Foreign news

මේ වනවිට යේමනයේ හූති කැරලිකරුවන් විසින් දකුණු ඊශ්‍රායලය ඉලක්ක කරගෙන ප්‍රහාර වැඩි වශයෙන් එල්ල කර ඇත.

තවදුරටත් ප්‍රහාර එල්ල කරන බවත් මෙම ප්‍රහාර නැවැත්වීමට නම් ඊශ්‍රායලය කොන්දේසි දෙකක් ඉටු කළ යුතු බව හූති කැරලිකරුවන් සඳහන් කරයි.

ගාසා තීරයේ සටන් විරාම ගිවිසුමට එකඟ වීම සහ ඉරානයට එරෙහිව අමෙරිකාව එල්ල කරන ප්‍රහාරවලට හවුල් නොවීම බව හූති කැරලිකරුවන් සඳහන් කරයි.

ඉදිරියේදී ප්‍රහාර තවදුරටත් දැඩි කරන බවත් එක් පියවරක් ලෙස ලෝකයේ ඉතා වැදගත් මුහුදු මාර්ගයක් වන බාබ් අල්-මන්ඩෙබ් (Bab al-Mandeb) සමුද්‍ර සන්ධිය වසා දැමීමට සූදානම් වන බව වාර්තා වේ.

නැගෙනහිර ජපානයේ ප්‍රදේශවලට රික්ටර් මාපකයේ 5.0ක භූමිකම්පාවක් ඇති වූ බව ජපාන කාලගුණ විද්‍යා ඒජන්සිය සඳහන් කරයි.

මෙම භූමිකම්පාව හේතුවෙන් පදිංචිකරුවන් කෙටි කාලයකට නොසන්සුන් වූ නමුත් බරපතල හානියක් සිදුවී නොමැති බවද සඳහන් කරයි.

භූමිකම්පාවෙන් පසුව ඊසානදිග ජපානයේ ටෝකියෝ සහ අමෝරි ප්‍රාන්තය අතර ෂින්කන්සන් බුලට් දුම්රිය සේවාව අත්හිටුවීමට පියවර ගෙන ඇත.

එහෙත් කිසිදු අසාමාන්‍යතාවයක් සොයාගත නොහැකි වූ බැවින් එම දුම්රිය මෙහෙයුම් නැවත ආරම්භ කර ඇති බව විදෙස් මාධ්‍ය වාර්තා කරයි.

ඉදිරි දිනවලදී ප්‍රබලත්වයකින් යුත් පසු කම්පන ඇති විය හැකි බැවින් සතියක කාලයක් නිවැසියන් විමසිල්ලෙන් සිටින ලෙස ජපාන කාලගුණ විද්‍යා ඒජන්සිය අනතුරු ඇඟවා ඇත.

ඩුබායි වෙරළ ආසන්නයේ තිබූ විශාල තෙල් නෞකාවකට පසුගියදා ඉරාන ඩ්‍රෝන ප්‍රහාරයක් එල්ල කළේය.

මේ අතර කටාර් වෙරළට ඔබ්බෙන් වූ මුහුදු තීරයේ තෙල් නෞකාවකට හඳුනා නොගත් ප්‍රහාරයක් එල්ල වී ඇති බව විදෙස් මාධ්‍ය වාර්තා කරයි.

මෙම ප්‍රහාරය හේතුවෙන් නෞකාවේ එක් පැතිකඩකට හානි සිදුව ඇති නමුත් එහි සිටි සේවක පිරිසට කිසිදු අනතුරක් වී නොමැති බවද විදෙස් මාධ්‍ය වාර්තා කරයි.

කෙසේ වෙතත් නෞකාවෙන් මුහුදට තෙල් කාන්දු වීමක් වැනි කිසිදු පාරිසරික හානියක් සිදුව නොමැති බව එරට බලධාරීන් සඳහන් කරයි.

ක්‍රිමියානු අර්ධද්වීපයට ඉහළින් වූ ප්‍රදේශයේ ගමන් කළ An-26 වර්ගයේ රුසියානු හමුදා ගුවන් යානයක් කඩා වැටී පුද්ගලයින් 29 දෙනෙකුට දිවි අහිමි වී ඇත.

මෙම ගුවන් යානයේ ඇති වූ තාක්ෂණික දෝෂයක් හේතුවෙන් මෙම අනතුර සිදුව ඇති අතර ගුවන් යානයේ කාර්ය මණ්ඩල සාමාජිකයින් හයදෙනෙකු ද මියගිය පිරිස අතර සිටී.

මොස්කව් වේලාවෙන් සවස 6.00ට පමණ මෙම අනතුර සිදුව ඇති බව රුසියානු ආරක්ෂක අමාත්‍යාංශය විසින් තහවුරු කර ඇත.

ඉරානයට එරෙහි යුදමය ක්‍රියාමාර්ග සඳහා එක්වීම ප්‍රතික්ෂේප කරන රටවල් ඉලක්ක කරගනිමින් අමෙරිකානු ජනාධිපති ඩොනල්ඩ් ට්‍රම්ප් සිය විවේචන එල්ල කර ඇත.

ඉන්ධන ලබාගැනීමට නොහැකිව සිටින, එහෙත් ඉරාන පාලනයට එරෙහි මෙහෙයුම්වලට සහාය නොදෙන බ්‍රිතාන්‍යය වැනි රටවල් වෙත උපහාසාත්මක යෝජනාවක් ඉදිරිපත් කරමින් ජනාධිපති ඩොනල්ඩ් ට්‍රම්ප් මේ බව සඳහන් කරයි.

සමාජ මාධ්‍ය ඔස්සේ ජනාධිපති ඩොනල්ඩ් ට්‍රම්ප් සඳහන් කළේ,

“මා සතුව ඔබට යෝජනා දෙකක් තිබෙනවා. පළමුවැන්න, අමෙකාවෙන් ඉන්ධන මිලදී ගන්න, අප සතුව ඕනෑ තරම් තිබෙනවා. දෙවැන්න, දැන්වත් ප්‍රමාද වී හෝ ධෛර්යය උපදවාගෙන හෝමුස් සමුද්‍ර සන්ධියට ගොස් ඔබට අවශ්‍ය දේ බලහත්කාරයෙන් ලබාගන්න.”

මේ අතර සැපයුම් රැගත් අමෙරිකානු ගුවන් යානාවලට ප්‍රංශ ගුවන් සීමාව භාවිත කිරීමට අවසර නොදීම ඉතාම අහිතකර බවද ජනාධිපති ඩොනල්ඩ් ට්‍රම්ප් සඳහන් කරයි.

ලොව වැඩිම ජනගහනයක් සිටින ඉන්දියාවේ සෑම පුද්ගලයෙකුම ගණනය කිරීමේ දැවැන්ත කාර්යය සඳහා එරට නිලධාරීන් මිලියන 3කට අධික පිරිසක් වසරක කාලයක් පුරා මෙහෙයුම් දියත් කිරීමට සූදානම් වේ.

ඒ අනුව අප්‍රේල් (01) වනදා සිට ඉන්දියාවේ සෑම පුද්ගලයෙකුම ගණනය කිරීම ආරම්භ වන බවත් සංගණනය අදියර කිහිපයකින් ක්‍රියාත්මක වන බවද ඉන්දීය රජය නිවේදනය කරයි.

පළමු අදියර – අප්‍රේල් (01) වනදා සිට අන්තර්ජාලය හරහා ස්වයංව ලියාපදිංචි වීමට අවස්ථාව ලබාදීම.

දෙවන අදියර – නිවාස සහ නිවාසවල තත්ත්වයන් පිළිබඳ තොරතුරු රැස් කිරීම සඳහා නිලධාරීන් නිවසින් නිවසට යාම.

තෙවන අදියර – පුද්ගලයන්ගේ ආර්ථික සහ සමාජීය තොරතුරු මෙන්ම කුලය පිළිබඳ තොරතුරු රැස් කිරීම.

ඉතිහාසයේ ප්‍රථම වතාවට මෙම සියලු දත්ත ඩිජිටල් ක්‍රමවේද ඔස්සේ වාර්තා කරන බැවින් ප්‍රතිඵල ඉතා ඉක්මනින් නිකුත් කිරීමට හැකි වනු ඇති බව සංගණන කොමසාරිස් මෘතුංජය කුමාර් නාරායන් සඳහන් කරයි.

චීනය සහ රුසියාව විසින් ඉරානයට සහාය වීම සඳහා දරන උත්සාහයන් පිළිබඳව අමෙරිකාව දැඩි අවධානයෙන් පසුවන බව අමෙරිකානු ආරක්ෂක ලේකම් පීට් හෙග්සෙත් සඳහන් කරයි.

එනිසා අවශ්‍ය සෑම අවස්ථාවකදීම එම මැදිහත්වීම් වලට එරෙහිව ක්‍රියා කරන බවද අමෙරිකානු ආරක්ෂක ලේකම් පීට් හෙග්සෙත් (31) පැවැති මාධ්‍ය හමුවකදී සඳහන් කරයි.

මැදපෙරදිග ගැටුමේ ඉදිරි දින කිහිපය ඉතා තීරණාත්මක වනු ඇති බවත් ඉරාන සන්නද්ධ හමුදාවලින් සෙබළුන් විශාල වශයෙන් පලායෑමේ ප්‍රවණතාවක් දක්නට ලැබෙන බවද ඔහු සඳහන් කරයි.

රුසියාව සහ චීනය ඉරානයට උදව් කරන ආකාරය පිළිබඳව අමෙරිකාව නිවැරදිව දන්නා බවත් ඒ සියල්ල ප්‍රසිද්ධියේ ප්‍රකාශ කිරීමට අවශ්‍ය නොවන නමුත් අවශ්‍ය තැන්වලදී ඔවුන්ට සෘජුව මුහුණ දෙන බවද ඔහු සඳහන් කරයි.

ආරක්ෂක ලේකම් පීට් හෙග්සෙත් සඳහන් කළේ,

“අප සතුව විකල්ප වැඩි වෙමින් පවතිනවා, නමුත් ඉරානයට ඇති විකල්ප සීමිතයි. ගතවූ එකම මාසය තුළ අප යුද්ධයේ කොන්දේසි තීරණය කර අවසන්. ඉදිරි දින කිහිපය තීරණාත්මකයි.”

උතුරු ඊශ්‍රායලයේ තෙල් පිරිපහදු මධ්‍යස්ථානයකට ඉරානය සහ ලෙබනනය එක්වී මිසයිල ප්‍රහාර එල්ල කර ඇති බව විදෙස් මාධ්‍ය වාර්තා කරයි.

පසුගිය මාසයේ ඉරානයට එරෙහිව අමෙරිකාව සහ ඊශ්‍රායල යුද්ධය ආරම්භ වීමෙන් පසුව එම පිරිපහදු මධ්‍යස්ථානයට එල්ල වූ දෙවන ප්‍රහාරය මෙය වේ.

හයිෆා හි බසාන් තෙල් පිරිපහදුව ලෙසද හැඳින්වෙන මෙම පිරිපහදු මධ්‍යස්ථානයට එල්ල වූ ප්‍රහාරය හේතුවෙන් විශාල ගින්නක් හටගෙන ඇති බව විදෙස් මාධ්‍ය වාර්තා කරයි.

මෙම ප්‍රහාරයෙන් කිසිදු ජීවිත හානියක්, අන්තරායකර ද්‍රව්‍ය අවදානම් සහ මහජනතාවට කිසිදු අනතුරක් නොමැති බව ඊශ්‍රායලයේ ගිනි නිවන හා ගලවා ගැනීමේ සේවය සඳහන් කරයි.

ඉතාම කෙටි කාලයක් තුළ ඉරානය සමග එකඟතාවකට පැමිණීමට නොහැකි වුවහොත් ඉරානයේ ජල පිරිපහදු මධ්‍යස්තාන විනාශ කරන බව අමෙරිකානු ජනාධිපති ඩොනල්ඩ් ට්‍රම්ප් සඳහන් කරයි.

සිය ‘Truth Social’ ගිණුමේ සටහනක් තබමින් ජනාධිපති ඩොනල්ඩ් ට්‍රම්ප් මේ බව සඳහන් කරයි.

අමෙරිකාව හිතාමතාම කිසිදු ජල පිරිපහදු මධ්‍යස්ථානයක් මෙතෙක් ඉලක්ක කර නොමැති නමුත් අමෙරිකානු භටයින් ඝාතනය කිරීමට පළිගැනීමක් වශයෙන් අදාළ ප්‍රහාර එල්ල කරන බවද ඩොනල්ඩ් ට්‍රම්ප් සඳහන් කරයි.

මුහුදු ජලයේ ලවණ ඉවත් කොට එය පරිභෝජනය කළ හැකි තත්ත්වයට පත් කිරීම ජල පිරිපහදු මධ්‍යස්ථාන හරහා සිදුකරයි.

ඊශ්‍රායලය වෙත මාරාන්තික ප්‍රහාර එල්ල කිරීම සම්බන්ධයෙන් වැරදිකරුවන් වන පලස්තීනුවන්ට යුද අධිකරණ හමුවේ මරණ දණ්ඩනය දීමේ නීතියක් ඊශ්‍රායල පාර්ලිමේන්තුව සම්මත කර ඇත.

මෙම මරණ දණ්ඩනය ඊශ්‍රායල අගමැති බෙන්ජමින් නෙතන්යාහු විසින් අන්ත දක්ෂිණාංශිකයින් වෙත ලබා දුන් පොරොන්දුවක් ඉටු කිරීමක් ලෙස විදෙස් මාධ්‍ය සඳහන් කරයි.

දින 30ක් ඇතුළත ක්‍රියාත්මක වන මෙම නීතිය, අගමැති බෙන්ජමින් නෙතන්යාහු ඇතුළු මන්ත්‍රීවරුන් 120 දෙනෙකු විසින් අනුමත කරන ලද අතර ඊට විරුද්ධව ඡන්ද 48ක් සහ එක් අයෙක් ඡන්දය දීමෙන් වැළකී සිටියේය.

කෙසේ වෙතත් පලස්තීන ජාතිකයන් ඝාතනය කිරීම සම්බන්ධයෙන් වරදකරුවන් වන ඊශ්‍රායල ජාතිකයින්ට මෙම මරණ දණ්ඩනය පැනවෙන්නේ නැති බවද විදෙස් මාධ්‍ය වාර්තා කරයි.