දැරියක් බරපතළ ලිංගික හිංසනයකට ලක් කළ බවට චෝදනා ලැබ සිටින පූජ්ය පල්ලේගම හේමරතන හිමිට එරෙහි නඩුවේ මූලික විමර්ශන අවසන් කර විමර්ශන උදෘත නීතිපතිවරයාට යොමුකළ බව නිට්ටඹුව පොලීසිය අද (15) අනුරාධපුරය මහේස්ත්රාත් අධිකරණයට දැනුම් දුන්නේය.
රජයේ රස පරීක්ෂක වාර්තා සහ නඩුවේ දෙවන සැකකාරියගේ බැංකු ගිණුම් වාර්තා සම්බන්ධයෙන් තොරතුරු පමණක් ඉදිරියේදී ලැබීමට නියමිත බවද විමර්ශන නිලධාරීන් මහේස්ත්රාත් අධිකරණයට දැනුම් දුන්නේය.
තවද මෙම සැකකාර හිමිනම අත්අඩංගුවට ගැනීම සිදුවූ කොළඹ නවලෝක පෞද්ගලික රෝහලේ සිට මේ වනවිට කොළඹ ජාතික රෝහලට මාරුකර ඇති බව බන්ධනාගාර නිලධාරීන් අධිකරණයට දැනුම් දුන්නේය.
ජාතික රෝහලේ අධිකරණ වෛද්ය නිලධාරීන්ගේ නිරීක්ෂණය යටතේ සිටින සිය සේවාදායකයාට ඉදිරි දින වලදී වෛද්ය පරීක්ෂණ කිහිපයක් සිදුකිරීමට නියමිත වීමත්, සිදුකෙරෙමින් පවතින විමර්ශන වලට පූර්ණ සහාය දැක්වීමක් ලෙසත් මෙම අවස්ථාවේ ඇප ඉල්ලීමක් සිදු නොකරන බව සැකකාර හිමිනම වෙනුවෙන් පෙනී සිටි ජනාධිපති නීතිඥවරයා අධිකරණයට දැනුම් දුන්නේය.
මෙම නඩුවේ දෙවන සැකකාරිය වන ලිංගික හිංසනයට ලක්වූයේ යැයි කියන දැරියගේ මව වෙනුවෙන් නීතිඥවරයෙකු ඇප අයැදුමක් ඉදිරිපත් කළද, ඊට පොලිස් ළමා හා කාන්තා කාර්යාංශය සිය විරෝධය පළ කළේය.
අනතුරුව කොටුව මහේස්ත්රාත් අධිකරණයේ නියෝග ප්රකාරව රක්ෂිත බන්ධනාගාරගතව ජාතික රෝහලේ ප්රතිකාර ලබමින් සිටින පළමු සැකකාර හිමිනම එළඹෙන (22) වනදා අනුරාධපුර මහේස්ත්රාත් අධිකරණයට ඉදිරිපත් කරන ලෙස අනුරාධපුර මහේස්ත්රාත්වරයා නියෝග කළේය.
තවද දෙවන සැකකාරිය වන ලිංගික හිංසනයට ලක්වූ දැරියගේ මව එළඹෙන (22) වනදා දක්වා යළි රක්ෂිත බන්ධනාගාරගත කරන ලෙසද අනුරාධපුර මහේස්ත්රාත්වරයා නියෝග කළේය.
