලි කුමාර මහතා පවසයි.

පවතින අයහපත් කාලගුණය හමුවේ මේ වනවිට සමස්ත දිවයිනෙන් 25%කට ආසන්න ප්‍රමාණයකට විදුලිය විසන්දි වී ඇතැයිද ඔහු සඳහන් කළේය.

තවද පවතින තත්ත්වය යටතේ කොත්මලේ ජල විදුලි බලාගාරය සහ රන්ටැඹේ ජල විදුලි බලාගාරය ක්‍රියා විරහිත කිරීමට සිදුව ඇතැයිද සාමාන්‍යාධිකාරීවරයා සඳහන් කළේය.

අද (28) පැවැති මාධ්‍ය හමුවේදී අදහස් දක්වමින් සාමාන්‍යාධිකාරීවරයා පැවසුවේ පවතින තත්ත්වය හමුවේ විදුලිය යථා තත්ත්වයට පත් කිරීමද දුෂ්කර කාර්යක් වී ඇති බවය.

එම විදුලි විසන්දි වීම් යටතේ නැගෙනහිර, මධ්‍යම, උතුරු පළාත ආශ්‍රිතව වැඩි වශයෙන් විසන්දි වීම් වාර්තා වී ඇතැයිද සාමාන්‍යාධිකාරීවරයා සඳහන් කළේය.

එහිදී වැඩිදුරටත් අදහස් දැක්වූ සාමාන්‍යාධිකාරී ශර්ලි කුමාර මහතා,

“ඒ රැහැන් මාර්ගයේ කුළුනක් කඩාගෙන ගිහින් තියෙනවා. එක අලුත්වැඩියා කරනකන් අපිට මහියංගනය, අම්පාර, වවුනියාව ප්‍රදේශවලට විදුලි සැපයීම අපහසුවෙලා තියෙනවා. තවම ටවර් එක වතුරෙන් යටවෙලා තියෙන්නේ ඒ නිසා අලුත්වැඩියා කරගන්න බැහැ අපිට. මීට අමතරව බෝවතැන්න බලාගාරයේ ඉඳලා උකුවෙල දක්වා දිවෙන රැහැන් මාර්ගයේත් කුළුනක් ගැලවිලා ගිහින් තියෙනවා. මේ නිසා බෝවතැන්නෙන් පිටවන ජලය පිටකර ගන්න බැරි නිසා බෝවතැන්න බලාගාරයත් ආරක්ෂිතව තියාගන්න ඕන නිසා විදුලිය විසන්දි කරලා තියෙනවා. මීට අමතරව ඉහළ කොත්මලේ බලාගාරය ඕෆ් කරන්න වෙලා තියෙනවා හේතුව ඒකට එන ජලය මඩ සහිත සහ රෙඩු ගොඩක් එක්ක එන්නේ ඒ නිසා ඒ පවර්ස්ටේෂන් එකත් ඕෆ් කරන්න වෙලා තියෙනවා. 

මේ වගේම කොත්මලේ බලාගාරයේ ජෙනරේටර්ස් තුනෙන් එකක් අපිට ඕෆ් කරන්න වුණා වතුර කාන්දුවක් හේතුවෙන් අනිත් දෙක මේ වන විට ක්‍රියාත්මක කරනවා. ඊට අමතරව අනෙකුත් සියලුම බලාගාර මේ වෙනකොට උපරිමයෙන් වැඩ කරනවා. මීට අමතරව රන්ටැඹේ බලාගාරයත් අපිට ඕෆ් කරන්න වෙලා තියෙනවා. 

25%-30% ක ප්‍රමාණයකට මේ වෙනකොට විදුලිය නැහැ.  නමුත් මේක අපිට හරියටම ගණනය කරගන්න බැහැ මොකද අපි හැමෝම යම් යම් ප්‍රදේශ ආශ්‍රිතව කොටුවෙලා ඉන්නේ. ඒ වගේම නුවර ගත්තාම අපේ ප්‍රාථමික උප පොළක් තියෙනවා ගැටඹේ පන්සල කිට්ටුව ඒක සම්පූර්ණයෙන්ම ජලයෙන් යටවෙලා තියෙන්නේ. ඒ නිසා පේරාදෙණිය විශ්වවිද්‍යාල ප්‍රදේශයට සහ නුවර නගරය ප්‍රදේශයට විදුලිය සැපයීම කරගන්න බැරි වෙලා තියෙනවා. 

ඒ වගේම අපි තවත් රැහැන් මාර්ග කිහිපයක්ම අපි ඕෆ් කරලා තියෙනවා. මොකද රැහැන් මාර්ග ජලයට කාන්දු වීමක් සිදුවුණොත් ජීවිත අනතුරු වෙන්න පුළුවන්, අපේ උපකරණවලට හානි වෙන්න පුළුවන් ඒ නිසා අපිට මහජන ආරක්ෂාව පතා විදුලිය විසන්දි කරන්න වෙලා තියෙනවා.

අපි මේ වෙලාවේ තනිකර යොදවලා තියෙන්නේ විදුලි අලුත්වැඩියාව සඳහා. අපි මේ වෙලාවේ සලකා බලන්නෙත් අත්‍යවශ්‍ය ස්ථාන සඳහා විදුලිය සැපයීම ප්‍රමුඛතාව යටතේ. ඉන් අනතුරුව තමා අපිට ගෘහස්තයින් සම්බන්ධව බලන්න වෙන්නේ. ඒ නිසා මම ඉල්ලා සිටින්නේ සමහර ප්‍රමාදයන් සිදුවේවි අපිට ප්‍රමුඛතාවයන් මත තමා විදුලිය සැපයීම් සිදුකරන්න වෙන්නේ. අපිට ලක්ෂ 70ක් පාරිභෝගිකයින් ඉන්නවා. මේ වෙනකොට විශාල පාරිභෝගිකයින් ප්‍රමාණයකට විදුලිය සැපයීම අහිමි වෙලා තියෙනවා. මේවා අලුත්වැඩියා කරන්න වතුර තත්ත්වය බැහැලා යනකන් ඉන්න වෙනවා.”

අධික සුළං සමඟ යතුරුපැදියක් මතට ගසක අත්තක් කඩා වැටී එකම පවුලේ හතරක් යට වී ඇත.

වැල්ලවාය ප්‍රාදේශීය ලේකම් කොට්ඨාසයට අයත් ඇතිලිවැව මහආරගම ප්‍රදේශයේ දී අද (28) උදෑසන එකම පවුලේ මව, පියා සහ දරුවන් දෙදෙනෙකු ගමන් කරමින් සිටි යතුරුපැදියක් මතට මෙලෙස ගස කඩා වැටී ඇති බව අප වාර්තාකරු සඳහන් කළේය.

අනතුරට ලක්වූවන් කඩිනමින් මුදාගෙන රෝහල් ඇති අතර පසුව පියා මියගොස් ඇත.

තුවාල ලැබූ මව දියණිය සහ පුත්‍රයා වැල්ලවාය මූලික රෝහලට ඇතුළත් කර ඇති බව වැඩිදුර සඳහන් වෙයි.

හසලක මිනිපේ පමුනුපුර ප්‍රදේශයේ සිදු වූ නායයෑමකින් පුද්ගලයින් 08දෙනෙකු මියගොස් තවත් 09දෙනෙකු අතුරුදන්ව තිබේ.

අතුරුදන් වූ පුද්ගලයින් සොයා මෙහෙයුම් සිදු කරන බව වාර්තා වෙයි.

මේ අතර කෑගල්ල බුලත්කොහුපිටිය, දේදුගල ප්‍රදේශයේ නිවාස පෙළක් නායයෑමකට ලක්ව තිබේ.

දිස්ත්‍රික් ලේකම් ජේ.එම්.හේරත් මහතා සදහන් කළේ නිවාස 05ක් මෙලෙස නායයෑමට ලක්ව ඇති බවට තොරතුරු ලැබී ඇති බවය.

ඒ අනුව එම නිවෙස්වල සිටි පුද්ගලයින් අතුරුදන්වී සිටින අතර ඔවුන් මුදා ගැනීම සදහා එම ස්ථානයට ළඟා වීම ද දුෂ්කර වී ඇති බව දිස්ත්‍රික් ලේකම්වරයා පැවසුවේය.