Foreign news

ග්‍රීන්ලන්තය ඈඳා ගැනීමේ වැඩපිළිවෙලට එරෙහිව කටයුතු කරන රටවලට එරෙහිව නව තීරුබදු පනවන බවට අමෙරිකානු ජනාධිපති ඩොනල්ඩ් ට්‍රම්ප් අනතුරු අඟවා ඇත.

ධවල මන්දිරයේ පැවති මාධ්‍ය හමුවකදී ජනාධිපති ඩොනල්ඩ් ට්‍රම්ප් සඳහන් කළේ,

“ජාතික ආරක්ෂාව සඳහා අපට ග්‍රීන්ලන්තය අවශ්‍යයි. ග්‍රීන්ලන්තය සමග ඔවුන් එකග නොවන්නේ නම්, මට එම රටවල් මත තීරුබදු පැනවිය හැකියි.”

එහෙත් නව තීරුබදු පනවනු ලබන්නේ කුමන රටවලටද යන්න හෝ එම එම රටවලට එරෙහිව අනුගමනය කරන බදු ප්‍රතිපත්තිය කුමක් ද යන්න හෙළිකර නොමැත.

අමෙරිකාවේ ආරක්ෂාව සඳහා ග්‍රීන්ලන්තය අත්‍යවශ්‍ය බවත් එය පහසු වුවත් අපහසු වුවත් කෙසේ හෝ අත්පත් කරගන්නා බව ජනාධිපති ඩොනල්ඩ් ට්‍රම්ප් සඳහන් කළේය.

කෙසේ වෙතත් ග්‍රීන්ලන්තය අත්පත් කර ගැනීමේ ජනාධිපති ට්‍රම්ප්ගේ තීරණයට ඩෙන්මාර්කය සහ ග්‍රීන්ලන්තය ඇතුළු රටවල් රැසක් සිය විරුද්ධත්වය ප්‍රකාශ කර ඇත.

වෙනිසියුලානු විපක්ෂ නායිකා මරියා මචාඩෝ සහ අමෙරිකානු ජනාධිපති ඩොනල්ඩ් ට්‍රම්ප් අතර අමෙරිකාවේ ධවල මන්දිරයේදී පැවැති හමුවකදී විපක්ෂ නායිකාව සිය නොබෙල් සාම ත්‍යාගය අමෙරිකානු ජනාධිපතිවරයා වෙත පිරිනමා ඇත.

වෙනිසියුලානු ජනතාවගේ නිදහස සඳහා ඔහුගේ කැපවීම අගය කිරීමක් ලෙස සිය සාම ත්‍යාගය අමෙරිකානු ජනාධිපතිවරයා වෙත පිරිනැමූ බව විපක්ෂ නායිකා මරියා මචාඩෝ මාධ්‍ය වෙත අදහස් දක්වමින් සඳහන් කළාය.

පැයකට වඩා කාලයක් පැවති මෙම හමුව අමෙරිකානු ජනාධිපතිවරයා සහ වෙනිසියුලානු විපක්ෂ නායිකාව අතර පැවැත්වූ පළමු හමුව වන අතර අමෙරිකානු ජනාධිපතිවරයා සමග සාකච්ඡාවෙන් පසු ඇය රිපබ්ලිකන් සහ ඩිමොක්‍රටික් යන දෙඅංශයේම සෙනෙට් සභිකයින්ද හමුව ඇත.

අමෙරිකානු ජනාධිපතිවරයා සිය Truth Social ගිණුමේ සටහනක් තබමින් සඳහන් කර ඇත්තේ, වෙනිසියුලානු විපක්ෂ නායිකා මරියා කොරිනා මචාඩෝ හමුවූ බවත් ඇය බොහෝ දේ අත්විඳ ඇති කාන්තාවක් වන බවත්ය.

තවද ඇය සිය නොබෙල් සාම ත්‍යාගය තමන්ට ප්‍රධානය කළ බවත් තමන් ඒ සම්බන්ධව ඇයට සිය ස්තූතිය පළ කරන බවද අමෙරිකානු ජනාධිපතිවරයා සිය Truth Social ගිණුමේ සටහනක් තබමින් සඳහන් කර ඇත.

මේ අතර නොබෙල් ත්‍යාගයක් ප්‍රකාශයට පත් කළ පසු එය අවලංගු කිරීමට, බෙදා ගැනීමට හෝ වෙනත් අයෙකු වෙත පිරිනැමීටම නොහැකි බවත් ඇල්ෆ්‍රඩ් නොබෙල්ගේ කැමැත්තෙහි හෝ නොබෙල් පදනමේ ප්‍රඥප්තිවල එවැනි හුවමාරුවක් සඳහා හැකියාවක් නොමැති බවද නෝර්විජියානු නොබෙල් කමිටුව නිවේදනයක් නිකුත් කරමින් සඳහන් කර ඇත.

අමෙරිකාවේ නව සංක්‍රමණික නීති වලට අනුව රටවල් 75ක පුද්ගලයින් සඳහා වීසා නිකුත් කිරීම දින නියමයක් නොමැතිව කල්දැමීමට තීරණය කර ඇත.

බ්‍රසිලය, ඉරානය, රුසියාව, සෝමාලියාව, ඇෆ්ගනිස්ථානය, ඊජිප්තුව, තායිලන්තය, යේමනය ඇතුළු රටවල් 75ක පුරවැසියන් සඳහා මෙම තහනම පැනවීමට තීරණය කර ඇති අතර සම්පූර්ණ රටවල් පිළිබඳ තොරතුරු මෙතෙක් ප්‍රකාශයට පත් කර නොමැත.

ඒ අනුව ජනවාරි මස (21) වන දින සිට මෙම නව නීතිය ක්‍රියාත්මක වනු ඇති බව වාර්තා වේ.

ඉරාන රජයට එරෙහිව රට පුරා පැවැත්වෙන අඛණ්ඩ මහජන විරෝධතා වලින් මියගිය සංඛ්‍යාව 2,000ක් පමණ වන බව විදෙස් මාධ්‍ය වාර්තා කරයි.

මේ වනවිට විරෝධතා පැවැත්වෙන ප්‍රදේශවල ඇතැම් රෝහල්, මියගිය හෝ තුවාල ලැබූ පිරිස්වලින් පිරීගොස් ඇති බව රෝහල් බලධාරීන් සඳහන් කරයි.

රෝහල් වෙත රැගෙන ආ බහුතරයක් අවුරුදු 20ත් 25ත් අතර වයසේ පසුවන තරුණයන් බවත් ඉන් බොහෝ දෙනෙකුගේ හිසට හෝ පපු ප්‍රදේශයට වෙඩි වැදී තිබූ බව වාර්තා වේ.

සති දෙකක කාලයක් පුරාවට එම විරෝධතා මැඩපැවැත්වීම සඳහා ගත් දැඩි ක්‍රියාමාර්ග මෙම ඉහළ මරණ සංඛ්‍යාවට හේතුව වන විදෙස් මාධ්‍ය වාර්තා කරයි.

අමෙරිකානු ජනාධිපති ඩොනල්ඩ් ට්‍රම්ප් විසින් ඉරානය සමඟ වාණිජ සබඳතා පවත්වන රටවල භාණ්ඩ සඳහා 25%ක තීරු බද්දක් පැනවීමට තීරණය කර ඇත.

ඒ අනුව මෙම 25%ක තීරු බදු පැනවීම වහාම ක්‍රියාත්මක කරන බවද අමෙරිකානු ජනාධිපති ඩොනල්ඩ් ට්‍රම්ප් සඳහන් කර ඇත.

ටෙහෙරානය විරෝධතාකරුවන් ඝාතනය කළහොත් ජනාධිපති ට්‍රම්ප් මිලිටරිමය වශයෙන් මැදිහත් වන බවට තර්ජනය කිරීමෙන් පසුව නව තීරුබදු පැනවීම සිදුකර ඇත.

පහසුවෙන් ග්‍රීන්ලන්ත භූමිය අත්පත් කර ගැනීමේ ගිවිසුමට එළැඹීමට නොහැකි නම්, දුෂ්කර ආකාරයෙන් එය කිරීමට සිදුවෙන බව අමෙරිකානු ජනාධිති ඩොනල්ඩ් ට්‍රම්ප් සඳහන් කරයි.

ග්‍රීන්ලන්තය අල්ලාගැනීමට තමන් ඉදිරිපත් නොවුණහොත් අනාගතයේදී රුසියාවට හෝ චීනයට එය අත්පත් කරගත හැකි බවද අමෙරිකානු ජනාධිති ඩොනල්ඩ් ට්‍රම්ප් සඳහන් කරයි.

අමෙරිකානු ජනාධිති ඩොනල්ඩ් ට්‍රම්ප් සඳහන් කළේ,

“ඔවුන් කැමති වුණත් නැතත් අපි ග්‍රීන්ලන්තයේ යමක් කරන්න යනවා. අපි එය නොකළොත් රුසියාව හෝ චීනය ග්‍රීන්ලන්තය අත්පත් කර ගනීවි. අපට රුසියාව හෝ චීනය අසල්වැසියෙක් කරගන්න ඕන නෑ.” 

දැඩි ජාත්‍යන්තර මතභේද මධ්‍යයේ වෙනිසියුලාවේ වැඩ බලන ජනාධිපතිවරයා තමන් බවට අමෙරිකාවේ ජනපති ඩොනල්ඩ් ට්‍රම්ප් ප්‍රකාශ කර ඇත.

AI තාක්ෂණය ඔස්සේ සකසන ඡායාරූපයක් ඔහුගේ Truth Social සමාජ මාධ්‍ය ඔස්සේ පලකරමින් ජනපති ඩොනල්ඩ් ට්‍රම්ප් මේ බව සඳහන් කර ඇත.

ජනපති ඩොනල්ඩ් ට්‍රම්ප්ගේ නියෝගයකට අනුව පසුගිය (03) වනදා වෙනිසියුලානු වේලාවෙන් අලුයම 1.50ට පමණ එරට අගනුවරට අමෙරිකාවෙන් දැවැන්ත ප්‍රහාර මාලාවක් එල්ල කළේය.

අනතුරුව අමෙරිකානු හමුදාව විසින් වෙනිසියුලාවේ ජනාධිපති නිකොලස් මධුරෝ සහ ඔහුගේ බිරිඳ සිලියා ෆ්ලෝරස්ව අත්අඩංගුවට ගත්තේය.

එක්සත් ජනපද පුරවැසියන්ට ජාත්‍යන්තර ගුවන් ගමන් නැවත ආරම්භ වී ඇති බැවින් වෙනිසියුලාවේ සිටින එක්සත් ජනපද පුරවැසියන් වහාම එරටින් පිටත් වන ලෙස එක්සත් ජනපද රාජ්‍ය දෙපාර්තමේන්තුව විසින් දැනුම් දී ඇත.

වෙනිසියුලාවේ ආරක්ෂක තත්ත්වය තවමත් අවිනිශ්චිත තත්ත්වයක පවතින බවත් ඒ අනුව වෙනිසියුලාවේ සිටින එක්සත් ජනපද පුරවැසියන් වහාම වෙනිසියුලාවෙන් පිටත්ව යන ලෙසට වෙනිසියුලාවේ පිහිටි එක්සත් ජනපද තානාපති කාර්යාලයද නිවේදනයක් නිකුත් කරමින් සඳහන් කර ඇත.

එරටින් පිටත්ව යාමට පෙර එක්සත් ජනපද පුරවැසියන් පූර්වාරක්ෂාවන් ගත යුතු බවත් ඔවුන්ගේ වටපිටාව පිළිබඳව දැනුවත් විය යුතු බවත් දන්වා තානාපති කාර්යාලය සඳහන් කර ඇත.

වෙනිසියුලාවේ සිටින කොලෙක්ටිවෝස් ලෙස හැඳින්වෙන සන්නද්ධ මිලිෂියා කණ්ඩායම් මාර්ග බාධක පිහිටුවා එක්සත් ජනපද පුරවැසිභාවය හෝ එක්සත් ජනපදයට සහාය දැක්වීමේ සාක්ෂි සොයමින් සිටින බව මේ වනවිට වාර්තා වී ඇති බවද තානාපති කාර්යාලය සඳහන් කර ඇත.

ඉරානයේ උත්තරීතර නායක අයොතුල්ලා අලි කමේනි පාලනයට එරෙහිව රට පුරාම ආරම්භ වූ මහජන විරෝධතා අඛණ්ඩව මේ වනවිටත් පැවැත්වේ.

ඉරානයේ නගර 180ක ස්ථාන 500කට වැඩි ප්‍රමාණයක් පුරා පැතිරී ඇති මෙම ප්‍රචණ්ඩ විරෝධතා හේතුවෙන් මේ වනවිට අවම වශයෙන් 116ක් පමණ මියගොස් ඇති බව විදෙස් මාධ්‍ය වාර්තා කරයි.

මෙම ප්‍රචණ්ඩ විරෝධතා හේතුවෙන් මියගිය පිරිස අතර කුඩා ළමයින් නව දෙනෙකු සිටින බවත් 2,600කට වැඩි විරෝධතාකරුවන් පිරිසක් ආරක්ෂක අංශ සිය භාරයට ගෙන ඇති බවද විදෙස් මාධ්‍ය වාර්තා කරයි.

එරට විරෝධතාකරුවන් තවදුරටත් දේපළ වලට හානි කරමින් ප්‍රචණ්ඩව හැසිරෙන අතර එරට පුරා අන්තර්ජාල සේවා තවමත් අක්‍රිය තත්ත්වයේ පවතී.

මෙම විරෝධතා වලට සහභාගී වන ඕනෑම අයෙකු “දෙවියන්ගේ සතුරෙකු” ලෙස සලකනු ලබන බවත් එය මරණ දඬුවමට යටත් කළ හැකි චෝදනාවක් බවද උත්තරීතර නායක අයොතුල්ලා අලි කමේනි සඳහන් කරයි.

අමෙරිකානු හමුදාව විසින් සිරියාවේ ක්‍රියාත්මක IS ත්‍රස්ත සංවිධානයට අයත් ඉලක්ක කිහිපයක් වෙත දැවැන්ත ප්‍රහාර මාලාවක් දියත් කර ඇත.

IS ත්‍රස්ත සංවිධානය පසුගිය මාසයේදී සිදුකළ ප්‍රහාරයකින් අමෙරිකානු හමුදා සෙබළු දෙදෙනෙකු සහ අමෙරිකානු සිවිල් පරිවර්තකයෙකු මියයාමේ සිද්ධියට ප්‍රතිචාර වශයෙන් මෙම ගුවන් ප්‍රහාර සිදුකර ඇත.

අමෙරිකානු වේලාවෙන් ඊයේ දහවල් 12.30ට පමණ මෙම ගුවන් ප්‍රහාර සිදුකර ඇති අතර අමෙරිකානු හමුදා සහ හවුල් හමුදා මෙම ප්‍රහාරට සහභාගී වූ බව විදෙස් මාධ්‍ය වාර්තා කරයි.

තවද IS ඉලක්ක වෙත අඛණ්ඩව අතිරේක ගුවන් හා භූමි ප්‍රහාර සිදුකරමින් පවතින බවද අමෙරිකානු හමුදාව සඳහන් කරයි.