Local news

අපරාධකරුවන්ට සහ ජාවාරම්කරුවන්ට සහාය දක්වන පොලිස් නිලධාරීන්ට එරෙහිව නීතිය දැඩිව ක්‍රියාත්මක කරන බව පොලිස්පති නීතීඥ ප්‍රියන්ත වීරසූරිය සඳහන් කරයි.

ශ්‍රී ලංකා පොලිසියේ කණිෂ්ඨ පොලිස් නිලධාරීන්ගේ සුභසාධනය සඳහා අනුරාධපුර පූජා නගරයේ අරිප්පු පාර පළමු පටුමග ප්‍රදේශයේ ඉදිකරන ලද “රජරට සිසිල” කණිෂ්ඨ පොලිස් නිවස්නය විවෘත කිරීමේ අවස්තාවට එක්වෙමින් පොලිස්පති නීතීඥ ප්‍රියන්ත වීරසූරිය මේ බව සඳහන් කරයි.

පොලිස්පති නීතීඥ ප්‍රියන්ත වීරසූරිය සඳහන් කළේ,

“පොලීසියයි, ජාවාරම්කාරයොයි, අපරාධකාරයොයි පොලීසියට ඉන්න බෑ. නිලධාරීන් ඒ තත්වයට පෙළඹෙනවා නම් ඒ සම්බන්ධයෙන් තීන්දු තීරණ ගන්න කිසිම ආකාරයෙන් පැකිලෙන්නේ නෑ.”

වසර 20කට ආසන්න කාලයක් පුරා පැවති සාකච්ඡාවලින් පසු සාගරය සහ සාගර ජීවීන් ආරක්ෂා කිරීම සඳහා කලක සිට සාකච්ඡා මට්ටමින් තිබූ (Biodiversity Beyond National Jurisdictions) ගිවිසුම බලාත්මක කර ඇත.

ඉකුත් සැප්තැම්බර් මාසයේදී රටවල් 60ක් මෙම ගිවිසුමේ අන්තර්ගත නිර්ණායක අනුමත කර තිබූ අතර එතැන් සිට දින 120කට පසුව මෙය බලාත්මක වීම සුවිශේෂීය.

දේශගුණික විපර්යාස හේතුවෙන් උග්‍රවන විනාශකාරී ධීවර පිළිවෙත්, නැව්ගත කිරීම, ප්ලාස්ටික් දූෂණය, අධික ලෙස මසුන් ඇල්ලීම සහ ගැඹුරු මුහුදේ කැණීම් වැනි කටයුතු පාලනය කිරීම සඳහා මෙම ගිවිසුම බලාත්මක කර ඇත.

දෙසැම්බර් මස මේ සඳහා චීනය, ජපානය වැනි ප්‍රධාන සමුද්‍රීය බලවතුන් එක්වීමත් සමග අදාළ ගිවිසුම අනුමත කළ රටවල් ගණන ජනවාරි වනවිට 83ක් දක්වා ඉහළ ගොස් ඇත.

ලොව විශාලතම සහ ඉහළම වටිනාකමින් යුතු දම් පැහැති ආර්නූල් මැණික කොළඹදී එළිදක්වා ඇත.

මෙරටින් හමුවූ මෙම ආර්නූල් මැණික කැරට් 3,563ක බරකින් යුතු දුර්ලභ ගණයේ මැණිකක් වන අතර එය රත්නපුර ප්‍රදේශයෙන් 2023 වසරේදී හමුවී ඇත.

ලොව මෙතෙක් සොයාගත් දම් පැහැති ආර්නූල් මැණික් ගල් අතර විශාලතම මැණික ලෙස නම් කර ඇති මෙය ස්වභාවික ආර්නූල් මැණික් ගලක් ලෙස විද්‍යාත්මකව තහවුරු කර ඇති බව වාර්තා වේ.

මෙහි වටිනාකම අමෙරිකානු ඩොලර් මිලියන 300ත් 400ත් අතර වන බව එම මැණික එළිදැක්වීමේ අවස්ථාවට එක්වෙමින් ලංකා මැණික් පර්යේෂණාගාරයේ ප්‍රධාන රත්නවේදී අශාන් අමරසිංහ සඳහන් කරයි.

පාර්ලිමේන්තු මන්ත්‍රීවරුන්ගේ විශ්‍රාම වැටුප් අහෝසි කිරීමේ පනත් කෙටුම්පතේ වගන්ති බොහොමයක් ආණ්ඩුක්‍රම ව්‍යවස්ථාවට පටහැනි බවට තීන්දුවක් ලබාදෙන ලෙස ඉල්ලා ශ්‍රේෂ්ඨාධිකරණයට පෙත්සම් දෙකක් ඉදිරිපත් කර ඇත.

හිටපු පාර්ලිමේන්තු මන්ත්‍රීවරුන් වන එම්.එම්. ප්‍රේමසිරි, නවරත්න බණ්ඩා බී.එම්. දීපාල් ගුණසේකර සහ සමන්සිරි හේරත් යන අය විසින් එක් පෙත්සමක් ඉදිරිපත් කර ඇත.

අනෙක් පෙත්සම හිටපු පාර්ලිමේන්තු මන්ත්‍රී පියසෝම උපාලි සහ උපාලි අමරසිරි යන අය විසින් ඉදිරිපත් කර ඇත.

යෝජිත පනත් කෙටුම්පතේ ඇතැම් වගන්තිවලින් මෙරට ආණ්ඩුක්‍රම ව්‍යවස්ථාව මඟින් සහතික කර තිබෙන මූලික මිනිස් අයිතිවාසිකම් උල්ලංඝනය වන බව එම පෙත්සම් තුළින් පෙත්සම්කරුවන් සඳහන් කර ඇත.

අදාළ පනත් කෙටුම්පත සම්මත කරන්නේ නම් පාර්ලිමේන්තුවේ විශේෂ බහුතර ඡන්දයෙන් සම්මත වී ජනමත විචාරණයකින් අනුමත විය යුතු බවට තීන්දුවක් ලබාදෙන ලෙස පෙත්සම්කරුවන් සිය පෙත්සම මගින් ශ්‍රේෂ්ඨාධිකරණයෙන් ඉල්ලා ඇත.

මහින්ද රාජපක්ෂ තාත්තා බලාගත්තා වගේ අනුරාධපුර ගොවියෝ ටික බලාගන්නා ලෙස හිටපු මන්ත්‍රී තිස්ස කුට්ටිආරච්චි, පාර්ලිමේන්තු මන්ත්‍රී නාමල් රාජපක්ෂට කියයි.

හිටපු මන්ත්‍රී තිස්ස කුට්ටිආරච්චි සඳහන් කළේ,

“නායක තුමනි. ඔබතුමාගෙන් අපි ඉල්ලන්නේ, මේ අනුරාධපුර කෘෂිකාර්මික අහිංසක ගොවියෝ ටික තාත්තා බලාගත්තා වගේ බලාගන්න. බාප්පා බලාගත්තා වගේ බලාගන්න එපා.

බාප්පා බලාගත්ත විදිහ බලාගත්තොත් තොප්පි තමයි. ඒනිසා තාත්තා බලාගත්තා වගේ බලාගන්න. මොන තාත්තද, මහින්ද රාජපක්ෂ තාත්තා. බලාගත්තා වගේ බලාගන්න.”

ශ්‍රී ලංකා පොදුජන පෙරමුණේ කොට්ඨාශ සංවිධායකවරුන්ට තඹුත්තේගමදී පත්වීම් ලිපි භාරදීමේ ජනහමුවකට එක්වෙමින් තිස්ස කුට්ටිආරච්චි මේ බව සඳහන් කරයි.

අද (18) දින කොළඹ සිට වැලිමඩ දක්වා ධාවනය වූ බස් රථයක් හල්දුම්මුල්ල, ඌවතැන්න ප්‍රදේශයේදී පෙරළී බිහිසුණු අනතුරක් සිදුව ඇත.

මෙම බිහිසුණු අනතුරින් බස් රථයේ රියදුරුවරයා ජීවිතක්ෂයට පත්ව ඇති අතර බස් රථයේ කොන්දොස්තරවරයා, කුඩා ළමයෙක්, කාන්තාවක් ඇතුළු පස් දෙනෙකු තුවාල ලබා රෝහල්ගත කර ඇත.

බස් රථයේ රියදුරු අසුන පිහිටි දොර විවෘතව ඇති බවත් ඒ අවස්ථාවේදී රියදුරු එම දොර වැසීමට තැත් කර ඇති බවත් එහිදී බස් රථය පාලනය කරගත නොහැකිව අසල තිබූ පස් කණ්ඩියක ගැටී මාර්ගයේ පෙරළී ගොස් ඇත.

88, 89 කාලයේ සෙල්ලම් දාන්න දැන් ලෑස්ති වෙන්න එපා බවත් එදා මහින්ද රාජපක්ෂ හිටිය බවත් අද නාමල් රාජපක්ෂ සිටින බව ශ්‍රී ලංකා පොදුජන පෙරමුණ පාර්ලිමේන්තු මන්ත්‍රී නාමල් රාජපක්ෂ සඳහන් කරයි.

ශ්‍රී ලංකා පොදුජන පෙරමුණේ කොට්ඨාශ සංවිධායකවරුන්ට තඹුත්තේගමදී පත්වීම් ලිපි භාරදීමේ ජනහමුවකට එක්වෙමින් පාර්ලිමේන්තු මන්ත්‍රී නාමල් රාජපක්ෂ මේ බව සඳහන් කරයි.

මන්ත්‍රී නාමල් රාජපක්ෂ සඳහන් කළේ,

“ඔබේ මර්ධනය ඔබ තියාගන්න. ඒ 88, 89 සෙල්ලම් දාන්න දැන් ලෑස්ති වෙන්න එපා. එදා මහින්ද රාජපක්ෂ හිටියා. අද ඉන්නවා නාමල් රාජපක්ෂ. අය 88, 89 සෙල්ලම් දාන්න එපා. ඒවා ඒ කාලේ. අද අලුත් පරම්පරාවක්. වෙනස් වෙච්ච සංස්කෘතියක්.”

“ආ උගන්ඩාවේ සල්ලි. ඒක ගේන්ඩ. ඒක ගේන්න ඕනේ. අර ඩුබායි මැරියට් හෝටලේ ඒක ගේන්නත් ඕනේ. ඒ හින්දා අපි ගෞරවයෙන් ආණ්ඩුවෙන් ඉල්ලන්නේ. බොරුව නවත්තන්න. රැවටිල්ල නවත්වන්න. මර්ධනය නවත්වන්න.”