Local news

විෂ මත්ද්‍රව්‍ය උවදුර තුරන් කරන “රටම එකට” ජාතික මෙහෙයුමේ මධ්‍යම පළාත් වැඩසටහන ජනාධිපති අනුර කුමාර දිසානායකගේ ප්‍රධානත්වයෙන් අද (11) ප.ව 2.30ට නුවරඑළිය නගරයේදී පැවැත් වේ.

මලෛගම් ජනතාව මුහුණ දී සිටින ප්‍රධාන සමාජ ගැටලුවක් ලෙස විෂ මත්ද්‍රව්‍ය උවදුර හඳුනාගෙන තිබෙන අතර, සියලු පාර්ශ්ව ඒකාබද්ධ කරගත් පුළුල් දැනුවත් කිරීමේ යාන්ත්‍රණයක් මගින් එම ජනතාව ඉන් මුදාගෙන ඔවුන් සමාජ සහ ආර්ථික වශයෙන් ඉහළට ඔසවා තැබීම මෙහි අරමුණයි.

විෂ මත්ද්‍රව්‍යවලට අදාළ වැටලීම්වලදී සක්‍රීය දායකත්වයක් ලබා දුන් පොලිස් නිලධාරින් 62 දෙනෙකු ඇගයීමට ලක් කිරීමද මෙහිදී සිදු කිරීමට නියමිතය.

හිටපු ජනාධිපති රනිල් වික්‍රමසිංහගේ ලන්ඩන් සංචාරයට අදාළව විභාග වෙමින් පවතින නඩුව සම්බන්ධයෙන් කොටුව මහෙස්ත්‍රාත් අධිකරණය හමුවේ පසුගිය (28) වැනිදා පෙනී සිටි හිටපු ජනාධිපති ලේකම් සමන් ඒකනායක අද (11) දින දක්වා රක්ෂිත බන්ධනාගාරගත කළේය.

ඒ අනුව රක්ෂිත බන්ධනාගාරගත කර සිටින හිටපු ජනාධිපති ලේකම් සමන් ඒකනායක අද (11) දින කොටුව මහෙස්ත්‍රාත් අධිකරණය හමුවට ඉදිරිපත් කිරීමට නියමිතය.

රුපියල් ලක්ෂ 166කට අධික රජයේ මුදල් සාවද්‍ය පරිහරණය කළ බවට චෝදනා කරමින් හිටපු ජනාධිපති රනිල් වික්‍රමසිංහට එරෙහිව ඉදිරිපත් කර තිබෙන නඩුවේ දෙවන සැකකරු ලෙස හිටපු ජනාධිපති ලේකම් සමන් ඒකනායක නම් කර ඇත.

ඒ අනුව හිටපු ජනා­ධි­පති රනිල් වික්‍රමසිංහගේ ලේක­ම්ව­රයා ලෙස කට­යුතු කළ සමන් ඒක­නා­යකට එරෙහි නඩුව අද (11) දින කොටුව මහේ­ස්ත්‍රාත් අධි­ක­ර­ණය හමුවේ කැඳ­වනු ලබයි.

සිම් කාඩ්පත් ලියාපදිංචි කිරීමේ දැනට පවතින රෙගුලාසි සංශෝධනය කර නව රෙගුලාසි හඳුන්වා දීමට අමාත්‍ය මණ්ඩල අනුමැතිය හිමිව ඇත.

1991 අංක 25 දරන ශ්‍රී ලංකා විදුලි සංදේශ පනතේ විධිවිධාන අනුව 2019 අංක 01 දරන ග්‍රාහක සිම් කාඩ්පත් (ග්‍රාහක අනන්‍යතා මොඩියුල – SIM) ලියාපදිංචි කිරීමේ රෙගුලාසි 2019-08-02 දිනැතිව ප්‍රකාශයට පත් කර ඇත.

එම රෙගුලාසි එදිනෙන් පසුව නිකුත් කරන ලද සිම් කාඩ්පත් සඳහා පමණක් අදාළ වේ.

එබැවින්, 2019-08-02 දිනට පෙර ලියාපදිංචි වූ ඇතැම් ග්‍රාහකයින් පිළිබඳ තොරතුරු දුරකථන ක්‍රියාකරු සමාගම් සතුව නොමැති අතර ඒ හේතුවෙන් ඇතැම් නීති විමර්ශන කටයුතු වලදී ගැටලු සහගත තත්ත්වයක් නිර්මාණය වී ඇත.

වයස අවුරුදු 16 ‑ 17 අතර ග්‍රාහකයින් ලියාපදිංචි කිරීමට සහ මෙරටට පැමිණෙන විදේශිකයින්ට සිම් කාඩ්පත් නිකුත් කිරීමට අදාළ නව විධිවිධාන ද ඇතුළත් කරමින් දැනට ක්‍රියාත්මකව පවතින රෙගුලාසි වර්තමාන අවශ්‍යතාවන්ට ගැළපෙන පරිදි සංශෝධනය කිරීමේ අවශ්‍යතාව හඳුනාගනු ලැබ ඇත.

ඒ අනුව 2019-08-02 දිනට පෙර ලබා ගන්නා ලද සිම් කාඩ්පත් වලට අදාළ ග්‍රාහක තොරතුරු නැවත ලියාපදිංචි කිරීම සඳහා විධිවිධාන සලසමින් සහ දැනට ක්‍රියාත්මක 2019 අංක 01 දරන ග්‍රාහක සිම් කාඩ්පත් (ග්‍රාහක අනන්‍යතා මොඩියුල ‑ SIM) ලියාපදිංචි කිරීමේ රෙගුලාසි යෝග්‍ය පරිදි සංශෝධනය කරමින් නව රෙගුලාසි හඳුන්වා දීම පිණිස ඩිජිටල් ආර්ථික අමාත්‍ය වශයෙන් ගරු ජනාධිපතිතුමා ඉදිරිපත් කළ යෝජනාව අමාත්‍ය මණ්ඩලය විසින් අනුමත කර ඇත.

ඒ අනුව 1991 අංක 25 දරන ශ්‍රී ලංකා විදුලි සංදේශ පනත යටතේ පවතින රෙගුලාසි ඉදිරියේදී සංශෝධනය වනු ඇත.

ඩුබායි ඇතුළු රටවලත්, තැන් තැන් වලත් තිබුණු මුදල් ගැන විමර්ශන සිදුකරමින් පවතින බව කැබිනට් ප්‍රකාශක, සෞඛ්‍ය හා ජනමාධ්‍ය අමාත්‍ය නලින්ද ජයතිස්ස සඳහන් කරයි.

අමාත්‍ය නලින්ද ජයතිස්ස සඳහන් කළේ,

“අපි භාරගත්තේ අපරාධ වලින් ග්‍රහන රාජ්‍යයක්. මේ රාජ්‍යය ඇතුලේ ඔවැනි දේවල් රාශියක් සිදුවෙලා තියෙනවා. එනිසා උගන්ඩාවේ පස්සේ විතරක් එල්ලිලා ඉන්න එපා.

ඩුබායි ඇතුළු රටවලත්, තැන් තැන් වලත් තිබුණු මුදල් ගැන විමර්ශන සිදුකරමින් පවතිනවා. මම දැක්කේ නැහැ කොහෙවත් නාමල් රාජපක්ෂවත් ඩුබායිවල තිබුණු සල්ලි ගේනවාද කියලා අහනවා.

ඒනිසා ඒ කටයුතු සිදුවෙමින් පවතින බව කියන්න පුළුවන්. ඒ හෙළිදරව් වන කරුණු අනුව අපි බලමු ඉදිරියේදී මොනවද වෙන්නේ කියලා.

කෙහෙල්බද්දර පද්මේ එක්ක සම්බන්ධකම් පැවැත්වු දේශපාලඥයෝ දැන් එකිනෙකා අපරාධ පරීක්ෂණ දෙපාර්තමේන්තුවට ගේන්න පටන් අරගෙන තියෙන්නේ. ඒ ඒ කටවුත්තර අනුව විමර්ශන දියත් වෙයි.

සමහර සාක්ෂි විනාශ කරලා තියෙනවා. සමහර සාක්ෂි කරුවන් විනාශ කරලා තියෙනවා. සාක්ෂි පිළිබඳව විමර්ශන කරපු නිලධාරීන් තැන් තැන් වලට ස්ථාන මාරු කරලා හෝ ඔවුන්ට ලංකාවේ ඉන්න බැරි තත්ත්වයක් සලස්වලා තියෙනවා.”

කැබිනට් තීරණ දැනුම්දීමේ මාධ්‍ය හමුවට එක්වෙමින් අමාත්‍ය නලින්ද ජයතිස්ස මේ බව සඳහන් කරයි.

2022 වසරේ මැයි (09) වැනිදා රට පුරා පැවති අරගලකාරී වාතාවරණය මධ්‍යයේ නිට්ටඹුව නගරය හරහා ගමන් කරමින් සිටි පාර්ලිමේන්තු මන්ත්‍රී අමරකීර්ති අතුකෝරල සහ ඔහුගේ ආරක්ෂක නිලධාරියාව ප්‍රකෝපකාරී පිරිසකගේ ප්‍රහාරය හේතුවෙන් ඝාතනයට ලක්විය.

ඒ අනුව එම ද්විත්ව ඝාතන සිද්ධිය සම්බන්ධයෙන් පුද්ගලයන් 41 දෙනෙකුට එරෙහිව නීතිපතිවරයා විසින් මහාධිකරණය හමුවේ අධිචෝදනා ගොනු කළේය.

අද (11) දින පාර්ලිමේන්තු මන්ත්‍රී අමරකීර්ති අතුකෝරළ සහ ඔහුගේ ආරක්ෂක නිලධාරියා ඝාතනය කිරීමේ සිද්ධියට අදාළ නඩු තීන්දුව ප්‍රකාශයට පත් කිරීමට නියමිතව ඇත.

ගම්පහ මහාධිකරණයේ සහන් මාපා බණ්ඩාර, රශ්මි සිංගප්පුලි සහ රසන්ත ගොඩවෙල යන විනිසුරුවරුන්ගෙන් සමන්විත ත්‍රිපුද්ගල විනිසුරු මඬුල්ල හමුවේ අද මෙම තීන්දුව ප්‍රකාශයට පත් කරයි.