Local news

මීගොඩ ප්‍රදේශයේදී දන්සැලකට කැබ් රථයක් කඩා වැදීමෙන් ඊයේ (31) දින මධ්‍යම රාත්‍රියේ පුද්ගලයින් 6 දෙනෙකු මියගොස් තවත් 7 දෙනෙකු තුවාල ලබා ඇත.

15 හැවිරිදි දැරියක්, කාන්තාවන් දෙදෙනෙක් සහ පිරිමි පුද්ගලයින් තුන්දෙනෙකු මියගිය පිරිස අතර වන බවත් තුවාල ලැබූ තවත් 7 දෙනෙකු හෝමාගම රෝහලේ ප්‍රතිකාර ලබන බව පොලීසිය සඳහන් කරයි.

දන්සැල් පෝලිමේ සිටි වයස අවුරුදු 15, 32, සහ 56 හැවිරිදි කාන්තාවන් තිදෙනෙකු, වයස අවුරුදු 35 සහ 38 වයස්වල පසු වන පිරිමි පුද්ගලයින් තිදෙනෙකු මෙලෙස මියගොස් ඇත.

එලෙස මියගොස් ඇත්තේ, පිළියන්දල සහ අවිස්සාවේල්ල ප්‍රදේශවල පදිංචිකරුවන් පිරිසක් බව පොලීසිය සඳහන් කරයි.

අනතුර සිදුකළ රියැදුරු පළාගොස් ඇති අතර එහිදී වහාම ක්‍රියාත්මක වූ පොලීසිය සැකකරු ලුහුබැඳ ගොස් ගිනි අවි පෙන්වා ඔහු අත්අඩංගුවට ගෙන ඇත.

අත්අඩංගුවට ගත් අවස්ථාවේ රියැදුරු බීමත්ව සිට ඇති බවත් එම සැකකරු පිළියන්දල ප්‍රදේශයේ පදිංචි 40 හැවිරිදි පුද්ගලයෙක් බව පොලීසිය සඳහන් කරයි.

රාජ්‍ය ආයතනවල ඝන අපද්‍රව්‍ය කළමනාකරණ කටයුතු විධිමත් කිරීම සඳහා රාජ්‍ය පරිපාලන පළාත් සභා හා පළාත් පාලන අමාත්‍යංශය විසින් පසුගිය (15) වෙනිදා දැනුම් දුන් විශේෂ චක්‍රලේඛය අනුව ප්ලාස්ටික් වතුර බෝතල් මිලදී ගැනීම හා භාවිතය තහනම් වේ.

ඒ අනුව සියලුම රාජ්‍ය ආයතනවල තනි භාවිත ප්ලාස්ටික් වතුර බෝතල් මිලදී ගැනීම හා භාවිතය ඊයේ (31) දින සිට සම්පූර්ණයෙන්ම නතර කළ යුතු වේ.

ඊට අමතරව තනි භාවිත ප්ලාස්ටික් ආයතනය තුළ භාවිතයෙන් වැළැක්වීම සඳහා සියලුම ආයතන ප්‍රධානීන් අවශ්‍ය ක්‍රියාමාර්ග ගතයුතු බවද අදාළ චක්‍රලේඛයේ සඳහන් වේ.

ඒ අනුව සියලුම රාජ්‍ය ආයතන “ත්‍රී ආර්” සංකල්පයට අනුගත වීම එනම් අවම කිරීම, නැවත භාවිතය සහ ප්‍රතිචක්‍රීකරණය සිදුකළ යුතු වේ.

ලෝක වෙළඳපොළේ තෙල් මිල 2% කට වඩා වැඩි ප්‍රමාණයකින් ඉහළ ගොස් ඇති බව විදෙස් මාධ්‍ය වාර්තා කරයි.

බ්‍රෙන්ට් බොරතෙල් මිල දර්ශකය ඩොලර් 2.16කින් හෙවත් 2.37%කින් ඉහළ ගොස් බො⁣රතෙල් බැරලයක් ඩොලර් 93.28ක් ලෙස සටහන්ව ඇත.

අමෙරිකානු බොරතෙල් මිල දර්ශකය ඩොලර් 2.37කින් හෙවත් 2.71% කින් ඉහළ ගොස් බොරතෙල් බැරලයක් ඩොලර් 89.73ක් ලෙස සටහන්ව ඇත.

මෙරටට අමෙරිකානු ඩොලර් මිලියන 1.33ක මූල්‍ය ප්‍රදානයක් ජපාන රජය විසින් ලබාදී ඇත.

දිට්වා සුළිකුණාටුවෙන් පීඩාවට පත් ජීවනෝපාය අහිමි වූ නැගෙනහිර මිරිදිය ධීවරයින් නගා සිටුවීම සඳහා එම මූල්‍ය ප්‍රදානය ලබාදී ඇත.

අදාළ ගිවිසුම් අත්සන් කිරීම ධීවර, ජලජ හා සාගර සම්පත් අමාත්‍ය රාමලිංගම් චන්ද්‍රසේකර්ගේ ප්‍රධානත්වයෙන් පසුගිය (29) වෙනිදා කොළඹ පිහිටි ජපාන තානාපති කාර්යාලයේදී සිදු විය. 

මෙම ගිවිසුමට ශ්‍රී ලංකාවේ ජපාන තානාපති අකියෝ ඉසොමාටා සහ ජාතීන්ගේ ආහාර හා කෘෂිකර්ම සංවිධානය නේවාසික නියෝජිත විම්ලේන්ද්‍ර ශරන් යන අය අත්සන් තැබූහ.

රජයට සම්බන්ධ සමාජ මාධ්‍ය මඟින් ශාසනයත්, බුදුදහමත් විනාශ කිරීමේ සංවිධානාත්මක වැඩසටහනක් අද ක්‍රියාත්මක කරගෙන යන බවට සඳහන් කරමින් එක්සත් ජාතික පක්ෂය නිවේදනයක් නිකුත් කර ඇත.

භික්ෂූ විනය සම්බන්ධයෙන් පියවර ගත යුතු ආකාරය පිළිබඳව ක්‍රමවේදයක් ඇති බවත් ඊට අදාළ කැබිනට් පත්‍රිකා සකසා ඒවා මහා නායක හිමිවරුන් ප්‍රමුඛ මහා සංඝරත්නයට ඉදිරිපත් කර ඉන් පසුව තීරණ ගත යුතු බවද එක්සත් ජාතික පක්ෂය සඳහන් කරයි.

දුස්ශීල භික්ෂූන් සම්බන්ධයෙන් පියවර ගැනීමේ කිසිඳු විරුද්ධත්වයක් නැති නමුත් භික්ෂූ විනය සම්බන්ධයෙන් පියවර ගත යුතු ආකාරය පිළිබඳව ක්‍රමවේදයක් පවතීන බවද එක්සත් ජාතික පක්ෂය සඳහන් කරයි.

ලංකා ඛනිජ තෙල් නීතිගත සංස්ථාව විසින් ඊයේ (30) මධ්‍යම රාත්‍රියේ සිට ක්‍රියාත්මක වන පරිදි ඩීසල් මිල ගණන් ඉහළ දැමීමට කටයුතු කළේය.

ඒ අනුව ලංකා සුදු ඩීසල් ලීටරයක මිල රුපියල් 15කින් සහ සුපිරි ඩීසල් ලීටරයක මිල රුපියල් 20කින් ඉහළ දැමීමට ඛනිජ තෙල් සංස්ථාව කටයුතු කළේය.

කෙසේ වෙතත් ඩීසල් මිල ඉහළ දැමුවද, බස් ගාස්තු සංශෝධනයක් සිදු නොවන බව ජාතික ගමනාගමන කොමිසම (NTC) සඳහන් කරයි.

බන්ධනාගාරගතව සිටින පුද්ගලයෙකු සමඟ තමන් සබඳතා පැවැත්වූ බවට මාධ්‍ය මඟින් ප්‍රචාරය වන පුවත් සම්පූර්ණයෙන්ම අසත්‍ය හා ද්වේශසහගත බව පාර්ලිමේන්තු මන්ත්‍රී මුජිබර් රහුමාන් සඳහන් කරයි.

විශේෂයෙන්ම ජනාධිපති මාධ්‍ය අංශයේ ප්‍රධානීන් ඇතුළු පිරිසක් එක්ව තමන්ට එරෙහිව සංවිධානාත්මක චරිත ඝාතනයක් මෙහෙයවමින් සිටින බවද මන්ත්‍රී මුජිබර් රහුමාන් සඳහන් කරයි.

තමා කිසිදු දිනක අපරාධකරුවන් හෝ ජාවාරම්කරුවන් සමඟ දේශපාලනය කර නොමැති බවද මන්ත්‍රී මුජිබර් රහුමාන් ප්‍රවෘත්ති සාකච්ඡාවක් කැඳවමින් සඳහන් කරයි.

විශ්වවිද්‍යාල සමයේ සිටම වීදි බැස සමාජ සාධාරණත්වය සහ ජාතිවාදයට එරෙහිව සටන් කර ගොඩනැඟූ පිරිසිදු දේශපාලන ඉතිහාසයක් තමන් සතු බවද මන්ත්‍රී මුජිබර් රහුමාන් සඳහන් කරයි.

තමන්ගෙන් කිසිදු විමසීමකින් තොරව, ජනතාව තුළ වැරදි මතයක් ඇති කිරීමේ චේතනාවෙන් මෙම පුවත පළ කර ඇති බවත් ITN සහ ලේක්හවුස් වැනි මාධ්‍ය ආයතන ඊට දායක වී ඇති බවද මන්ත්‍රීවරයා චෝදනා කරයි.

ලේක්හවුස් ආයතනය අදාළ පුවත ඉවත් කරගැනීමට එකඟ වූ බවත් ස්වාධීන රූපවාහිනී සේවයට (ITN) එරෙහිව ඉදිරියේදී අධිකරණමය පියවර ගන්නා බවද මන්ත්‍රීවරයා සඳහන් කරයි.

ඒරාවුර් ප්‍රදේශයේ පදිංචි 11 හැවිරිදි සහෝදරිය ඝාතනය කිරීමේ සිද්ධිය සම්බන්ධයෙන් සැකපිට 14 හැවිරිදි සිසුවෙකු ඒරාවුර් පොලිසිය විසින් අත්අඩංගුවට ගෙන ඇත.

පසුගිය (28) වෙනිදා එම දැරියගේ මළ සිරුර නිවසේ නානකාමරයේ ඇති ජල ටැංකියේ තිබී සොයාගත් අතර දුරකතනය ලබානොදීම හේතුවෙන් එම සිසුවා විසින් මෙම ඝාතනය සිදු කර ඇති බවට තොරතුරු වාර්තා වේ.

මෙම දරුවන් දෙදෙනාගේ මව විදේශගතව සිටින අතර එම සිදුවීම සිදුවන දිනයේ ඔවුන්ගේ පියා රැකියාව සඳහා පිට ප්‍රදේශයකට ගොස් සිට ඇති බව සඳහන් කරයි.

සිය නැගණියගෙන් එම සැකකරු දුරකතනය ඉල්ලා ඇති අතර ඇය එය ප්‍රතික්ෂේප කිරීමත් සමග දෙදෙනා අතර ඇති වූ බහින්බස්වීම දුරදිග ගොස් මෙම ඝාතනය සිදු කර ඇත.

අනතුරුව පියා රැකියාවට ගොස් නිවසට පැමිණ දරුවන්ව සොයා ඇති අතර එහිදී සිය දියණිය ජල ටැංකියේ සිහිසුන්ව වැටී ඇති අයුරු දැක වහාම රෝහල් ගත කිරීමට පියවර ගත්ත ද ඒ වන විටත් ඇය මියගොස් සිට ඇත.

මෙම සිද්ධිය සම්බන්ධයෙන් 14 හැවිදිරි සිසුවාගෙන් පොලිසිය සිදු කළ ප්‍රශ්න කිරීමේදී තමන් විසින් සිය නැගණිය ඝාතනය සිදු කළ බවට ප්‍රකාශ කර ඇති අතර අනතුරුව එම සිසුවා අත්අඩංගුවට ගෙන ඇත.