Foreign news

මියන්මාරයේ නව ජනාධිපතිවරයා ලෙස ජෙනරාල් මින් අන්ග් හලින්ග් තෝරාපත් කරගෙන ඇති බව විදෙස් මාධ්‍ය වාර්තා කරයි.

මියන්මාර පාර්ලිමේන්තුවේ හමුදා හිතවාදී මන්ත්‍රී ආසන 584න් 429ක පක්ෂපාතීත්වය ජෙනරාල් මින් අවුන් හ්ලියැං හට ලැබී ඇත.

පාර්ලිමේන්තු ආසන වලින් හතරෙන් එකක ප්‍රමාණයක් මැතිවරණයකින් තොරවම සක්‍රීය හමුදා සාමාජිකයින් සඳහා වෙන් කර තිබූ බව විදෙස් මාධ්‍ය වාර්තා කරයි.

අමෙරිකානු ජනපති ඩොනල්ඩ් ට්‍රම්ප් විසින් එරට නීතිපතිනි පෑම් බොන්ඩි (Pam Bondi) වහාම ක්‍රියාත්මක වන පරිදි එම ධුරයෙන් ඉවත් කර ඇත.

මාසයක කාලය තුළ ට්‍රම්ප් පරිපාලනයේ සිදුවූ දෙවන ප්‍රධානතම කැබිනට් මට්ටමේ වෙනස් කිරීම ලෙස මෙය සැලකෙයි.

ජනාධිපති ට්‍රම්ප් සිය ‘Truth Social’ ගිණුම ඔස්සේ මෙම තීරණය තහවුරු කර ඇති අතර ඇය පෞද්ගලික අංශයේ ඉහළ තනතුරකට යොමුවනු ඇති බවද සඳහන් කර ඇත.

මෙම හදිසි ඉවත් කිරීමට ප්‍රධානතම හේතුව, ලිංගික අපරාධ චෝදනා ලැබ සිටින ප්‍රකට මූල්‍යකරුවෙකු වන ජෙෆ්රි එප්ස්ටයින්ට අදාළ රහසිගත ලිපිගොනු සම්බන්ධයෙන් පෑම් බොන්ඩි කටයුතු කළ ආකාරය පිළිබඳව ජනාධිපතිවරයා තුළ ඇති වූ දැඩි අප්‍රසාදයයි.

අනතුරුව එම පුරප්පාඩු වූ නීතිපති ධුරයේ වැඩ බැලීම සඳහා ජනාධිපති ට්‍රම්ප් විසින් නියෝජ්‍ය නීතිපති ටොඩ් බ්ලැන්ච් (Todd Blanche) පත් කර ඇත.

එමෙන්ම ස්ථිර නීතිපති ධුරය සඳහා වත්මන් පරිසර ආරක්ෂණ ඒජන්සියේ (EPA) ප්‍රධානී ලී සෙල්ඩින් (Lee Zeldin) පත් කිරීමට බොහෝ දුරට ඉඩ ඇති බවද අමෙරිකානු දේශපාලන ආරංචි මාර්ග සඳහන් කරයි.

ඉරානයේ කරාජ් (Karaj) හි පිහිටි උසම සහ වැදගත්ම යටිතල පහසුකම් ව්‍යාපෘතියක් වන B1 පාලම ගුවන් ප්‍රහාරයකින් විනාශ කිරීමෙන් අනතුරුව, ජනපති ඩොනල්ඩ් ට්‍රම්ප් දැඩි අනතුරු ඇඟවීමක් කර ඇත.

ඉරාන B1 පාලම කඩා වැටෙන දර්ශන සිය Truth Social ගිණුම ඔස්සේ ප්‍රසිද්ධ කරමින් ජනාධිපති ට්‍රම්ප් සඳහන් කළේ,

“ඉරානයේ විශාලතම පාලම බිමට සමතලා විය. එය නැවත කිසිදා භාවිතා කළ නොහැක. තවත් බොහෝ දේ ඉදිරියට සිදුවනු ඇත.”

“ප්‍රබල රටක් ලෙස පැවතීමට නම් ඉතිරි දේත් විනාශ වීමට පෙර, ප්‍රමාද නොවී ගනුදෙනුවකට එළඹීමට දැන් කාලයයි.”

ඉරාන විප්ලවීය ආරක්ෂක බලකාය (IRGC) විසින් මිසයිල සහ ඩ්‍රෝන උපාංග ප්‍රවාහනය කිරීම සඳහා මෙම පාලම ප්‍රධාන සැපයුම් මාර්ගයක් ලෙස භාවිතා කළ බව අමෙරිකානු නිලධාරීන් සඳහන් කරයි.

ලෝක වෙළඳපොළේ බොරතෙල් මිල සැලකිය යුතු ලෙස ඉහළ ගොස් ඇති බව විදෙස් මාධ්‍ය වාර්තා කරයි.

WTI Crude බොරතෙල් බැරලයක මිල අමෙරිකානු ඩොලර් 111.54 දක්වා ඉහළ ගොස් ඇති අතර එය 11.41%ක වැඩිවීමකි.

බ්‍රෙන්ට් බොරතෙල් බැරලයක මිල ඩොලර් 109 ඉක්මවා ගොස් ඇති බවද විදෙස් මාධ්‍ය වාර්තා කරයි.

මේ අතර මර්බන් බොරතෙල් බැරලයක මිල ඩොලර් 114.84 දක්වා ඉහළ ගොස් ඇත.

ඉදිරි සති 2-3 ඇතුළත ඉරානයේ සියලුම විදුලි බලශක්ති මධ්‍යස්ථාන වෙත ඉතා ප්‍රබල ප්‍රහාර එල්ල කරන බව අමෙරිකානු ජනාධිපති ඩොනල්ඩ් ට්‍රම්ප් සඳහන් කරයි.

මෙම දැවැන්ත ප්‍රහාරයන් හරහා ඉරානය නැවතත් “ශිලා යුගය” දක්වා ආපස්සට ඇද දමන බවද අමෙරිකානු ජනාධිපති ඩොනල්ඩ් ට්‍රම්ප් වොෂින්ටනයේ සිට ජාතිය අමතමින් සඳහන් කරයි.

ඉරානයට එරෙහිව ක්‍රියාත්මක හමුදා මෙහෙයුම්වල අරමුණු සම්පූර්ණ වීමට ආසන්න බවත් ඉදිරි සති කිහිපය තුළ එම කටයුතු අවසන් කරන බවද අමෙරිකානු ජනාධිපති ඩොනල්ඩ් ට්‍රම්ප් සඳහන් කරයි.

අමෙරිකාව සැලසුම් කළ හමුදා අරමුණු බොහොමයක් මේ වන විටත් සාර්ථක වී ඇති බවත් එම කාර්යය නිම කිරීමට තව ඇත්තේ ඉතා සුළු කාලයක් බවද ජනාධිපති ඩොනල්ඩ් ට්‍රම්ප් සඳහන් කරයි.

ඉරානය සමඟ පවතින ගැටුම “අනාගත පරම්පරාව සඳහා කරන ආයෝජනයක්” බවත් මෙම ගැටුම නිවැරදි පරිදි තේරුම් ගැනීම ඉතා වැදගත් බවද ජනාධිපති ඩොනල්ඩ් ට්‍රම්ප් සඳහන් කරයි.

ආරක්ෂාව, බලශක්තිය, ආර්ථිකය අතින් ගත්කල තමන්ට වඩා ශක්තිමත් සම්බන්ධතාවක් අවශ්‍ය වන්නේ යුරෝපය සමග බව බ්‍රිතාන්‍ය අගමැති කියර් ස්ටාමර් සඳහන් කරයි.

ඉරානයට එරෙහි යුද්ධය තමන්ගේ යුද්ධයක් නොවන බවත් තමන් යුද්ධයට කිසිසේත් සම්බන්ධ නොවන බවද බ්‍රිතාන්‍ය අගමැති කියර් ස්ටාමර් සඳහන් කරයි.

බ්‍රිතාන්‍ය නේටෝවට සම්පූර්ණයෙන්ම කැපවී සිටින බවත් එය ලෝකයේ මෙතෙක් දැක ඇති එකම ඵලදායී මිලිටරි සන්ධානය බවද බ්‍රිතාන්‍ය අගමැති කියර් ස්ටාමර් සඳහන් කරයි.

අමෙරිකානු ජනාධිපති ඩොනල්ඩ් ට්‍රම්ප් ‘Truth’ සමාජ ගිණුමේ සටහනක් තබමින් කළ ප්‍රකාශයට ප්‍රතිචාර දක්වමින් බ්‍රිතාන්‍ය අගමැති කියර් ස්ටාමර් මේ බව සඳහන් කරයි.

“මා සහ අනෙක් අය මත කුමන පීඩනයක් එල්ල වුවත්, කුමන හඬක් නැඟුවත් මා තීරණ ගන්නේ බ්‍රිතාන්‍යයේ ජාතික අවශ්‍යතා වෙනුවෙන් ක්‍රියා කිරීමට. මම කියන්නේ මේක අපේ යුද්ධයක් නෙවෙයි කියලා. අපි ඒකට යන්නේ නෑ.”

රුසියාව විසින් අමෙරිකාව සමඟ උදර්පන ගිවිසුම් පවතින රටවල සංචාරය කිරීමෙන් වළකින ලෙස සිය පුරවැසියන්ට විශේෂ අනතුරු ඇඟවීමක් නිකුත් කර ඇත.

පසුගිය 2022 වසරේ රුසියානු – යුක්‍රේන යුද්ධය ආරම්භ වූ දිනයේ සිට අමෙරිකාවේ දඬුවම් පැමිණවීමේ හැකියාව දැඩි වී ඇති බව රුසියානු විදේශ අමාත්‍යාංශය සඳහන් කරයි.

කෙසේ හෝ යම් හෙයකින් අමෙරිකානු බලධාරීන් අතට පත් වුවහොත් රුසියානු පුරවැසියන්ට දිගුකාලීන සිරදඬුවම් විඳීමට සිදුවීමේ අවදානමක් පවතින බවද සඳහන් කරයි.

අමෙරිකානු බුද්ධි අංශ විවිධ වාසිදායක ව්‍යාපාරික හෝ සංචාරක දීමනා ලබාදී රුසියානුවන් විදේශ රටවලට ගෙන්වා ගැනීමේ කූට උපක්‍රම භාවිතා කරන බවද සඳහන් කරයි.

රුසියානු විදේශ අමාත්‍යාංශය සඳහන් කළේ,

“අමෙරිකානු සම්බාධක මගින් රුසියානු ආර්ථිකයේ උපායමාර්ගික අංශ ඉලක්ක කර ඇති බැවින්, බොහෝ රුසියානුවන් තමන් නොදැනුවත්වම අමෙරිකානු නීති ක්‍රියාත්මක කරන ආයතනවල සහ බුද්ධි අංශවල ඉලක්ක බවට පත්වීමේ අවදානමක් ඇත.”

ඉරානය විසින් කුවේට් ජාත්‍යන්තර ගුවන්තොටුපළේ ඉන්ධන ටැංකි වලට යළිත් ඩ්‍රෝන ප්‍රහාර එල්ල කර ඇති බව විදෙස් මාධ්‍ය වාර්තා කරයි.

මෙම ප්‍රහාර හේතුවෙන් ගුවන්තොටුපළේ ඉන්ධන ටැංකි වල විශාල ගින්නක් හටගෙන ඇති බවද විදෙස් මාධ්‍ය වාර්තා කරයි.

හදිසි කණ්ඩායම් එම ස්ථානයේ සිටි අතර සිදුවු හානිය සැලකිය යුතු මට්ටමක පවතින බවත් කිසිදු ජීවිත හානියක් සිදුව නොමැති බව එරට සිවිල් ගුවන් සේවා අධ්‍යක්ෂ මණ්ඩලය සඳහන් කරයි.

ඉරානයේ ඩ්‍රෝන යානා සහ එයට සහාය දක්වන සන්නද්ධ කණ්ඩායම් විසින් එල්ල කරන ලද ප්‍රහාර හේතුවෙන් ඉන්ධන ටැංකි වලට හානි සිදුව ඇති බව සිවිල් ගුවන් සේවා අධ්‍යක්ෂ මණ්ඩලයේ ප්‍රකාශකයෙකු සඳහන් කරයි.

කිසිදු සටන් විරාම යෝජනාවක් ඉරානය විසින් ඉදිරිපත් කර නොමැති බව එරට විදේශ අමාත්‍ය අබ්බාස් අරාග්චි සඳහන් කරයි.

ඉරානය විසින් කරුණු පහකින් යුත් සටන් විරාම සැලැස්මක් ඉදිරිපත් කර ඇති බවට පැතිර යන පුවත් හුදෙක් මාධ්‍ය වල පලවන දෑ පමණක් බවද අමාත්‍යවරයා සඳහන් කරයි.

ආක්‍රමණිකයාට දඬුවම් පමුණුවන තෙක් සහ ඉරානයට සිදුවූ හානි සඳහා පූර්ණ වන්දි ගෙවන තෙක් මෙම යුද්ධය අඛණ්ඩව ඉදිරියට ගෙන යන බවද අමාත්‍යවරයා සඳහන් කරයි.

අමෙරිකානු ජනාධිපති ඩොනල්ඩ් ට්‍රම්ප් ධවල මන්දිරයේ ඇතුලේ උත්සව ශාලාවක් ඉදිකිරීමට ආරම්භ කළ ව්‍යාපෘතිය අධිකරණ නියෝගයක් මගින් තාවකාලිකව නතර කර ඇති බව විදෙස් මාධ්‍ය වාර්තා කරයි.

ඉදිකිරීම් ආරම්භ කිරීමට පෙර අනුගමනය කළ යුතු නිසි නීතිමය පටිපාටි ධවල මන්දිරය විසින් උල්ලංඝනය කර තිබීම හේතුවෙන් අම‍ෙරිකානු විනිසුරු රිචඩ් ලියොන් විසින් මෙම ඉදිකිරීම් වහාම නතර කරන ලෙසට නියෝග කර ඇත.

ජාතික අගනුවර සැලසුම් කොමිසමට සැලසුම් ඉදිරිපත් නොකිරීම, ව්‍යාපෘතියේ පාරිසරික තක්සේරුවක් ලබා නොගැනීම සහ කොංග්‍රස් මණ්ඩලයෙන් අවසර ලබා නොගැනීම යන චෝදනා මෙහිදී එල්ල වී ඇත.

අමෙරිකානු ජනාධිපති ඩොනල්ඩ් ට්‍රම්ප් ධවල මන්දිරයේ අයිතිකරු නොව එහි “භාරකරු” පමණක් බවද අම‍ෙරිකානු විනිසුරුවරයා ප්‍රකාශ කර ඇත.

“එක්සත් ජනපදයට අයත් දේපළ සම්බන්ධ සියලු නීති රීති සැකසීමේ අයිතිය කොංග්‍රස් මණ්ඩලයට හිමි වේ.”

මෙවැනි විශාල වෙනසක් කිරීමට කොංග්‍රස් මණ්ඩලයේ අනුමැතිය අනිවාර්යය බැවින් අමෙරිකානු ආණ්ඩුක්‍රම ව්‍යවස්ථාව ට්‍රම්ප් විසින් උල්ලංඝනය කරන බවද සඳහන් කරයි.