Foreign news

අමෙරිකාව කිසියම් හෝ ආකාරයකට තම රටට පහර දුන්නොත් ඊට ප්‍රතිචාර දක්වන බවට ඉරාන උත්තරීතර නායක අයතුල්ලා අලි කමේනි අනතුරු අඟවයි.

අමෙරිකාව ඉරානයට පහර දුන්නොත් මැදපෙරදිග කලාපයේ අමෙරිකන් හමුදා ඉලක්ක වලට ප්‍රතිප්‍රහාර එල්ල කරන බවද ඉරාන උත්තරීතර නායක අයතුල්ලා අලි කමේනි සඳහන් කරයි.

ඉරාන උත්තරීතර නායකයා ටෙහෙරාන් නගරයේ පැවති උත්සවයකදී සඳහන් කළේ,

“මෙවර යුද්ධයක් ආරම්භ කළහොත් එය කලාපීය යුද්ධයක් වනු ඇති බව ඔවුන් දැනගත යුතුයි. අමෙරිකාව අපට පහර දුන්නොත්, අපි මැදපෙරදිග කලාපයේ අමෙරිකන් හමුදා ඉලක්ක වලට ප්‍රතිප්‍රහාර එල්ල කරනවා.”

දකුණු කොරියාව පසුගිය වසර වොෂින්ටනය සමඟ ඇති කරගත් වෙළඳ ගිවිසුමට අනුව කටයුතු නොකිරීම හේතුවෙන් දකුණු කොරියානු ආනයන සඳහා තීරුබදු 25% දක්වා ඉහළ නංවන බව අමෙරිකානු ජනාධිපති ඩොනල්ඩ් ට්‍රම්ප් සඳහන් කරයි.

මෝටර් රථ, දැව සහ ඖෂධ ඇතුළු භාණ්ඩ රැසක් සඳහා මෙලෙස 15% සිට 25% දක්වා බදු ඉහළ දමා ඇති බව ජනාධිපති ඩොනල්ඩ් ට්‍රම්ප් සිය සමාජ මාධ්‍ය ඔස්සේ නිවේදනය කර ඇත.

මෙම බදු ඉහළ නැංවීම පිළිබඳව තමන්ට නිල දැනුම්දීමක් සිදු කර නොමැති බවත් ඒ සම්බන්ධයෙන් වොෂින්ටනය සමඟ කඩිනම් සාකච්ඡා පැවැත්වීම අපේක්ෂා කරන බවද දකුණු කොරියාව සඳහන් කරයි.

ජනාධිපති ඩොනල්ඩ් ට්‍රම්ප් සිය දෙවැනි පදවිප්‍රාප්තිය සිදුවූ පසුගිය වසරේ ජනවාරි (20) වැනිදා අත්සන් තැබූ විධායක නියෝගයට අනුව ලෝක සෞඛ්‍ය සංවිධානයේ ප්‍රධාන සම්පත් දායකයා වූ අමෙරිකාව (22) දින සිට නිල වශයෙන් එහි සාමාජිකත්වයෙන් ඉවත් වී ඇත.

ලෝක සෞඛ්‍ය සංවිධානයේ නීති වලට අනුව එහි සාමාජිකත්වයෙන් ඉවත් විය හැක්කේ නීත්‍යනුකූල දැනුම්දීමක් කර වසරකින් අනතුරුව පමණක් වන අතර එම කාලය තුළත් සාමාජික මුදල් ගෙවිය යුතු වේ.

ප්‍රංශ වයින් සහ ෂැම්පේන් සඳහා 200% තීරුබදු පනවන බවට අමෙරිකානු ජනාධිපති ඩොනල්ඩ් ට්‍රම්ප් විසින් තර්ජනය කර ඇත.

ගෝලීය ගැටුම් විසඳීම අරමුණු කරගත් ජනපති ට්‍රම්ප්ගේ සාම මණ්ඩලයට ප්‍රංශ ජනාධිපති එමානුවෙල් මැක්‍රොන්ගේ සහාය ලබා ගැනීම සඳහා සිදුකරණ උත්සහයක් බව වාර්තා වේ.

තමන්ට සහාය දක්වන බවට කළ ආරාධනය, ප්‍රංශ ජනාධිපතිවරයා විසින් ප්‍රතික්ෂේප කිරීමට අදහස් කරන බවට සැලවීමත් සමඟ ජනාධිපති ඩොනල්ඩ් ට්‍රම්ප් මේ බව සඳහන් කර ඇත.

ජනාධිපති ඩොනල්ඩ් ට්‍රම්ප් මාධ්‍ය වෙත ප්‍රකාශ කර ඇත්තේ,

‘ඔහු එහෙම කිව්වද.? හොඳයි.. කිසිවෙකුත් ඔහුට කැමති නැහැ.. මොකද ඔහු ඉතා ඉක්මනින් ධුරයෙන් ඉවත් වනවා. මම ඔහුගේ වයින් සහ ෂැම්පේන් සඳහා 200% තීරුබදු පනවනවා. ඔහු එවිට එක්වනු ඇති. නමුත් ඔහු එක්විය යුතුත් නෑ.”

වසර 40ක් උගන්ඩාවේ පාලනය හොබවන යොවේරි මුසෙවෙනි හත්වැනි වරටත් එරට ජනාධිපතිවරණය ජයග්‍රහණය කිරීමට සමත්ව ඇත.

උගන්ඩාවේ ජනාධිපතිවරණයේදී 81 හැවිදිරි යොවේරි මුසෙවෙනි සියයට 71ක ඡන්ද ප්‍රතිශතයක් ලබාගෙන ඇති බව විදෙස් මාධ්‍ය සඳහන් කරයි.

එරට ප්‍රධාන විපක්ෂයේ අපේක්ෂකයා වූ බොබී වයින් හෙවත් කියාගුලනි සෙන්ටමු ලබාගෙන ඇති ඡන්ද ප්‍රතිශත සියයට 24ක් බව විදෙස් මාධ්‍ය සඳහන් කරයි.

එළඹෙන පෙබරවාරි මස (01) වැනිදා සිට ක්‍රියාත්මක වන පරිදි එක්සත් රාජධානිය, ඩෙන්මාර්කය සහ අනෙකුත් යුරෝපීය රටවලට නව තීරු බදු පැනවීමට අමෙරිකානු ජනාධිපති ඩොනල්ඩ් ට්‍රම්ප් කටයුතු කර ඇත.

ග්‍රීන්ලන්තය අමෙරිකාවට ඈඳා ගැනීමේ ක්‍රියාවලිය සඳහා ගනුදෙනුවකට එළැඹෙන තාක් මෙම තීරු බද්ද ක්‍රියාත්මක වන බව සිය Truth Social ගිණුමේ සටහනක් තබමින් අමෙරිකානු ජනාධිපතිවරයා සඳහන් කර ඇත.

ඒ අනුව එක්සත් ජනපදයට ආනයනය කරන සියලුම හෝ ඕනෑම භාණ්ඩයක් සඳහා 10%ක නව තීරු බද්දක් පැනවීමට අමෙරිකානු ජනාධිපතිවරයා කටයුතු කර ඇත.

ඩෙන්මාර්කය, නෝර්වේ, ස්වීඩනය, ප්‍රංශය, ජර්මනිය, එක්සත් රාජධානිය, නෙදර්ලන්තය සහ ෆින්ලන්තය යන රටවල්වලින් අමෙරිකා එක්සත් ජනපදයට ආනයනය කරනු ලබන ඕනෑම භාණ්ඩයක් සඳහා මෙම 10%ක තීරු බද්ද පැනවෙනු ඇත.

ඉන්දුනීසියාවේ සමුද්‍ර කටයුතු සහ ධීවර අමාත්‍යාංශයට අයත් ATR 42-500 වර්ගයේ ගුවන් යානයක් අතුරුදන්වී ඇත.

ATR 42-500 වර්ගයේ ගුවන් යානයක් පුද්ගලයින් 11 දෙනෙකු සමඟ අතුරුදන්වී ඇති බව එරට මාධ්‍ය වාර්තා කරයි.

මැකස්සාර් (Makassar) නගරයට ආසන්න ප්‍රදේශයකදී මෙම යානය අතුරුදහන්ව ඇති බවට සැක පළ කරයි.

ග්‍රීන්ලන්තය ඈඳා ගැනීමේ වැඩපිළිවෙලට එරෙහිව කටයුතු කරන රටවලට එරෙහිව නව තීරුබදු පනවන බවට අමෙරිකානු ජනාධිපති ඩොනල්ඩ් ට්‍රම්ප් අනතුරු අඟවා ඇත.

ධවල මන්දිරයේ පැවති මාධ්‍ය හමුවකදී ජනාධිපති ඩොනල්ඩ් ට්‍රම්ප් සඳහන් කළේ,

“ජාතික ආරක්ෂාව සඳහා අපට ග්‍රීන්ලන්තය අවශ්‍යයි. ග්‍රීන්ලන්තය සමග ඔවුන් එකග නොවන්නේ නම්, මට එම රටවල් මත තීරුබදු පැනවිය හැකියි.”

එහෙත් නව තීරුබදු පනවනු ලබන්නේ කුමන රටවලටද යන්න හෝ එම එම රටවලට එරෙහිව අනුගමනය කරන බදු ප්‍රතිපත්තිය කුමක් ද යන්න හෙළිකර නොමැත.

අමෙරිකාවේ ආරක්ෂාව සඳහා ග්‍රීන්ලන්තය අත්‍යවශ්‍ය බවත් එය පහසු වුවත් අපහසු වුවත් කෙසේ හෝ අත්පත් කරගන්නා බව ජනාධිපති ඩොනල්ඩ් ට්‍රම්ප් සඳහන් කළේය.

කෙසේ වෙතත් ග්‍රීන්ලන්තය අත්පත් කර ගැනීමේ ජනාධිපති ට්‍රම්ප්ගේ තීරණයට ඩෙන්මාර්කය සහ ග්‍රීන්ලන්තය ඇතුළු රටවල් රැසක් සිය විරුද්ධත්වය ප්‍රකාශ කර ඇත.

වෙනිසියුලානු විපක්ෂ නායිකා මරියා මචාඩෝ සහ අමෙරිකානු ජනාධිපති ඩොනල්ඩ් ට්‍රම්ප් අතර අමෙරිකාවේ ධවල මන්දිරයේදී පැවැති හමුවකදී විපක්ෂ නායිකාව සිය නොබෙල් සාම ත්‍යාගය අමෙරිකානු ජනාධිපතිවරයා වෙත පිරිනමා ඇත.

වෙනිසියුලානු ජනතාවගේ නිදහස සඳහා ඔහුගේ කැපවීම අගය කිරීමක් ලෙස සිය සාම ත්‍යාගය අමෙරිකානු ජනාධිපතිවරයා වෙත පිරිනැමූ බව විපක්ෂ නායිකා මරියා මචාඩෝ මාධ්‍ය වෙත අදහස් දක්වමින් සඳහන් කළාය.

පැයකට වඩා කාලයක් පැවති මෙම හමුව අමෙරිකානු ජනාධිපතිවරයා සහ වෙනිසියුලානු විපක්ෂ නායිකාව අතර පැවැත්වූ පළමු හමුව වන අතර අමෙරිකානු ජනාධිපතිවරයා සමග සාකච්ඡාවෙන් පසු ඇය රිපබ්ලිකන් සහ ඩිමොක්‍රටික් යන දෙඅංශයේම සෙනෙට් සභිකයින්ද හමුව ඇත.

අමෙරිකානු ජනාධිපතිවරයා සිය Truth Social ගිණුමේ සටහනක් තබමින් සඳහන් කර ඇත්තේ, වෙනිසියුලානු විපක්ෂ නායිකා මරියා කොරිනා මචාඩෝ හමුවූ බවත් ඇය බොහෝ දේ අත්විඳ ඇති කාන්තාවක් වන බවත්ය.

තවද ඇය සිය නොබෙල් සාම ත්‍යාගය තමන්ට ප්‍රධානය කළ බවත් තමන් ඒ සම්බන්ධව ඇයට සිය ස්තූතිය පළ කරන බවද අමෙරිකානු ජනාධිපතිවරයා සිය Truth Social ගිණුමේ සටහනක් තබමින් සඳහන් කර ඇත.

මේ අතර නොබෙල් ත්‍යාගයක් ප්‍රකාශයට පත් කළ පසු එය අවලංගු කිරීමට, බෙදා ගැනීමට හෝ වෙනත් අයෙකු වෙත පිරිනැමීටම නොහැකි බවත් ඇල්ෆ්‍රඩ් නොබෙල්ගේ කැමැත්තෙහි හෝ නොබෙල් පදනමේ ප්‍රඥප්තිවල එවැනි හුවමාරුවක් සඳහා හැකියාවක් නොමැති බවද නෝර්විජියානු නොබෙල් කමිටුව නිවේදනයක් නිකුත් කරමින් සඳහන් කර ඇත.