Foreign news (Sinhala)

ඊශ්‍රායලය හා හමාස් යුද්ධයේදී කොන්දේසි විරහිතව ඊශ්‍රායලයට සහාය පළ කිරීමට ඉදිරිපත් වී සිටින අමෙරිකානු ජනාධිපති ජෝ බයිඩන් ඊශ්‍රායලයට අනතුරු අඟවා ඇති අතර එය සෘජුව අනතුරු ඇඟවීමක් කළ පළමු අවස්ථාව වේ.

ගාසා තීරයේ, රෆා නගරයට ඊශ්‍රායල හමුදා දිගින් දිගටම ප්‍රහාර එල්ල කරන්නේ නම් ඇමෙරිකාව ඊශ්‍රායලයට ආයුධ සැපයීම වහා නතර කරන බවත් ඊශ්‍රායලයට බෝම්බ සැපයීම තාවකාලිකව නතර කිරීමට තීරණය කර ඇති බවද අමෙරිකානු ජනාධිපතිවරයා අනතුරු අඟවමින් සදහන් කරයි.

අමෙරිකානු ජනාපධිතිවරයාගේ තීරණය කනගාටුවට කරුණක් බව ඊශ්‍රායල අග්‍රාමාත්‍ය බෙන්ජමින් නෙදන්යාහු සදහන් කර ඇති අතර අමෙරිකානු ජනාපධිතිවරයාගේ අනතුරු ඇඟවීම් කිසිදු ගණනකට නොගෙන ඊශ්‍රායල ගුවන් හමුදාව රෆා නගරයට ප්‍රහාර එල්ල කරන බව විදෙස් මාධ්‍ය වාර්තා කරයි.

අමෙරිකානු ජනාධිපති ජෝ බයිඩන් අනතුරු ඇඟවීම සිදුකර හමාස්වරුන්ගේ පැත්ත ගෙන ඊශ්‍රායලය අමාරුවේ දැමූ බව ඇමෙරිකාවේ හිටපු ජනාපධිති ඩොනල්ඩ් ට්‍රම්ප් සදහන් කර ඇති බව විදෙස් මාධ්‍ය වාර්තා කරයි.

රුසියාව විසින් වත්මන් යුක්‍රේන ජනාධිපති ව්ලොදිමීර් සෙලෙන්ස්කි ඝාතනය කිරීමට උත්සාහ කර ඇතැයි යුක්‍රේන ආරක්ෂක සේවාව සදහන් කරයි.

මේ සම්බන්ධව සැකපිට යුක්‍රේන රජය ආරක්ෂාකිරීමේ ඒකකයේ අණදෙන නිලධාරීන් දෙදෙනෙකු අත්අඩංගුවට ගෙන ඇති අතර ඔවුන් රුසියාවේ චර පුරුෂයින් ලෙස කටයුතු කර ඇත.

එම පුද්ගලයින් යුක්‍රේන ජනාධිපති සෙලෙන්ස්කිගේ ආරක්ෂකයින් අතරින් ඔහු ඝාතනය කිරීමට කැමති අයෙක් සොයා රහසිගත මෙහෙයුමක් කර ඇතැයි ද අනාවරණ කර ඇත.

ඉරානය විසින් ඊශ්‍රායලය වෙත ප්‍රහාර එල්ල කිරීම සඳහා කෘෘස් මිසයිල 100ක් පමණ සූදානම් කරගෙන සිටින බවට අමෙරිකාව අනතුරු අඟවා ඇත.

අමෙරිකානු ජනාධිපති ජෝ බයිඩන් ඉරානයට අනතුරු අඟවමින් පවසා ඇත්තේ එවැනි ප්‍රහාර එල්ල නොකරන ලෙසටත් තම රට ඊශ්‍රායලයේ ආරක්ෂාවට සහාය දක්වන බවයි.

ඉරානය සිය හමුදා සහ අවි, කලාපය පුරා ස්ථානගත කරමින් පවතින බවට හඳුනාගෙන ඇති බවත් එම කලාප වෙත අතිරේක බලඇණි යොමුකිරීමට අමෙරිකාව දැනටමත් කටයුතු කරමින් සිටින බවද අමෙරිකාව සදහන් කරයි.

ඊශ්‍රායලය විසින් සිරියාවේ ඉරාන කොන්සල් කාර්යාලයට ප්‍රහාරයක් එල්ල කළ බවට පිළිගෙන නොමැති නමුත් එම ප්‍රහාරය පිටුපස ඊශ්‍රායලය සිටින බවට ඉරානය සදහන් කළ බව විදෙස් මාධ්‍ය වාර්තා කරයි.

එහෙත් ඕනෑම ප්‍රහාරයකින් ආරක්ෂා වීමට සූදානම් බව ඊශ්‍රායලය පවසා ඇති අතර ඉරානයේ අනතුරු ඇඟවීම් හමුවේ ඊශ්‍රායල අගමැති බෙන්ජමින් නෙතන්යාහු සිය යුද කැබිනට් මණ්ඩලයේ සාමාජිකයන් හමුවී ඇති බව වාර්තා වේ.

මේ අතර අමෙරිකා ජනාධිපති ජෝ බයිඩන් සදහන් කර ඇත්තේ, අණ දෙන නිලධාරීන් ඝානතනය කළ ගුවන් ප්‍රහාරය සම්බන්ධයෙන් ඉරානය ඊශ්‍රායලයට පහර දෙනු ඇති බවත් තමා ඊශ්‍රායලයේ ආරක්ෂාව සඳහා කැපවී සිටින බවයි.

ඉරානය සහ ඊශ්‍රායලය අතර පවතින යුධමය තත්ත්වය වර්ධනය වෙතැයි වාර්තා වීම හේතුවෙන් ඉරානයේ සිටින ජර්මානු ජාතිකයින්ට එරටින් ඉවත් වන ලෙසට ජර්මනිය අනතුර අඟවා ඇති බවද විදෙස් මාධ්‍ය වාර්තා කරයි.

වියට්නාමයේ විශාලතම බැංකුව වන සයිගොන් කොමර්ෂල් බැංකුවෙන් මුදල් වංචා කිරීමේ චෝදනාවට වරදකාරිය වූ 67 හැවිරිදි Truong My Lan හට මරණ දඬුවම නියම කර ඇත.

මෙම නඩු විභාගය වියට්නාමයේ වැඩිම අවධානයක් දිනාගත් නඩුව වන අතර ලොව සිදුකළ විශාලතම බැංකු වංචාව හා සම්බන්ධ නඩු විභාගයත් මෙය වන අතර වසර 11ක් පුරා ඇය විසින් ඩොලර් බිලියන 44ක් වංචාකර ඇත.

Van Thinh Phat Holdings සමූහයේ සභාපතිනිය වන Lan, Ho Chi Minh City හි ව්‍යාපාරික කේන්ද්‍රස්ථානයේ පැවති නඩු විභාගයක් අවසානයේදී වංචා කිරීම, අල්ලස් ගැනීම සහ බැංකු නීති උල්ලංඝනය කිරීම් සම්බන්ධයෙන් වරදකරු විය.

වංචා කිරීමේ චෝදනාව සඳහා ඇයට මරණ දණ්ඩනය සහ අල්ලස් සහ බැංකු රෙගුලාසි උල්ලංඝනය කිරීම යන අනෙක් චෝදනා දෙක සඳහා වසර 20 බැගින් වූ සිරදඬුවම් නියම කර ඇති බවද එරට මාධ්‍ය වාර්තා කරයි.

මෙම නඩුවේ විත්තිකරුවන් 84 දෙනෙකුට වසර තුනක පරිවාසයේ සිට ජීවිතාන්තය දක්වා සිරදඬුවම් නියම වූ අතර ව්‍යාපාරිකයෙකු වන ලාන්ගේ සැමියා වන එරික් චූ සහ අවුරුදු 17ක් ලැබූ ඇගේ ලේලියට වසර නවයක සිර දඬුවම් නියම විය.

ඊශ්‍රායලය විසින් ගාසා තීරයට එල්ල කළ ගුවන් ප්‍රහාර හේතුවෙන් හමාස් සංවිධානයේ ප්‍රධානීන් ලෙස කටයුතු කළ හමාස් නායක ඉස්මයිල් හනියේගේ පුතුන් තිදෙනා මියගිය බව විදෙස් මාධ්‍ය වාර්තා කරයි.

ගාසා තීරයේ අල්-ෂාටි කඳවුරේදී හසාම්, අමීර් සහ මොහොමඩ් යන පුතුන් තිදෙනා පැදවූ මෝටර් රථයට ඊශ්‍රායල බෝම්බ ප්‍රහාරයක් එල්ල කිරීමෙන් පසු මියගිය බව හමාස් සංවිධානය සදහන් කරයි.

හමාස් සංවිධානයේ තොරතුරු වලට අනුව 61 හැවිරිදි හමාස් නායක ඉස්මයිල් හනියේට පුතුන් සහ දියණියන් 13 දෙනෙකු සිටින බව වාර්තා වේ.

තම පුතුන්ගේ මරණය සම්බන්ධයෙන් ඉස්මයිල් හනියේ සදහන් කර ඇත්තේ, ” මගේ පුතුන්ගේ රුධිරය අපේ ජනතාවගේ රුධිරයට වඩා ප්‍රිය නොවේ.” යනුවෙන්ය.