Foreign news

ඉරානයේ බැංකු යටිතල පහසුකම් ඉලක්ක කර අමෙරිකාව සහ ඊශ්‍රායල තවදුරටත් සිය ප්‍රහාර එල්ල කරන්නේ නම් ගල්ෆ් කලාපයේ පිහිටි අමෙරිකානු බැංකු ශාඛා වෙත සිදුකරන ප්‍රහාර තවදුරටත් පුළුල් කරන බව ඉරාන විප්ලවීය හමුදා ආරක්ෂක බලකාය අනතුරු අඟවයි.

පසුගිය සතියේ ඉරාන බැංකු ගොඩනැගිලි ආශ්‍රිතව එල්ල වූ ප්‍රහාර හමුවේ රට තුළ බැංකු මෙහෙයුම් අඩපණ වී තිබූ බවත් එම ප්‍රහාර වලට ප්‍රතිචාර ලෙස ගල්ෆ් කලාපයේ අමෙරිකානු බැංකු පද්ධති ඉලක්ක කර ඉරානය ප්‍රහාර එල්ල කර ඇත.

එනිසා තවදුරටත් එවැනි ආකාරයේ වරදක් සිදුකිරීමට සතුරු පාර්ශවයන් කටයුතු කරන්නේ නම් ගල්ෆ් කලාපයේ රටවල පිහිටි සියලුම අමෙරිකානු බැංකු ශාඛා සිය නිත්‍යානුකූල ඉලක්කය වනු ඇති බවද ඉරාන විප්ලවීය හමුදා ආරක්ෂක බලකාය සඳහන් කරයි.

ඉරාන තෙල් අපනයනය සඳහා තීරණාත්මක මධ්‍යස්ථානයක් වන කාර්ග් දූපත එක්සත් ජනපදය විසින් සම්පූර්ණයෙන් විනාශ කර ඇති බව අමෙරිකානු ජනාධිපති ඩොනල්ඩ් ට්‍රම්ප් සඳහන් කරයි.

“විනෝදය” සඳහා එක්සත් ජනපදයට තවත් කිහිප වතාවක් ඉරාන කාර්ග් දූපතට පහර දිය හැකි බවද අමෙරිකානු ජනාධිපති ඩොනල්ඩ් ට්‍රම්ප් සඳහන් කරයි.

ඒ අනුව ඉරානය සමග ගිවිසුමක් ඇති කර ගැනීමට තමන් සූදානම් නොමැති බවත් ඉරානයට ගිවිසුමක් ඇති කර ගැනීමට අවශ්‍ය නමුත් කොන්දේසි තවමත් ප්‍රමාණවත් නොවන නිසා තමන් දැන් එය කිරීමට අකමැති බවද ජනාධිපති ඩොනල්ඩ් ට්‍රම්ප් සඳහන් කරයි.

අමෙරිකානු මාධ්‍ය ආයතනයක් වෙත ප්‍රකාශයක් ලබා දෙමින් ජනාධිපති ඩොනල්ඩ් ට්‍රම්ප් මේ බව සඳහන් කරයි.

එම කොන්දේසි මොනවාද යන්න පැවසීම ප්‍රතික්ෂේප කර ඇති ජනාධිපතිවරයා ඕනෑම න්‍යෂ්ටික අභිලාෂයක් අත්හැරීමට ඉරාන කැපවීමක් ගිවිසුමක කොටසක් වනු ඇතැයිද සඳහන් කර ඇත.

යුද්ධය ආරම්භ වූ දිනයේ සිට මේ දක්වා කාලය තුළ ළමුන් සහ ගරුවරුන් 200කට ආසන්න ප්‍රමාණයක් මියගොස් ඇති බව ඉරානයේ මාධ්‍ය ප්‍රකාශිකා ෆාතිමේ මොහජෙරානි සඳහන් කළාය.

එල්ල වු ප්‍රහාර හේතුවෙන් පාසල් 120කට පමණ හානි සිදුව ඇති බවත් ටෙහෙරානයේ පිහිටා ඇති ආසඩි කුලුනට දැඩි ලෙස හානි වී ඇති බවද මාධ්‍ය ප්‍රකාශිකා ෆාතිමේ මොහජෙරානි සඳහන් කළාය.

පාසල් සිසුන් සහ ගුරුවරුන් 161කට ආසන්න ප්‍රමාණයක් තුවාල ලබා ඇති බව ඉරාන අධ්‍යාපන අමාත්‍යංශයේ ප්‍රකාශයක් උපුටා දක්වමින් IRNA ප්‍රවෘත්ත ඒජන්සිය සඳහන් කරයි.

පුද්ගලයින් 42,914 දෙනෙකුට අයත් දේපළ විනාශ වී ඇති බව බවත් ඉරානයේ රතු අඩසඳ සංගමය සඳහන් කරයි. 

රට පුරා ඇති වෛද්‍ය, සෞඛ්‍ය සහ හදිසි මධ්‍යස්ථාන 160කට වැඩි ප්‍රමාණයකට හානි සිදුව ඇති බවද සඳහන් කරයි.

ටෙහෙරානයේ නව උත්තරීතර නායක මොජ්තාබා කමේනි ඝාතනය කිරීමට උත්සාහ නොකරන ලෙසත් ඔහු ඉලක්ක කළහොත් අමෙරිකාවට දරුණු පළිගැනීමකට මුහුණ දීමට සිදුවනු ඇති බව රුසියාවේ ඉරාන තානාපති සඳහන් කරයි.

රුසියාවේ ස්පුට්නික් මාධ්‍ය ජාලය සමඟ පැවැති සම්මුඛ සාකච්ඡාවකට එක්වෙමින් ඉරාන තානාපති කාසෙම් ජලාලි මෙම අනතුරු ඇගවීම සිදුකර ඇත.

නව උත්තරීතර නායක මොජ්තාබා කමේනිගේ පියා වන අලි කමේනි අමෙරිකාව විසින් ඝාතනය කිරීමෙන් පසුව ඉරාන වැසියන් ‘ලේ පළිගැනීමක්’ අපේක්ෂා කරන බවද ඉරාන තානාපති කාසෙම් ජලාලි සඳහන් කරයි.

ඉරාන නාවික හමුදාවේ යුද නෞකාවක් වන IRIS Dena නෞකාවට ඉන්දියන් සාගරයේදී එල්ල කළ ප්‍රහාරය සම්බන්ධයෙන් නිසි ප්‍රතිචාරයක් ලබාදෙන බව ඉරාන හමුදාපති අමීර් හතාමි (Amir Hatami) අමෙරිකාවට අනතුරු අඟවා ඇත.

යුද අභ්‍යාසයක් නිමා කර යළි ඉරානය බලා එමින් සිටියදී මෙම ප්‍රහාරය එල්ල කර ඇති බවත් සෘජු සටනක නිරත නොවී සිටියදීත් තම නාවිකයන්ට එල්ල කළ මෙම ප්‍රහාරය දැඩිව හෙළා දකින බවද ඉරාන හමුදාපති අමීර් හතාමි සඳහන් කරයි.

ඉරාන IRIS Dena නෞකාවේ නාමය සහ එහි කාර්ය මණ්ඩලයේ ජීවිත පරිත්‍යාගය, ඉරාන නාවික ඉතිහාසය තුළ ධෛර්යයේ සහ කැපවීමේ සංකේතයක් ලෙස පවතිනු ඇති බවද ඉරාන හමුදාපති අමීර් හතාමි සඳහන් කරයි.

ඉරාකයේ බැග්ඩෑඩ්හි අමෙරිකානු තානාපති කාර්යාල පරිශ්‍රයේ පිහිටි හෙලිකොප්ටර් යානා අංගනයට මිසයිල ප්‍රහාරයක් එල්ල කර ඇති බව විදෙස් මාධ්‍ය වාර්තා කරයි.

මෙම මිසයිල ප්‍රහාරය එල්ලවීමත් සමග අමෙරිකානු තානාපති කාර්යාල සංකීර්ණය ඇතුළත සිට දුමාරයක් නැඟී ඇති බව විදෙස් මාධ්‍ය වාර්තා කරයි.

මෙම ප්‍රහාරය සහ ප්‍රහාරයෙන් සිදුවු හානිය සම්බන්ධයෙන් බැග්ඩෑඩ් හි අමෙරිකානු තානාපති කාර්යාලය මෙතෙක් නිල ප්‍රකාශයක් සිදුකර නොමැත.

අමෙරිකාව සමග සහයෝගයෙන් කටයුතු කරන කලාපයේ තෙල් සමාගම් වලට ප්‍රහාර එල්ල කරන බවට ඉරානය අනතුරු අඟවා ඇත.

ඉරානයේ තෙල් හා බලශක්ති යටිතල පහසුකම් වලට එල්ල වන ඕනෑම ප්‍රහාරයකට පළිගැනීමක් ලෙස එම ප්‍රහාර එල්ල කරන බව ඉරානය සඳහන් කරයි.

ඉරානයේ ප්‍රධානම බොරතෙල් අපනයන මධ්‍යස්ථානය වන කාර්ග් දූපතේ හමුදා ඉලක්ක වෙත එල්ලවූ අමෙරිකානු ප්‍රහාරයට ප්‍රතිචාර ලෙස ඉරානයේ සන්නද්ධ හමුදාවන්ගේ ඒකාබද්ධ සටන් විධානය නිවේදනයක් නිකුත් කරමින් මේ බව සඳහන් කර ඇත.

ඉරානයේ නව උත්තරීතර නායක මොජ්ටාබා කමේනි සහ එරට ඉස්ලාමීය විප්ලවවාදී ආරක්ෂක බළකායේ ඉහළ පෙළේ නායකයින් ගැන තොරතුරු සපයන්නෙකුට මුල්‍ය ත්‍යාගයක් ලබාදීමට අමෙරිකානු රාජ්‍ය දෙපාර්තමේන්තුව තීරණය කර ඇත.

ඒ අනුව නව උත්තරීතර නායක මොජ්ටාබා කමේනි සහ ඉස්ලාමීය විප්ලවවාදී ආරක්ෂක බළකායේ ඉහළ පෙළේ නායකයින් ගැන තොරතුරු සපයන්නෙකුට අමෙරිකානු ඩොලර් මිලියන 10 දක්වා වූ මුල්‍ය ත්‍යාගයක් ලබාදීමට තීරණය කර ඇත.

මේ අතර අමෙරිකාව සහ ඊශ්‍රායලය ඒකාබද්ධව ඉරානයට එරෙහිව සිදුකරන යුද්ධය වෙනුවෙන් මැදපෙරදිගට අමතර භට පිරිස්, මැරීන් භටයින් සහ නාවික නෞකා යෙදවීමටත් අමෙරිකාව තීරණය කර ඇත.

ඉරානයේ ප්‍රධාන බොරතෙල් අපනයන පර්යන්තය ලෙසින් සැලකෙන “කාර්ග් දූපතට” අමෙරිකාව විසින් බෝම්බ හෙළා ඇත.

මෙම “කාර්ග් දූපත” ඉරානයේ ප්‍රධානම බොරතෙල් අපනයන පර්යන්තය ලෙසින් සැලකෙන අතර එය ඉරානයේ ‘ඛනිජ තෙල් ජීවනාලිය’ ලෙස හඳුන්වයි.

ඉරානය සිය බොරතෙල් අපනයනයෙන් 90%ක්ම සිදුකරන්නේ මෙම දූපත හරහා වන අතර ඉරානයේ විශාලතම තෙල් ගැණුම්කරුවා වන චීනය තෙල් රැගෙන යන්නේ මෙම දූපතෙන්ය.

සැතපුම් 5ක පමණ දිගකින් යුත් කුඩා දූපතක් වන මෙය, ඉරාන වෙරළට නාවික සැතපුම් 15ක් පමණ දුරින් පිහිටා ඇත.