Local news

අද (03) දින බස්නාහිර, සබරගමුව සහ වයඹ පළාත්වලත් ගාල්ල, මාතර, මහනුවර සහ නුවරඑළිය දිස්ත්‍රික්කවලත් විටින් විට වැසි හෝ ගිගුරුම් සහිත වැසි ඇති විය හැකි බව කාලගුණ විද්‍යා දෙපාර්තමේන්තුව සඳහන් කරයි.

තවද බස්නාහිර සහ සබරගමුව පළාත්වලත් ගාල්ල, මාතර, මහනුවර සහ නුවරඑළිය දිස්ත්‍රික්කවලත් ඇතැම් ස්ථාන වලට මි.මී 100ක පමණ තද වැසි ඇති විය හැකි බවද කාලගුණ විද්‍යා දෙපාර්තමේන්තුව සඳහන් කරයි.

ගිගුරුම් සහිත වැසි සමග ඇතිවිය හැකි තාවකාලික තද සුළං වලින් සහ අකුණු මඟින් සිදුවන අනතුරු අවම කර ගැනීමට අවශ්‍ය පියවර ගන්නා ලෙසද එම දෙපාර්තමේන්තුව ජනතාවට දැනුම් දෙයි.

අද (03) පෙරවරුවේ ඇඹිලිපිටිය ප්‍රදේශයේ ඇඟලුම් කර්මාන්ත ශාලාවක ඇති වූ හදිසි ගින්නකින් එහි සේවිකාවන් 22 දෙනෙකු පමණ රෝහල්ගත කර ඇත.

ගින්න හේතුවෙන් පිළිස්සුම් තුවාල ලැබූ සහ විෂ දුම ආඝ්‍රාණය වූ අදාළ ඇඟලුම් කර්මාන්ත ශාලාවේ සේවිකාවන් පිරිසක් ඇඹිලිපිටිය මූලික රෝහල වෙත ඇතුළත් කර ඇත.

ඇඹිලිපිටිය නෝනාගම සුදුපාලම අසල ප්‍රදේශයේ පිහිටි රෙදිපිළි කර්මාන්ත ශාලාවක ගබඩාවක් තුළ මෙම ගින්න හටගෙන ඇති බව පොලීසිය සඳහන් කරයි.

හම්බන්තොට සහ ඇඹිලිපිටිය ගිනි නිවන ඒකක විසින් ගින්න මැඩපැවැත්වීම සඳහා කටයුතු කරමින් සිටියි.

ජාත්‍යන්තර මූල්‍ය අරමුදල (IMF) විසින් ශ්‍රී ලංකාවට අනුමත කළ හය සහ හත් වැනි වාරික වලට අදාළ ඩොලර් මිලියන 695ක මුදල මෙරටට ලැබී ඇත.

එම මුදල මෙරට විදේශ සංචිත වලට බැර කර ඇති බව මුදල් හා ක්‍රම සම්පාදන නියෝජ්‍ය අමාත්‍ය ආචාර්ය අනිල් ජයන්ත සඳහන් කරයි.

අද (03) දින ලෝක වෙළෙඳපොළේ බොරතෙල් මිල ගණන් සැලකිය යුතු ලෙස ඉහළ ගොස් ඇත.

ඒ අනුව WTI බොරතෙල් බැරලයක මිල අමෙරිකානු ඩොලර් 94.92 දක්වා ඉහළ ගොස් ඇති අතර එය 1.24%ක වර්ධනයකි. 

බ්‍රෙන්ට් වර්ගයේ බොරතෙල් බැරලයක මිල ඩොලර් 97.04ක් දක්වා ඉහළ ගොස් ඇති අතර එය 1.08%ක වර්ධනයකි.

මර්බන් බොරතෙල් බැරලයක මිල ඩොලර් 96.09 දක්වා ඉහළ ගොස් ඇති අතර එය 1.76%ක වර්ධනයකි.

දිවයිනට පැමිණි පාකිස්ථානු නාවික හමුදාවට අයත් ‘PNS Taimur’, ‘PNS Aslat’නෞකාවන් දෙක සහ ‘PNS/MHangor’සබ්මැරීනය ශ්‍රී ලංකා නාවික හමුදාව විසින් නාවික හමුදා සම්ප්‍රදායානුකුලව පිළිගැනීම කොළඹ වරායේදී සිදුකෙරිණි.

මෙලෙස කොළඹ වරායට පැමිණි ‘PNS Taimur’ නෞකාවේ අණදෙන නිලධාරී ලෙස, කපිතාන් Niamat Saeed Khanද, ‘PNS Aslat නෞකාවේ අණදෙන නිලධාරී Nadir Mateen Afridiද, ‘PNS/MHangor’සබ්මැරීනයේ අණදෙන නිලධාරී ලෙස කපිතාන් Uzair Farooqද කටයුතු කරනු ලබයි.

එම නෞකාවන්ගේ සහ සබ්මැරීනයේ කාර්ය මණ්ඩලය දිවයිනේ වැදගත් ස්ථාන නැරඹීම සඳහා ප්‍රදේශ කිහිපයක සංචාරය කිරීමට නියමිත අතර ශ්‍රී ලංකා නාවික හමුදා නෞකාවන් සමඟ බටහිර නාවික විධානයට අයත් මුහුදු තීරයේදී නාවික අභ්‍යාසයක නිරත වීමටද නියමිතය.

ශ්‍රීලන්කන් ගුවන් සමාගමේ හිටපු විධායක නිලධාරී කපිල චන්ද්‍රසේනට එරෙහිව කොළඹ මහේස්ත්‍රාත් අධිකරණයේ විභාග වූ නඩුවේ ඔහු වෙනුවෙන් පෙනී සිටි ජනාධිපති නීතිඥ රියෙන්සි අර්සකුලරත්නට සහ නීතිඥ උදාර මුහන්දිරම්ට ලබන (05) වනදා අධිකරණය හමුවේ පෙනී සිටින ලෙස කොටුව මහේස්ත්‍රාත් පසන් අමරසේන නියෝග කළේය.

කපිල චන්ද්‍රසේනට එරෙහි නඩුවේදී ඔහු වෙනුවෙන් පෙනී සිටි ජනාධිපති නීතිඥ රියෙන්සි අර්සකුලරත්න සහ ඔහුගේ කනිෂ්ඨ නීතිඥ උදාර මුහන්දිරම්ගේ සාක්ෂි විමසීම සඳහා ඔවුන් අධිකරණයට කැඳවන ලෙස කොළඹ අපරාධ කොට්ඨාසය කළ ඉල්ලීමක් පිළිගනිමින් මහේස්ත්‍රාත්වරයා එලෙස සිතාසි නිකුත් කළේය.

සාක්ෂි විමසීම සඳහා නීතිඥවරුන් උසාවියට කැඳවීමට හැකියාව ඇති බවත් නීතිඥවරුන් සාක්ෂි දීමේදී සිය සේවාදායකයින්ට දුන් අවවාද මෙන්ම සේවාදායකයින් විසින් අනාවරණය කරන ලද කරුණුවල රහස්‍යභාවය ආරක්ෂා කිරීමේ අයිතිය ඔවුන්ට ඇති බවත් කපිල චන්ද්‍රසේනට ඇප තැබීමේදී උද්ගත වී ඇති ප්‍රශ්නගත කරුණු සම්බන්ධයෙන් සාක්ෂි විමසීම සඳහා නීතීඥවරුන් අධිකරණයට කැඳවන බවද මහේස්ත්‍රාත්වරයා පෙන්වා දුන්නේය.

කොළඹ පොදු සුසාන භූමියක සඟවා තිබූ ආයුධ කිහිපයක් සොයාගැනීමට පොලිස් මධ්‍යම අපරාධ විමර්ශන කාර්යාංශය සමත් වී ඇත.

ඒ අනුව මෙරටදී නිෂ්පාදනය කළ මිනි ඌෂි වර්ගයේ ස්වංයක්‍රීය ගිනිඅවියක් සහ විදෙස් රටක නිෂ්පාදිත පිස්තෝලයක්, මැගසිනයක් හා උණ්ඩ 3ක් කොළඹ පොදු සුසාන භූමියක සඟවා තිබියදී සොයාගෙන ඇත.

ඩුබායිහී සිට මෙරටට පිටුවහල් කළ මහවත්තේ චාමර නම් අපරාධකරුගෙන් සිදුකළ ප්‍රශ්න කිරීම්වලදී හෙළිවූ තොරතුරු අනුව මෙම ආයුධ සොයාගෙන ඇත.

පසුගියදා ඩුබායි රාජ්‍යයෙන් පිටුවහල් කළ මහවත්තේ චාමර නැමැති අපරාධකරු මේ වනවිට පොලිස් මධ්‍යම අපරාධ විමර්ශන කාර්යාංශයේ රඳවා සිටියි.

බස් ගාස්තු සංශෝධනය කරනු ලබන්නේ ක්‍රියාත්මක බස් ගාස්තු සංශෝධන සමීකරණය අනුව බව ප්‍රවාහන හා මහාමාර්ග නියෝජ්‍ය අමාත්‍ය ප්‍රසන්න ගුණසේන සඳහන් කරයි.

ඒ අනුව ඉන්ධන මිල ගණන් ඉහළ ගියද මේ අවස්ථාවේ බස් ගාස්තු වැඩි කිරීමක් සිදු නොවන බව ප්‍රවාහන හා මහාමාර්ග නියෝජ්‍ය අමාත්‍ය ප්‍රසන්න ගුණසේන සඳහන් කරයි.

ඉන්ධන මිල වෙනස්වීම හේතුවෙන් බස් ගාස්තු සංශෝධනයක් සිදු කිරීමට නම් එම වෙනස 4%කට වැඩි මට්ටමක තිබිය යුතු බවද නියෝජ්‍ය අමාත්‍ය ප්‍රසන්න ගුණසේන සඳහන් කරයි.

නියෝජ්‍ය අමාත්‍ය ප්‍රසන්න ගුණසේන සඳහන් කළේ,

“තෙල් මිල වැඩිවීමත් එක්ක බස් ගාස්තු වැඩිවීමක් වෙන්නේ නැහැ. බස් ගාස්තු වැඩි වෙන්නේ සමීකරණයට අනුවයි. ඒ අනුව 4%කට වඩා වැඩි ප්‍රමාණයකින් ඉන්ධන මිල වෙනස් වුණොත් විතරයි බස් ගාස්තු සංශෝධනය කරන්නේ. මෙවර ඉන්ධන මිල වැඩිවීම එම සීමාව ඉක්මවා නැති නිසා බස් ගාස්තු වැඩි කිරීමක් සිදු වෙන්නේ නැහැ.”